سمعه البنت

[عضوا]

بسم الله الرحمن الرحيم

السلام عليكم

شلوووونكم بنااات؟

عوووده لكم بعد انقطاع طووويل :eh_s(7):

المهم اني انا تخرجت دبلوم و توني اكمل دراستي
و بحكم دراستي معاي شباب بكلاساتي
و انا بشطارتي و بحبي للخير
فكذا شاب و بنات يسالوني انا و رفيجتي على شرح و نشرح لهم
و سااعات اشتغل مع شباب بمشروع
و ساعات يكون بينا تواصل واتس اب و هذا حدة
علاقتنا كلها زماله و احترام
و لله الحمد انا عمري ما خربطت و انا بالتعش فاكيد ما ودي اخربط بالعشرين
على العموم
مادري ليش دايما اوسوس انه اخاف سمعتي تخترب و انا بريئه
ساعات افكر اني اقول لا حق اي احد يطلب المساعدة
او اني اذا احد سلم ما ارد و احقر
و لكن هم احس بالذنب لانه معطم الاوفات انا اعرف هالشغله و مافيها شي اذا ساعدت شاب

اتمني فهمتوا قصدي!!!

و سوال لربما يكون سخيف

بس متى البنت تعرف انه سمعتها راحت فيها؟؟؟!!!

و سلامتكم

 

[نونه المنكوشه]

بالعكس شي حلووو لكن بحدود يعني في بعض الشباب إذا الوحده ساعدته حسباله حبته وأنجبرت فيه ههههه أنتي خلي تعاملج وياهم بحدود وحتي بالواتس يعني سوالف زايده نووو وصدقيني البنت الزينه تفرض أحترامها ع الكل غصب وطول ماأنتي ماشيه سيدا محد يقدر يتكلم عليج بشي

 

[Pink_Roses]

رايي من راي نونه

 

[عمة حمودي]

الله يكثرمن أمثالك لوتبعدينهم من الواتس بيكون أفضل
اذااختفت سمعتهابتروح معاها الله يحفظك

 

[منيره آل ثاني]

انصحج تبتعدين عن الريايل وتمين مع البنات احسن لج
لان مو بس سمعه وبس هم فيها شرف ممكن واحد باجر يضحك عليج وتفقدين عذريتج ولا شي
ولاتنسين الشيطان شاطر يقدر يوقع بين اثنين
فانصحج بالابتعاد.....والله اعلى واعلم

في حفظ الرحمن ورعايته

 

[سيكلوجيه]

كلش مو شي

 

[عضوا]

الله يكثرمن أمثالك لوتبعدينهم من الواتس بيكون أفضل
اذااختفت سمعتهابتروح معاها الله يحفظك

مشكوووره على المرور
و لكن بحكم الشغل و المواد و الدروس اضطر

انصحج تبتعدين عن الريايل وتمين مع البنات احسن لج
لان مو بس سمعه وبس هم فيها شرف ممكن واحد باجر يضحك عليج وتفقدين عذريتج ولا شي
ولاتنسين الشيطان شاطر يقدر يوقع بين اثنين
فانصحج بالابتعاد.....والله اعلى واعلم

في حفظ الرحمن ورعايته

يا ريت في بنات واايد
المشكله انه احنا شويه و البنات مادري شفيهم
اللي تتأفف و اللي تستغبي علي اذا طلب شرح
و من ناحيه انه في احد يقص علي
اسمحي لي اختي انا لو شنو ما صدق اي شاب
مجرد زميل و اخواني الصغار

و الله الحافظ

كلش مو شي

اختي مافهمت شنو قصدج ب كلش مو شي
ممكن توضيح اكثر

 

[taioba]

حبيبتي انا انصحج تبعدين عن الشباب
وديري بااالج من سالفه الواتس اب اكبر غلط
والدين حبب صفه الحياء عند المراة المسلمه والرجل المحترم يحب المراة الحاياويه
والحياء لا يكون في مكالمه الشباب حتا ولو بالعلم خليهم يسؤلون الدكتور عيل ليش موجود

 

[Dalal.E]

السلام عليكم

اختي نصيحه لاتكلمينهم واتسآب حتى لو ماتمادوا معاج

انا بالجامعه اصير مع قروب شباب عادي بس شي اسمه واتسآب انسي لا ثم لا ثم لا حتى لو ماتعدوا حدودهم لاتكلمينهم واتسآب في بنات معاي عادي عندهم قروب شباب وجذي بس مانصحج انتي بنت ولج سمعه باجر وراج زواج شلج بهالسوالف وترا الشباب نيتهم خايسه لاتشوفينهم مساكين ماعليج. واحد معاي بالقروب نغزلي واتسآب طنشته عمه بعينه قلتله تبي شي عندك ايميلي.

انا اتواصل معاهم بإيميل الجامعه ومسيفته بتلفوني يعني اي ايميل يوصلي على طول انتي سوي نفس الشي

 

[Dalal.E]

For IPhone

اذا تبين تسيفين ايميلج ويوصلج كل ايميل علو طول دشي:
1. Settings
2. Mail, Contacts, Calendars
3. Add Accounts
4. Outlook.com
5. كتبي ايميلج والباسورد والدسكربشن كتبي اسم الجامعه



حبيبتي انا مو قصدي اخرعج عن سالفت الواتسآب بس الحذر واجب انتبهي على نفسج الا ليش ماتعطين امج خبر؟ انج تتواصلين معاهم واتسآب
قوليلها عشان اذا شي صار ماصار اهي عندها علم

وربي يوفقج ويحفظج

 

[Shinexo]

آي حبيبتي بعدي عن سالفة الواتساب , زميلج عادي مب مشكله مب حرام ولا شي خلكم ايميل بس عشان وايد اسباب اهمها

رقمج لا يجي واحد مب زين وينشره ويقط كلام مو صج بحقج والناس تحب تجوف الغلط .. سوي ايميل حق الجامعه بس وتواصلي وياهم فيه عشان صار ماصار عندج اثباتات ..

انا ادرس برع ومعآي شباب بعد بس مستحيل اكلم حد فيهم واتساب معنهم اجانب مب عرب حتى ابعد عن الشر وغنيلوو ,

 

[زوجة حياتي]

البنات ماقصروووو

 

[Huda alotaibi]

شوفي حبيبتي في مثل قديم
يقول "ياماشي بدرب الزلق لا تامن الطيحه "

 

[ايمان7]

وعليكم السلام
باين أن نيتج طيبة وبنت ناس ومحترمة بس الحرص واجب خصوصا مع الشباب
ترى والله مهما يحاولون يبينون الطيبة مجرد مايجتمعون بمجلس ماراح يكون كلامهم الا عن البنات وتلطيخ سمعتهم
كان عندي صديقة تدخل منتدى للجامعة وهالبنت قمة بالاحترام والأخلاق وحاطه حدود وشاطرة فكانوا يسألونها شباب وبنات
وماتحب ترد احد لأنها تعرف الجواب وتحب تفيد غيرها بحدود
اقسم بالله لطخو سمعتها بالأرض مع انهم مايعرفون شكلها بس كل واحد يقول هذي تبيني عشان جذي ساعدتني واللي يقول
كلمتها واللي واللي حسبي الله ونعم والوكيل
حتى كان في واحد يبيها زواج بس يوم سمع هالكلام هون
فأحذري يااختي البنت مجرد ماتكلم ولد تبدى تخسر سمعتها
وعسى ربي يعطيج على نيتج ويوفقج ويبعد عنج اعيال الحرام

 

[Dr.dan]

حبيبتي ادري مثل ماتقولين مابينكم شيء
بس بحدود الدراسه و هالاشياء
بس نصيحه الكويت صغيره
و مجتمعكم نفس مجتمعنا بالسعوديه
ف ماتدرين احد حاقد شيقول عنك
او شخص يقول ترا البنت الفلانيه معاي بالواتساب و الناس شدراها باللي بينكم بحدود الدراسه بس
و نفس الشي بعض البنات غيورات و حقدوات
و يتكلمون من ورا بعضهم
فرضا قالت فلانه تكلم شباب بالواتس ومعاهم بالقروب ومن هالكلام
بس لانها حاقده و تبي تشوه سمعه ،،
و مثل مايقولون سمعة البنت مثل الخام الابيض
اذا جاها شي لو نقطه شافوه كل الناس ،،
مثل ما قالو البنات ايميل الجامعه
او ااي طريقه ثانيه ..
و الله يستر عليك و يسترك دنيا و اخره و يكفيك شر خلقه حبيبتي

 

[woroodalward]

المثل يقول لا تبوق لا تخاف واذا اهلج عندهم علم بالموضوع لا تحاتين لكن اذا بالخش اهني الغلط