رحلتي السعيده الى هونج كونج وجوانزو(الصين)

[babloo]

بسم الله الرحمن الرحيم
السلام عليكم خواتي العزيزات
مثل ما وعدتكم راح اقول لكم ملخص رحلتي العجيبة الى بلد العزز والكشخه هونج كونج و الى الصين .. وماهي الصعوبات الي واجهناها يالله تابعوني ...


بالبداية كنا حاجزين على طيران القطرية والي ما انصح أحد أبدا انه يسافر عليها ، كانت طيارتنا تطير من الكويت الساعه 10 بالليل وتطب ترانزيت في الدوحه ساعتين بعدين نطير لهونج كونج .. المهم صار في تأخير على القطرية وما طرنا من الكويت الا الساعه 12 يعني تأخير ساعتين وسألنا شلون على الطياره الي هناك قالوا لنا في مكار الكويت ان الطياره أكيد ناطرته وطرنا الحمدلله وطبينا الدوحه وأول ما دخلنا المطار قالوا الطياره طارت (هذي أول صدمه ) انزين وشنو الحل !! قالوا تقعدون بفندق هني بقطر لين تيي حزة الطيارة الثانيه وكان وقتها الساعه وحده بالليل يعني ثاني يوم بالليل .. مع ان احنا كنا حاجزين 3 ليالي بفندق في هونج كونج راحت علينا ليلة المهم قلنا نبي جنطتنا عشان نبدل مو معقوله بنتم بملابسنا 3 ايام والله لا يراويكم شصار فينا بمطار الدوحه 3 ساعات بس ندور جنطتنا فوضه فوضه في كل مكان مضيعين جناط العالم وتأخير على الطيارات والموظفين نفسيه ومالهم خلق يتحركون يعني باختصار تبهذلنا واحنا نركض من واحد لي واحد لين يابوا لنا جنطتنا بعد الثلاث ساعات وعلى حسابهم سكنونا في فندق اسمه الليوان مستواه جيد بصراحه 4 نجوم وكان الفطور والغدا والعشا والمواصلات عليهم .. بس قلنا خل نستغل هاليوم الي بقطر ونطلع نتمشى تو الناس على طيارتنا وطلعنا والله ركبنا تاكسي ودانا سيتي سنتر مالهم وايد حلو وعود قد المرينا بس كذا طابق في تحت تزلج على الجليد وصالات بولنج وبلياردو وسينما .. والله استفدنا من تأخر الطياره هالمره في ان نشوف قطر !
وصارت الساعه 11 بالليل ويه خذانا الباص مال المطار وودانا وقعدنا ننطر وقت الطياره وقلنا ما راح ندخل الطياره الا لمن يقولون النداء الأخير وقعدنا انا وريلي مستانسين نصور بالمطار وكلما نادوا على الطياره قلنا لا بعد شوي المهم صار وقت النداء الاخير مصخناها لازم نروح نركب الطياره وصلنا عند البوابه ولا زوجي الحبيب مضيع البوردينج (يا لهوي إيه النحس ده ) وراح مسكين يركض بالمطار يمينا ويسارا عشان يطلع لنا بوردنج يديد والحمدلله تم كل شي على خير وركبنا الطياره وطرنا وانا حظي النحس تحت الكرسي الي جدامي في صندوق حديد مادري شنو اهوا تبع الطياره مادري يمكن الصندوق الأسود المهم اني طول الرحله (8 ساعات ونص) وانا مو قادره افرد ريولي تعذبت وبحمدلله وصلنا هونج كونج ...... فاصل ونواصل

 

[babloo]

نكمل رحلتنا ... اول ما وصلنا مطار هونج كونج طبعاالكتيبات عن البلد موجوده في كل مكان مشينا مع حشود البشر الي نازله معانا من الطياره ونزلنا من الدري المتحرك ولا بويهنا قطار ماكو شي ثاني غيره لازم الكل يركبه وركبنا مشا فينا اقل من دقيقه واحنا للحين بالمطار خذينا جناطنا وسألناهم من وين نحصل تاكسي كان في وحده قاعده يم بوابة الخروج من المطار وكتوب عندها تاكسي انفورميشون (على ما اذكر) قعدت تقول لنا (اقروا بالانجليزي) تيك ذا ورئ تاكسي واحنا مو فاهمين هذي تقصد وايت ولا رد المهم طلعنا وركبنا تاكسي أخضر هههههههه طلع ماله شغل اللون اهيا كانت تبينا نركب التاكسي مال شركتهم ولا كل التكاسي يوصلون والزين بتكاسيهم انها تمشي على العداد يعني محد يقص عليكم بسالفة التكاسي وطبعا في هونج كونج عملتهم الدولار الهونج كونجي غير عن عملة الصين (يوان ريممبي) احنا ماندري ما صرفنا الا ريممبي بس عادي خذا من عندنا بالصيني عاد الفلوس الهونج كونجيه توننننس جنها لعبه ملونه وصغيره جنها مو صج .. وصلنا التاكسي لي فندقنا واهوا سيتي جاردن يبعد عن المطار ساعه كامله حجزنا الليله من الكويت ب 30 دينار (عند واحد نعرفه) ولا اهوا سعره اكثر من جذي بس الغريب ان لمن حبينا نمدد ونقعد في هونج كونج قالوا لنا هناك الليله ب 1083 دولار هونج كونجي يعني تقريبا 38 دينار قلت حق زوجي احجز من سايتهم الي بالانترنت جان تطلع الليله علينا ب 25 دينار يعني ارخص من المكتب الي بالكويت !!
الفندق نظيف وجيد اول ما وصلنا من التعب قطينا روحنا على الفراش وما قمنا الا الساعه 12 بالليل طبعا ماكو شي فاتح بس تحت الفندق في سوبر ماركت (سفن الفن) شرينا من عنده حليب وماي (انا من الخوف كل شوي اسأل راعي المحل هذا في كحول ؟؟ ) الريال يستغرب يقول لي بعين الاحتقار هذا ماي خخخخخخ والله ما اضمن
رجعنا الفندق شبكنا على النت ياخذون 60 دولار على اليوم الكامل (احنا ماخذين اللاب توب معانا طبعا) لين دخنا ونمنا وقعدنا ثاني يوم الظهر واهني بدا مشوار السياحة
أول يوم قررنا نروح أوشن بارك هذي مثل ملاهي بس عجيييييييييبه عباره عن جبلين يطلون على البحر كل جبل في ألعاب ويوصل بين الجبلين تلفريك طبعا الطبيعه والمنظر شي خيالي من فوق وكان فيها الالعاب المعروفه الي عندنا طلقة الدبوس والجندول وقطار الموت كان في زحمه بس العابهم حلوه ما تطول وتشيل عدد كبير فماكنا نطول واحنا واقفين دور . بس الي كان مضليقنا الحر .. في ذاك اليوم كانت الشمس قويه الهوى زين بس شمس اذبحتني . وانا يايبه معاي من الكويت بخاخ الماي من ايفيان شريتع من الصيدليه كل شوي اطلعه وارش على ويهي وويه ريلي .. والمشكله الثانيه الحين يوووواااااااااااااااااعه شناكل ؟؟!!؟؟؟ لين الحمدلله حصلنا ماكدونالدز وكلينا من عندهم ماك فش (الله وكيلكم 14 يوم وانا اكل من هالماك فش) الحمدلله على النعمه وكان في هناك عروض منهم عرض الدلافين وايد حلو استانسنا فيه .. خلصت رحلتنا حق أوشن بارك ومن يم الباب التكاسي اشكثرها خذينا تاكسي وقلنا له يودينا مجمع (هاربر سيتي) طبعا هالمجمع يصك على أكشخ مجمع عندنا هني بالكويت كللللللللللللللللللللله ماركات ومو اي ماركات شي عجيب كبير حيل وكل الماركات الي تعرفينها والي ما تعرفينها موجوده طبعا ما دشيت اسأل عن الاسعار لان مو هذا غرضي من السفره كثر ماأهوا سياحه ووناسه وتقريبا اسعار هونج كونج نفس الكويت لان ما سافرت ديرة أكشخ من هالديره الكل لابس ماركات والكل راكب سيارات موااااااااااتر صح مو اي شي ... يعني ما توقعت هالديره جذي المهم واحنا نتمشى طلعنا من واحد من البوابات ولا جدامنا كورنيش اهني المنظر الي يبجي من الجمال رصيف وبعدين بحر و ورا البحر كله عماير عاااااليه وكلها ليتات ملونه المنظر رهيب واذا تكملين تلاقين على يسارج ستاربكس وهاجنداز زحلات ثانيه قعدنا كلينا في هاجنداز كوكي كرانش (طلب زوجي المفضل) وما أدري شلون دخلنا سوق الليل شارع ضيج وفيه الي يبيعون بالشارع شغل طاوله وفوقها مظله كان عندهم شغلات وااااااايد حلوه مو ملابس شغل لوحات وساعات و حزم وجناط كان في وايد اشياء حلوه بس ما شريت شي لان كل هذا معتمده على الصين واذا ما لقيت شي بالصين جذي جذي راح نرجع هونج كونج مره ثانيه عشان نرجع الكويت لان طيارتنا (كويت -هونج كونج-كويت) والصين رحنا لها بقطار ... بس ابي اقول هالشغله أخر يومين من الرحله لمن رجعنا هونج كونج يومين واحنا نمشي على ريولنا نبي نلاقي سوق الليل هذا ما ليقناه شي عجيب مشينا مشي اليهد ولا قدرنا ندله مره ثانيه عاد ضاق خلقي كان في شغلات وايد حلوه .... عادي عادي مافي نصيب .. خلصنا من هاربر سيتي ورجعنا الفندق وتعشينا مثل كل يوم تونه وليمون يايبينهم معانا من الكويت وخلص يومنا الي بقى لنا في هونج كونج (حسب التخطيط للرحله) ..... فاصل ونواصل

 

[babloo]

نكمل مشوارنا .... قمنا ثالث يوم ويمعنا قشنا وسوينا جك آوت وفي شي زوجي يسويه عجبني .. كلما نبي نروح مكان يسأل الرسبشون عن المكان ويخليهم يكتبونه لنا بالصيني أو بلغتهم .. عاد سأل الرسبشون عن محطة القطار (ترين ستسشون) جان يكتبونلنا اياها على ورقة وخذيناها وبس راويناها حق راعي التاكسي ودانا على طووول وهناك كل شي واضح وفي كتابة بالانجليزي على كل شي راح عند مال التذاكر وقال له ان يبي يروح جوانزو لان القطارات تروح اكثرمن منطقة كان سعر التذكره للشخص 190 دولار هونج كونجي ورحنا ،طبعا فيها ختم جوازات السالفه لان هونج كونج دولة ثانيه مالها شغل بالصين وخل اقول لكم هونج كونج ما تحتاج فيزا يسوون الفيزا مالتهم بالمطار اما الصين تحتاج تسوونها من الكويت يبون صورة جوازج وجوازج وصوره وحده شخصية و 14 دينار اذا انا مو غلطانه بالمبلغ .. ركبنا القطار حلو ونظيف جنه طياره وسرعته معقوله تقريبا 160 كم بالساعه وكانت مدة الرحله ساعتين وصلنا الصين (جوانزو) وختمنا جوازاتنا ... كنا متصلين بمترجمه تنطرنا بالمحطه لان قالوا لنا ان الصين ضروري معانا مترجم لانهم ما يفهمون .. اول ما وصلنا كان ناطرنا ريال قال ان المترجمه (حليمه) مشغوله عندها زبون وقال لنا انه بيركبنا المترو لانه اسرع مشينا وراه جان يوقف عند مكينه ويقص لنا تذاكر للمترو طلع لنا فيش مو تذاكر المهم مشانا مشي اليهد وصعدنا 60 دري
وصلنا الفندق وكان فندقنا اسمه بارك فيو سكوير خوووش فندق غرفته وااااااسعه ويعتبر هذا الفندق فندق الكويتيين او الخليجيين اشكثرهم هناك ما تحس انك بروحك لمن وصلنا ودخلنا الغرفه يتنا المترجمه (حليمه ) اهيا صينيه تتكلم عربي مكسر حده مع شويه انجليزي بس تفهمين منها عاد قلت لها ان احنا اتفقنا معاها اهيا ما نبي ريال ما آخذ راحتي جذي كلما بروح مكان معانا واحد غريب بالله بشتري لي ملابس داخليه هذا يوقف فوق راس !! قالت ان الزبون الي عندها يمشي بعد 3 ايام قلنا لها خلاص لمن يروح نبيج معانا بس اذا توهقنا راح نتصل فيج قالت اوكي ولمن احتجنا لها ثاني يوم ندق ندق ندق الاخت اسحبت علينا جان يقول ريلي احسن ختولي ما نحتاجها وصج والله بدون مترجم احسن لج وعادي تقدرين تدبرين أمورج مثل ما قلت لج اي مكان تبين تروحين له خللي الي بالرسبشون يكتبونه لج على ورقه بلغتهم وعطيها حق التاكسي وخللي دايما معاج كرت الفندق الي ساكنه فيه وقت الي بترجعين راويه الكرت ويردج وبس وايد بسيطه السالفه !
بس ابي اقول شي .. صج ان استخدام المترو وايد سهل بس يبيله احد يعرف وين رايح يعني بأي محطه بينزل بس لانج اول مره تطبين الصين اخذي تاكسي وروحي الفندق ووفري على نفسج الاذيه والتعب ونصب المترجمين
لمن كنا بالقطار كان في معانا 2 كويتيين طلعوا بالصدفه معانا بنفس الفندق عطانا ورقه فيها كل اسواق الجمله الي عندهم مكتوبه بالعربي وبالصيني وهذي الورقه مكتوبه في كل مكان راح تلاقونها على كروت المطاعم العربية وبالمجلات العربيه الي هناك ومن أول ما طبينا جوانزو كان روتينا واحد ......... فاصل ونواصل

 

[جورية كويتية]

عليكم بالعافيه حبيبتي
وياريتج حاطتلنا صووووور

:eh_s(18): :eh_s(7): :eh_s(18):
​

 

[dalprincess]

[frame="1 50"]حمدالله على سلامتج وعليج بالعافيه وناطرين باجي التقرير [/frame]

 

[*دبدوووبه*]

الحمدالله على سلامتكم
واهم شي انكم استاانستوو

 

[بنت عبدالغني شربت]

حمد الله علي السلامه بابلو وان شاء الله استانستي بالصين وسوق الليل الي بهونغ كونغ اسمه تمبل ستريت

 

[Suwi]

3alikooom bel 3afyh.... enshalh esstanstow hatha ahm shyy ​

 

[mooomooo]

الحمدلله على السلامه

ماشاء الله على انه تقريرج مافيه صور بس خفيف ينقرا <--- الاخت تحب الصور هههههه

وناطرين باجي التقرير

 

[زهرة اللوتس]

تقرير مفصل
مشكورة

 

[بتبوتااا]

ناطره التكمله << حدها اندمجت ولو في صور حطي لنا

 

[babloo]

آسفه على التأخير بنات تدرون رمضان ومطبخ ولويه ... عموما مبارك عليكم الشهر وعساكم من عواده
زنرجع لي مكان ما وصلنا بعد ما خذينا الورقه من الكويتي الي شفناه بالفندق والي فيهم اسماء أسواق الجمله
كنا كل يوم نقوم الساعه 12 الظهر من النوم ناكل بالفندق خبز وجبن وشاي وننقي واحد من هالسوقه نروح له ... طبعا السوقه هذيل حدهم عجيبين يونسون مكشوفين اغلبهم يعني يصيرون مثل ممر وفي محلات يمين ويسار يعني مو مجمع وفي اسوقه ثانيه مجمعات
رحنا سوق الساعات ،الجناط، الأجهزه الالكترونيه، الأحذيه(عزكم الله) ، الاكسسوارات، الملابس وفي وايد بس هذيل الي مدانا نروحهم بس ولا فيه بعد سوق زينة السيارات وسوق الاثاث ومادري شنو ..
نتمشى نتمشى لمن يصكنا اليوع نروح مجمع حلو من مجمعاتهم عندهم تي مول وفي مجمع أحلى منه بنفس الشارع شويه جدام بس وم ذاكره اسمه فيه سينما والعاب ياهال فوق يونس خووش مجمع .... المهم نروح ناكل في ماكدونالز فش ميل ونتمشى شويه بالمجمع ولمن تصير الساعه 7 تقريبا نروح مكاننا المفضل وهو شارع بيجن لوو (شارع بكين) هذا الشارع اتم فيه المحلات فاتحه لي الساعه 10 غير عن سوق الجمله الي يسكر الساعه 6 عاد نروح هناك نشتري نشتري ونتمشى وناسه الشارع حلوووووووو كل شوي يطق علينا مطر غزيييير ونبطل الشمسيه وفي بيتزا هت بعد نتعب كلش كلش نقعد في بيتزا هت وناكل بيتزا جبن وخضراوات ونرد الفندق ... شفتوا هذا النظام قعدنا نسوي جذي طوووول قعدتنا في جوانزو مع ان فيها وايد اماكن سياحيه عجيبه اكبر سفاري في شرق اسيا والعاب مائيه وملاهي واشياء وايد بس ما رحنا لان جونا انا وزوجي جو تمشي مو العاب وجذي (ترى احنا مو شياب)
والحين باجي آخر يومين في سفرتنا .. والي رجعنا فيهم الى هونج كونج مره عشان نرد الكويت بس والله كانوا احلى يومين في حياتي ..... تابعوني .... فاصل ونواصل

 

[OmRashed]

مشكوره خوش تقرير

 

[عاشقة وفلسانة]

يعطيج العافيييييية على هالتقرير

ومبارك عليج الشهر والقرقيعان والعيييد مقدمن

ناطرين رحلة كونزوو والأثاث و الشحن شخبارة؟؟ صج غلا وو يسوى نشطب من هناك

ناطرين

طلى علينا

 

[Maltesers]

عليكم بالعافيه .. شوقتينا عالصين مع ان وايد ناس ما مدحوها وايد

 

[شهدQ]

ونااااااااااسه بابلو



لايوقف لايوقف لايوقف


نبي تفاصيل اكثر واعمق

 

[شمع تحترق]

شوقتينا ناطرين الصور يا الغاليه

 

[زيـنـه]

ناطرين باجي التقرير ..

 

[بنت الحزن]

عليج بالعافيه و مشكوره

 

[بيتي فورة]

مشكورة ..