دلوعة الغيم
دلوعة الغيم ما هي بأي دلوعه . .
ذي غير حتى الدلع . . وده يدلعها . . .
ما كنها إلا من الأزهار مصنوعه . .
إمعتق العود كنه . . لمس اصابعها . . .
فيها من الزين والإحساس والروعه . .
ما تجعل العين . . بالدهشه تتابعها . . .
وفيها من الحزن والوجدان واللوعه . .
الونّه اللي ما احد . . يعلم دوافعها . . .
عذبه كما سلسبيلٍ عذب ينبوعه . .
ترفه تفاصيلها . . كنك موزعها . . .
صلفه ولاهي علي كيف العرب طوعه . .
فيها مزاجيةٍ . . ما احدٍ ينازعها . . .
فيها براءة طفل لانهلت دموعه . .
يريد له لعبةٍ . .مجنون صانعها . . .
وفيها شموخ بدويٍ شيخ بربوعه . .
كل المصايب تحت . . حكمه يطوعها . . .
تضحك ويهتز عرش الهم وجموعه . .
تبكي تسيل العطور . . بوبل دامعها . . .
لاسولفت من سمعها ذابت سموعه . .
ومن الحلا كلمته . . يبلش يطلعها . . .
بعيونها الموت يعدم مجد مجموعه . .
لالدت بعينها . . بأطراف برقعها . . .
وفي وجنتيها زهور الورد مزروعه . .
شف حبة الخال تعدم . . من يطالعها . . .
خاتم سليمان بالشفه ندّر نوعه . .
التوت كنه بلون . . الدم طابعها . . .
من ضي نور القمر تقول مقطوعه . .
ما كنها ترفةٍ . . يذبح تميعها . . .
فيها اعذب الشعر لو يخط مطبوعه . .
كنه من الزين . . والرقه يبايعها . . .
وليل الهوى من غلاها ضوت شموعه . .
دلوعةٍ يقطع الله . . من يقاطعها
