زوجي بيسافر تونس

[Miss Cherry]

السلام عليكم

بنات زوجي امس قالي بيسافر تونس مع ربعه اول مرة يسافر مع ربعه مادري ليش احس اني محتره بس مابينت له شي انا ماعندي مشكلة يسافر بس عندي علامة استفهام على هالديرة مادري ليش

شوروا علي الديرة فيها شي ولا انا غلطانه .. وشنو المفروض اسوي اللي باط جبدي كله يشتكي ماعنده فلوس من وين طلعت فلوس السفرة مادري ويقول سعر التذكرة فوق ال 300

بنات اطنقر واسوي منها سالفة ولا اطنش ولا شنو المفروض اسوي ?

 

[randomy]

انتي سكتي وهذا غلط


ياتعبرين عن مشاعرج من اول شي ولا بيطنشج كل مره


الفلوس تطلع حق روحه و وناسته لاتحاتين

حاولي تغيرين الديره الي بيروح لها ....المغرب اوتونس وشباب مادري...الله يهديه ويسخره لج

 

[Miss Basma ..}]

مرة ثانية لا قالج ما عنده فلوس ذكريه بالسفرة
هالرجاجيل مو حق مسئولية و لا عندهم فلوس ، بس حق الزواج من ثانية و سفرات مع الربع تطلع الفلوس :/

 

[فروحته]

ترا تونس مافيها شي خاصة بعد الثورة وايد اشياء تغيرت بس انتو ما عندكم ثقة بنفسكم
ولا حتى المغرب الي تقول المغرب بس الرياييل لو يروحون وين اهما بيدورون على هالشي
و لا عمر الديرة تكون سبب فالفساد اتقوا الله يا بنات انتي المفروض من الاول تقولين له تشتكي لي ما عندك فلوس والحين طالع بسفرة
غلطج ما تحجيتي من البداية حبيبتي و ربي يسخره لج و يحميه و مو شرط رايح هناك بيسوي شي غلط
صفو النية

 

[الغضى]

انا مايغثني الا اللي يقول ماعندي فلوس ,,,,, وعقب يسافر

ان شاء الله بخيل عليج ومقصر بالبيت
والله ما اطوفها له
اللحين صار اللي صار ,,,,,, كثري دعاء واستودعيه الله

 

[دلال الكويت q8]

تونس مافيها شي ترى
مو مثل المغرب
دوله عاديه بس اذا قصدج عن المبدأ ان يسافر مع ربعه ما الومج
بس شوفي لاتتهاوشين لان راح ياخذها عناد حاولي تبينين انج متضايقه وساحليه
نصيحه لاتتهاوشين والله تهاوشت وعاند

 

[أم حسوون]

السلام عليكم ، لا تخربين على عمرج وتغثين نفسج ، واذا سافر مع ربعه يعني هو ماله حق عادي خليه يستانس ، اذا هو مقصر معاج بالصرف تقدرين تناقشينه بس لا تعاندين زوجج ما حد راح يخسر الا أنت .

 

[Miss Cherry]

بنات انا ماطوفتها بس هو قالي السالفة بالتلفون انا كنت عند اهلي حتى لو في نقاش مايصلح بالتلفون انا سكت وسمعت منه ولما سكرت قعدت افكر واقولبها بمخي .. امس رديت بيتي وقعدت اسأله واناقشه يقولي انا بخاطري اغير جو ومهما يكون سفرتي مع ربعي غير لما اروح معاج اقعد احاتي ومسئولية ومادري شنو ويوم سألته ليش بالذات تونس قال لانه دولة عربية زوجي مامعاه لغة يقول جربت اروح دولة ماعرف لغتها وتبهذلت وواحد من ربعه راايح لها قبل يمدحها وسألته منو بيروح معاه اتوقع واحد من اللي معاه مطوع على كلامه

ليما الحين انا محتره ماهمني موضوع الصرف وانه حصل فلوس للسفرة بس اشوف الديرة ماتصلح ومادري عن اللي معاه بنات قلبي معورني

 

[مذهلة2013]

انتي الي تحددين اذا تبينه يروح ولالا
انا من ناحيتي مااحب ريلي يسافر مع ربعه
لانه انا اولى اروح واسافر وياه
بس انتي شوفي وضعج واكيد وضعج غير عن وضعي
فكري وشوفي واذا ماتبينه يسافر قوليله

 

[بنوته ستايل]

امممم انا ماعندي مانع يسافر معا ربعع واصلا ماقدر امنعه هذا رجال ودام ان مو مسوي شي غلط مالي حق امنعه ... بس ع حسب الديره الي بيروح لها اذا ديره عليها علامه استفهام لااااا راح اعارض الديره مو السفره ..
ولو ان كل مكان بالعالم فيه الزين والفساد والخراب بس شي اهون من شي يعني انا عندي المغرب وتايلند بلاك ليست مستحيل يروح لهم معا ربعه ...
اما ع موضوع تونس ماعمري سمعت عنها اذا فيها شي ولالا بس انتي لاتتهاوشين معاه ولا تداحرينه عشان ماتصير عناد خصوصا انج ماتدرين هالديره فيها شي ولالا ..
مالج الا تستودعينه الله والله الحافظ شيلي من راسج الافكار السوده

 

[بنوته ستايل]

واول مايسافر اشغلي نفسج باي شي طلعات او غيري من شقتج اي شي يشششغلج عشان ماتفكرين واجد وتجيبين العيد واذا في شي من الي ببالج صدقيني بينكشف طال الزمن ولا قصر عشان جذي لاتعبين نفسج واستمتعي بحياتج واتركي التفكير الي يعور الراس ��

 

[روعة الشرق]

والله اللي يبي يخربط يخربط بكل مكان
عندنا بالكويت بلاوي لا نقص ع بعض

والدول اللي ذكروها بعض الخوات
تايلند او المغرب
هذي الدول عليها سياحه من العالم كلها بالملاين دول جميله
بس العيب وين العيب باللي تفكيره يبي يخربط
والا الخربطه عندنا مو مقصره

واما تونس الملاحظه الللي عليها ان يمكن وضعها الامني مش ولابد
اما حسب كلام وحده من صديقاتي راحت لها مع زوجها لما كان بالسفاره انها دوله محترمه وسياحيه من الطراز الاول
وسياحتها شاطئيه

 

[روعة الشرق]

وع فكره طنشي الموضوع
لان اذا بتفكرين بتتعبين
احما نهتم ونحترق وهو يسافر ويستانس

 

[الأميرة جوري]

تونس مافيها شي وبعدين خلاص تخذ قرار واتفق مع ربعه ما يصير يقول هونت اكيد بيقولون سكان مرته بيني انج مستانسه وصيه بهدايا اللي ما طلعت فلوسه الا بالسفره

 

[MiSsY HottY]

مفروض يسفرج انتي الاول بعدين ربعه يا كرهي للربع

 

[Miss Cherry]

انا سافرت معاه تونه رادين من اقل من شهر

زوجي من قبل يقول احب اسافر مع ربعي اسوي شغلات ماسويها اذا مع اهلي يعني سفرت الاهل غير سفرة الربع غير انه سفرة الاهل على قولته مسئولية

 

[فروحته]

ترا النقص منكم مو من المغرب او تايلاند
وعيب عليكم تفكرون جدي ببلدي والله عيب
في اخت قالت الي يبي يخربط يخربط بكل مكان صح لسانك
على اساس انتو عندكم ماكو غلط و الله صج كلام ما يدش العقل
يعني بس المغرب و تايلاند الي فيه هالشي انتو لا حرام ما عندكم شي
بس الواحد ما يشوف عيوبه يشوف عيوب الناس بي
الدعارة تشوفونها بالمغرب و السحر بالمغرب
ما تشوفون انو انتو كنساء مقصرين فحقه الريال
ما تهتمون لهم ما تدارونهم ولا تدلعونهم كله طلبات و ابي و ابي
ما تقبلون امهم ولا خواتهم مقصرين فحقوقهم
و ادا اديتو حقكم يكون بنفور صج والله ما عرفنالكم
والله يهدي و يستر على بناتنا
وحسبيا الله و نعم الوكيل بلي خلى وضع بلدنا جدي ووسخ سمعتنا

و يا صاحبة الموضوع لا تخافين عليه و ثانيا نصيحة من البداية عارضي
حتى لو تطلب الامر تمثلين عليه او اي شي
و ربي يعينج

 

[بنت عطا]

حبيبتي الفساد بكل مكان ماجت ع دوله حتى الي يبي بيلقاه بالكويت وببلاش بعد مومحتاج يسافر

يمكن يبي يستانس مع ربعه بس انتي سوي انج زعلانه وانج احق بالسفره معاه من ربعه وجذي وان مانفع شكواج لله بعد ههههههه

 

[Om..soso]

بالعكس بيني إنج واثقة فيه وروح استأنسه وغير جو وارتاح

والي يبي يخربط بيخربط لو حاكرته بغرفه

خل يروح يستأنس ،، واحنا الحريم طبعنا نخاف ونحاتي ونغار

بس خليها فرصة لج أهو يسافر مني تفرغي حق عمرج و عناية واهتمام وطلعات ووناسة

وكلام حلو ودلع بالمسجات

و يرد مشتاقلج

وخليها نقاط من صالحج إنج تبين وناستة وراحته