زوجي والخاص ..

[اتعبت حسادها]

الســــــــلام عليكم

شلونكم بنات عساكم بخير ....

ابي منكم مساعده .... ابي اقنع زوجي اني اولد بمستشفى خااص واهو مو راضي اني اولد بمستشفى خاص

يبيني اولد بحكومه ... واحنا الحمد لله ماعلينا قاصر من ناحية الماده ...

شنو اقول له ... وابي كلام يقنعه بالموضوع تكفوووون

 

[مشموشته]

قوليله بالخاص اكو راحه نفسيه و انشاء الله ماكو اهمال لاننا قاطين فلوس مو ببلاش

قوليله يعني خساره فيني و في البيبي ... اسخدمي اسلوب دلع شويه


قوليله بالحكومه اذا ماكو غرف حزت ولادتي يقطوني بغرفه عامه فيها 3 او 4 حريم ماتقدر تدش علي و بيننا و بين الحرمه الوالده ستاره تسمع صياحها و الحاله حاله

قوليله نفس ما انا قلت لريلي اخاف من الحكومه نسمع بلاوي و الواحد مو بايع عمره

والله يوفقج

 

[خجوله احب الناس]

او قووليلة ماابي رجال يولدني والحكومة ماتخيرج بس الخاص تطلبين اللي تبين ......<<اذا هالشي يجيب راسه

وعسى الله يسهل علينا اجمعين

 

[؛؛حلاوه؛؛]

رد : زوجي والخاص ..

ليش اهوا موراضي شنو عذره

 

[om al ghaleen]

آذا انتي موظفه خليه على حسابج
واذا لآ بعد ماعليج الا تسمعين كلآم ريلج كلها يومين وطالعه
صج مافيه اهتمام ووصاخه :cxxxp:بس كدكاتره ممتازين "

مع العلم انه الخاص قالولي الحين فتح بطن والصباح قالولي نعطيج أبره ظهر و وننتظر عليج
(( المشيمه مستعرضه عندي ))
لاني بصراحه مااقدر ع القصيريه يهال ومدراس .. "

\\

 

[LiL MaMa]

رد : زوجي والخاص ..

قوليله بالخاص يهتمون بالبيبي اكثر

تغذيته و فحوصاته و نظافته

و الغرف نظيفه

و السسترات يهتمون فيج

بالحكومه محد يدري عنج

 

[الصعيريه]

رد : زوجي والخاص ..

سواء بخااص ولاحكوومي

التساهيل من الله

اول ولاده لي كانت بمستشفى حكومي والحمدالله كانت سهالات
وثاني ولاده بخااص لانه ولادتي كانت بطلق صناعي وخفت من الحكومي لانه كمامهم خفيف


وحاولي معاااه كلميه لانه صراحه الخاص اريح
واذا إنتي موظفه قوليله نص المبلغ علي ونصه عليك

والله يسهل علييج إن شاءالله

 

[حــــزن]

رد : زوجي والخاص ..

قولي له الحكومي يبوقون اليهال ههههههههههههههههههههههه

والله جد ذكريه بالحوادث اللي صارت قبل

 

[LiL MaMa]

رد : زوجي والخاص ..

قولي له الحكومي يبوقون اليهال ههههههههههههههههههههههه

والله جد ذكريه بالحوادث اللي صارت قبل

لوووووووووووول حسبي الله على بلييسج

 

[قمة الرضا]

الظاهر زوجي وزوجج ربع الله العالم لاعبين بمخهم ربعهم فلانه ماتت وعلانه غيبوبه

 

[اختكم بالله]

قوليه الحكومه مافيه عنايه ومونظيف

 

[دمع القلوب]

شوفي صدقيني اذا راسه يابس واذا ما اقتنع قبل الولاده بمده صدقيني خلاص يعني انسي الخاص


انا بولادتي ببجري كنت داخله جمعيه وماخذه فلوسي وانا بالثامن وحزة الولاده حطيت فلوسي جدامي وقلت يالله الخاص قال والله ما تفرحين فيه مااااااااالج الا الحكومه


للحين قاهرني بسبة هالسالفه


باقي ولاداتي اكون عند اهلي واروح من وراي واحطه جدام الامر الواقع بس عادي عنده لانه مو دافع شي من جيبه لوووول

 

[$حبيبة عبودي$]

رد : زوجي والخاص ..

قولي الحكومه يولدوني شباب كويتين يتعلمون على الحريم ...رفيجتي مخيطها عتيبي صغير تقول مغطيه وجهي واللي تحت مفتوح لووووول

 

[sweet-rose]

الله وخياط الحكومة عاد يلوع الجبد ولادتين انا بالصباح البجر ما حسيت بس بالثاني لا والله خياطهم لوعة ... الحين انا على ويه ولادة وناوية اولد بخاص ان شاء الله بس عشان الخياط

 

[كـ غلا ــلي]

قوليه كل اهلي ورفيجاتي اولدوا بالخاص وكل وحده فيهم تتباهى بريلها تبيني اطلع مكسوره الخاطر

وبعدين انا مرت فلان الفلاني الله يرضا اولد بحكومه وقعدي نفخي فيه لين يصدق عمره وانشاءالله بيرضالج

 

[خليفة العظماء]

وريه كلام البنات بالمنتدى عن الحكومه

والله اني رحت للحكومه مره مو بس انحشت الى هجيت قلت والله ما اقعد عندهم
السسترات كانو احليوات بس الدكتور يرفع الضغك وكل الموجودين هنود

 

[خليفة العظماء]

ايي قولي له عشان اسوي تجميلي هههههههه
قولي له الحكومه يخربون المرا من تحت من الزحمه وكل هنود
اما الخاص كل بنات ديرتي ويضبطون الخياط ويسوون تجميلي
مابي اروح لحكومه يخربوني من تحت


بعد شتسوين مع الرياييل

 

[& الذاهبه &]

ان شاء الله يغير رايه

والله يسهل عليج

 

[LiL MaMa]

رد : رد: زوجي والخاص ..

قوليه كل اهلي ورفيجاتي اولدوا بالخاص وكل وحده فيهم تتباهى بريلها تبيني اطلع مكسوره الخاطر

وبعدين انا مرت فلان الفلاني الله يرضا اولد بحكومه وقعدي نفخي فيه لين يصدق عمره وانشاءالله بيرضالج

هههههههههههههه لافكرتج عجيييبه


انا في بجري كان قايللي حكوومه

و تعبت و انا بأول الاشهر و رحت العدان لما شاف نفس الدكتوره الخايسه و السستر اللي ماتدري وين الله قاطها تهاوش معاهم و قاللي لو عندي قطو ما اييبه حكومه

ههههههههههه الحمدالله اني تعبت عشان يشوووف خياسهم

 

[كويتيه مذهله 87]

انا مع ريلج

انا اراجع بالصباح ماعمري شفت هالمعامله الي يتكلمون فيها البنات
وسويت عندهم تنظيفات خلوني عندهم ملكه
وكل وحده اقعد يمها والده فيه تمدحه !!!

,,,