سبووووح سبووح سبووح

[بنت^كآليفورنيآ]

انا موضوعي اليوم عن السبوح
انا اكثر ما يضايقني بالسبوح اني اسوي لازم شعري استشوار لانه مو ناعم وجذي يتقطع شعري ويولي لو كل يومين سويته .ولا تقولون كيراتين مستحيل اسويه اختراع فاشل ما وراه الا تساقط الشعر وانعدامه
.... ويضايقني موضوع السبوح بسبة الاستشوار اللي يخرب الشعر والا انا يوميا اغسل جسمي حيل واعطره بس شعري لا عادي 3 ايام ما اغسله وريحة الشامبو بينتين تقعد بشعري يومين كاملين تفوح ف ماعندي مشاكل ومع عطر الشعر الحمدلله يصير نظيف

ف مرة قريت حديث للرسول صلى الله عليه وسلم مع ام سلمة انها تقول رابطه شعرها وهل يجب اني افلة لما اغتسل قالها لا يكفيج 3 حثيات



ماراح اطول شوفو الفييديو وفهموني هل انا فاهمه صح والا غلط


اللي فهمته من الفيديو

ان اذا بغتسل من الجنابه اكون رابطه شعري ويكفيني انه يحوشه الماي ومو لازم يوصل للجذووور
هذا كنت فاهمته من حديث الرسول ان يكفي بالجنابة 3 حثيات
وهالشيخ يقول ان الحيض يجب ان الماي يتغلل الشعر بس الجنابه لا .. يعني اانا تدرون شسوي امسح بإيدي وابلل شعري من داخل 3 مرات بماااااي ولما اطلع يكون مبلل بس مو كله كله فهمتو ؟
ومحتاجه وحده تشرح عدل الطريقة الصح والاكيده ......
شوفوه امانه واللي تفهمه عدل تنوررررني وعسى جزاها الجنه يارب
وامانه اللي ماتشوف الفيديو لا تعلق واللي ماعندها خلفيه وتبي ترد وتعلق وبس .... لا تعلق لان انا
ابي انسانه فاهمه عدل ترد علي مابي ردود وايد

https://www.youtube.com/watch?v=bNggrqEW2Go


وشكرآ لكم ناطرتكم

 

[M!SS.LOBY]

اذا تبين تكونين طاهرة ونظيفة للصلاة

لازم تغتسلين الماي يصب من قمة رأسج للاسفل اصابع ريلج الماي يوصل

 

[شادن33]

والله انا جم مره ابي افهم هالحديث ماعرفت الصراحه
مالنا غير الاغتسال الكامل عن الحلال والحرام

وعن الاستشوار حبيبتي احسلج خلي شعرج قصير ولاتطولينه وايد أسهل بالاستشوار والتسريح

 

[حامل يديدة]

لازم الماي يحوش كل. جزء بجسمج وشعرج سواء فليتي شعرج او خليتيه مربوط

 

[في قلب البحرين]

الله يسلمج على ايام قبل كانت شعورهم كثيييييييييييييييفه
والعجافه اتم عادي اسبوع مب مثلنا كل يوم او يومين انسله ونتسبح
قبل غير واللحين غير

الافضل تسبحين كامل وتفلين شعرج لان اللحين من البرامج الدينيه ماقط واحد قال لاتفلين شعرج وجذي

انا مب وااايد ملتزمه بس يعني اقول لج اللي اعرفه
والله يغفر لنا ولج وللمسلمين على غلطنا وتقصيرنا ​

 

[انصاريه قمره]

انا اتسبح سبوح كامل عن احسن وانظف ومشالله شعري وايد طويل لي تحت ظهري وحيل تعبت من الاستشوار وريلي الله يهديه مو راضي اقصه مفكره اسوي كيراتين للعلم انا شعري مو خشن الشعره ينفسها ناعمه وخفيفه بس فيه رده بس خايفه لي سويت يحت شعري

 

[3houd86]

شعرج يكون مربوط و تكبين عليه 3 كبات ماي. مو مسح.

 

[Emanii]

مادري والله

 

[اذوب بكلامه]

موقع الإسلام سؤال وجواب - لا يكفي مسح الرأس وتخليله في غسل الجنابة
لا يكفي مسح الرأس وتخليله في غسل الجنابة

ورد في سؤال 2648 طريقة غسل الشعر من الجنابة , لكن هل يجوز تخليل الشعر والاكتفاء بالمسح عليه فقط لأني أجد مشقة في غسله كل مرة بسبب استعمال مجفف الشعر للظهور بمظهر جميل أمام زوجي .

الحمد لله
الواجب في الغسل من الجنابة غسل البدن كله ومنه الشعر ، والغسل هو جريان الماء على العضو . الشرح الممتع 1/ 128

فلا بد من إفاضة الماء على الشعر وإيصاله إلى ما تحته ، أما مجرد المسح على الشعر فلا يكفي لأنه لا يعتبر غسلاً ، والواجب هو الغسل لا المسح .

عَنْ عَائِشَةَ قَالَتْ كَانَ رَسُولُ اللَّهِ صَلَّى اللَّهُ عَلَيْهِ وَسَلَّمَ إِذَا اغْتَسَلَ مِنْ الْجَنَابَةِ يَبْدَأُ فَيَغْسِلُ يَدَيْهِ ثُمَّ يُفْرِغُ بِيَمِينِهِ عَلَى شِمَالِهِ فَيَغْسِلُ فَرْجَهُ ثُمَّ يَتَوَضَّأُ وُضُوءهُ لِلصَّلاةِ ثُمَّ يَأْخُذُ الْمَاءَ فَيُدْخِلُ أَصَابِعَهُ فِي أُصُولِ الشَّعْرِ حَتَّى إِذَا رَأَى أَنْ قَدْ اسْتَبْرَأَ حَفَنَ عَلَى رَأْسِهِ ثَلاثَ حَفَنَاتٍ ثُمَّ أَفَاضَ عَلَى سَائِرِ جَسَدِهِ ثُمَّ غَسَلَ رِجْلَيْهِ " رواه مسلم 474 ، قال الشيخ ابن عثيمين في شرحه لهذا الحديث : " يجب إيصال الماء في الغسل من الجنابة إلى ما تحت الشعر ولو كان كثيفا .

يؤخذ هذا من إدخال أصابعه ( صلى الله عليه وسلم ) في الشعر وحفن ثلاث مرات بعد أن روّى أصوله " .ا.هـ. شرح بلوغ المرام (ص399)

قال الشيخ عبد العزيز ابن باز رحمه الله : " يُرشد النساء اللاتي يتحرجن من غسل رؤوسهن في الجنابة بأنه يكفيهن أن يحثين على رءوسهن ثلاث حثيات من الماء حتى يعمه الماء من غير حاجة إلى نقض ولا تغيير شيء من الزي الذي يشق عليهن تغييره ، مع بيان مالهن عند الله من الأجر العظيم والعاقبة الحميدة والحياة الطيبة الكريمة الدائمة في دار الكرامة إذا صبرن على أحكام الشريعة وتمسكن بها " مجموع فتاوى الشيخ عبد العزيز ابن باز رحمه الله 6/236

انظر السؤال رقم ( 34776 ) .
الإسلام سؤال وجواب

 

[امـ خــزامـى]

^^^
كفت ووفت

 

[دلوعه ززوجي]

الله يعين
الله يسلم الحمام الزيت ينعم الشعرر.
مولازم كل مزه ستشوار مره ناعم مره كلرييييي مره عجفه مره عنقوص مره كبه مر كشه ههههههه

 

[Patcholli]

منو قالج الكيراتين اختراع فاشل
بالعكس سويته قبل سنتين عند وحده مغربيه وصار روعه
راحت الردات
توقف التساقط
وماقام يتشابك فبعض نفس قبل
وصار يطول بسرعه
بالعكس الكيراتين علاج بس المشكله بالصالونات الي قاعده تحط تمليس واشياء ثانيه وتقص عليكم وتقولكم كيراتين
وانا ماجربته على طول الا لما شفت نتيجته على شعر خالاتي بعدين سويت حق روحي

المهم الحديث دقي على شيخ احسن لاتاخذين فتاوي من العامه محد بيفسر له احسن من مشايخ الدين ..

 

[نونه المنكوشه]

انا اصلا ماوقف تساقط شعري اله لما سويت الكراتين عند وحده عجيبه مشاءالله وموبس انا بنات عايلتنا كلهم مسوين عندها ولاوحده شكت منه واكثر من مره يسون شلج بهالعذاب ويصبرج عند الريال تقعدين ثلاث ايام ماتغسلينه تري حتي لواتعطرينه مستحيل هم يطلع ريحه مومستحبه ولاتنطرين يقط عليج كلام يجرحج تالي تستوعبين اما سويه وله تحملي الاستشوار بس لاتقعدين هالمده ماتغسلينه

 

[كتكوته حبيبي]

نونه المنكوشه ممكن تعطيني رقمها الي تسوي كيراتين انا سويته من سنتين ونص بماليزيا بشهر العسل وكلمه عجيب شويه عليه ورخيص والحين نزل واايد ومافكر اخاطر باي صالون لان شعري صار خفيف وحاليا قاعده اعالجه من التساقط واكثفه ياريت اذا تعطيني رقمها عالخاص

 

[رنيم الروح]

حبيبتي لازم سبوووح كامل والماء يتخلل الشعر ويوصل الى الجذور سوى كان دورة او جنابه طريقة غسلهم واحد
انا احيانا اتعب من التجفيف او ماعندي وقت اجعد شعري الطريقه الاسهل
الي اقترح التجعيد فك ازمه ههههههههه

 

[بنت^كآليفورنيآ]

للأسف صار الكل يرد والكل يقول لازم ولازم والاغلب شكلهم ما شافو الفيديو ولا بطلوه
انا ما امسح بإيدي
انا ادخل اصابعي داخل واخلي الماي يحوش اغلب الشعر بس ما يصب صب مثل السبوح الكامل
وطلعت فتاوى شكثر ان مو لازم يصب صب ويتخلل كل الشعر
والفيديو موجود
محد علق عالفيديو والاغلب قال لازم ولازم انزين انتي تأكدتي انه لازم ؟
والا علشان انتي تتسبحين كامل قلتي لازم
طيب يمكن فيه فتوى تقول ان مو لازم يتغسل بشكل رسمي مثل الدورة ؟
قلت لكم اللي ماعندها فتوى ومو فاهمه لا ترد لكن ماكو فايده
شوشتو تفكيري
واشكر الاخت اللي حطت فتواها


وانا البداية قلت هدفي الاستفادة من الفاهمين وباحثين بالموضوع
مو أي وحده ترد !!!!!!!!!!!!!!!!

 

[بنت^كآليفورنيآ]

كله كوم واللي قالت ماتغسلين شعرج ويطلع ريحه كوم ثاني .. حسستيني اني ما افهم .. ههههههه حبيبتي ريحي بالج انا زوجي صريح ويقطها بالويه واذا شام ريحه ما يستحي يقولها بويهي عادي .. والحمدلله ماتشكى وبالعكس يقولي ريحة الشامبو تفوح منج وليش انا لا عنه اهو كله يقولي اني نظيفة ماشاءالله واعرف النظافة والاصول .. و وايد بنات مايغسلونه يوميا .. ودكتوري الجلدية قبل سنتين قايل اصلا غلطتكم انكم تغسلونه يوميا واخر شي كلكم عندي تتشكون . بروحه الماي خواره والشعر اكثر شي يتغسل مرتين بالاسبوع والا الوحده تصلع .. حتى زوجي مانعته يغسل شعره يوميا مو زين الشامبو والماي بكثرة ... ويسبب صلع مبكر .. ومرة خبيرة تجميل قالت نفس الكلام ... لاتخافين علي عارفة طريج النظافة
واللي بتتسبح يوميآ عليها بالعافيه لا تقولي لان انا اسمع كلام مختصين بالشعر .. واهي براحتها هذا شعرها وتسوي فيه اللي تبيه

 

[بنت^كآليفورنيآ]

والله انا جم مره ابي افهم هالحديث ماعرفت الصراحه
مالنا غير الاغتسال الكامل عن الحلال والحرام

وعن الاستشوار حبيبتي احسلج خلي شعرج قصير ولاتطولينه وايد أسهل بالاستشوار والتسريح

مو راضي اقصه والا جان قصيته
حتى انا احس الحديث له معنى ومن جذي ابي وحده فاهمه تشرحه وتفهمنا لان الموضوع
له عدة فتاوي ودي اتواصل مع شيخ لكني بره الكويت


عندي ارقام مفتين عفيا اللي تقدر تدق تقولي اعطيها وبدعيلها من قلبي

 

[بنت^كآليفورنيآ]

لازم الماي يحوش كل. جزء بجسمج وشعرج سواء فليتي شعرج او خليتيه مربوط

للاسف انتي مو فاهمه ان الموضوع فيه شك وسبق وحذرت ان اللي مو فاهم لا يرد
لان في حديث او اكثر للرسول يقول مو لازم فك الشعر .؟
وفي احاديث امس بالنت طلعتهم تقول الدورة لازم الماي يتخلل الشعر ويغرقه ماي .. لكن الجنابة لا .... انتي مو متأكدة ليش تلزمين وتشوشين تفكيري دام ماتدرين ان الموضوع فيه شك
وشكلج مابطلتي الفيديو

 

[بنت^كآليفورنيآ]

الله يسلمج على ايام قبل كانت شعورهم كثيييييييييييييييفه
والعجافه اتم عادي اسبوع مب مثلنا كل يوم او يومين انسله ونتسبح
قبل غير واللحين غير

الافضل تسبحين كامل وتفلين شعرج لان اللحين من البرامج الدينيه ماقط واحد قال لاتفلين شعرج وجذي

انا مب وااايد ملتزمه بس يعني اقول لج اللي اعرفه
والله يغفر لنا ولج وللمسلمين على غلطنا وتقصيرنا ​

شلون محد قال والفيديو هذا شنو ؟
قلت لكم لا تردون اذا ما بطلتو الفيديو ... طيب حديث ام سلمة شنو قالها الرسول ؟
ليش تردين وانتي مو متأكدة
هذا دين ومحتاجه فتوى مو محتاجة ردود