ساعدوني بنتي موراضيه اداوم اولى ابتدائي

[فراشه ورديه]

السلام عليكم

اشلونكم

تصدقون اني مانمت من يوم مابدت المدرسه اللهم ساعتين ثلاث وقولوني انتفخ بنتي مو متعوده اداوم بالروضه

ومتعلقه فيني حيل لدرجه اني بحياتي كلها مااطلع مكان الا وهي معاي والمصيبه اني انا بعد متعوده عليها

مشكلتي الحين انها مو راضيه اداوم للمدرسه يعني اليوم ثلاث مدرسات يالله خذوها مني وقفلو باب المدرسه وقصه طويله

وماساه قامت اتصارخ لدرجة ان المدرسه كلها تسمع صراخها وانا واقفه وراء الباب وطايحتله بجي

الحين مادري شنو اسوي واشلون اتصرف وهذي حالتنا كل يوم ياربي شنو هالعذاب بنتي المسكينه متعذبه وانا اكثر منها

انزيين مافي حل آخر انصحوني قولولي شنو اسوي انا غلطانه ولا استمر بطريقة انهم ياخذونها مني كل يوم بالغصب

والصراخ انزين بسال سؤال في عندنا طريقة منازل للابتدائي يعني يصير ادرسها بالبيت وتاخذ شهاده فيدوني الله يجزاكم

خير عطوني حلول

 

[laylaas]

والله كأنج تقوولين قصة اختي
انا اختي ماداومت السنةالي طافت والسبب البجي والدلع من تبجي وترجع نقولها ماكو مدرسة
وتغيب يمكن داومت اسبوع واحد بس
حراااااااااااااااااااااااام راح من عمرها سنة
المهم هالسنة دخلناها اولى ابتدائي وبجي والحاله حاله فقلت حق امي خليها تبجي
مصيرها بتسكت وبتشوف البنات وبتتعرف عليييهم
بس اليوم اهي غااايبة تعبانة
واخاف تتعود عالغيااب نفس السنة الي طاافت

فنصييييييحة قولي لها انج موجودة بالمدرسة وانج تشوفينها من بعيد او
انج موصيه ابلات عليها تعرفيينهم عشان ماتخاف وتتطمن وعقب ماترد راجعي معاها شنو بالجنطة وشنو يبووون
وقولي لها ذكرياتج باولى ابتدائي وشلون تعرفتي عالبنات وان احنا نتعلم وندش المدارس عشان الكويت وعشان تتوظف وتكشخ

ومن هالحجي وييبي لها هدية حلوة وغالية نهاية كل اسبوع اذا ماغابت طول الاسبوع وديها مكتبة جرير او سبيس تون او تلعب فبروووي
يعني شي حلوو وقيم


والله يحفظ بنيتنا وبنيتج من كل مكروووووه

 

[كنووز]

الله يشرح قلبج وييسر امور بنتج

لا تحاااتين معروف هالايام صعبببببببببببببه بس ترا اهي مجرد ايام او اسبوع اسبوعين بالكثير

وبعدين كان شيء لم يكن....تصبري

مثل ما قالت الاخت لا تغيبينها بعدين بالعكس بيزيد صراخها راح تشوف ان البجي طريقة مجدية

في طرق تهديها

مثلا: استاذني من الناظرة والمدرسات وشرحي كاااااااااامل احساسج لدرجة انج بتخلينها تدرس مناازل وقولي لهم ابي ادخلها الصف ولو اول مره ...ا

ولا تطولين لميها وبوسيها وكلميها وخليها تشوفج وقولي لها انج ماراح تتركينها قوليلها انا بس بخليج تلعبين مع رفيجاتج شوي وانا راجعة لج (قنعيها بفكرة انج ماراح تتركينها)

خلي بايدها شي تحبه منج (لعبة صغيرة مثلا)

والاهم سمي عليها وادعي لها من قلبج

ويا رب تجين تقولين لنا بعد جم يوم او جم اسبوع بالكثييير ان الموضوع صار عادي

وعقبال ما تبشرينا انها متفوقه بعد

تحياتي

 

[مشغوله و محتاسه]

انزين بسال سؤال في عندنا طريقة منازل للابتدائي يعني يصير ادرسها بالبيت وتاخذ شهاده فيدوني الله يجزاكم

خير عطوني حلول

لا حبيبتي ماكو جذي .... هذي سوالف امريكا اخترعوها من زحمة مدارسهم ... فسمحو للي مو عاجبه التدريس و يبي يخفف ما يشوف شر بس يحضر الاختبارات


الحل انج تستمرين تودينها للمدرسه
بالطيب بالغصب تروووووووووح
ساحليها شوي ... و شدي عليها شوي
فهميها انها كبرت وان المدرسه شي حلووو و وناسه
اشتري لها هدايا بسيطه و قولي لها اذا ما بجت بتحصل هديه ..

طلعي من البيت بدون ما تاخذينها ... لو مشوار لفرع الجمعيه و تردين ... بس خل تتعود ان مو كل
مشوار اهي معاج ..

اخذييها نص الدوام اول الايام ... بس مو وايد ..
و ترا اغلب اليهال يبجون بس عقب اول ما يشوفون الام مشت يستسلمون ويسكتون ..
و حطي في بالج ان الطفل ما يضر نفسه بالبجي ... يعني ما عليها شر ان شاء الله
البجي مجرد وسيلة للتعبير ..
انتي غلطانه تخلينها لاصقه فيج بهالطريقه .... لازم تخلينها تستقل و تطلع شخصيتها
و الحين فرصتج اتضبطين الامور

ديري بالج من الغياب ترا الحين النظام اليديد فيه رسوووب بسبب الغياب .. و في انذارات من اول 5 ايام متواصله بدون عذ مقبول
حرام العام كان في ولد دلوع و امه كله مغيبته واخرتها رسب و عاد السنه !! ضاعت سنه من عمره بسبب الدلع والغياب

طووووولي بالج و ان شاءء الله تكون الامور تمام

 

[م فطومه]

اممم والله عورتي قلبي ادري ان هالشي صعب بس ماكو شي من غير حل

هذا يعتمد على المدرسات بعد يعني خل يعاملونها معاملة خاصة لانها متعودة عليج ترى هالشي موعيب ولا هو شي غلط بالعكس حلو ان البنت تتعلق بامها احسن من انها تتعلق بهالخدم

شوفي يالغاليه.....

حاولي طبعا بالكلام والقصص انج تذكرين المدرسة بصورت زينة ..روحي المكتبة خل تختار الستيكرات للدفاتر
وقومت الصبح حطيلها اغنية حلوة ولا مسرحية هدى حسين خخخخخ انا بناتي جذي
في نسرحية لعبدالرحمن العقل اسمها abcd
حلوة وااااااااااااااااااايد خل تتشوق للمدرسة
وتريقي معاها ولما تبجي لميها وكلميها وانتي لامتها

ودايما اوعديها بانج ماراح تتاخرين عليها وانج راح تطلعينها لما تخلص المدرسة ..وديها مركز سلطان وتسوقي معاها او الجمعية
هالشي بالاول صعب بعدها راح تتعود
ولاتنسين دور الاخصائية النفسية بهالموضوع


وطمنيني علييها عاد انا مدرسة وامووت ببنات اولى

 

[فراشه ورديه]

مشكورين حبايبي الله يجزاكم خير ويجزاكم الجنه كلامكم ريحني وابشركم انها تقريبا خفت والحمدلله داومت بس طبعا بجي خفيف بدون صراخ وان شالله اني بطبق نصايحكم كلها الله يغفرلكم ويبارك فيكم ويعافيكم ويحققلكم كل امانيكم ان شالله بدعيلكم مشكورين لمساعدتكم لي

 

[هنـــد]

ياحياتي والله كسرت خاطري

خليها تتعود على المدرسه ديربالج اتعودينها عالغياب اهم شي السنتين الاولى بالمدرسه تتأسس فيها

وانتي قعدي معاها وفهميها انج اتودينها الصبح وتقعد اهناك 5 ساعات عشان اتعرف تقرأ وتكتب وبعدها تأخذينها على طول وقوليلها انا واقفه عند الباب انطرج بس اتخلصين

وبعدين لازم اتعودينها انج اتروحين بروحج احسن والله وخليها تعتمد على نفسها

ترى الدلال الزايد نفس نتائج القسوه الزياده !

يعني خلي علاقتج معاها وسط

 

[Dancing^Queen]

حبيبتي مردها بتتعلم
ولازم تخالط بنات من سنها
ولازم تتعلم بالطريقه الطبيعيه
يعني لين متا بتظل جذي؟باجر تصير مو اجتماعيه وشخصيتها ضعيفه وماتقدر تخالط الناس
خل تصير مستقله بذاتها شوي
تبجي يومين ثلاث وتسكت مايظر

 

[هدولى]

لازم تعودينها على المدرسه وتقويين قلبج وخليها تبجى مره ومرتين وثلاث لحد ما تعلم هذا لمصلحتها , وحاولى تحببينها بالمدرسه مثل تشترين لها ستكرات واغراض للمدرسه حلوه وتمرين الجمعيه تشترين لها حلويات , وهم حاولى تحطين ببالها أن المدرسه شى أساسى ومهم والله يوفقها انشاء الله .

 

[بنت جنيف]

عاااااااااااااادي هالحالات انشوفها كل سنه بس ترى عادي لاتحاتين مردها بطخ وتسكت وعندنا بنات مدرسات طول اليوم بجي وصراخ يهز المدرسه هز يبون امهم

 

[[..كـــــرك..]]

جنها اختي

والمشكله اختي ماتبي دراسه وعقلها كله مع ام بي سي ثري وسبيس تون

اكلمها اقولها تعالي ندرس تقول لااريد اذهبي اذهبي <<< ياربي شالعاهات خخخخخخخخخخخخخخخخخخ


بس اشوا ان امي معاها بالمدرسه

اقولج شغله ماعندج وحده من الاهل مدرسه ؟ حطيها معاها بنفس المدرسه

وكلمي الناظره قوليلها بقعد مع بنتي وخلج عند قريبتج

بس ماكو حل غيره : (

 

[ســوســو]

لا عوديها وقوليلها اذا صرتي شاطره بييبلج اللي تبينه وشجعيها وحببيها بالمدرسه لا تصيرين نفس وحده اعرفها علبونه بنتها ماتبي الدراسه

وبس بجي طلعتها من المدرسه واهي بخامس والحين البنت مفروض بـ 8 متوسط واهي قاعده بالبيت < خربوا حياة بنيتهم

 

[فراشه ورديه]

مشكورين حبايبي الله يجزاكم خير والله يعطيكم العافيه عالردود الحلوه ماقصرتو حبايبي

والله انا تقطع قلبي عليها حتى نويت اروح عليها هالسنه كنت مابخليها اداوم بس كلامكم حفزني وشجعني

والفضل لله ثم لكم الله لايحرمني منكم كويتيات

وابشركم انها اداوم وبدون معاناه وبجي وصراخ بس ان شالله تستمر يارب

 

[جوجو.]

امبي من صجج تبينها تدرس مسائي لامايصير
وبعدين روحي معاها وقعدي معاها أول جم يوم وبعدين كشتي فيها قوي قلبج