رفيجتي

[لولو305]

مساء الخير
شلونكم


ماادري من وين ابدي رفيجتي من 17 سنه واخر 5سنين كنا حيل مع بعض كل شي نقوله البعض طول اليوم مع بعض بالفون واتس
وانا حيل احبها هي بنسبه لي اختي واكثر
تزوجت والله فرحه بعرسها اكثر من اختي تخيلو الكل يقولون لي راح تغير عليج كنت اقولهم مستحيل
فعلا بعد شهر بدات تغير يوم عن يوم ماتسال ولاشي
انا ادري انها مشغول بحياتها بس مو معقوله ماعندج وقت عشر دقايق تسالين اصلا نظام دوام زوجها شفتات يعني مرات تنام عند اهلها
قلت عادي انا اسال مو مشكله
تخيلو تكرمت بوظيفتي من قبل الوزاره مافكرت تقولي مبروك قلت شدعو ماتقولين لي مبروك جان تقولي مبروك بدون نفس
يوم جا عيد ميلادي ماقلت كل عام وانتي بخير لما قلت لها اخر وحده اتوقع ماتقولي انتي قالت انا نسيت التاريخ ادري موضوع عيد ميلاد شي تافه بس بنسه لي الكل يذكر الا هي ان ااحد يقولي كل عام وانتي بخير تفرحني
مشكله انا اقلبي مايطاوعني مااسال عنها عشان جذي سكرت الواتس طلعت من القروب و لا سالت ولا همها هذا اللي خلني اضايق اكثر
فوقها الكل يسال ليش مضايق ماقدر اقولها منها مابي احد يتشمت بصداقتنا مابي يقول اي تغيرت عليج مابي يذمونها
قولولي شنو اسوي:bbbiu:

 

[حصة2010]

حبيتى عادى عندى اكثر من 50 صديقة بعد التقا عد من الكل نسانى ويعلم الله كنت أ سأل عن الجميع والقصص كثير ة وربى يعينك

 

[اميره بكلمتي]

حبيبتي الدنيا ماتوقف عند احد خليها براحتها ماردها بتردلج فانتي طنشي فيها لو تبيج صدقيني لو شنو مايغيرها شي

 

[تهاني القمر]

من صجج يضيق خلقج عشان رفيجه

طااااف حبيبتي اهي ما تستاهلج هذي حكرت نفسها بزوجها وإنعزلت عن العالم

يمكن مو بس عنج عن الكل

الله يعوضج باحسن منها

 

[جوك احلى جو]

الدنيا تلاهي الله العالم بظروفها فاعذريها

 

[بيبي2014]

امبيه اشفيهم البنات من اول ما تتزوج يكبر راسها وتشوف نفسها

حبيبتي اذا انتي حاسه انها اهي تبتعد عنج انتي لا تضغطين عليها خليها تولي

استانسي بدوامج ورافجي بنات غيرها الدنيا ما توقف ع احد

 

[brettey]

عادي حبي لا تتعلقين باحد طاااف وعيشي حياتج

 

[شوشو الشقيه]

عادي الوضع جدا
احس بصراحة
مع الوقت بتعلمين تعيشين بدون صديقه
انا كنت مثلك اقدس الصداقة و اتالم و انجرح بس مع كثرة الصدمات أصبحت اقوى
الان اصادق بس لا اضع كل همي و صديقتي هي الشيء المقدس
اعتبرها ان جاءت و ان راحت عادي لا افتكر
دونت كير
خليج دونت كير وبتعشين مرتاحة

 

[((البرنسيسا))]

البنات غالبيتهم صاروا جذي من تتزوج تتغير عليج

وكله تعبانه وموفاضيه

الله يعينا ويعينهم

 

[gala q8]

اووووه انا اكثر وحده انضريت من رفيجاتي .. و يتغيرون علي و اواصلهم بس ماكو فايده

فعااادي .. الحين للاسف ماتلقين الصديقه الصديقه

و عذريها ماعليه ..

 

[لولو305]

شكرا لكم حبايبي

 

[دلوله 111]

اي الحين الرفيجات جذي نظامهم اذا تزوجوا سحبوا
وعقب شهرين ثلاث ترد مثل ماكانت
رايي انج ترافجين بنات واذا عليها اهي
بس اتصلي فيها بالمناسبات وعقب بتشوفين

 

[MiSsY HottY]

امبيه نفس سالفتي بالضبط ... رفيجتي من 20 سنه انا كنت اركض وراها وكانت شخصيتي ضعيفه عندها علبونه ما ابي اخسرها وما تدق كلش بس أنا أدق عليها واهيا تسوي نفسها دايم مشغوله وما عندها وقت يما منها بعدين تزوجت ولا باركت لي و لا يابت هديه ولا عماة عين حتى لو زجاجة عطر وطنشت عادي وحتى لما ولدت ما يابت لي هديه وقمت أعاملها بالمثل ما أدق ولا أسأل وساحبه عليها وعايشه حياتي جان تفتعل مشكله من القهر تقول انا قايله عنها حجي عند وحده ما أدري شكووووو مع اني ما يبت طاريها كلش ولا همتني وعايشه حياتي والله .. بس الظاهر وايد اضمنتني وعلبالها ماراح اتخلى عنها والله عاملي الكل بالمثل وراح ترتاحين حييييييييييييل ولا يأنبج ضميرج

 

[MiSsY HottY]

شغله ثانيه ترا الكره الارضيه متروسه بشر وناس تعرفي على رفيجات يدد وناس يدد وهاذا اللي انا قاعده اسويه والله اريح شي لا تضرين احد ولا لج شغل باحد اللي باعج بيعيه لا تركضين ورا احد الله يوفقج