شرايكم بطيري المزيون ابو خدود حمرا

[كوكا كولا]

السلام عليكم ورحمة الله وبركاته


تصدقون ماعمري حبيت الطيور بس من شفت هذا تعلق قلبي فيه

طيري من نوع كوكتيل (كروان) وايد حلو وذكر هولندي







المميز فيه انه لما يتعود عليج يتعلق فيج حيل
من تفتحين القفص يطلع على طول ويوقف على جتفج
ولما تعلمينه على تصفيره معينه يتعلمها ويصير يصفرها مثلج
ياكل من أيدج ويعطيج راسه تحطينه وتلعبين معاه
هذاك اليوم قاعده اكل وقف يم صحني بياكل مصدق نفسه الأخ ههههههههههه




قبله كان عندي زوج كوكتيل امريكي لون الذكر أصفر كامل واطراف ابيض
ماتت النثيه اول ماشريتها جذي من غير سبب يمكن كانت مريضه لأن كانت كله ساكنه تحت القفص وخامره على روحها

وظليت اروض الذكر وكان شرس ينفخ علي لما اقرب منه
ما تروض الا لما انكسر طرف من جناحه وطلعته غصب من القفص ولفيته بفوطه علشان ما يعضني
وعالجت جرحه لما وقف النزيف ورديته القفص

بعدها بيوم والله العظيم شي كبير تغير فيه طخ وصار مو شرس وشوي شوي قام ياكل من ايدي
وعلمته يوقف على ايدي وجتفي والحمدلله بسرعه تعلم
بس حسافه يوم حملت مادري شهالقرار الغبي الي خلاني اقرر ابيعه والله قلبي عورني عليه

بس عوضتها وشريت (كوكو) اسمه على وزن (كوكتيل) فديته المزيون ابو خدود

والي تبي معلومات عن هالنوعيه انا حاضره

 

[Rnaa]

واااي حده كيوت .. بس انا مالي علاقة بالطيور
بس هذا واايد حلو بس جنة حرام قاعد بروحه .. يبيله وحدة تونسه (؛

 

[غلاى الغويليه]

مااااااااااااااااشاء لله يهببببببل

بجم شريته ومن وين ؟

 

[كوكا كولا]

Rnaa

هههههههههههه اي يبيله نثيه بس مو الحين خليه عزوبي يستمتع بأيام العزوبيه شوي
لاحق على حنه النثيه والفروخ

 

[كوكا كولا]

غلاى الغويليه

تسلمين ياحياتي اي وااااايد يونس ولي ظل فتره عندج راح تكتشفين شطانته هههههههه
بس افضل نوع الهولندي انا قبل كان عندي امريكي بس الهولندي يتعلم اسرع واونس وانشط
من سوق الطيور نصيحة اخذي متدرب احسن لأن الي مو متدرب راح يأذيج شوي بالتدريب

أسعارهم على حسب بس اقل شي 15 دينار المتدرب لا يقصون عليج ويقولون لج بالعشرينات
وفي الوانهم حلوه في اصفر ورمادي مدموج مع بعض يسمونه ذهبي هم حلو بس انا احب الرمادي الي راسه اصفر
واي استفسار حياج لا تستحين لووووول صرت خبره بهالسوالف

 

[غلاى الغويليه]

ههههههه ماشاء لله عليج مبين خبره فيهم
زين لو متدرب وكل شئ جم
يعض ولا لا
وعادى اطلعه برا القفص وجناحه كامل ولا لازم قص عند البيطرى نفس الكاسكو؟؟؟
لانه صراحه دش مزاجى ابي مثله ههههههههه

 

[كوكا كولا]

غلاى الغويليه

انا لما شريته كاوا قاصين جناحه شوي وانا عادي اطلعه من القفص يصير ويرد ولي فتحتي القفص طلع من روحه
اذا مدرب ماراح يأذيح ويحوس وينحاش ولا يفح بويهج وينافخ
ومافي فرق بالسعر بين المدرب والي مو مدرب الا يمكن 5 دنانير او بحدود العشره بس يستاهل بدال التدريب والتعب
لأن التدريب يبيله صبر انا وايد تعبت لما دربت طيري الي قبله
واي سؤال انا حاضره ياحياتي

 

[غلاى الغويليه]

مشكوووووووووووووووره فديتج وجارى البحث مثل طيرج ;d

 

[كوكا كولا]

غلاى الغويليه

العفو يالغالية واذا شريتي نفسه وريني صورته

 

[om MaRyooM]

يحلاته

تصدقين خاطري اشتري واحد مثله احب هالنوع من الطيور

بس شسالفة التدريب
علا شنو يدربونه



حلاااااته الله يحفظه بوخدود وردية ههههه

 

[قهوة باردة]

ههههههههههه واضح انك شخصية ماشاء الله عشان كذا تعلم السنع وصار مو شرس مثل اول
بس أهم شي يوم يصرخ عليك لا قربتي من القفص هههههه
أختي كيف الواحد يعلم الببغاء تقليد الاصوات ؟؟

 

[كوكا كولا]

om MaRyooM

التدريب انه يكون أليف ويتعود عليج
اذا مو مدرب اول ما تقربين منه راح يفح بويهج وقنزوعته ترتفع ويعصب ولا يصعد على ايدج ولا يغرد ويصفر

اذا متدرب راح تشوفينه عادي يصعد على ايدج ومن تلمسينه ما يفح بويهج ولا يصارخ ويطير
المدرب اريح لج لأن التدريب ياخذ وقت وممكن تزهقين هذا من تجربتي لأن عندي 2
واحد كان مو مدرب ودربته بس حسافه بعته قبل لا اولد خفت عالبيبي والحين عندي هذا حبيبي فديته
مدرب وخالص وبسرعه تأقلم علي وتعود وقاعده اعلمه تغريده معينه بس يضبطها بصورها فيديو واحطها بالمنتدى

 

[كوكا كولا]

قهوة باردة

اي شفتي شلون ما قدر يقاومني ههههههههههه
لما يتعود عليج ويبدأ يصفر شوي شوي اهني يجي دور تدريبه عالتصفيره المعينه
اخترعي لج تصفيره حلوة وسهله وكرريها كل يوم عليه لما يحفظها وراح يغرد فيها على طول

 

[om MaRyooM]

مشكورة على ردج حياتي

انشالله لي نزل المعاش اييبلي واحد
وعادي يعيش بروحه ؟؟ ولا لازم ايبله طير نفسه

 

[كوكا كولا]

om MaRyooM

اي عادي ياقلبي اصلا لي حطيتي معاه نثيه راح يخمر ولا يغرد ويصفر وبيصير كسول
كل همه النثيه ههههههههههههه

 

[golnaz]

يهبببببببل ماشاءالله
عندي نفسه بالضببببببط و اول ما يبته كان كله عندي ويقعد على جتفي وامشي فيه عادي بس من يوم يبتله النثية صار مايعرفني كللللللللش وصار وحشي لانه هذا الطير سبحان الله طبعه غيوووووور حييييل ولمن احد يقرب من قفصه عباله يبون ياخذون النثية يقوم ينفخ و يبي يعض يعني اهو ريال البيت ومايرضى احد يتعدة على حرمة بيته عشتااو هههههههه بس حلوو شكله وترا يقلدووون الاصوات الي عندي الذكر كله يقلد صوت المطافي والقطوة ورنات التلفون يوننننننس
الله يخليه لج يارب :*

 

[كوكا كولا]

golnaz

اي صح كلامج هههههههههههه يا راااااجل عشتو ما يرضى احد يقرب من نثيته
علشان جذي احب الفترة الأولى يكون بروحه قد ما أقدر
وونيس حيل يهببببل احلى نوعيه طيور حبيتها
تسلمين عالمشاركة الحلوة فديتج

 

[Unico Style]

ما شاء الله عجيب

كان عندنا امازون بس ريلي باعة و لي يومج متحسفه عليه ((((((((

 

[كوكا كولا]

Unico Style

ايييييييييييي بخاطري الحين كاسكو
يسلموا عالمرور فديتج

 

[Unico Style]

عجيييييييييييييييييييييييييييييييييييب
يشوق حده
اذا اهوا هادي دربيه على حركات مثل يرفع جناحه او يفتر