ساعدوني بصالتنا تعالوا شوفوها

[caribou]

شلوونكم بنات شخبااركم ؟؟

ابيكم تساعدوني بصالتنا احنا تونا شارين الأثاث بس مو عاجبني عطوني أفكار شلون أرتب القعدات والألوان اللي ادخلها والستاير والاكسسوارات و... كل شي أي فكره ببالكم قولولي عنها بليز حتى لو تحطون صور اخذ منها الافكار


هذي الصور

 

[sunshine22]

تقدرين تغيرين خام الكنب
روحي البلوكات في خام ارقى من هذا شخبااااااري بني ونكد
اسمحيلي بس حرام هالاثاث موضه مغبررررره اصلا

ولا تزعلين امانه

 

[caribou]

لا ما ازعل بالعكس انا مو عاجبني وابي افكار .. شنو الألوان الحلوه ؟؟ واقدر اخليه بني وألبس الكوشيات ألوان ؟؟

 

[Sweet.Heart]

اخذيلج فره اب ميداس وغيره
شوفي افكارهم وترتبيهم ..
ولا تتقيدين اب لون واحد

وان شاء الله انشوف صالتج بعد التعديل ..​

 

[احب المدرسة]

لون الطوفة خليه بس اشتري قنفات سادة وبعدين انتي من ايكيا او زارا هون اشتري مثل شرشرف او شي ماادري شسمة حق القنفات تكون بنفص لون الطوفة تقريبا او مختلفة وبعدين نفس لون الشرشرف سوي خطوط بالطوفة

بتطلع وااايد حلوة

 

[caribou]

رحت اليوم ميداس شفت الأثاث وزاغ قلبي شحلاااااااتهم الألوان والترتيب يهببببببل تحسفت ليش ما خذينا منهم لانه الصاله مو انا منقيتها والحين مانقدر تغير لانه تونا شارينا بس بنات اكيد عندكم افكار وانشالله تقدرون تساعدوني انا ماعرف وايد بهالسوالف

 

[Sweet.Heart]

+ اييي و القنفه اللي يم الباب مكانها غلط ، حطي طاوله و زينيها تطلع نااايس
يا حيااااتي ميخالف ان شاء الله المره اليايه تشترين من عندهم​

 

[عبير-الشرق]

مادري اجس لو تغيرين لون الطوفه تخلينها فاتحه والبردات تخلينها ساده وناعمه احلي لان الاثاث وايد مشجر فيصير خبه غيري الخام مال الكويات خلي ساده ولون فاتح شوي عشان تكسرين التشجير والقنفه الي صايره بروحها شيليها وحطي فازه اوطاوله ناعمه

 

[caribou]

sweet heart عدل كلامج بشيل القنفه وبدور نفس هالطاولات تقريبا شرايج فيهم؟؟

عبير الشرق ودي أغير ألوان الكوشيات واسويهم ساده مثل ما قلتي بس شرايج شنو الألوان الحلوه ؟؟

 

[Sweet.Heart]

ايييي ناااايس
ولا تنسين تشترين مناظر حلوة​

 

[حلو القصيد]

موووفقه بتغيير

 

[ريمي اميري]

البركه سكنكم واثاثكم حلوو كثير
ماشاء الله
اذا تبين شوي ملاحضات مثلا الكنب الكبير الاصفر الي كانه جنب الباب هذا سكري فيه الجلسه الي
مسويتها وحطي مكانه الكراسي الي يم الستاره

ملاحضه ثانيه الزوالي او السجاد يبيلك شي اكبر يطلع احلاااا ..

 

[ســتارز]

تبارك الله الصالة حلوة بس يبيلها شوية رتوش


شوفي ياقلبي الصورة الاولى يبيلج بردة مشيرة بني فاتح باغمج لان الطوفة فاتحة وسادة

الصورة الثانية الدرايش يبيلهم بردة دائرية عليهم كلهم يعني متصلة نفس اللي بالصورة الاولى

وزولية دائرية بالنص الوان تقريبا مثل الطوفة لان القنفات لونهم غامج

الصورة الثالثة تشيلين القنفة اللي يم الباب وترحلينها للصورة الرابعة وتحطينها بدل الاخيرة عاليسار

واللي رحلتيها حطيها بنفس الغرفة عند القنفة الاولى اللي مثلها

موفقة

 

[noorq8]

بالعكس قنفاتج وايد راقيين وحلوين انتي مو شايفتهم حلوين لأن مافي ستاير لي حطيتي الستاير بيبين زينهم بس في الكرسيين الملكي اللي تحت الشباك هذول غيري مكانكم بالقنفه اللي يم الباب أم مقعدين عشان تدخلين الطقمين مع بعض وقطعة السجاده الصغيره اللي مقابل الكرسيين الملكي مالها داعي لانج حاطه قطع تحت الطاولات وأتوقع ان لون الطوفه مو أصفر غامق مثل ماهو مبين أظن التصوير مغمقه شوي ماتحتاجين ثروهات ولا شي صدقيني مع الستاير الساده واللي تحتهم شيفون ساده بس لهم هدب بألون القنفات بتشوفين جمال الأطقم , تتهنون فيهم وتوصخون بالعافيه

 

[caribou]

مشكوورين بنات ما قصرتووا :*** فدتوني وايد بس انا ودي أدخل ألوان مثل الازرق او البرتقالي او البنفسجي شرايكم راح يطلع حلو؟؟ ادخل هالالوان مع الستاير و الكوشيات والاكسسوارات

 

[semsem2031990]

حطي كوشايات خضر فاتح تحصلينهم بصفاة الغانم
برادي اخضر فاتح و كثري الاضاءة و حطي اشجار طبيغية و لوحات طبيعية موجودة بالسوق الايراني
شيلي التحف الي لونها غامج و حطي تحف ملونه تحصلينهم بسنتر بوينت

 

[توتاتوتا]

بالعكس الكنب مناسب للاستقبال بس عدلي بالصبغ و بطريقة سهله اطلبي من صباغ يزيد على الجدار نقش فلفت اختاري شكل النقش مثلا معين و يرصه و يسير كانه ورق جدران شوفي اشكاله بالنت حلو او روحي اصباغ الجزيرة تلقينه عندهم و زيدي من التحف و الستاره اختاري ستايل كلاسيك و كبيري الزل الى حدود الكنب عدلي ترتيب الكنب بحيث كله على دائرة وحدة بالذات القطع الكبار لا تخلين شي منها متعاكس مع الثاني و اذا بتدخلين الوان ما يناسب البني الغامق الا الوان فاتحه مره و جربي البيج انا ماحب مع البني ازرق

و اتمنى الصورة تساعد

اما ميداس بصراعه زايرته من يومين كئيب و شين مافيه من الزين شعره

 

[caribou]

بنات من وين اشتري ستاير حلوه واسعارهم مناسبه ؟؟

 

[ألوان طيف]

اول شي مبروكين ان شاء الله و عساه منزل مبارك
ثاني شي ، بما ان قنفاتج غامجين فيبيلج تفتحينهم انسي الاخضر و الأزرق حده مو لايق، دخلي الاوف وايت و البيج، روحي البلوكات و اختاريلج لون فاتح راقي و لبسي الكوشيات واذا تزيدينهم شوي عشان يضيع لون القنفات الغامج، حطيلج قطع زل كشخه و اكبر من اللي حاطتها، الستاير خليها فاتحه و ناعمه و خلي لونها نفس اللون اللي راح تختارينه حق الكوشيات. بالنسبه حق لون الطوفه فجزء منها راح تغطيها الستاير و جزء اللوحات و حطي مرايه كبيره حلو و ممكن تحطين طوفه وحده وول بيبر فاتح ، بالأضافه الى الثريات الكبيره الكريستال، و ان شاء الله راح تعجبج بعد ماتخلص اي و نسيت اقولج الستاير سويها تفصال من الضجيج. و اي خدمه انا حاضره عالخاص... موفقه

 

[caribou]

ثانيكووو بنات يعطيكم العافيه :***
حبايبي الستاير اخليهم كل الصاله نفس اللون ولا كل قعده ستايرها لون مختلف؟؟ واذا سويت القعده دائريه كلها اخاف يطلع الصوب الثاني فاضي اذا بس حطيت فيه الكراسي ؟! والكوشيات قصدكم عن الكبار اغير لونهم ؟؟ لانه الكوشيات الصغار اهم فاتحين لونهم ذهبي .. اخر سؤال جنه اذا لبست الكوشيات لون بيج او اوف وايت يطلع شكل القعده عادي ؟؟ الحين مو جنه هابين يدخلون ألوان ؟ احس يطلع احلى شرايكم ؟ وبسس اسسفه طولت عليكم مصختها سامحوني فديتكم