ساعدوني انا محتاره

[شمس ورديه]

مرحبا
بصراحه انا محتاااااره وابي مشورتكم خواتي انا دايم اقرا ردودكم وماشااء الله فيه بنات فاهمين وواعيين بردودهم
سااااعدوني وشوروا علي الله يجزاكم كل خير
مالي احد استشيره مالي خوات كبار ينصحوني انا البنت الوحيده واخواني كلن مشغول بحياته وعياله وامي مره كبيره
وانا عمري 27 وسبق لي الزواج وتطلقت بدون سبب وربي عالم اني انظلمت بزواجي الاول
اتقدم لي واحد من قرابتنا اصغر مني ماسبق له الزواج اعتقد عمره 23 بس لسي مو متاكده ممكن 24
وراتبه يعتبر كويس نوعا ما وفيه ناس تمدحه لنا وهو عارف بوضعي وراضي وراح اسكن بقريه (وهذي نقطه بعد مخوفتني اخاف ما اتاقلم خصوصا واني بالمدينه طول عمري وراح اكون بعد بعيد عن امي
امي ماهمها اهم شي تبيني اتزوج وتفرح فيني مع اني شايله همهااا مرررره
انا محتاره اوافق عليه والا لا
خصوصاا بوضعي هذا اخاف ارده واندم واخاف اوافق واندم اني اكبر منه اخاف ما يكون فيه تكافئ وما ادري عن شخصيته كيف تكون
شوروا علي وربي اني في حيرررره مايعلم بها الا الله

 

[فديت حلاتي]

استخيري الله وماخاب من استخار

بالتوفيق

 

[روانتي 12]

استخيري
واذا ارتحتي وافقي عليه

وانا اقول وافقي الواحد مايدري الخيره وينها . . والخيره فيما اختاره الله

 

[آشوآآآق]

استخيري و الله يكتب لج اللي فيه الخير

 

[وش تبي]

عادي فرق العمر مراح ياثر بشي انا من رايي انج توافقين ماتدرين يمكن خير لج

 

[كويتية وكلها جاذبية]

الله يكتب لج الي في الخير لج حبيبتي بس لازم تستخيرين واذا ارتحتي توكلي على الله اذا ما ارتحتي
خيييييييييره من ربج اهم شي تعرفين وضعه اكثر تقعدين عند منو شنو وضعه الوظيفي

عادي يوديج تزورين امج ليش ما اخذ من ناس اقرب منه بالمكان والعمر :bbbiu:

انا لو كنت مكناج لازم اريح راسي من كل هالأسله وعقب اقرر حاولي تعرفين اكثر عنه موفقه يارب

 

[أروح فدوه لك]

صلاه الاستخاره اول يا حبيبتي

والعمر مو مهم المهم الطيبة والاخلاق يحبج ويصونج

 

[دمعه قهر2]

في نقطة مهمه و هي انه ماسبق له الزواج اخاف في سبب او عيب يخليه ياخذ مطلقه
انا اتعاطف معاج بس والله عشان مصلحتج تأكدي من السبب اللي خلاه يخطبج و ليش ما اخذ بنت ماسبق لها الزواج؟ مع ان العرف السائد هو ان الولد اللي ماسبق له ياخذ بكر و المطلقه تاخذ مطلق او متزوج

 

[شقآوه أنثى]

استخيري احسن

 

[دلال و غلا]

من بعد الاستخاره العمر ما يأثر اذا كان انسان صالح و واعي و عقله كبير
ياما رياجيل يجون كبار بالعمر و العقل عقل مراهق و السكن ف قريه ما تعتبر مشكله
و امج الله حافضها ويطول بعمرها كل بين فتره و فتره روحي لها و اقعدي واستانسي
و لا تنسين انه محد دايم لاحد و المره بشكل عام محتاجه رجال يحبها و يصونها ويوقف معاها


موفقه حبيبتي

 

[اللّہ معي ، ♡]

حبيبتي بمثل هالامور انا اقول الاستخاره اقضل شيء واهم من راينا

بعدين شوفي نفسك هل انتي بالشكل اكبر منه ولا انتي من النوع اللي تغطين هالثغره باناقتك ودلعك
عشان مايجي يوم يقولك انتي اكبر مني وتنجرحين .. احسبي حساب هالشيء

بعدين انا قلبي مو مرتاح له بصراحه وسالفهة القريه بعد
انا. اقول الصبر زين اصبري واستغفري ورب العالمين يكبر حضك ويجيك واحد احسن منه

لان ٢٤ احس صغير على تحمل المسؤليه خصوصا شبابنا ماهم كفؤ انهم يتحملون مسؤليه زوجه و ولد


استخيري وفكري وشوفي شاللي تقررين عليه

انا اقول تصبرين لين يجي واحد مناسب احسن من اتزوجين وتفشلين مره ثانيه بزواجك

اعتقد اصبري واستغفري وربي بيعوضك حبيبتي


الله يسعدك


دعواتك لي ربي يحقق اللي اتمناه

 

[ملكة الكلمه]

من وجهة نظري افضل اولا ان تستخري وتصلي وتدعي اذا حسيتي فيه راحة وقبول توكلي ع الله
اما من ناحية العمر عادي اسمع كثير بنات أخذوا اصغرمنهم بكثير وماشيه حياتهم وعايشين بسعادة
وانتي فرق بينكم ماهو كثير

 

[مناوي الكويت]

انا اقولج استخيري وثانيا وايد حريم خذوا اصغر منهم وعاشوا احلى عيشة ان كنتي كبيره او صغيره مو مهم المهم اشلون تعاملين ريلج الله يسعدج ويهنيج

 

[@@نور الدنيا@@]

استخيري اختي ويوم تملجووون اقعدي وياه وشوفي اطبااعه وكيف نظام حياتهم و ان شاء الله بتحصلين اللي يعجبج منه يارب و عادي العمر مش مهم والله .. و خير مثال لج سيدنا محمد عليه افضل الصلاه و السلام تزوج السيده خديجه وهي اكبر عنه .. ف اقول لج يعني العمر ابد عمره ماصار عائق و ان شاء الله بترتاحين وياه وربي يكتب لج اللي فيه الخير ..

 

[أعشقه]

البنات كفو ووفو وماحبيت اطلع بدون دعوه حلوه مني بالتوفيق ..
وبالنسبه لمخاااوفك حاولي تجلسين وتسالين اي احد من اهله عن مخاوفك قبل ماتوافقين
حاولي تريحين عقلك وقلبك من اي اسئله تخوفك منه او من العيشه معه واذا ارتحتي وافقي
وبشكل عاااام انتي محتاجه لزواااج .. ربي يسهل وييسر لك ..
وبالنسبه للعمر .. هذا الشي يروح ويرجع عليك انتي .. اذا تشوفين انه عايدي ماياثر هالشي عليك وع علاقتك معه مستقبلاا وافقي واذا بتشوفين ان هالشي راح ياثر او يضايقك لا توافقين .. يعني هالنقطه تروح وترجع عليك انتي .. لان انتي الاساس فيهااا ..
ربي يوفقك ياقلبي ويريح قلبك .. الله يسهل امورك لكل خير وصلاح ..
.

 

[آلمتوهقه]

الله يكتب لج الي في الخير لج حبيبتي بس لازم تستخيرين واذا ارتحتي توكلي على الله اذا ما ارتحتي
خيييييييييره من ربج اهم شي تعرفين وضعه اكثر تقعدين عند منو شنو وضعه الوظيفي

عادي يوديج تزورين امج ليش ما اخذ من ناس اقرب منه بالمكان والعمر :bbbiu:

انا لو كنت مكناج لازم اريح راسي من كل هالأسله وعقب اقرر حاولي تعرفين اكثر عنه موفقه يارب

الله يكتب لج اللي فيه الخير يارب