ساعدوني مع ولدي

[المسكـ]

السلام عليكم

ودي اقولكم معاناتي مع ولدي

توه كمل عمره 4 سنين الله يخليه لي ولابوه

ولدي مواليد شهر 10 برج الميزان نفس شخصيتي لاني نفس البرج

الحاصل انه عنيد لابعد الحدود كنا عايشين ببيت اهل ريلي وطلعنا من عندهم واعتقد ان هالشي اثر عليه وايد خاصه انه وايد متعلق فيهم لاني انا وقتي كان اغلبه بالجامعه وبالدراسه وبين الكتب يعني تقريبا 3 سنوات من حياته انا وجودي معاه شبه معدوم وطبعا مارضعته لاني لاعندي وقت ولا فيني حليب عاشر يوم من ولادتي داومت الجامعه يعني حتى نفاس مو مثل البشر وطبعا طلع علي كله بولادتي الثانيه عوار ظهر وعظام وحملي ضعيف ومعاي نزيف
نرجع حق محور حديثنا طبعي ملوله للاسف ولاني دايما متوتره دايما اصرخ عليه وتربيتي له كلها اوامر طبعا هالشي مو عاجبني كللش .
الشي الثاني كل يوم وكل ساعه وكل دقيقه يحن ويحن ويحن ويحننننننننننننننننننننننن
يبي يروح عند يدته وضعي مايسمح لي اطلع وريلي دوام صبح وعصر وماودي يتعلم ينام برا البيت
ودي يصير فيه حنيه علي ودي يقول ابي امي بس للاسف .... ماكو هالشي
وطبعا داااااااااااااااااااايمااااااااااااا يصارخ بكل شي يطلبه يصارخ وانا اكلمه بصوت هادي اقوله لاتصارخ ويعاند ويصارخ وطبعا لما يشوف ابوه مستانس عالوضع يزيييييييييييييد الكم ويصارخ زياده وساعات ان بغى شي وماعطيته يبجي ويطق بايده وريله بالطوفه ويصارخ من قمة راسه مرات اكبت داخلي ومااطلع نرفزتي جدامه مرات اكون اوردي متنرفزه فاقوم واشفي غليلي واطقه .
طبعا يكسر خاطري واقعد ابجي لاني ماعرفت اربيه تربى عالحنه والانانيه وحب الذات وتربى على الدفاشه وطولت اللسان ودي اغير هالشي فيه بس للاسف ليلحين موقادره
وطبعا انا حامل بالثاني ومادري شلون بيكون الوضع هل راح ييتم جذي ولالا؟
وعلى فكره يزور يدته مرتين بالاسبوع وانوديه الالعاب واشتريله اللي يبي وطبعا حاولت معاه طرق وايد منها كرسي العقاب او انه يوقف عالطوفه او اني احرمه من شي يحبه بس ان شاف ابوي ولا ابوه ولا يده ولا يدته اين ويستخف يصير مينون يحسسهم اني كابته مشاعره طبعا امي معاي ماتحب طفل مو مؤدب تحاول اتقوم سلوكه بس للاسف عيزت منه
شنو الحل تكفووووووون فيدووني موقادره اسيطر عليه ومابي اخووه يتعلم اطباعه ولايتربى مثله ابي حل قاطع هالسالفه وايد مؤرقتني ووايد افكر فيها مادري شسوي اتصدقوون فكرة اوديه طبيب نفسي بس خفت يطلعون حجي عليه انه مينون ماشالله اهلنا بخوور

يارب اهدي ولدي وعقله :eh_s(11):​

 

[ديانا سبنسر]

ولدج عمره كبير ويفهم تقربي منه وسولفي عليه واشركيه حتى بتريبة البيبي الياي لاتزفين ولاتطقين تقربي منه بس اول مرة ثاني مرة راح تظبط معاج الله يخليه لج يارب

 

[ام كوثر2007]

لازم الكل يساعدج انج تعدلين سلوكه ..


ما يصير انتي تسوين شي ويده والا ابوه والا احد من اهلج يخرب ..


لازم تفهمين اللى عندج يقوفوون معااج . ولا ادلعينه واااااااايد الصبي شدي عليه ترا بعد جم يوم بيعذبج اكثر من جذى .

 

[وردة الكاميليا]

ليش حبيبتي مكبرة السالفة طولي بالج عليه اشوية وانتي بعد حامل والنفسية لها دور بعد خليه قريب منج وهيئيه نفسيا عشان يستقبل البيبي الياي وفهميه انج تحبينه وايد الله يحفظه ويهديه ويتمم عليج

 

[iLLuMinaTion]

طولي بالج

 

[نوناتي حياتي]

مثل بنتي مضايقتني الله يصلحهم

 

[المسكـ]

اي والله الله يصلحهم والله مطوله بالي عالاخر بس ساعات الواحد والله العظيم ماله خلق عمره هذا ايي يحن بعد واااااااااااااااااي حزتها بشق هدومي اللي مساعدني كان اول خدامتي فلبينيه يحبها وتعلب معاه اما الطوفه اللي عندي الحين بس فلجه حلجها واتطالعه والله لو تشوفه ماسك جمر ماتقوله لا طبعا اثيوبيه والله فوق غبائها دعالة ولدي
والله يعينني على تربيته
بس قاعده اهيئه نفسيا لاستقبال البيبي كل خوفي انه يسوي فيه شي واي يمه ساعات اقوله منو بيساعدني ويمشط حمودي ولا منو بيسويله ميلك ؟ يقول انا اقوله شاطر حبيبي انته احسه مستانس بس اول ماحملت قتله بييلك اخو تلعب معاه قال والله امووت لوووول شعرفك انته بالموت بعد عاد انا خفت بيني وبينكم

 

[ام الحلوااات]

وســـعــــي صــــدرررج عــلـــيــــه وخـــلـــيـــج مــعـــــاه هــــاديــــــــه وشــــوي شـــــوووي بــيــســتــجـــيــــب لــــج بـــس الــمـــفــــروض ابــــوه مـــايــضــحـــك عـــلـــى تــصـــرفــــاااتـــه جـــــــدااامــــه هــــاالـــشـــــــي يــخــلـــيـــه يــتــمـــااادى اكــــثـــــر​

 

[منو انت]

انتي بعد قاسيه عليه حييييل

يعني شي طبيعي ماراح يصير حنون معاج مايشوف الا الصراخ والعقاب ويشوف من ام ابوه الدلع والبوسات والكلام الطيب اكيد راح يكون مشدود لها اكثر

نصيحه اطلبي منه اللي تبين بهدوء وخل يتعوود اذا صار زين ويسمع كلامج ان له هديه بالمقابل واكيد راح يعرف انج اذا رضيتي عليه راح يشوف شي حلو منج

فتره وتعدي وان شاءالله يكبر ويتعدل شخصيته بس شكله عصبي الاخ يطق بالطوف والله موشوي الله يصلحه * _ *

 

[خريجــة2014]

حبيبتي الجآهل يتأثر حيل بمعاملة آلآم له يعني انتي تزفين وتصارخين
عليه لا تقولين مو بإيدج صح انه مو بإيدج بس بعد الجهال يبيلهم
طوووووووووولة بآل واهو مو مني والطريج ماخذ هالطبع حآولي تكسبينه
مرة ومرتين وثلاث حتى لو ما تقبل منج تمي على هالشي وخلي معاملتج معآهـ
حلوة ونفسيتج زينه كل شي بالمسآيس يصير وخصوصا انه طفل حولي تكسبينه من الحين
لانه لا كبر واهو على هالطبع بيكون الوضع آصعب عليج وانتي الحين حآمل عسى الله يقومج بالسلامة
اذا جبـتي الجاهل بآجر لا ادلعين الجاهل وتخلين الاهتمام كله له جداام اخوهـ !!
رآح يزيد جذي وهالشي يولد الكرره والغيرهـ والعنآد ~

وعسى الله يخليج لهم ويخليهم لج

 

[المسكـ]

منو انت : صح كلامج وحده عصبي ولدي للاسف طالع علي ماطلع بارد على ابوه والله يعيني وصح ساعات احس اني قاسيه معاه وان شالله احاول اعمل بنصيحتج

بنت الاكابر مشكوووره حبيبتي عالرد وفعلا كلامج عدل ان كبر راح اتعب زياده