رسالة لكل وحده تفكر تسوي عملية شفط دهون..

[افروديت]

تعالي انا وانتي نتخيل هالموقف .. تخيلي انج بكل عافيتج ربي منعم عليج بالصحه وماتشتكين من شي تقومين وتتحركين بكل خفة .. تاكلين على راحتج وتنامين على راحتج..
وتخيلي فجأة اليوم الثاني ماتقدرين تقومين من فراشج ... وجسمج كله متورم... واي حركة تسوينها تحسين بنار جهنم الحمرا؟؟؟؟؟
هذا اللي صار لأختي العاقله الفهمانه اللي كنت اقول عنها اهي كل الحكمة والثقل فيها... قالت لي بروح اسوي عملية ليزر لعيوني قلت توكلي على الله.. رحت لها المستشفى ومن صدمتى الكبيرة وقفت في مكاني مادري شاقول؟؟؟؟
اختي عشان وزنها زايد جم كيلو.. راحت سوت شفط دهون وشوي تفخ خدود.... بس تدرون شنو صار؟؟ اختي طلعت وحده ثانية .. صارت مسخ بمعنى الكلمة ... وجهها متفوخ تخرع عيونها حمرا ماتبين وخدها متورم احس بينفجر اي لحظه... استغفر الله العظيم... والجسم احمر مو بس احمر الا لونه قرمزي مايل للسواد كانه احد طاقها طق..وبكل مكان شاقينها ومخيطينها... وديتها البيت وقلت لاهلي لحد يدش عليها عشان عيونها ماتتأذي من الليت...
لكن اقسم بالله العظيم انها تبجي جدامي مو قادرة تتحمل الألم الرهيب اللي تحسه من اي حركة بسيطه.. تبي احد يلبسها.. تبي احد يقعدها عشان تشرب شي... والله يابنات مو قادره تروح الحمام عشان تسوي شي وتسويها على نفسها عزكم الله.. والله اني شفت عورتها اول مره بحياتي لانها بكل بساطه موقادرة تلبس ملابسها الداخليه بنفسها؟؟؟
اقسم بالله انها تبجي بجي من اللي سوته بنفسها... ندماااااااااااااااااانه على اكبر غلطه في حياتها.. تبي تصير حلوه واهي اللي مافيها الا العافيه جنها البخت... عشان بس متينه...... بس متينه ..

 

[حصووونه]

لاحول ولا قوه الا بالله
ياختي لاتلومينها اختج تبي الزين والرشاقه منو يكره الرشاقه والقوام المنسق بس دكتورها ماعطاها مسكنات ليش للالم والانتفاخ والورامم اللي قريته عند اللي شفطو انه طبيعي ويختفي بعد كم يوم والله يشافي اختج ولا يخسرها عاد عقب هالتعب

 

[الأميرة نوره]

قريت وايد تجارب بالمنتدي لبنات سوو شفط دهون و شد بعد بس ماوصفوا الالم لهالدرجه !!
يمكن اختج رايحه عند دكتور اي شي __ يصير تقوليين اسمه ؟ << عشان البنت ياخذون حذرهم منه .
وماتشوف شر اختج < الله يستر عليها و يعديييها سلامات .

 

[%ورد طايفي%]

الله يكون بعووونها
بس انتي ساعديها ووقفي معاها ولا تقعدين تانبينها زياده خلاص الي صار صار وهي محتاجه وقفتج معاها

 

[نمله معصبه]

الله يكون بعووونها
بس انتي ساعديها ووقفي معاها ولا تقعدين تانبينها زياده خلاص الي صار صار وهي محتاجه وقفتج معاها

معاها 100%
وان شاء الله تقوم بالسلامه يارب يهون عليها الألم........

 

[حبيبة الملايين]

تقوم بالسلامه ويجزاج الله الف خير على مساعدتج لاختج

 

[كرز أخضر]

سلامتها ماتشوف شر...خل تاخذ مسكنات حق العوار...بس منو دكتورها ؟؟؟

 

[*يارا*]

ما تشوف شر إن شاء الله

بس ترى غلط قاعدة بالبيت وساكته لازم تراجع دكتورها وإذا ما حست بتحسن

تراجع دكتور ثاني

وحبيبتي أعتقد والله أعلم أن شفط الدهون تعتبر علاج لأن في وايد ناس متضررين من الشحوم والدهن إلي بجسمهم

وشد الجسم إن شاء الله ما في شي خاصه إذا كانت متزوجه وزوجها مو عاجبه جسمها المترهل ومأثر هذا عل حياتهم

الزوجيه

 

[عمري الخالد]

سلامتها وما تشوف شر


والله يجزاج خير حبيبتي

 

[:: Diva ::]

امممممم
حياتي لا تستعجلين على النتيجه
للحين الجسم مورم و كدمات

نطري عليها اسبوعين الى شهر و تطلع النتيجه
تبرد الجبد ان شالله

 

[شمس 20]

لا تحكمين عليها نطري شوي

 

[۩۩ الجـــــود ۩۩]

الله يشفيها

منو دكتورها اختى

 

[secret sauce]

طمنينا على اختج شصار عليها

 

[^غلاي أنت^]

الله يشافيها ان شاء الله

 

[لؤلؤية]

الله يقومها بالسلاااااااامة

 

[هاي مون]

ايوالله كلاااامج صح ميه بالميه

ترا الصحه تاج على روووس الاصحااااااء ومايعرفها الا اللي يفقدها

والله انا نفس اختج ميته على الشفط والعمليات بس كل مااشووف عيااالي اهووون واخاااف يصير فيني شي

والله يصبرني ويضعفني بخير بدوون هالعملياات


والله يشفي اختتتج يااارب

 

[انواروه]

ياحيااااتي كسرت خاطري اختج يالاا ماعليه انشالله هاليومين بس ويروح الالم

آنه مرت اخوي سوت شفط كانت بطـــــــــــــــــــــــــــــــــــه شي مو طبيعي فخوذ وارداف يابووووووي وعقب ماسوت العمليه صارت كل ماتاكل شي ترجعه حتى الماي ترجعه ليين صار وزنها بالاربعينات او يمكن بالثلاثينان والله يابنات ان كل من جافها قال الحمدالله على العافيه صار جسمها اول ماتجوفين تحمدين ربج بالدقيقه مليون الله يكون بعونها

 

[حنون المزيون]

افروديت اشصار على اختج خف الورم اللي بويها وإلا لا ؟

أعرف وحده جذيه انتفخ ويهها يوم العملية بس عقب أسبوع فش عادي أختج فيها ضغط ؟؟

والكدمات والألم مو مشكله يروح لأن ساعات ما تقدر تتحرك مو من الشفط لا من السسترات مسحبينها وقت العمليه يقومون فيها ويقعدون فتحس بألم بجسمها

على العموم ما تشوف شر وياريت اطمنينا عليها

 

[@ام ضاري@]

اتوقع انها سوت الشفط وبنفس الوقت اتفخت عشان جذي انتفخ وجهاا

بس اهي الماده اللي حطتها على وجها شنو كولاجين والا من جسمها

هم اتوقع شهر شهرين وراح تستانس على جسمها

هي الحين تبي منكم تشجيع شجعيها وقولي باجر تخف ها النتفاخات وتصيرين مثل مابغيتي

ان شاءلله تقوم بسلامه طمنيناا عليها

 

[طير الحب]

شى مو طبيعى اللى فيها خل تراجع الطبيب

كل يوم اشوف برنامج دكتور 90120 امس و حده مسوسه بطنها وصدرها شفط وشد وويها تقسير ونفخ عقب العمليه طلعت اقعدت شوى وطلعوها بكرسى لمكان ترتاح فيه ومن باجر ياه للطبيب لابسه جينز وقاعده على حيلها

اكيد اختج فيها شى مو طبيعى العوار اللى تشتكى منه