دشيت التاسع وليلحين ماني عارف شسوي حق النفاس .. خبيرات النفاس والطب الشعبي مساعدتكم

[معلمه متميزه]

قوة بنات شلونكم ..

مثل ما انتو شايفين دشيت التاسع وعسى الله يهون علي وعلى كل الحوامل ويسهل ولادتنا ياااارب ..

المشكله اني ما اعرف حق سوالف النفاس كلش ملش وامي نفسي مسكينه ما تعرف لان امها هم ما تعرف فمحد علم الثاني ..

سؤالي هو لكم انتو خواتي وعزيزات ومنقذاتي .. ابي اعرف شنو المفروض اكل من اول يوم الولادة الى اخر الاربعين شنو الادوية شنو اكل ومتى وشلون ومع شنو ؟؟؟ الخ وسمعت في سوالف نتبخر فيها ومعرف ايش يعني الي تعرف برنامج النفاس الكامل تفيدني ويزاها الله الف خير .. ابي اتنفس عدل تكفون وان شاء الله القى عندكم الجواب ..:yaaaaaarb: وهالبرنامج يصلح للولادة الطبيعية والقيصريه ولا بس الطبيعي ؟؟ واذا قيصري شسوي ؟؟

تخيلو امي تقولي ما شرينا ادوية النفاس .. اقولها شنشتري وحق شنو ومنوين اشتري وشلون نستعمله غشممممم حدنا بهالسالفه ..:eh_s(11):

انطر ردكم بفارغ الصبر وتسلموووون

 

[زينانه]

الله يتمم عليج بالهون والسلامه
بس انتي قالولج ولادتج طبيعي والا قيصري؟

 

[لوكي وكلي دلع]

انشاءلله البنات يقولولنا انا نفس حالتج مااعرف شي

 

[Mednight Rain]

انا نفسج بجرية وماعرف شي ، دخلت كذا موضوع بمنتدانا واستفدت من البنات ، في وحدة اسمها خبيرة أعشاب مسوية مواضيع تشرح وتبين لج كل دواء وطريقة استعمالة ، وتبيع أدوية أنا للأمانة ماجربتها .
بس البخور مانصح فيه احسه خرااابيط

شوفي هالرابط http://www.q8yat.com/t102628.html

 

[*ريما*]

سبحان الله

 

[q8 83]

شوفي موضوع خبيرة اعشاب لان مشالله عليها حاطه كل شي بالتفصيل

 

[معلمه متميزه]

مشكورين بنات على الرد انا احتمال قيصريه واحتمال طبيعي الدكتورة تقولي 50-50 بس لان ولادتي الاولى قيصري والله يستر من هالولادة ..

 

[دمثة]

حبيبتي عندج خبيرة اعشاب بس اتوقع تسافر بالصيف توقف طلبات

في وحدة اسمها ام فيصل بيتها بجابر العلي اخذي منها ادويتج للنفاس روعه عاد سوي سيرج واخذي الرقم تلفوني مو جنبي عشان اعطيج اياه

والبنات يمدحونهاا


1- بالمستشفي اخذي معاج مره وبس تطلعين من الولادة يعطون اهلج ماي فيه ويخلونه جنبج كل ماعطشتي شربي وبعدين زين لج يجونج متعطرين وموزين العطر عالجرح

2- الدلاغات ما تغطينها والبنطلون لابسته عالطول وغطي راسج

3- الصبح ريوق الصبح اهم شي الساعه 7 حليب حار والدوا الاعشاب مردود اسمه وتنامين وعقب تقعدين تاكلين غداج

4- السبوح بسرعه ونشفي الشعر

5- بعدي عن العطور لين يصير الجرح زين والسرة البيبي تطيح

6 - اياكي والجوع اهو الخراب بعين امه ههههه


وسوي سيرج بالمنتدى في بنات وايد حاطين برنامج النفاس

 

[دمثة]

ترى القيصريه خامس يوم من الولادة تاخذ الادويه لكن اللمره لازم

 

[فوفو..]

اسمعي ياقلبي ان كنتي من السعوديه فحيك الله جربي كورس النفاس
وهوعباره عن ..1لهوم العشرين الاولى
2..لهوك العشرين الثانيه
3..عسل طبيعي مخلوط بلهوم خاص
4..بخور للعشر ايام الاخيره
5..غسول للعشر ايام الاخيره
6..مخلط اعشاب
7..تمره بسمنه طبيعيه مع حبه رشاد وحبه سوداء
8..كريم للبشره ينعم ويصفي ...طبيعي..
ان حبيت تتواصلين معي حياك الله عند ك الجوال او رقم البن الخاص فيني..

 

[Kawaii GiяL]

والله حتن انا نفس حالتج ماعرف بهالسوالف و لا امي تعرف
​

 

[زينانه]

لاتحاتين
انتي بما ان مجربه النفاس من قبل دليل على ان عندج خبره صغيرونه عالاقل
انا اعطيج رقم وحده تبيع ادويه تهبل ونظيفه بالعارضيه ورخيصه مو غاليه
ثاني شي...... النفاس لازم تهتم بشغلتين (الاكل - اللبس)
شلووووووووووووون؟؟؟


اللبس: يعني لبس يدفيج من راسج لريولج عشان لايدخلج هوا لان الهوا اذا دشت راح تتعبين حيل
مو قصدي تلبسين شتوي وانتي بالقيظ.لا لا بس عالاقل على راسج امطه مغطيه اذونج ... لابسه بنطلون قطن تحت قميص النفاس
او تلبسين بجامه بكم طويل بالبيت. وبوقت النوم ... ودلاغات بريولج وديري بالج تمشين حافيه عالرخام.


الاكل: النفاس لازم تهتم بريوقها وغدا وعشا يكون وجبه سنعه مثل دجاج محشي وسلطه وشوربه ... وقبوط بالحم ....
مع زياده الفلفل الاسود طبعا عالاكل....وبين الوجبات تقدرين تاكلين عصيده او شاي اعشاب...

ممنوع تاكلين الكوسا البطيخ الملوخيه .الباميه. الايسكريم . المشروبات الغازيه)لانها تضر رحمج وتتعبج

واي شي انا حاضره للاستفسار اكثر
وادعيلي بالولد​

 

[Kawaii GiяL]

حبييبتي حست بالمنتدى و ماشالله يمدحون خبيرة اعشاب ام خالد الهاجري
شوفي هالروابط الله يوفقها سمعتها طيبة بالمنتدى
انشالله اذا قربت اولد باخذ منها و اريح راسي و افك امي من هالسوالف
و صديقتي و حبيبتي بالتجمع ام وهابي جربت من عندها تمدحها

http://www.q8yat.com/t102628.html

http://www.q8yat.com/t749059.html

http://www.q8yat.com/t748260.html

​