شرايكم بالرجال اللي يمشي ويخلي مرته وراه.. دعوه للنقاش الجاد

[shadows]

السلام عليكم عزيزاتي


من فتره قمت افكر بعدة امور واولهل انه صادفتني مشكله بنفس النوع وبديت افكر

شنو اللي يخلي الرجل الشرقي يفكر في هالطريقه وتعامله مع امه او اخته او مرته

كنت اتمشى وفجأه نصحني اخي الكبير في السماح له بالمرور اولاً واسماه بعدم الاحترام

انا اهني استغربت وقعدت افكر شوي

من وين استمدوا هالأفكار وخذوها، هل هناك نص في القرأن الكريم يوجب على المرأه الانصياع لأوامر الرجل وان تكون تابعه مهما كان سواء اخ او زوج

اكثر من موقف واكثر من مره اشعر بالاسف اتجاه بعض من الرجال هنا

الاسلام كان او من نادى بأهمية المرأه وضرورة احترامها وتقديرها وعدم التقليل من شأنها

بعض الحمقا هنا نعم اقولها من واقع عيشتي في هالمجتمع

زوج يأمر زوجته بالجلوس في المقعد الخلفي للسياره والسماح لابن اخيه ذو التسع ‏​‏​

 

[Shasawi]

بومكسر وفنيلة طول عمرة هيلقي مو شي يديد

 

[رحيق الحياة]

بالنسبه للعنوان صح انا اشوف مثل هالحالات ,,, المرأه ما تكون تمشي وراه وبس همن تكون شايله الياهل وشنطة الياهل ووشنطتها وتعابل فيهم وهو يمشي جدام ولا حتى كلف على نفسه يشيل معاها ويساعدها,,, استمدو هلافكار من التخلف بعض العادات والتقاليد ,,, تلقين يدته او امه تنصحه لا تعطي مرتك وجه وخلك شيدد معاها تمشي معاك سيده ....الخ ومن هالكلام التخلفي .


الاسلام عز المرأه ورفعها عما كان فيه بالجاهيله ,,, والشاعر يقول: من أكرم النساء فهوه الكريم .. ومن هانها فهو اللئيم

 

[كلي-حلآ]

امي تقول المراه ماتقود الرجال الرجال اهو يقودها ترا انا اشوف مافيها شي بس مو لدرجه ان تشيل الجهال والجناط مو لهدرجه بس اني امشي جدامه واهو ورااي لا عييب وترا هذي الشغلات مو بس مع زوجي حتى مع ابوي واخواني احنا تربينا على هالشي وبس ترا بالمقابل في مراعاة من الزوج ومنو الحين اللي يشيل الجناط لا المرأه ولا الرجال الله يخلي الخدم اهم اللي يشولون الجناط بس ارجع واقول الرجال اللي يخلي مرته تمشي جدامه موو رجال

 

[RmRom]

على حسب ثقافة الرجل !

وبعدين ليش يمشي جدامها أو هي تمشي جدامه !!

ليش ما يمشون مع بعض ؟؟ شنو اللي يمنع ؟

بس احنا مجتمعنا في بعض الأفكار الغبيه والعقد النفسية اللي ليما الحين ما تحررنا منها

اللي أعرفه ومتأكده منه إن النساء شقائق الرجال

ونصيحة للي تتبع العادات .. ترى العادات ما راح تدخلنا جنه .. وفيه عادات وايد ..كانت في الجاهلية وليما ألحين الناس يسوونها !

واحنا الله عطانا عقول عشان نمييز مووو نمشي وراء عادات الجاهلية الاولى

انا استغرب من اللي يتبع عادات وتقاليد من وضع مخلوق ويترك تشريعات من وضع خالق !!

وكلمة حق لازم أقولها المجتمع ألحين أحسن بواااااااااايد من أول .. الناس تفتحت وتنورت .. والفئة اللي تقولين عنها كل مالها تتلاشى .. يعني المجتمع كل ماله في تقدم فكري وثقافي .

 

[غداً القاك]

اكون تابعه له اطيعه.. اسمع كلامه .. اقدره احترمه
بس مو لدرجه اني اقعد وراء او امشي وراه
الحمد لله خصوصاً الرجال هالوقت متفهمين يمكن على جدانا قبل كذا
هالعادات اندثرت ولو فيه فهم قللللله ولله الحمد

 

[ScarletteO'Hara]

اسميه تخلف
بالنسبة للمرة و الريال على حد السواء
الريال لانه ما يحس برجولته الا اذا كانت مرته تمشي وراه و يا ريت لازقه فيه لأ بينها و بينها متر
و المرة لانها سلبية حتى مو حاسة بنفسها انها كفو تمسي يم الريال
و الله مرة شفت منظر مقزز لوع جبدي
كنت بالواوان تبع المطابخ و تعرفون اذا الناس وافقوا على مطبخ يقعدون مع الموظف على مكتبه عشان يكتبون العقد و يتفقون على السعر
فشفت ريال قاعد على المكتب جنه ملك
و مرته واقفة شبعدها عنه
الحين بدال ما تريح مرتك مريح نفسك؟
شكلهم كان يفشل و نقدت على المرة
ما احب الحريم السلبيات
بالعكس الريال حلاته مرته يمه على ايده اليمين مو وراه حالها حال ال..........؟؟؟
احتقر هذي الحركة
ممكن لو اكون طالعة مع مجموعة اشخاص هني مجبورين احد يكون جدام و احد ورا
بس انا مع ريلي بروحنا طالعين و يقلعني وراه؟
ما ارضاها لنفسي
هالعادات و التقاليد البالية الحمدلله مو موجودة بمحيط عائلتي و لا مع ريلي
المرة لها احترامها

 

[ScarletteO'Hara]

امي تقول المراه ماتقود الرجال الرجال اهو يقودها ترا انا اشوف مافيها شي بس مو لدرجه ان تشيل الجهال والجناط مو لهدرجه بس اني امشي جدامه واهو ورااي لا عييب وترا هذي الشغلات مو بس مع زوجي حتى مع ابوي واخواني احنا تربينا على هالشي وبس ترا بالمقابل في مراعاة من الزوج ومنو الحين اللي يشيل الجناط لا المرأه ولا الرجال الله يخلي الخدم اهم اللي يشولون الجناط بس ارجع واقول الرجال اللي يخلي مرته تمشي جدامه موو رجال

حبيبتي ليش لازم واحد يقود الثاني؟
ليش ما يمشون يم بعض؟
و صاجة مثل ما انا اشوف المرة الي تمشي ورا ريلها سلبية و ما عندها شخصية
اشوف الريال الي يمشي ورا مرته بنظره اسوأ
احسه للاسف مو ريال
كل شي بالمساواة حلو

 

[al-musk]

اشوف الاحترام مو معناته تقليل من مكانتي وكرامتي لاهو يمشي جدامي ولا انا امشي جدامه .. نمشي يم بعض
و مو معناته لما اخليه يمشي جدامي يعني بكون سي السيد و هالشي بزيد من احترامه وتقديره

 

[الرشوف]

مو معناة اني امشي وراة يعني اهو قادني


بس انا بصراحة ماحب الرجال يمشي ورا مرته


احسة مو شييييي كلش


جنها لاحقهاااا

ولا احب ان الرجال يمشي جدامها ان كان متعمد طبعا


بس احس هالعقليات خلاص انمحت من الوجودد

بس للاحترام ما يصير انتي تمشين جدامة


المفروض يمة


احسن شي اكون جنبة سواء اخوي زوجي ابوي خالي عمي
نفس الشي مهما كان للرجل احترامة



ماداني المرة اللي تبين للناس انها اهي اللي تمشي و اهووو خروف وراها وووع

 

[stars black]

بصراحة معاك الحق افكار عندنا شوي
يعني تصير معاي زوجي يمشي قدامي وانا اراكض عشان الحقه
وابوي كذا,,,,,,,بس اخوي عادي ياحليله هو اللي مصبرني
يمشي معاك ويعطيك فرصة تعبري عن رايك
وكمان يحب يطلعك ومايشتكي
بس عادي انا اجلس ورى لو كان معه ولد حتى لوصغير
من دون مايأمرني:bbbiu:يعني مره كنا طالعين انا واهله
اخوه صغير جاء يجلس ورى بس انا قلت له قدام اجلس
وجلس مع اخواته عادي

 

[miss_jamsheer]

اي هالطبع خايس مثلا ساعات انكون نمشي واتلاقين ريلي طاير وانا وراه اقوله انزين خفف شوي انطرني ولا انكون بمطعم بنقوم اتلاقين بروحنا ولا مع ولدي مشى ولاينطر اقوم اعدل واشيل جنطتي عاد انا عناد اخفف عشان يحس ومره جذي علي ماقمت وانا حامل خو بالغصب امشي خذا ولدي ومشى جان اقوم اروح من الصوب الثاني عناد عنه

 

["بوح الجروووح"]

انا صراحة ماأيد هالشي احسن شيي يمشون يم بعض ولا ليش المرة تروح مع زوجها تحفظ كرامتها احسن

 

[shadows]

بنات اسعدتني ردودكم وخصوصا اللي قالوا انه هالمشكله مايعانونها في محيط عائلتهم

بس محدينكر انها موجوده وترى ما اندثرت وايد شاغله بالي

المشكله انه انا مو متزوجه ولو بفكر انه زوجي بالمستقبل بيعاملني مثل جذي انا مااا اتحمل

الله يعيين ويصبر اللي تتحمل لأنها مو مجرد مشى قدامي واللي تقول عادي خليت صبي صغير يقعد جدام

الريايل مع الوقت ماراح يحترمون المره اللي تقبل انه ينقص من قدرها ومايحسبلها حساب

يابنات انا اتكلم من واقع تجربه

اللي تقول مافيها شي يمكن مو حاسه بحجم المصيبه

لكن سؤالي اهوا شنو الحل

اللي تقول لازم لا اهي تمشي جدامه ولا اهو يمشي جدامها منو دوره اهني يجي لحل هالمشكله!!

 

[رفاعيه]

لا انا امشي جدام ولا اهو يمشي ورا اثنينا نمشي مع بعض !

 

[كويتية و لكن]

الاتكيت يقول تمشي جنبة وراة يعني ما تعنيلة شي وجدامة اهانه له الاتكيت يقول كذه

 

[**سهام**]

واللي يعافيكم منو الحين اللي يطلع مع زوجته لمكان عام
اغلب الكويتيين اقول اغلبهم مو كلهم ما يطلعون مع حريمهم
يا تطلع اهي مع خواتها ولا بسيارتها او مع السايق
الكويتي بريستيجه ما يسمحله يطلع مع زوجته اماكن عامة والجمعية ما يروحلها الا بنص الليل
هذا اللي اشوفه حواليني للاسف
بس اول سنة او سنتين من زواجهم يمكن يطلعون مع بعض وبعدين انسي
و المطار هو المكان الوحيد اللي اشوف فيه عوايل كويتية وهالظاهرة تكون واضحة وعاد يبين منهو الاتيكيت
واتذكر مرة حطوا بالتلفزيون عن دولة خليجية مصورين الناس واهما يدشون السوبرماركت
كان الخليجي يمشي بسرعة وزوجته تكون وراه بأمتار
أما الوافدين فكانوا كل واحد يمشي يم مرته حتى لو كانت مشيتها بطيئة
جان زين والله نلقا هالتسجيل علي اليوتيوب علشان تشوفون الفرق
ويبيلنا احد بعد يسوي تسجيل حق الكويتين خنشوف اتوقع بيطلعون اهل اتيكيت

 

[LuLiTa]

بـ صراحه هـ الشي نادر ما اشوف مع اهلي ,,, لازم يمشوون بعض ايد بـ ايد ,,,,و الريال اهو اللي يشيل الاغراض و المرة اتشيل اليهال ,,,

 

[أأأحبه]

طبع مو حلو صراحه
وأحسس انو الرجال يصير يفكر بالتفكير هذا
من محيطه واهله وامه وابوه
لأنه يتربي مثلا على ان الرجال هو الى يقود المره والرجال المفروض كلمته مسموعه وبدون اي نقاااش !
والمره عبده طائعه لزوجها..... ومن هالقبيييل !
بس بجد سسسوري أأحسسة تخلف
يعني ماحس برجولته الا لمن مششاء قدامها !!!




يسسسلمو ع هيك طرح ياحلوة

 

[المرتاحة]

الاحترام بيناتهم واجب

و همن تعاونهم مع بعض حلو

لانه اثنينهم يكملون بعض مافي احد افضل من احد علشان جذي افضل انهم يمشون يم بعض