رياجيل اخر زمن

[سارة ة]

السلام عليكم ورحمة الله وبركاته

شلونكم وشخباركم


اولا حبيت اقول الصراحه الصراحه رياجيل هالوقت مامنهم فايده ويجيبون المرض والهم والنكد والغثاااااا

انا عمري 20 وزجي 26

متزوجه صارلي سنة وحامل وكل يوم عن يوم يصدمني اكثر وانصدم فيه وعرفته عل حقيقته

المشكله
^^^
انا بالجامعه ثالث سنة باقي لي سنة ونص اتخرج
وزوجي مدني

وبصراحه اهو مايعطيني مصروووف الا 70 ديناارولا يزيد عليهم شي الا قليل 20 او 10

و70 دينار كل شي منها ويقولي لا تطلبيني شي منها بدل وداريع للبيت الحموله وبجايم وقمصان واذا جت مناسبه والا شي اقعد اجمع الفلس عل الفلس واهو عنده بس يقولي ماراح اعطيج هذا حقج وبس!
نجي للماجله اهو ما ادري بخل والا شنو
ماياخذني معاه الجمعيه كلششششش واهو مايجيب الا الاشيا الاسياسيه ولا اشتهيت اي كاكاو والا شي اروح بيت اهلي اشتري من اعانتي !
يقولي هذا مو من واجباتي اشتري خرابيط
وطوفت وقلت مابي المشاكل ماله داعي اتهاوش عل اللقمه
وياماا احتجت منه فلوس وذلني ذل ويتفضل ويتممممنن علي
والحين قمت اصرف من اعانتي 200 و70 اللي اهو يعطيني ايااها ولا منته




المشكله هاليومين شاااايش علي تخيلوا
يقولي لا توظفتي سوي استقطاع 500 دينار لمده 10 سنوات واهو يسوي استقطاع بعد
عشان نشتري بيت !
قلت له اوك اساعدك بس تسجل نص البيت باسمي!!!!
والا يعصب ويهاوشني ونكد علي عيشتي ويقولي انتي رديه ومافيج خير ماتساعدين رجلج !!!

حلوه هذي يبني اعطيه 90 الف هديه مثلااااا واهو ياما طلبته 10 دنانير ذلني ذل عليها
امي قالت لي لا تعطينه امل من الحين
قوليله انج ماراح تاخذين وقلت له
وهاليومين متغيره معاملته معاي حييل ويزفني ويهاوشني ولا قلت تعبانة بطني يعورني يقولي عسااا!!


بناااات الحين منو الصح ومنو الغلط
وهل اللي سويته صح او غلط
وهل اهو راهي علي والا انا ظالمته
تكفون لا تهملون الموضوع حدي تعبانة والحمل لاعب فيني ​

 

[سارة ة]

اااااااب واخيراااا نزل

 

[Patcholli]

:|

شدعوه عليه الصراحه ماعنده سالفه ..؟؟

انا مادري جم معاشه بس الكاكاو ذبح روحه بربع دينار شنو مو من واجباتك ليش هاذي بعد تعتبر واجبات ؟؟

اختي مادري ريلج عليه قروض ولا ديون ولا معاشه مو ميزي يعتمد بس اذا انتي واثقه انه ميزانيته راهيه لا والله لا تسكتين عن حقوقج شنو يعني تسوين استقطاع 500 دينار ويستثكر عليج ان يسجل نص البيت باسمج وانتي قاطه عليه من حلالج ؟؟

اصلا المفروض اهو يقولج بسجل بسمج مو انتي تقولينله لا وموعاجبه بعد ياحلاوه ..؟؟ قلنا ريلي على عيني وراسي بس شكو يعني اصير مغفله واقط دم قلبي واحرم روحي 10 سنين عشان بيت بيصير كله لك وماتدرين عقب هال 10 سنين يحط على راسج شريجه ويسكنها فبيتج ..!!

لا حبيبتي يا يدخل اسمج بالبيت ولا قطي معاشج على لبسج وكشختج ووناستج ولاتحرمين روحج عشانه ومايطول منج فلس الي مايوديج معاه الجمعيه ياي يقولج 500 دينار من معاشج ؟؟
قوليله اذا انت كاكاو وخرابيط مو عاده من مسؤلياتك ليش بتدخل البيت بمسؤلياتي ؟؟
اصلا اذا بيت من الاسكان غصب يتسجل اسم المره بالبيت مع الريال بالوثيقه بس اذا اهو بيشتري بيت اهني لا

انا اشوف ان ريلج استغلالي ومو كفو الصراحه لاتصيرين مغفله ويقص عليج بشي انتي مو ملزومه فيه ..!!
وعلميه ان معاشج شي خاص فيج اذا بتساعدين بكيفج واذا ماتبين تساعدين هم بكيفج اهو مايتدخل بشي ولا له حق يشره ويعاتب ويحن ..

 

[happydays]

الله يعينج الصراحه

بس مبين ان اللي فيه بخل حاد و بيبي بعد ياخذ من معاشج بعد

ما ادري والله شنو الحل

 

[سارة ة]

ااااب

 

[Mrs Al-Nasser]

لا ترضخين وترضين تسوين استقطاع من معاشج واخر شي مايكتب نصه باسمج !!
تقعدين حده حده ١٠ سنين عشان سواد عيونه وبالاخير مايقدر ولا شي ؟! ليش انشالله

واذا عالمعاش كل شهر ماعليج منه عندج ٢٠٠ اعانه و٧٠ يعطيج ياها تكفي على ماتشتغلين شتسوين بعد
وروحي الجمعيه بروحج اشتري اللي بخاطرج فيه ولا منته :| صج رياييل اخر زمن !

بس ديري بالج تعطينه شي مدامه مايقدر لاتعطينه ولا فلس
اذا انتي محتاجه ومايعطيج ليش انتي تعطينه
حتى بعدين لما تشتغلين قوليله معاشي حقي بروحي وانت تصرف عالبيت وعالعيال
خلي فلوسج حقج واذا اشتهيتي شي حق عيالج ولا حق بيتج بس لاتساعدينه صراحه مو كفو
استانسي بفلوسج حقج وحق عيالج

 

[سارة ة]

يقول لي انتي جعيصص وبخيله!!
مايشوف نفسه اللي حتا الكاكاو بربع دينار مايجيبه لي

 

[Mrs Al-Nasser]

لوول والله يحر اذا قال لج جذي قولي له قاعده اتعلم منك !
علميه شوي شوي وسايسيه عشان تاخذين منه اللي تبينه تدلعي وكلميه بهدوء ولين انشالله يفيد وياه والله يهديه يا رب ويوفقكم ويا بعض

 

[متواضعة]

زين بعد يعطيج 70 الحمدالله

الله يهديه ويسخره لج

ادعي حبيبتي مالج الا الدعاء

 

[جذابه بنت ذيابه]

حبيبتي


يمكن زوجج عليه قروض وعنده مستلزمات ..



قولي الحمدالله اعرف وحده زوجها شارط شرط شهر يعطيها معاش و شهر يروح معاها السوق تشتري بس اللي تحتاجه ..!




انتي اذا احتجتي شي قوليله فلان حبيبي انا ادري انك بتجيب لي هالكاكاو مشتهيته اذا مو عشاني عشان اللي ببطني

ورفعيه لسابع سما طيريه بالعجه ههههههه ..



واذا على سالفة البيت قوليله اسمحلي .. مابي اشتري بيت ننطر بيت الحكومه ونسنع فيه ..!



٧٠ ماتسوي شي بس الحمدالله عندج اعانه ،، وحاولي ماتصرفين واجد ،، قطي قطيه مع رفيجاتج واهلج ،،
عشان ولادتج ،، واذا احتجتي بالنفاس يكون عندج

 

[ديانا سبنسر]

الله يعينا على هالرياييل

 

[brettey]

ديري بالج ترضخين وتعطينه واذا ظل جذي خل ابوج يوقفه عند حده يقول له مالك شغل بمعاشها ولا لاتلوم الا نفسك وقولي له كيفك ازعل بس انت ملزوم فيني

 

[سارة ة]

ااافا وين راي البنات الباقي !!

 

[نـعـومـه]

بنات شفيكم ليش موفاهمين هالنقطه !!

ترا اذا سجل نص البيت بأسمها حق عيالها راح يضيع !

بعد عمر طويل اذا الله خذا امانتكم اخوانج لهم نصيب بالبيت يعني موكله حق عيالج حرام جذي حلال امهم وابوهم احد ثاني يشاركهم فيه !

هذا الشي اللي معاه حق اما الامور الثانيه غلطان فيها

سالفه الفلوس اقولج اهوه شرعا ملزوم يدفع اجار البيت ويمجل البيت ويعطيج نفقه موشرط مبلغ معين اسمه يعطيج خلاص هذا بالشرع اما يشتريلج ملابس للعروس والعزايم هذا لازم يكون كرم منه مواجباري !

وسالفه الككاو بخاطرج فيه الله يهديه بس مادري شقول

وسالفه البيت انج تيمعين جنج قاعده معاي انا وزوجي نتناقش وقالي اني اقط معاه وجذي بس الفرق قالي تبين قسيمه كشخه قطي من معاشج 200 واذا ماتبين تقطين خلاص لاتقطين نشتري بيت حكومه

وانا رايي البيت حلو انج تساعدينه لانه بيت العمر وراح يكون بأختياركم بس عاد مو 500 كل شهر !!!! عالاقل 150 او 200 بالكثير 250

شكثرررررر حريم عاونو رياييلهم عالبيت اذا موثلث ترباعهمم

بس الفلوس بحسابج موبحسابه !
وهذا رايي

 

[al-musk]

طبعا انتي الصح وهو شفيه محزر عليج .. الاخ فاهم الزواج غلط ويبيج بعد ماتسجلين نصيبج من البيت .. والله الواحد نفسه مايضمن نفسه هالدور يضمن واحد محزر عليج وكل شي بالحسرة..\انا اقول دخلي اهلج بالموضوع ابرك خل كل واحد يعرف حدوده والتزاماته

 

[فراشه بيضا]

بنات حبايبي فيه شي احنا ماندري عنه
الرياااااااااااااايل يقعدون بالدواوين ويعلمون بعض اشلون يستغل فلوس المرا والبطل الشاطرر اللي مخلي مرته مشتريتله سياره او تقط معاه في البيت
كل واحديدرس الثاني عبالهم شطاره
ناسين انه القوامه لهم والصرف عليهم

 

[مناير ...!]

انتبهي تطيعينه
البيت واجب عليه اهو

 

[دلوعة صلوح]

الله يعينج ويهدى لج يارب

 

[noorq8]

بنات شفيكم ليش موفاهمين هالنقطه !!

ترا اذا سجل نص البيت بأسمها حق عيالها راح يضيع !

بعد عمر طويل اذا الله خذا امانتكم اخوانج لهم نصيب بالبيت يعني موكله حق عيالج حرام جذي حلال امهم وابوهم احد ثاني يشاركهم فيه !

هذا الشي اللي معاه حق اما الامور الثانيه غلطان فيها

سالفه الفلوس اقولج اهوه شرعا ملزوم يدفع اجار البيت ويمجل البيت ويعطيج نفقه موشرط مبلغ معين اسمه يعطيج خلاص هذا بالشرع اما يشتريلج ملابس للعروس والعزايم هذا لازم يكون كرم منه مواجباري !

وسالفه الككاو بخاطرج فيه الله يهديه بس مادري شقول

وسالفه البيت انج تيمعين جنج قاعده معاي انا وزوجي نتناقش وقالي اني اقط معاه وجذي بس الفرق قالي تبين قسيمه كشخه قطي من معاشج 200 واذا ماتبين تقطين خلاص لاتقطين نشتري بيت حكومه

وانا رايي البيت حلو انج تساعدينه لانه بيت العمر وراح يكون بأختياركم بس عاد مو 500 كل شهر !!!! عالاقل 150 او 200 بالكثير 250

شكثرررررر حريم عاونو رياييلهم عالبيت اذا موثلث ترباعهمم

بس الفلوس بحسابج موبحسابه !
وهذا رايي

حبيت أصحح لج هالمعلومه , البيت لما يتسجل باسم الزوج والزوجه وعندها أبناء ذكور حسب الشرع محد يورثها الا عيالها وزوجها وامها وبوها ( هذا شرع وبالقرآن) أما لوماعندها الا بنات فيتعمد على مذهبهم السنه غير والشيعه غير

 

[شيخهـ البنات]

رايي من راي نعوومة