سالفه حييييل ضايقتني من زوجي

[ايام وردية]

شلونكم ان شاءالله بخير


بدخل بالموضوع ع طوول

في شغلة مضايقتني مع زوجي كرهتني فية والله

انا متزوجة سنة وكم شهر

اللي صار

زوجي كل بعد كم يوم يقولي شرايك اوديك بيت اهلك وتنامين عندهم والله يبنات تقريبا الشهر اللي طاف نمت كل الشهر عند اهلي لاني حامل وتعبانة وصارت لاهلي ضروف بعد ونمت شهر

والحين رديت عنده البيت وامس قالي شرايك تنامين بيت اهلك؟انا عطيتة طاف

واليوم العصر قال بوديك بيت اهلك ونامي هناك للعلم البيت مافي احد كل اهلي مسافرين والله بيتنا فاااااااااضي قلتله يعني انام لحالي هو عادي عنده طيب ليش شالسبب

المهم انا طقيتة بجية واعصب اقولة ماتبيني ليش اخذتني كل يوم والثاني نامي بيت اهلك

ولبست عباتي واخذتلي لبسة وحدة واخذت جهازي الاب توب <<اهم شي

وصلني بيت اهلي وانا ياعيني عليا ابكي ع الصامت بالسيارة مدري منتبة لي او مانتبه

وقلتله

ياقلبي على امي حاطة قلبها بالثلاجة تفكر انك مهتم فيني ماتدري انك راميني في بيت اهلي ومحد في

قال خلاص امرك الساعه12 لكن حالفه مارجع له والله قهرني

والله يبنات من اول ماتزوجنا وهو نامي بيت اهلك واذا نمت مثلا يومين وادق علية اقوله اليوم تعال خذني يقول لا بعد نامي يوم

والله فتشلت من اهلي بس اطلع له اعذار لاشافوني نايمة عندهم

كرهته باسلوبة

مع اني اذا جلست بالبيت يعاملني معاملة حلوة وطيب وكريم وحنون وكل اللي اطلبة يروح يشتريها لي والله لو اخر الليل ويحلف انة يحبني كل يوم يقولي احبك واحبك

بس ماصدقته انا كارهتة ليش مايبيني اجلس عنده اللي يحب مايفارق حبيبة

آآآآه يبنات والله من بعد المغرب وانا ابكي خاصة بيت اهلي موحش محد في وبنام لحالي فية وانا خواافه

للعلم يبنات انا متاكدة مايروح يخربط لانه ملتزم وراعي دين

بس اموت واعرف اش فية بقلبة ليش مايبيني انام عنده شهر كامل الا يقطع الشهر ويقولي نامي اسبوع او اكثر بيت اهلي

الله يخليكم نوروني مدري ليش كتبت الموضوع يمكن لان احس بالوحده لا ام ولاخوات الا انا

ماغير دموعي مسليتني:eh_s(2):

 

[مُخملْ]

حبيبتيْ ،
هدي نفسجْ وتعوّذي من ابلييسْ ، لماتحسّين هديتيْ
اتصلي له وخليه ايي وتفاهموا معَ بعض بهدوء وبدون عصبية وصراخْ
فهمي منه سبب هالتصرف اللي يتصرفه ، شوفي شوالاسباب اللي يخليه
يبتعد عنجْ ، افهمي بهدوء وحاولي تحلين المِشكلة ،.#

،

الله يسهّل أمرج وييسره ويجمع قلوبكم ويصلح مابينكمْ

​

 

[بتبوتااا]

لازم ياقلبي تفهمين منه ليش يبي فراقج ؟ ولا ردي بيتج عنده واذا قال لج روحي نامي بيت اهلج قولي له لاا مالج خلق او ما تببن يعني قعدي على قلبه ليما تعرفين السبب

 

[أم الفناتك]

يمكن يشوفج تعبانه ومالج خلق شي يقولج روحي ريحي او ان بيتأخر مع ربعه مايبي يحاتيج يقولج نامي في وايد اسباب اتخلييه يقول جذي وانتي من اول المفروض ترفضين الريال تعود الحين غيرييه باسلوبج

 

[iLLuMinaTion]

الله يهديكم ويكمن قلبج

 

[سمو]

اللهم صل علي محمد وال محمد


انا استغرب من اللي ينامون بيت اهلهم ؟؟؟ خو مشتاقه لاهلج روحليهم من الصبح لليل وردي بيت اهلج ؟؟؟ بعض البنات مشتاقه للسهر مع خواتها وتبي تعيد الايام الخوالي ؟؟؟ خو خلاص تزوجتي تحملي المسؤوليه ؟؟؟ <<< كلامي موجه لكل المتزوجات مو لصاحبه الموضوع بس :eh_s(4):

الشهر اللي طاف نمت كل الشهر عند اهلي لاني حامل وتعبانة وصارت لاهلي ضروف بعد ونمت شهر

اذكر دكتوره فوزيه الدريع قالت مره : حتي لو المره تتنسى علي ريلها يعني ما تبي ريلها .. تقعد ببيتها وما تطلع .

شهر بحمالج ...وشهر علشان ظروف اهلج ؟؟؟ حبيبتي شهر بعدج يكفي الريال انه ما يشتاق ...واحيانا الرياييل البعض منهم عنده كبرياء ...يعني عنده هدتني شهر عادي عندها ..يقول انا بعد عندي عادي فراقها .


اللي سويتيه غلط ....وصار خلاص .... الحين لا تطلعين من بيتج ...حتي لوقالج روحي ....قولي مابي احب اقعد ببيتي وارتاح فيه اكثر ... عندي القعده معاك تسوى الدنيا كلها ....وصبري جم اسبوع لا تروحين لاهلج وقعدي ببيتج ...وشوفي شلون تتغير الاحوال .


والله يهديكم لبعض يارب :yaaaaaarb:

 

[Patcholli]

عزيزتي احنا مستحيل نعطيج التفسير الصحيح 100% لتصرف زوجج الغريب
الحل عزيزتي ان تكون شخصيج قويه .. وتواجهينه بكل صراحه وجراه .. بدون خوف او حساسيه او دموع ..
خلج واضحه وقوليله عطني الاجابه بدون لف او دوران .. شنو السبب ورا رغبتك اني انام فبيت اهلي ..؟؟
وفهميه ان البيت بيتج متى ماحبيتي تقعدين تقعدين ومتى ماحبيتي تروحين عند اهلج بيكون هالشي برغبتج مو بالحاح منه .!
لازم تحطين النقط على الحروف .. قعدتج فبيت اهلج وانتي زعلانه ماراح تنفعج المواجهه والنقاش الجاد والصريح اهو اللي تحتاجينه

 

[ام كوثر2007]

اكبر غلط تسوينه انه كل ما قالج روحي نامي قلتي تم


وهو تعود

الحين انتي تعوذي من بليس ولا يالج الساعه 12 ردي معاه وجنه شي ما صار


ومن اليوم ورايح اذا قالج روحي نامي بيت اهلج قوليله والله متعوده علي فراشي ومخدتي .. ما احب اغيرهم

وقضبي ارضج في بيتج .. ولا تنامين برااا لو شيصير .. الا بيوم الولاده تروحين المستشفي وعقبها بيتج ..


لا تعودوون ريايييلكم علي نومه الاهل .. لانهم بيستحلونها


خليج طوول سنينج معاااه وطوول عمرج نايمه علي فراشج والعذر والله ما احب اغير مكاني ايحوشني ارق وقلق ..


وامشي علي هالمواااال .. وشوفي بعدين اذا بطل حلجه وقالج نامي برا


حتي لو بيسااافر خليج في بيتج .. لو شيصير ما تتحركين من مكانج حبيبتي اخذيها نصيحه من اختج العوووده اكبر غلط النوم عند الاهل .. يوزووو من هالعاده .

 

[@همس المطر@]

سالية لييية
شنو السبب
حلو تروحين وماكو احد
وتنامين بروحك
لازم تعرفين شنو السبب

 

[أم ميميتو]

شنو لعبه هي كل شوي رايحه نايمه عند اهلج دام مافي شي ضروري يجبرج تنامين عند اهلج طنشي ولا تردين عليه قوليله انا ما ارتاح الا في بيتي حتى اذا رحتي عند اهلج قضي اليوم كله عندهم و بليل ردي نامي فبيتج

 

[الفردان]

حبيبتي

انا اشووف تقعدين معاه
تتفاهمين معاه
تسولفين معاه

يعني شي مو طبيعي
حتى لو بيتأخر يرجع بليل ياخذج

يمكن انتي تعبانه من الحمال تتوهمين
ترا في بنات نساتهم برياييلهم


و كلميه وان قالج روحي بيت اهلج
قوليله مابي مرتاحه فبيتي

وعقب اكيد بتتبطل سوالف و بتعرفين السبب

 

[صادقة بكلمتي]

حبيبتي وسعي صدرج ولا تبجين علشان ولدج او بنتج اللي ابطنج دايم اقول ترا اللي ابطنج يتشرب ويتجرع المج وحزنج ودموعج حررررررررررررام ماله ذنب ادري نفسيتج تعبانة بس انتي للحين فيها ردي معاه البيت لا ياج وقوليله بقعد معاك نتفاهم انا ابي اعرف بصراحة ليش توديني بيت اهلي قاموا يشكون بنومتي عندهم ويقولون لي حنا ما زوجناج علشان تيين عندنا لج بيتج وتبين تينا زوارة تعالي وقاموا يعاتبوني عبالهم انا اللي مهملتك وما ابيك اقعد ابيتي انت اللي تسويه ما يرضي الله بما انه ملتزم ويخاف ربه عدل عقولتج اشتغلي على خط الدين ومخافه الله لان اللي بقلبه وازع ديني ويخاف الله لازم يتذكر انه اللي يسويه ما يرضى ربه قوليله انت ما تبيني ليش خذيتني ليش حرمتني من اشياء وايد ليش تحسسني باشياء وادخل الشيطان براسي تخليه يوسوسلي باشياء عنك خوفيه شككيه شوفي شعنده بصراحة وقوليله من الحين امي تقولي لا ولدتي بالسلامة تنفسي ابيتج وانا ايلج واساعدج مع الخدامة بيتج اريحلج خلي يعرف من الحين ان نفاسج ابيتج خله يساعدج بالياهل علشان يعرف معنى المسؤولية والالم والمعناة اللي تعانيها خله يهد ربعه وياخذ ايام اجازة علشان يقدر يساعدج وووو جذي تعودينه حبيبتي الريال على ما تعودينه و ولدج على ما تربينه يعني اللي تعوووووووووووووووودي ريلج عليه بياخذ عليه ولا تقولين شلون اتنفس ابيتي ووووو عادي اعتبري نفسي لا قدر الله مالج احد ولا تدرسين برا معاه و ولدتي برا قومي بنفسج وخله يساعدج ترا انا و وايد بنات نسوي جذي وكاهو ريايلنا بسم الله عليهم صاروا يحددون ايام ربعهم ولا يتاخرون نسوا ايام العزوبية وعرفوا معنى الزواج والمسؤولية ولو شنو ما صاااااااااااااااااااااااااااااااااااااااااااااااااااااااااااااااااااااااااااااااار لا تنامين ابيت اهلج وقوليله لاتبلي هالطاري كلش ما ارو بيتنا الا زوارة والله يسخره لج ويسعدج وتقومين بالسلامة وتقر عينج بولدج امييييين طمنينا عنج وكلنا هني خواتج باذن الله

 

[roobee]

شكله متزوج وفاتح بيت ثااااني


اضحك معاچ بس غريبه
ليش مايبيچ وشنو الي يشغله
عنچ؟؟؟
او شكله تعود يعيش عزوبي
لانچ كل مرة تروحين وتخلينه بروحه
وعايش حياته بروحه،،،،،،
يعني تعود،،،
حاولين تحببينه فيچ وبالقعده معااج
لانه شكله مل من القعده معاج
او بالاصح مو مستانس
سوي قعده حلوه كل يومين
موشرط تلبسين وتشخلعين
لا رتبي الغرفة وحطي فواحه
وخلي بيتج ريحته روعه لان الرجال تجذبه
الريحه
وثاني شي سولفي معاه وونسي
لعبي معاه ورقه جنجفه اونو
بلي ستيشن ،،،،،
وضبطي. شاي وقهوه او عصاير

واذا عندج دوه يكون احلى،...... يعني
المقصد،،،

خليه يحب القعده معاااج
ويشتاق للبيت
ومايتحمل انج تنام ببيت اهلج
يضيق اذا رحتي عنه،؟؟

 

[Gifts&Occaions]

انتي عودتيه كل ماقال روحي نامي بيت اهلج رحتي .. انتي مره متزوجة خلاااص ماتنامين الا بيتج مع زوجج ولا تبين تنصدمين بيوم تلقين وحدة ثانية نايمة بفراشج !!
واي عذر يقولج اياه لاتصدقينه .. ليش يلح على انج تروحين بيت اهلج .. ايب رفيجته البيت .. اصحي !!!!!!!

 

[ام الزين2000]

زوجج غاااامض لازم تسألينه هن السبب وتخلصين الموضوع والله اعينج حبي

 

[صمتها ونه]

امببببببببيييييييه !!!

مقدر اقووولج شي سوا الله يصلحهه !!!!!!!!!!!!!!!!!!!!!!!!!!!!!!!!!!!

 

[ạ7ạśêś ~]

^^^^^^^^^
ماحد قصر بالكلام ي قلبي
وعسى الله يهديج ويسخر لج ريلج ي رب

 

[حساسة مصر]

من حقك تشكي فيه دلوقتي

اللي بيتجوز بيكون عايز مرته جنبه عطول و خصوصا اذا حامل

اذا حامل يشيلها فوق راسه و يبين لها انه عايز بس يخدمها و يفضل لازق لها تحت رجليها

ده قولي له انتا عايز تخلص مني ف البيت ليه ؟؟

انا مش عايزة امشي انا عايزة افضل قدامك هنا خليني هنا معاك

وبعدين لو الموضوع طول او استمر يقولك امشي بيتكم ابدأي راقبيه و شوفي تصرفاته لا يكون يجيب بنات البيت

ولا حد يجي له وانتي مش شايفة

وان شاءالله مايطلعش اللي في بالك ولا يكون فيه حاجةوحشة

الله يوفقك يارب

 

[دمعة جنون]

مردي مثل الاخوات الي فوق ^.. اذا قالج روحي عند اهلج قوليله ماقدر استغني عن بيتي خلاص صرت ماعرف انام الا في فراشي

حتى لو حاول فيش لا تروحين ^^

ان شاء الله تنحل مشكلتكم

 

[قطوووة]

ترى موضوعه مريب