خبيرات اسبانيا يدشون هني

[q8helwa]

شلونكم بنات

اللي خبيره باسبانيا وراحتلها من قبل

بسال

عادي اروحلها بعطلة الربيع يعني مافيها ثلج


وجم تكون ميزانيه اذا بقعد اسبوع ونص؟

وهل هي غاليه والا رخيصه؟

وشلون جوها؟

وفيها اسواق شعبيه رخيصه؟*

 

[law love]

والله نسيت متى رحت برشلونه كان شتى بس ماكو ثلج و موحيل برد

اهيا كديره ماعجبتني وايد

دشي العرب المسافرون و اقري التقارير وقرري

اي شهر بتروحين ؟

 

[q8helwa]

انا شفت صوورها تهبل طبيعه ومناظر

 

[law love]

معلومه بالشتا ماكو طبيعه و مناظر

برشلونه كلش ما شفت طبيعه

 

[q8helwa]

اب اب

 

[KOKO_284I]

ان شاء الله البنات يفيدونج

 

[الأنيقةs]

السلام عليييييكم أنا بعطله الصيف رحت أسبانيا وتحديدا برشلونه بصراحه عجيييبه خصوصا شارع الرامبلا وفي قريه لاروكا فيها محلات الأوت لت عجيييييبه تنزيلاتهم وبصراحه الديره غالية ورحت مدريد بس ما ارتحت فيها يعني مدينه جامده كلها مباني ماتفرق عن باقي الدول برشلونه فيها أسواق حلوه وأماكن سياحيه ممكن تروحين بالقطار صج غالي الدرجه الأولى بس اريح من الدرجه العاديه إن شاء الله أكون وقدمت تقرير مختصر وإذا تبين اي استفسار من عيوني

 

[القصيدة]

السلام عليكم و رحمة الله و بركاته

أسبانيا مناسبة بإجازة الربيع .. أبرد من جونا لكن مو ثلج

الأسواق الشعبية موجودة ع البحر في ماربيا .. برشلونا و مدريد بوتيكات الجلديات صناعة أسبانية و أسعارها معقولة

Have a nice journey :eh_s(17):​

 

[q8helwa]

اب اب اب اب اب

 

[عذوق]

اسبانيا ما يجيها ثلج انا رحت لها شهر 12 بس تهببببببببل
وقبل لا نسافر نرد نزل ثلج اةل مره لما جات العاصفه الثلجيه باوروبا
برشلووونه تهببببببببببل وما تنمل واسواقها تهبببل بس غاليييييييه والمطاعم غاليه بس اكلهم عجيييب السي فود
مدريد مثل ما قالت الاخت جامده ما حبيتها
وحضرنا مباريات توونس
فيه مكان لمطاعم سي فود ع البحر اسمه اولمبيك يهبببل اكلهم فيه اكله مشهوره عندهم بسأل زوجي نسيت اسمها
والكالاماري لا يطوفج

اممممممم

اذا تذكرت شي برد اقولج

 

[عذوق]

ي نسيت تراها باإاإاإاإإارده بالشتاإاإتإا مووووت البس بنطلونين ودلاغين وبوت عزكم الله واحس رجولي تجمد
ووجهي ما اقدر اطلعه البرد يقطع الوجه احط السكارف ع وجهي
يمكن السنه الي رحنا فيها كان برد حيييل

 

[<<المها>>]

ثلج ماكو بس بررررد وبرشلونه تهبل انا عجبتني وايد رغم انها اوروبيه بس الدوله فيها روح عربيه وشعبها حبوب اهيا كلها كسياحه متيمعه بشارع الرامبلا يهبل كله كشكات مبيعات وايس كريمات ومطاعم وحقين العروض والرسامين وكل الفنادق عليه وهناك اكو مجمع (( اللي كورت انجل )) يكون بساحة كاتالونيا يم الرامبلا عبرت شارع وهناك كله محلات مطشره ( زارا ثلاث محلات / h&m /ميزيم دوتي / اوشيو ومحلات جواتي ومحل مانجو / ومحل ديسجوال... الخ )) كلها هناك يبيلج كل يوم تمشين ووتدعسين بهالشارع كل داعوس تدشينه تكتشفين محلات ومطاعم بس لاتفكين عينج وايد ترى سوقها كله عندنا بالخليج يعني كله من طقه المحلات اللي قلت لج عليهم لانها اصلا محلات اسبانيه

بس حق العروض وهالسوالف مادري اذا بالربيع فيه ولا بس بالصيف عشان السياحه والجو

والاوت ليت الصراحه يهبل اسمه ( la roca village )) يبعد عن برشلونه تقريبا ساعه بس يسوى العنوه مسوينه على شكل قريه وفيه كافيهات والعاب لليهال بس لاتروحون بتاكسي لانه وااايد غالي وصلنا ب 40 دينار تقريبا وردينا بباص الشخص بيوروين ونص تخيلي الفرق احنا ماقدرنا نروح بالباص لاننا ماندري متى يتحرك الصبح فخفنا يمشيى علينا الوقت عاد انتي اذا بغيتي تروحين قبلها بيوم مري ساحة كاتالونيا وسالي متى يروح الباص اعتقد اخر رحله الساعه ١١ الظهر بتوقيتهم بس انتي تاكدي

من ناحية الغلا واايد غاليه المطاعم والتكاسي تقص الظهر

اسواق شعبيه ماشفت بس اكو الافارقه يحطون بسطات على البحر ماشفت غيرهم وفيها تقريبا ٣ مجمعات كبار ونفس المحلات مكرره

في حديقه فيها نافوره راقصه ورا ساحة الكتلونيا بس هذا اللي فيها عن نفسي حبيتها وايد
اي شي تبين راسليني ع الخاص اخاف ماارد للموضوع*

 

[وردة الكاميليا]

up

up

up

 

[miss_art]

up
up
up

 

[shereeen.79]

:eh_s(14)::eh_s(14)::eh_s(14)::eh_s(14)::eh_s(14)::eh_s(14)::eh_s(14)::eh_s(14):هلا حبيبتي
انا رحت لها شهر 9 ثاني يوم العيد وافتريت 3 اسابيع اباوربا
وقعدت 5 ايام ابرشلونه والصراحه الديره روووووعه وكانت حاره حزتها وشمسهم نار وساعات يصير براد
وديرو بالكم من اللي يقعدون ابشارع الرامبلا ويلعبون عالارض (مادري شسم اللعبه الصراحه ) اللي يحطون كره صغييييييييييره تحت قواطي الكبريت ويغيرون اماكنهم وطبعا تعطينه مبلغ من الفلوس واذا كسبتي تاخذين الدبل ،،،انا طبعا اول شي خذيتها على لعب وضحك وقلت حق ريلي خلالعب دقيقه ،،،،اثاري السالفه كلها غش ابغش وخلال دقيقه خسرت 500 دينار ويومها حاشني اكتئااااااااااااااب مو طبيعي وبجيت بجي من القهر ،،، بعدين قلت قلعتي حسيت ان هاللعبه جنها قمار

 

[ام نواف 5]

السنه هذي اوروبا بكبرها ماكو ثلج حتا باريس الحمدلله بس برد أكيد وإسبانيا معروف أدفا من فرنسا انا رحت اسبانيا بس من مطار باريس لمدريد غيرنا الطياره ورحنا غرناطه عشان كان نفسي اشوف قصر الحمرا ومن المطار خذنا سياره وجلسنا في غرناطه كم يوم ورحنا بالسياره لقرطبه وبعدين رحنا ملقا ون هناك رجعنا باريس ران شالله المره الثانيه بروح برشلونه عشان المدح الي قريته عنها