ساعدوني ... اسبوع 38 وعنق الرحم مو فاتح للحين ... شاسوي؟

[مراسي الحب]

اللي مجربين من قبل ...

في اول حمل لي ... خلصت شهري وخذيت عقبه 4 ايام ... وعقب توسعة من الدكتورة نزل الماي .. وماكو طلق ... جربوا 12 ساعة مع التحاميل 3 مرات على ما بدى الطلق ، وبعدين وركبوا لي طلق الصناعي 6 ساعات .. وآخر شي بنتي تعبت ... ودخلت قيصرية لأن ما فتح الرحم غير 2 سم من بداية التاسع ....

والحين ... انا نص التاسع ... والرحم مو فاتح كلللللش .... وعنق الرحم مو مساعد كللللش ... شاسوي؟؟ مع انه دكتورتي قالت لي فكري بالقيصرية ... شاسوي؟؟ أنطر؟؟؟ ولا اسوي قيصرية ....

واذا نطرت وما فتح الرحم .... هم اكون تعبت على الفاضي ...

واذا ولدت بالقيصرية ... يعني اللي بعدهم كللهم راح يصيرون قيصرية ....

على الأقل ادعوا لي ... الله يسهل علي :yaaaaaarb:

 

[Emanova]

الله يسهل عليج و يكتب لج اللي فيه الخير

 

[RoSe PeRFuM]

كثري اكل الرطب ،، شربي ينسون.. امشي كل يوم نص ساعة .. كثررررري الجماع...وانشالله على نهاية التاسع تنفتحين وتولدين طبيعي
أنا سويت جذي من بداية التاسع وبالاسبوع 38 ولدت

 

[نور-الكويت]

انا نفسج مراسي الرحم مسكر وناويه الدكتوره تولدني بطلق صناعي

 

[مراسي الحب]

كثري اكل الرطب ،، شربي ينسون.. امشي كل يوم نص ساعة .. كثررررري الجماع...وانشالله على نهاية التاسع تنفتحين وتولدين طبيعي
أنا سويت جذي من بداية التاسع وبالاسبوع 38 ولدت

ممكن اسال سؤال قليل ادب ... يعني اشكثر الجماع؟؟ وبعدين هذي كانت اول ولادة لج ولا الثانية؟؟؟ يعني مريتي نفسي بولادة قيصرية وبعدين سويتي كل هذا وفتح ارحم معاج؟؟

 

[لوكريسيا]

الله يسهل عليج ان شاء الله و الخيرة فيما اختاره الله .. ماتدرين وين الخيرة

ربي يهون عليج و يسهل عليج و تولدين و انتي و البيبي بصحة و سلامة هذا أهم شي

 

[مراسي الحب]

الله يسهل عليج و يكتب لج اللي فيه الخير

حبيبتي مشكورة عسى يا ربي توصلين اسبوع 38

 

[مراسي الحب]

انا نفسج مراسي الرحم مسكر وناويه الدكتوره تولدني بطلق صناعي

بس انا والدة قيصرية اول مرة ما تقدر تعطيني طلق صناعي ...

يعني لو اقدر اجرب الطلق وما يمشي ... اقول على الأقل حاولت وما مشت السالفة ...

 

[أم عامر]

الله يسهل عليج حبيبتي ويقومج بالسلامه
أنا معاج أعاني من نفس الحاله ولادتي الأخيره كانت قيصري وألحين ماراح يعطوني
طلق صناعي وألحين خلصت الأسبوع 39 وما في ولاده والرحم مسكر على الأخر
بس الفرق أن معاي طلوق وعوار من اول التاسع بس الرحم مو راضي يفتح وبكل ولاداتي جذي أطول ياله اولد
ولا اكون مطوفه فوق شهري اسبوع وخايفه هالمره لاتكون قيصري فقاعد اتدور واقرا يمين ويسار على شي يساعد على فتح الرحم بس قريت قبل شوي وانا احوس مقال ان شاء الله يفيدج ويفيدني وراح انزله لج علشان تشوفينه



وصفة ذهبية

بالله اسمعوني والله ما أكذب ياجماعه انا مجربه هذه الوصفه وعائلتي مجربتها كلنا نمدح فيها ومجربين فرق الولاده باستخدامها ومن غيرها...


عمل هذه الوصفه:
تفتح الرحم شويه شويه في مدة اسبوعين وانت ماتشعرى بحاجه
(ولله سلفتي راحت تراجع عند الدكتوره إلا الدكتوره استغربت قالت لها:الرحم عندك مفتوح اربعه سم انتى منتي حاسه بشي؟؟

وانا رحت للدكتوره وكنت بكر يعني حامل باول طفل ليا جاتني اوجاع زي الآم الدوره الشهريه ورحت وكنت امزح مع زوجي اقوله أتخيل تكون ولاده؟؟لأن الالام كانت مش جامده كثير

إلا الدكتوره تقولي الرحم مفتوح عندك سبعه سم؟؟)



الوصفه وطريقة عملها:



الوصفه عباره عن:

كمون + ينسون + نينخه + شمر + حلبه + محلب + حبه سوداء(حبة البركه)

طبعا كل الحتويات هاذى حبوب مش مطحونه

اما طريقة تناولها فهي كالتالى:

ملعقه صغيره من كل صنف تغلى في كاستين ماء الى ان يصبح المقدار بحجم كأس تقريبا تصفى وتحلى بالعسل وتشرب مع صحن صغير رطب

تشرب هذه الوصفه بعد مرور اسبوعين من الشهر التاسع كل يوم مره واحده


الله يسعدكم انشروا هاذى الوصفه لكل اللي تعرفوه

ترى انا ما اشوف حامل إلا اعطيها الوصفه سواء كنت اعرفها ولا لأ

الله يسهل لكل وحده حامل و يرزق اللي ماعندها اطفال.......

ولا تغفلوا عن نقطه مهمممه جدا جدا وهى الاساس لتسهيل الولاده وهى


الدعاء ..الدعاء..الدعاء........فالله عز وجل بيده تسهيل جميع الامور في حياتنا
والاكثار من تلاوة القرآن الكريم.......

عموما انا اعتذر على الاطاله..ولا تنسوني من دعواتكم واي استفسار انا حاضره

منقول من الغريب ، واسم العضوة ( جبا ياهوو )
اجو نشرها ولكم الأجر

وأي وحدة الله يسهل عليها ولادتها تدعيلي

 

[new^mom]

الله يكون بعونج ... بس انا اقول لا تجازفين وتحاولين انج تولدين طبيعي اذا هالشي فيه ضرر عليج وعلى البيبي
اولدي قيصريه احسن والله يكون بالعون

 

[ام يارا]

بعد عمري ذكرتيني بمعاناتي

انا توني من شهر و 12 يوم والده قيصريه

بس خذيت فوق شهري 11 يوم زياده

قالوا كثري جماع و اكلي تمر و سواالف اعشاب و خرابيط وامشي

واخرتهااااااااااااااااااااا شنووووووووووووووووو


قيصريه

بعد ما حاولت دكتورتي بطلق صناعي والرحم مسكر اخرتها بس فتحت واحد سانتي

قالت لي وزن الياهل كبير مو قادر ينزل بالحووض لان صغير وبدا الياهل يتعب لازم قيصريه



نصييحه نصيحه يا مراسي اذا بتصبرين كثري مشيي و لاتكثرين اكل سكريات و تمر و هالسوالف ما تفيد


وصبري يمكن في امل تولدين طبيعي احسن بوااااااااايد من انج تستعجلين و اخرتها تصير كل ولاده طبيعي


وعسى الله يسهل عليج و تولدين طبيعي و بشرينا يا حياتي

 

[مراسي الحب]

ام يارا مشكورة على الدعاء ... انا الحوض عندي ما فيه مشكلة ... بس الرحم مو راضي يفتح كللللش ... وعلشان قبلها قيصرية ما تقدر تعطيني طلق صناعي ... فيا انطر طبيعي كلللش .. او قيصرية ... والله محتارة ... انطر ولا خلاص عن مضيعة الوقت وخل البيبي يطلع الحين بدال ما يتعب؟؟

 

[وحده كويتيه]

الله يسهل امورج يااارب وانشالله تولدين طبيعي بدعيلج من قلبي صج

 

[مراسي الحب]

الله يسهل امورج يااارب وانشالله تولدين طبيعي بدعيلج من قلبي صج

يا حبيبتي ... ما قصرتي ... عساج دوم ذخر .. وعسى ربي يسهل عليج ان شاء الله

 

[whm]

توكل على اللة واولدى قيصرى ليش النطرة والتعب لج وللبيبي؟؟قيصرى خصوصا انج مسويتها من قبل

 

[كـــنـــزي]

عاد توني داشه القسم وبحط موضوع نفس موضوعج...

انا بجر وياقي لي اسبوع وادش العاشر..والرحم كلش مو فاتح والبيبي كبير قالت اخاف احط لج طلع صناعي الرحم ما يفتح.. والياهل يتعب.. وعطتني موعد الخميس وقالت اذا حركه الياهل زينه بنطر عليج 3 ايام.. وانا حدي خايفه.. اخاف تاليها تولدني قيصريه ..شسوي .. ومليت من المشي واصعد وانزل من الدري.. امس الصبح انهرت من البجي لاني مليت وتعبت وثقل مو طبيعي وما اقدر انام... بنات عفيه منو اكلت شهرها كله واولدت طبيعي..​

 

[مراسي الحب]

عاد توني داشه القسم وبحط موضوع نفس موضوعج...

انا بجر وياقي لي اسبوع وادش العاشر..والرحم كلش مو فاتح والبيبي كبير قالت اخاف احط لج طلع صناعي الرحم ما يفتح.. والياهل يتعب.. وعطتني موعد الخميس وقالت اذا حركه الياهل زينه بنطر عليج 3 ايام.. وانا حدي خايفه.. اخاف تاليها تولدني قيصريه ..شسوي .. ومليت من المشي واصعد وانزل من الدري.. امس الصبح انهرت من البجي لاني مليت وتعبت وثقل مو طبيعي وما اقدر انام... بنات عفيه منو اكلت شهرها كله واولدت طبيعي..​

الله يسهل عليج ان شاء الله يا رب ... انا ولدت عقب ما دشيت العاشر باربعة ايام ... لا تخافين من القيصرية .. انا بس خايفة اكون انا مستعيلة على البيبي هههه

 

[ملاكي الخفي]

كثري مشي ورطب والله يسهل عليج يارب
تحياتي..

 

[ام محمد الشمري]

الله يهون عليج ويرزقك الطفل الصالح وتام الخلق والخلق

 

[أم سعود1]

الله يسهل عليج والله يستر انا مثلج الاول قيصرية وخايفة من هالولادة يارب طبيعي وانشالله انتي بعد