شريت حق بنتي كتوه صغنوووونه بس توهقت بشغله !!!(عمرها شهرين)

[ذهبيه مرصعه بألماس]

قوه بنات


اشلونكم و شخباركم

:ch12: فيني نووووم

بنتي من زماااان تحن ابي قطوه ابي قطوه


ورحنا آنا وخواتي لحولي بارك بنونس هالحلوين

ولا تطيحلكم بنتي على محلات الحيوانات


و تقعد تبجي تبجي أبي قطوه


و بعد المداولات ... حكمت المحكمه بشراء كتوه صغنووونه نوعها شيرازي بس شنو بالضبط ما أدري

ب 45 ما رضى ينزل ولا دينار....


اكيد بتقولون وين المشكله ؟


المشكله ان الكتوه حيل صغنونه ... عمرها شهرين و يمكن اقل
ما ادري شسوي فيها
و فوق هذا عيونها تدمع اخاف فيها رمد ...
شريت لها من كارفور أكل مكتوب عليه كيتي و مدعم بالحليب بس مثل البسكوووت يااابس ...

بنات ...

أحط عليه شوية ماي او حليب يمكن تقدر تاكله

اهي تشرب حليب ابو قوس ( كرنيشن كله كورسترول)

و شريت لها تراب بس هم مو قادره تتاقلم عليه صايره كل ساعتين آخذها و احطها عالتراب عشان تسويها بس ماكو

بنات شسوي
بس عجيييبه تهبل تهبل تهبل خلت عيالي يطخووون بس يراقبونها ويلعبون معاها مع انها ما تتحرك بس تتلفت



قولولنا تجاربكم مع الكتوات الصغنوناااات حيييل

شنو توكلونهم

شنو تشربونهم

كم مره تسبحونهم

بشنو تسبحونهم

يالله بإنتظاركم

 

[semony]

اولا مبروووك عليك القطوطه

بالنسبه للاكل جيبيلها اكل مخصص للكتنز

وبالنسبه للحليب خففيه بالمويه عشان مايجيب لها الاسهال

والدراي فود حطي لها شوي بالصحن او بيدك لانها صغيره بس بليه بشويه مويه عشان يلين

الوجبات الرئيسيه 3 مرات

الفطار (( بيض مسلوق قطعيه صغار + حليب مخفف ))

الغداء (( دجاج مسلوق فقط من غير اي بهارات او ملح برضو قطعيه صغييير ))

العشاء (( دراي فود ))

مابين الوجبات اعطيها جبن مثلثات

ولا تنسي المويه على طول تكون موجوده مع تبديلها باستمرار

*************************

بالنسبه لتحميم خليها الين تكبر يعني يصير عمرها فوق الشهرين

اما استخدام الرمل

خليه في مكان معين وحطيها في الصندوق مرتين كل يوم الين تتعود وتروح بنفسها


واذا حصل وعملتها خارج الصندوق (( الله يعينك تشيلينه وتحطينه بالصندوق عشان تشم الريحه وتسويها بالصندوق مره ثانيه ))

ولا تنسين تنظفين المكان كويس عشان ماتشم الريحه وترجع توسخ بنفس المكان (( بالخارج ))

وامسحي لها مكان الاخراج بالمناديل المبلله بعد كل عمليه

لان بها السن تكون متعوده على امها بالتنظيف


واي استفسار انا حااااظره

 

[catwiti]

كنت افوحلها ديايه كامله وعقب ماتستوي بدون بهار ولا شي اقومم انتف الدياي واهرسه بيدي واظيف عليه مرق الدياي الي فحته فيه ويصير ليين وكانت تتتتتتتتحبه وكنت احط معاه جزر تحبه حييل وتاكله كله

 

[catwiti]

الجزر افوحه مع الداييه واهرسه معاها صدقيني تحبه

 

[sweet cake]

ما قصرت سيموني بس انا قطوتي لما شريتها ما حبت البيض ولا اي شي ثاني ما عجبها الا جبن مثلث احط لها شوي على اصبعي وهي تلحس ومع الدراي فود ولما سألت الدكتور قال اوكي بس على ما تكبر شوي وبعدها غيري بالاكل .. ولما وصلت 4 شهور قمت اعطيها مره بالاسبوع او مرتين اكل معلب بس مو اي نوعيه .. عطيتها فانسي فيست.. والحين احيانا اعطيها جبن شرايح ومرات مرتديلا >> تمووووت فيه.. بس اكل الدجاج المسلوق والبيض كلش كلش ما حبتهم وماقدرت اخليها تحبه.. والدراي فود طبعا لازم لازم يكون موجود لأن اكل البيت ما يغني عنه..
الدراي فود هو الاكل الجاف اللي اصير مثل الحبوب .. وانا استخدم مياو مكس وبيورينا..

لا تسبحينها الحين .. الجو بااارد عليها وممكن تمرض بس جيبي فوطه وبليها بماي دافي وامسحيها فيها نشفيها بالاستشوار.. واذا عن الشامبو احسن شي تستخدمين شامبو خاص فيهم.. افضل من شامبو الاطفال لأن القطاوه نظاف وبس يلحسون جسمهم فـ شامبوهم ما يأثر عليهم لما يلحسونهم لكن شامبو الاطفال ممكن يأثر عليهم عـ المدى البعيد..

وشوفي دام انها صغيره لا تخلينها بروحها ترى تخااااف وراح تشوفين انها تتعلق بأكثر شخص يهتم فيها وتشوف انه امها.. صج صج تتعلق فيه وصيااااح اذا ما شافته.. قطوتي جذي عرفتني عدل وكانت لما يصير الليل انام واحطها بسريرها بالارض تقوم وتوقف عند سريري وصياح وتحاول تصعد وما تسكت الا اذا حطيتها عندي وتجي بسرعه وتدخل بالفراش وتنااام >> تدنن << ..

واذا عن اللعب .. جيبي شريطه وحركيها وشوفي شلون تستخف عليها وتحاول تصيدهها.. ولا جيبي ليزر وحركيه عالارض وشوفي شلون تلحقه.. قطوتي شريت لها كور بس مو كفو ما عجبها شي..

وعن الحمام .. يمكن قطوتكم نفس اللي عندي.. قطوتي اول شي ما كانت ترضى تروح للحمام اذا في احد عندها .. وانا كنت خايفه انها ما تعرف بس الحمدلله طلعت تعرف.. انتي شوفي خلي اكلها قريب من المكان اللي فيه الرمل مالها .. وهي راح تعرف مكانه ولا تغيرين المكان ابد لأنها صغيره وتحاول تحفظ المكان..

عن نوعية الرمل انا استخدم تايدي كات من مركز سلطان وهو الوحيد اللي ارتاحت عليه قطوتي لأنه ما يدخل بين اصابعها وريحته حلوه..

ولا تنسين تنظفين اذنها وتحت عيونها لأن القطاوه لازم تمسحين تحت عيونهم وتنظفينها بقطن وماي دافي.. ويعتمد على حسب نوع القطوه ممكن مرتين او ثلاث او اكثر >> البيكي فيس اعتقد اكثر

اي استفسار ثاني لا يردج الا كيبوردج واذا تبين شوفي موضوعي المثبت بالقسم >>الدليل<< ترى ينفعج

 

[mr000]

بس ديري بالج لايصير فيها اسهال آنا قبل فتره شريت حق بنتي قطو هم عمره شهرين وقالنا راعي المحل لاتعطونه حليب ولاسمك بس أكل علب شريته من مركز سلطان مكتوب عليه كتنز وعلبته مدوره وصغيره كلش لأنه فيه علب هم مكتوب عليهم كتنز بس كبار هذوله سببوله اسهال وأحسن لو تودينها الطبيب تجيكين على عيونها وتتأكدين منه عن الأكل المناسب لأنه أذكر قالنا اللي بالمحل لاتعطونه أكل مطبوخ من البيت بس أكل العلب وفيه بعد أكل ناشف مثل ماقلتي هم شريناه من مركز سلطان!

 

[ياعشيري جعلك السلال]

شنو توكلونهم
دراي فوود ومرة وحدة باليوم اكل معلب
شنو تشربونهم
مااي وحليب مخفف مرتين بالاسبوع
كم مره تسبحونهم
بالشتا مرة بالاسبوع وبالصيف كل 3 ايام

ولا تنسين تسشورينها
بشنو تسبحونهم

شامبو خاص تحصلين في ايس او مركز سلطان واذا كلش كلش جونسوون

وانتبهي الماي لا يدخل عيونها واذونها

ووديها الطبيب يطعمها وينظف اذنها ويقرض اظافرها عشان ما تشمج اليهال

 

[mr000]

سويت كيك كل عام وانتي بخير مقدما ووين العنوان خل نطرش لج الهديه !!

 

[sweet cake]

سويت كيك كل عام وانتي بخير مقدما ووين العنوان خل نطرش لج الهديه !!

ههههههههههههههههههه وانتي بخير وصحه وسلامه >> عالتوقيع تحسين غصب ابي اعلم متى تاريخ ميلادي..:dddds:

خلاص الهديه وصلت :eh_s(6):

 

[мššααšαα]

الف مبروووك وآلــبناات مــآقصروو ..

 

[ذهبيه مرصعه بألماس]

واااااو صراحه نفعتوني ...

شوفو انا ترا ام قطاوه طوول عمري عندي قطاوه بس مو بهالعمر الصغير لا يكونو 4 اشهر يعني فاهمين شوي و يعرفون الاكل و كنت اوكلهم من اكلنا يعني الريوق بيض مفيوح و مرتدلا و حليبه

و الغدا شنو طابخين نحط حتى الللحم كنت احطه و الدجاج احط لها الجوانح هذا ايام المراهقه ... واااااااي على هالايام ...
و العشا نفس الشي و اذا كلش كلش علبة تونا بالماي مو بالزيت عشان ما تنقث

الألعاب آنا أعرف العبها بس اكثر شي استخفت عليه اليويو نسحب اليويو عالارض و اهي تراكض وراه فديتها و الله

بنات لا يطوفكم في ايكيا صوب المطعم وين ألعاب الأطفال في فيران احجام مختلفه و الوان مختلفه يشوقووووون شرينا حق كتوتنا فار صغير ب نص دينار أبيض حطيناه بصندوقها
عموما...

كتوتنا سميناها ( لندن)
لأن بنتي زعلانه على ابوها مسافر لندن و لمن كلمها و سألها عن اسم الكتوه قالت لندن!!! ( آنا اكتبها كتوه لأن ولد إختي يقولها جذي و يشوق لمن يقولها كتوه فديت خشته و الله )
حاليا متعلقه فيني اكثر شي

حبوبه و شيطونه مثل ما قلت اعطيها حليب ابو قوس و حليب كي دي دي بس ما شربتها ماي

الاكل الدراي فود حاطته بصحنها الخاص بس ما تاكله
بحاول ابلله باجر بشوية ماي و اشوف جان تاكله

الرمل خذيته من كارفور والله زين نوعا ما بس حباته كبيره شوي
لحد الحين اعلمها عالحمام

و آنا ما اعرف انزل الصور ولا جان اوريها لكم تضحك حجمها صغييييير و مكنفشه

 

[sweet cake]

اي عاد تشوفينها بالعمر هذا تدنن .. واحلى شي حركة الهجوم..عجيييييييييييبه..

 

[samsmeya]

احلى شي القطوه بهالعمر وبالعكس تربية ما تخوف وسهله عادي بس اهم شي تعلمينها على حمام الرمل وتعودينها عليه علشان ما توصخ البيت واما بالنسبه للاكل اشتريلها معلبات الخاصه للكيتي تنباع بالجمعيات وحتى المعلبات العاديه عادي يصير تعطينها ولا تخافين عليها انيابها تكسر صخر .. والله يهنيكم فيها

 

[ذهبيه مرصعه بألماس]

يوووو يوووو يوووو نجنن ... الله يستر عليها من عيالي ...


الكتوه ما تاكل و لا شي بس تشرب بهالحليب ...



يا زينها و اهي تتاهب للهجوووم موووووطبيعيه بس مناشبه لابتوبي

بس تتحرش فيه


بنات اليوم عطيتها حمام معتبر و استشورتها


بنات شرايكم ابودرها و لا لا .. احط لها بودرة بيبي جونسون ؟

 

[sweet cake]

اي انا احطلها بعد ما اسبحها عشان يمتص الرطوبه من جسمها..

بس مو زين لها الحليب لا تعطينها وجه.. لا تخلينها تكثر منه.. عطيها جبن مثلث باصبعج وخليها تلحسه وجربي جبن الشرايح يمكن تحبه.. بس ترى الدراي فود مفيد وضروري لها

 

[كلي انوثه]

حبي اكو بمركز سلطان اكل خاص بهالعمر وانا لما ارد البيت اصور لج ان شاءاللله
ومن ناحيه التراب والحمام مره ومرتين وتتعود لا تشيلين هم

 

[om norha]

حبيبتي في مركز سلطان اكل خاص للبيبي القطط وبعدين لا تعطينها حليب وايد يصير فيها عزج الله اسهال وبهالعمر لا تسبحينها موزين واي سؤال راسليني علي الخاص لان انا اموووووووووت علي القطاوة

 

[ذهبيه مرصعه بألماس]

قوه بنات
ابشركم قدرت افطمها عن الحليب
و رحت أيس هارد وير و شريت لها كل المستلزمات سرير حقها و العاب خاصه و عضاضه و أكل اللي اهو فانسي فود خذيت كبدة وقلب الدجاج أكثر شي حبته لندن....

و طبعا شامبو مضاد للدموع ... خاص بالقطط و الكلاب ...

و ليتر بوكس كبير عشان أعلمها عالدفن ...

الحمدلله ألحين حيل تغيرت و حيل تعودت على الأكل ....

بس احلى شي لا قامت الصبح و قعدت عند بنتي و قامت تاكل ميني كرواسوووون يااااي شكلها يشوق..
المشكله ما أعرف انزل صور .. و لا جان وريتكم حركاتها تجنن...


سؤال ...

ألحين متى أقدر اطعمها ؟؟؟

أتوقع صار عمرها ألحين 3 اشهر ...

ووين تنصحوني اطعمها ؟

 

[sweet cake]

يا حلوها

شوفي الحين تقدرين تطعمينها والتطعيم عادي طعمي عند الدهماء .. هم زينين بالتطعيم وسعرهم مناسب.. وانا طعمت قطوتي كل تطعيماتها هناك..

 

[الكرزي]

مبروووووك حبيبتي والبنات ماقصروا بس شوقتينا نبي انشوف الصور