سحر شعوذه حسد .. تكفو الحقو علي تكفووون

[كتكوته عسوله]

خواتي تكفون في موضوع متعبني كلش وبصراحه وانا هالشي ما قلته لأحد احس ان ثقتي بنفسي اهتزت شوي وهالشي مضايقني صرت اخاف اطلع حتى من باب بيتي والله العظيم بنات اقولكم السالفه وابيكم تحكمون منو الغلط ومنو اللي نفسه مريضه انا والا اهي وتكفون انصحوني شسوي وشلون اتعامل واتصرف معاها انا في وحده من فترة 3 اشهر قعدت معاي في المكتب قال لي المدير انها مو هاذا مكانها بس لأن قسمها مافيه مكان فيايه عندي مؤقت للعلم انا في مكتبي بروحي يعني مافيه الا انا واهي بالمكتب هالانسانه من اول ما عرفتها واهي تقول لي عن كيدها مع زوجهاومع الرياييل اللي تتعامل معاهم بحكم انها موظفه وجذي خصوصا انها وايد عندها اصدقاء وعلاقات مع ناس واصلين تقول عشان مصلحتها وانها امشيه امورها وتاعبه على نفسها هاذا كلامها وكله توصل نفسها فوق جدامي وانا كنت على نياتي معاها واجاريها وانصحها انها تبتعد عن الرياييل بس تقوللي هذيل معارف واصدقاء وانها تؤمن بصداقات الرجال اكثر من الحريم لانهم يكتمون السر اكثر المهم صرت اضيفها بمكتبي كل يوم وتعودت اهي علي وتقول لي انها حبتني واني غير عن باجي بنات الاداره ومع معرفتي فيها اكثر بحكم وجودها بويهي طول اليوم قامت تقول كلام والله يخليكم بنات ابيكم تعلموني شنو تقصد بالضبط بكلامها لان انا ما اعرف اسلوب النغزات وايد على نياتي المهم راح اقول لكم شنو تقول بالضبط كل يوم تيني بقصه يوم تيي عيونها حمر تقول لي شوفي شوفي عيوني تكفين في بنات صادفتهم بفلان مكان اللي اهي رايحتله وقالولها عيونج وايد حلوين وثاني يوم صارو جذي .. اليوم اللي بعده تقول لي واي المدير يكلمني ويطالع حمرتي اللي حاطتها وتضحك وتقول يبه والله العظيم lip glossمو اكثر تره ومره دعمت دقت علي تقوللي واهي معصبه تكفين قولي حق المدير وكل اللي بدوامنه تره فلانه يعني اسمها دعمت اوكي عشان تبرد عيونهم شوي علي طقوني عين قطيعه عندج سيارتين وعندج سيارتين وسدت السماعه ودايما اتكلم لي عن مواقفها القويه انها شجاعه وما تخاف من احد وانها اتهزأ ناس واصله وانها تمسح فيهم الارض وانها كلمن يشوف بطاقتها المدنيه او هوية العمل يقول لها مستحيل انتي جذي عمرج انتي وايد بيبي وشكلج نعوم ونثيه حدج انتي مستحيل موظفه وكله اتطنز على ريلي لانه متين وعلي لاني هم متينه وكله تناديني بطوط انا اتقبلها منها غصبن علي لاني اقول بقلبي يمكن مو قصدها او لان حاسبتها ميانه بس كله اتقول لي تطلقي بس اللي صج اذاني وضايقني موفقين سوتهم فيني وتكفون ابيكم تقولون لي شلون اتصرف مره ركبت لوحه بمكتبي حلوه جان تقول لي ابي منها وصج رحت العصر ركض على نياتي ودورت باكثر من مكان عشان احصلها لها لانها كانت خالصه ويبتها لها وقالت بعطيج فلوسها انا قلتلها لا اعتبريها هديه مني لج واول ما شافتها قالت حق الهندي يخليها مكانها انا عبالي اتقولله يوديها حق سيارتها بس قالت لها لا خليها مكانها ولا قالتلي مشكوره ولا شي والحين هاللوحه صار لها فوق ال3 شهور مركونه مكانها جان اقوم واحطها في الخزانه اللي بالمكتب وقلت لها تره اللوحه كاهي بالخزانه اخذيها ما ردت علي هالشي حيل ضايقني وحيل ابجي كل يوم لما اشوف اللوحه مغبره واهي بقراطيسها وايد اكسر خاطر نفسي انا اللي ركضت من مكان لي مكان عشانها اثول لو ريلي ماركضت له جذي والشي الثاني بنات اللي حيل ضايقني انها مره راحت مصر ولما ردت تدرون شنو يابتلي هديه ؟ يابتلي عين زرقه كبيره وايد اول ما دخلت علي سلمت عليها وكنت مستانسه لانها ردت بالسلامه جان تقوللي يبت لج شي حلو وايد راح تستانسين منه وكانت لما ادق علي من مصر كانت اتقوللي انا شريت لج هديه وايد حلوه راح تعجبج انا بيني وبين نفسي استانست وقلت الحمدلله فيها الخير المهم اول ما فتحت جنطتها والا اطلع لي مداليه مال العين الزرقه هاذي اللي المصريين يخلونها على الباب او شي جذي مال التراث مالتهم هاذي المدوره يمكن تعرفوها بنات طلعتها لي واهي ميته من الضحك جان تقوللي هاج بطوط هاذي هديتج شرايج فيها واهي تضحك انا قلت لها مشكوره وسكت واخذتها وتسولفلي عن الهدايا اللي شرتهم من مصر حق رفيجاتها هدايا وايد حلوه جنها بتحرجني انا سكت وما بينت لها اني منحرجه ومره قصت علي عطتني شي تقول انه حجر كريم وانه يسهل الامور وجذي انا بصراحه ما كنت ابيه ولا حبيت اخذه بس خفت منها لانها تعرف سوالف سحر وبلاوي وانا اخاف لاتسوي فيني شي اخذته وقالتلي ابي 200 دينار مو حقي حق راعية هالحجر هاذا وعقب اسبوع لازم اترديته لي وعطيتها ال 200 وقالتلي لازم يكون معاه دهن عود قالتلي انا بعطيج عندي وايد دهن عود وبعطيج منه قلت لها مشكوره ثاني يوم عقب ماخذت ال 200 قلتها وين الدهن العود اللي قلتيلي عنه قالت لي لامايبته معاي انتي روحي للشايع واشتريه تره مو غالي وطلعت من المكتب وخشت ويها اسبوع وردت اخذته انا هني حسيت نفسي وايد مغفله ولا حتى سألتني ها شنو استفدتي من هالحجر انا قالت لي انه هالحجر مقري عليه قران عشان حذي رضيت اخذه لو اني شاكه بس شسوي بنات اخاف منها اهي اعوذ بالله وايد اتعامل مع سحارين وكل يوم لازم تقوللي صار فيني جذي من عيون فلانه او من عيون اللي شافوها وتقوللي انها وايد محسوده احسها وايد مستهزئه فيني تكفون شلون اتعامل معاها وشنو اسوي باللوحه المركونه بمكتبي حتى مديري قال لي حرام هاللوحه جذي هاملتها تكفون قولولي شنو اسوي بهالموقفين اللي صارو وشلون اتعامل معاها مني ورايح :eh_s(2)::eh_s(2)::eh_s(2):

 

[عسل حدي]

انتي شنوو من وحده ؟
ماتفكرين ماكو مخ
شنو تعطيني حجر يمشي اموري وامشي وراها
انتي لو موحابه هالشي ماسويتيه
امبيه لو في حجر يمشي الامور جان خشته لها وماعلمت فيه ااحد مو تعطيج ياه
تدرين شنو انتي تحبين سوالفها ومحتره منها لانه عندها ثقه بنفسها وانتي لا
الي هالاشكال يمشونج ويضحكون عليج

صج حريتيني

 

[كتكوته عسوله]

انا مو حابه هالشي لا الحجر ولا غير الحجر الله يسامحج على الاقل نصحيني

 

[كتكوته عسوله]

محتره منها على شنو لا حول ولا قوة الا بالله لو اقول عن تفاصيل حياتها كلها فشل بفشل وضياع بضياع بس مابي افضحها مهما كان هاذي اسرار خاصه فيها

 

[.حــنــان.]

كلمي مديرج مابيها وياي بمكتبي وايد تسوي مشاكل
و على سالفه اللوحه كلميها و حسسيها انج متضايقه قوليلها الحين انا شاريتها لج ولا عبرتيني ولا حتى كلمه شكرا يعطيج العافيه
و الحجر هذاااااا قطيه بالزباله شهالخرابيط !!!!
يبا لو انا بدالج اسوي اي شيييييييي عشان افتك منها و من مشاكلها قطيعه
عيل اصدقاء رياااايييل ئااال قطع صج ماتستحي مادري وين قاعدين !!

 

[norsun]

شوفى حبيبتى النوعيه هذى لايغرك كلامها ترانى مجربه وحده نفس الشخصيه شنش تتكلمين عنها وكنت اخاف منها يسبة كلامها عن نفسها ودايما تسولف عن السحر والسحرا بس ابدا ماعمرى طعتها بشى يغضب الله سبحانه لانى على يقين ان الصحه والعافيه والرزق من الله واللى سويتيه انش خذيتى الحجر على انه يسهل امورك يعتبر شرك فاستغفرى وتوبى لله سبحانه والن وعيه هذى عند المواجهه اجبن خلق الله فقوى قلبش واستعينى بالدعا ء مثل اللهم اكفنى بها بما شئت وخليش معاها رسميه وخافى من الله ولا تخافين منها والله يكفيش شرها بغيت اسال كم عمرها

 

[granted]

انتي شحقة شادة حيلج وياها وتروكضين تيبيلنها الي تطلبه اختج صديقتج !!!
اقصاها وحدة مفروضة عليج بالدوام مسمى زميلة وايد عليها ليش وايد فازعه وياها
انا احسج من النوع الي يمشيىبالحجي المصفصف الحلو من جذي اهي تتعامل معاج بالحجي الحلو والمدح وارتحتلج ومادري شنو
طبعاً بترتاح لج تضيفينها وتخدمينها وتفزعين لها وتطوفين لها
حبيبتي حطيلها حد وعامليها بسطحية واذا يت خلصي شغلج وحاولي تسفهينها شوية ولا تجهدين لها خيرتها بتمل منج وتتركج
بس لاتخلينها تلف راسج بالحجي الحلو ترى الحجي ببلاش

 

[M!SS.LOBY]

لاحول ولا قوة الا بالله

 

[كتكوته عسوله]

هلا خواتي شكرا انكم تفاعلتو معاي بس والله ناشبتلي نشبه وسالفة العين الزرقه اللي يايبتها لي صوغه من مصر ما ادري شنو تقصد فيها يعني هل انا عيني حاره ؟ اختي norsun عمرها 25

 

[آهات و خواطر]

الله يسهل أمورك أختي
هذا حساب مستشار بتويتر يمكن يفيدك تتخلصين منها ( mostshark@ )

 

[Queen of love]

اول شي تسوينه انك تلتزمين باذكار الصباح والمساء والعين الزرقا حطيها بماي مقروء فيه الرقيه الشرعيه وبعدها احرقيه
وشغلي بمكتبكم قرآن دايما والله يبعدك من شرها والحجر ياحبيبتي يكون داخله جن والعياذ بالله لاتاخذين منها شي ولاتاكلين من اكلها والساحر ياويله من ربه ماله توبه الله لايجرنا لطريقهم ولتعاملهم ويكافينا شر كل من به شر

 

[((البرنسيسا))]

حبيبتي خليها تولي

لا تعطينها ويه

 

[شوق الوليف]

حيااااتي انتي حيل طيووووبه بس هي الخبيثه اول شي شكووو تقولج تطلقي نعمممم خيرررر منو هي تتدخل بحياتج وبعلاقتج مع زوجج هالشيء دليل انج معطتها وجهه حبيبتي فيه خطوط حمرا مفروض ماتتعداها اما الللوحه والهديه للاسف هاذي انسانه مريضه نفسيا وفيها خبث وجذااابه تستغلج وانتي تسكتين لانج خايفه منها عسى الله يكفيج شرها معاج حق تخافين ما الوومج بس ديري بالج وانتبهي خليج رسميه حاولي تجنبينها قدر المستطاع واذا سالتج شفيج قولي تعبانه متضايقه اي شي صرفيها ترا قاعده عندج مؤقت وبتذلف واللوحه المغبره قوليلها فلانه ترا باخذها ما اشوفج سويتي فيها شي ولاحتى شكرتيني عليها يمكن ماعجبتج واخذيها ولاتستحين من هالاشكال

 

[أميرة قلبة]

لا تستحين منها

قطيعه هالاشكال مال ابلغ عنهم


قهرتني والله
تتدخل حياتج شخصية حلوة هاذي تتطلقين

لا تصيرين عاد سذاجه

جعميها اي .... لانها وحده فاشله


لاتكلمينها حتى سلام حرام عليها





اي شي منها عندج اغسله ماي مقري و أي شي في شبهات شيله حتى مكتبج بعد نظفي كل شي

يفضل تغيرين رقمج انتي وريلج

تحطين ارقام سرية لا تخلين شي

يفضل ما تتكلمين عن حياتج شخصية بعد اي احد كان بس اختج او امج او ريلج



قولي لنا صار معاج

 

[عادت ذكرياتي]

لا حول ولا قوة إلا بالله

 

[حياتي تكنولوجيا]

مقيوله ام لسان قليلة احسان

خليج سطحيه معاها
لا تسولفين عن اهل بيتج حتى الاسماء لا تعرفها
لا تشربين او تاكلين منها شي ابددددااااا

حاولي تتصدقين كل يوم
لا تصير بينكم امور ماليه نصيحه
الله يكفيج شرها:yaaaaaarb:​

 

[نوف الصقعبي]

عمرها 25 سنه وهاذي سوالفها ؟؟​

رياييل على قولتج
وسوالف ضياع بضياع على قولتج
وانا فاهمتج بخصوص تصرفاتها المشينه مع الشباب
مبين انها قاضيه هاذي
وحده تتعامل بالسحوره وحياتها كله وصاخه وشباب وماخفي أعظم
وماخذها مقلب بعمرها خاف
مارلين مونرو
وله شيريهان
وله كيم كردشيان
اللى قايمه عليها المذبحه وكل العالم والناس والخليقه تغار منها
هاذي مريضه نفسيآ
هالنوعيه أعرفها عدل اهي اذا حقج جذي تسولف هاذي من النوع اللى كل واحد تكلمه تقوله شفت البنات شفت فلانه شفت علانه واي تموت مني تغار من جمالى وجسمي وتقعد تقص عالشباب انها وحده كل بنت تغار منها وتتمنا تكون نفسها​

عورتي قلبي يااختي
هاذي ماتستاهل صداقتج ولا تستاهل انسانه طيبه وحبيبه مثلج
انتى انسانه صادقه ووفيه لبنت مو كفو
لاتخلينها تستحقرج وتضحك عليج ولا تستغل طيبة قلبج وتعتبرج انسانه ساذجه
تشجعي وحطي لها حد
لاتخافين منها شنو بتسوي لج يعني
لاتخافين الا من
رب العالمين
سبحانه​

ولاتخافين من سحورتها
ربنا قال بكتابه الكريم​

قل لن يصيبنا إلا ماكتب الله لنا​

مهما بتسوي خل تسوي وخلج قريبه من رب العالمين بصلاتج وطاعتج له
وقبل ماتعيب على زوجج جان قلتى لها انتى تزوجى بالأول وتعالى عيبي علي​

فيها نقص موطبيعي هالبنت​

وخري عنها
وخري عنها
وكلمي مديرج من شنو خايفه من شنو
ماسكه عليج ممسك
؟​

حطي لها حد​

شنو بتقص راسج
؟​

تخافين منها لهلحد​

؟​

اللوحه قولى لها اذا ماتبين تاخذينها اليوم عشان بطلعها من مكتبي مسويتلى زحمه
جذي طقيها بويها اى اللوحه مسويتلى زحمه
ولو ضحكت وقطت كلام عامليها بالمثل ووريها انج جاده وماتضحكين وفرضي عليها احترامج
وشلون تخلين وحده تتمادى على زوجج
شلوووووووووووووووووون​

والله لو وحده تتكلم وتفكر بس تجيب طارى زوجى ​

أقطع لسانها
وأعطيها طراق على عينها يعلمها يعنى شنو معنى حدود
وان الزوج
___________________
خط أحمر
ماتفكرين تعدينه​

طمنيني عليج أول بأول​

 

[سماء الاحساء]

يالله شنو هذي الله يفكج منها تعاملي معها بسطحيييييييه وحدود العمل فقططططط ولن يضر الله شيئا الا باذنه

 

[3aly mstway]

حصني عمرج كل يوم ولا تاخذين منها شي وابعدي عنها قد ماتقدرين


الله يسسسسسسسسسسستر عليج منها

 

[<<الأميره>>]

كل يوم اقري اذكار الصباح والمساء
واذا جابت طاري سحر وشعوذه اقري سورة. الكرسي
وكلمي مديرج ينقلها عنج
قطيعه تقطع هالأشكال الخايسه