حياكم نتناقش بالمشاكل اللي تواجه عيالنا في المدرسه

[ملكة بيتها]

السلام عليكم
هالموضوع موجهه لجميع الأمهات والمعلمات والمتخصصات ...وإلى كل من يهمه الأمر أو لديه رأي أو معلومه تثري الموضوع ...
حبايبي عيالنا نص يومهم يمر عليهم وهم في المدرسه وطبعا يصادفون ويواجهون كل شي لوحدهم دون تواجدنا حولهم فأحيانا وعلى الأغلب تكون مشاكل صغيره يقدر مواجهتا وحلها بنفسه ...وبالمقابل هناك في مرحله ما قد تطرأ مشكله أو صعوبه يواجها لوحده ويكون غير قادر على حلها أو التأقلم معها ....وأحيانا تكون هناك ظروف ومسببات لمشاكل تخرج عن سيطره أبنائنا وحتى مع تدخلنا في حلها نحتاج لحكمه وحل ناجح نستمد منه الحلول ونستلهم الأفكار لنخلص أبنائنا من هذه المشاكل التي قد تترك أثر سلبي على نفسياتهم وبالتالي على تحصيلهم لو تركت من غير حل ..

ففي هذا الموضوع دعوه للنقاش وطرح المشاكل التي تواجه أبنائنا ونقاشها بمشاركتكم بتجاربكم حتى نصل لحلول لهذه المشاكل .....
وفي الختام أسأل الله العظيم أن يوفق أبنائنا ويجنبهم كل سوء ....

 

[lyale]

للرفع
خوووش موضوع

 

[ملكة بيتها]

شكرا ليال على الرفع

 

[ملكة بيتها]

أنا اليوم برفع الموضوع بطرح مشكله يمكن مرت على الكثير من الأمهات ياريت تشاركوني بحلها أو تقولولي شلون أتصرف ...
بنتي في الصف الأول إبتدائي وهي وايد هاديه وخجوله وفي صفها بنتين شياطين ودايم يتكلمون معاها بالصف ويلهونها عن المتابعه مع المدرسات ..وفي الإجتماع وحده من المدرسات أخذت فكره غلط عن بنتي بأنها شيطانه وما تنتبه ...طبعا أنا طلبت من بنتي إنها ما تتكلم معاهم ولا ترد عليهم وصار هالشي بس البنات وايد لاصقين ببنتي وهي كونت صداقه معاهم ...الحين أنا خايفه تتطبع بطبايعهم لأنهم معاها بصفها ولأنهم شياطين ماني حابه أقولها لا تكلمينهم ولا تحبينهم لأن بعدين بيقلبون عليها ويصير بينهم حزازات ؟؟ إنتو شرايكم شلون أتصرف

 

[lyale]

انا بكون اول وحده اشارك وعن تجربتي انتي ما تقدرين تقوليلها وخري عنهم بس فهميها ان الي يتكلم بالصف غلط وهي اكيد بتصير ابله علي ربعها وتقولهم ان غلط وجذي راح تتعلم وتعلمهم ترااا حرام في يهال محد علمهم
مثلا انا اليوم بنتي يتني ولا تقول اليوم رفيجتها ووحده ثانيه طالعين من حصة الدين قايلين حق التيشر بيروحون الحمام ورايحين يلعبون بالحمام تقول جذبو علي التيشر وفي مدرسه صادتهم وودتهم الصف وبلغت الابله ان وحده وحده ترووح لان قاعدين يلعبون هه فا فهمتها ان غلط وما يصير نجذب ومالج شغل فيهم اذا اهما يحبون يجذبون انتي لا تجذبين الله ما يرضا بيزعل والتيشر بعد راح تزعل منج ومن هالسوالف

 

[ملكة بيتها]

ليال حبيبتي والله إنتي الوحيده اللي معبرتني وصاجه أنا فهمتها إن غلط هالشي ومايصير أحد يتكلم بالكلاس هي مسكينه قامت ما ترد عليهم بس هم يظلون الحين هم مرافجينها بالفرصه يلعبون معاها وطبعا مع غيرها هم الظاهر مسوين صحبه مع الكلاس كله وهذا السبب القوي اللي يخليني ما أقولها لا تكلمينهم ولا تلعبين معاهم ...ومسكينه كل يوم الصبح أذكرها ما نتكلم بالكلاس وتلعبين معاهم بس ما تقلدينهم بشطانتهم ومن كثر ما أكرر عليها اليوم تقولي أدري ما أتكلم بالكلاس قبل لا أعطيها الموشح الصباحي ؟؟

 

[روحي تحب]

يعطيج العافيه ملكه على هالموضوع الحلو ....والله توني اشوفه

واي ياملكه........ انتي بنتج تعاني تقريبا من نفس مشكلة بنتي بس مع شوية فرق انه انتي بنتج يديده على هالكلاس بس شسوي اذا آنا بنتي هذول معاها من الكي جي يعني شوفي سالفة اليوم يت متضايقه وحده من هالبنتين طاقتها وقايلتلها ستوبت غيرل وقلتلها وين التيشر ليش ما قلتيلها تقول ماكانت اهني واحنا كنا بروحنا بكلاس الميوزك

....وهم آنا بنتي تستحي وايد وهالبنتين آنا شايفتهم ومكلمتهم ماشاء الله وايد جرئين وشياطين وبنتي ماتقايش وياهم ومسيطرين على الكل ....

.وآنا اسوي نفس كلام اختي ليال بس احس انه السالفه مصخت هاذي ثالث سنه ومايغيرون تعاملهم وياها وعاد اهي تحب الكل وتقول احبهم بس كله يطقوني وياخذون اغراضي ومايخلون احد يلعب معاي وآنا مره رحت قلت اسولف معاهم واقولهم انها تحبكم وانتوا حبوها انتوا بتضلون لما تكبرون مع بعض الله لايواريكم شلون ترد علي البنت ......تقولي ابي اعرف شمعنه بنتج التييشر تخليها ليدر عشتوا صدمتني :eh_s(1): وتقولي ليش تلبس جوتي نايك ابيه انتي شكو وكلامها كان وايد جرئ معاي يعني حتى مافي حيا الحمد الله والشكر وبعيد ميلاد بنتي قعدت اوزع هدايا تقولي يلا متى تخلصون هالعيد ميلاد ذبحتينا راسي قام يعورني عرفت انه البيئه اللي اهي فيها وايد صعبه وسلوكياتها مبينه بس شسوي ؟؟؟الشكوى لله

الحين آنا محتاره بنتي تحبهم عادي لاني اصبرها بس ليه متى اخاف تصيير سلبيه وتتعود على الطق وهذا شئ موحلو جذيه موقاعده تبني شخصيتها صح وماني لاقيه حل مع هالبنتين وحده كويتيه والثانيه اسبانيه بس رفيجات حيل مع ببعض كانهم عصابه.....ياي على بالي انبه المدرسه اخليها شوي تنتبه تحط بالها تراقب معاملتهم معاها

يلا بنات فيدوني ماتقصرون فيكم البركه .......ابيه احس اني كتبت مقاله :dddds: ماعليه تحملوني

 

[ملكة بيتها]

هلا روحي تحب حياج الله بالموضوع واي شنو هالبنات اللي أهاليهم مو مربيتهم أنا المدرسات يدروون ويتشكون منهم بعد يوم الإجتماع مدرسه العربي أسألها عن بنتي فتحت موضوع هالبنتين ونست بنتي قامت تكلم عنهم من كثر ما هم شياطين فعطت موجز كامل عن اللي يصير بالصف مسكينه عاد أنا قلتلها ليش ما كلمت أمهاتهم تقول إن وحده من البنات ( شوفي بس التربيه ) أمها طقتها طراق جدام الأبله لما عرفت عن شطانتها يعني هالطفله شنو بتتعلم من الطراق غير إنها تكره الأبله وتكره الماده وبتنكسر من الداخل وبتغار من كل طفل أو طفله أمه تعامله بلطف أنا أشوفها لما أمها تاخذه بآخر الدوام مسكينه يعني الأم لا تبوسها أول ما تشوفها ولا حتى تمسك إيدها لا الأم تمشي مستعيله والبنت تركض وراها وتعابل بالجنطه بعد والله شنو يتقطع قلبي عليها وهذاك اليوم تطالعني وأنا أبوس بنتي وأحضنها ما تدرين شصار فيني بقيت أروح وأحضنها وأبوسها ....يعني تحسين الأهالي مو ماخذين حنان من أهاليهم
بس لازم تبلغين المدرسه عشان ينتبهون لازم ما توصل للطق عشان يحطون لهم حد من الحين باجر يكبرون وتكبر العصابه معاهم

 

[& دلوعه زوجها &]

الله لايجيب المشاااااااااااااااااكل

مشكورةةةةةةةةةةةةةةةةةةةةةةةةةة

 

[روحي تحب]

مشكوره ملكه حبيبتي ......واي الله يعين ياربي ويحنن قلب كل ام على عيالها ويحنن قلب كل ضنى على امه

يعطيج العافيه خلاص شورتج وهداية الله آنا كنت افكر بجذيه والحين رايين احسن من راي واحد ......مننحرمش منج يالغاليه

 

[حضاره]

لله يعطيكم العافيه على هالموضوع00

انا مشكلة بنتي في الاطار اللي تكلمون فيه00بنتي الحين بجريد 4 بس من كانت بجريد 2 كانت معاها بنت مضايقتها ودايما اتحرش ببنيتي

ولما ضاق خلقي على بنيتي قلت اروح واكلم البنت تكف اذاها عن بنتي!!

في نهاية الدوام وهم طالعين مسكت البنت قلت لها 00حبيبتي ليش على رفيجتج ؟00ليش اطقينها؟؟ عفيه ماما لاتضايقينها عيب!!

بس هذا اللي قلته!!مادريت ثاني يوم الا السكرتيره داقه علي تقولي والد فلانه جاي المدرسه ومتضايق حده ليش اكلم بنته!!!

قلت لها بنته مناشبتنا مناشب كرهت بنتي بالمدرسه 00بس ليش اني ادور الستر قلت لها اعتذري له نيابة عني00

وبجريد 3 حرصت احطها في كلاس غير كلاس هالبنت تخيلوا اشسوت؟؟قامت اتحرش البنات اللي بصفها على بنيتي يحارشونها

بالبريك00ياحرام يطوف الوقت غلى بنيتي ودمها محروق00وهالسنه اضطريت احطها مع مدرسه عاديه00عشان لاتصير بصف

هالبنت وهم ماخلصت من شرها بنيتي متلعوزه00وانا تعبت من هاللي موبنت اوادم شسوي ؟؟حاولت اول المشكله اخليها ترافجها بس البنت

قبيحة ماكو فايده كرهتها وقلت حق بنتي لايكون اتصاحبينها او اتماشينها 00يارب تكفي بنيتي شر كل من فيه شر00

هذي احدى مشاكل عيالي وحبيت ادلي معاكم بدلوي00

 

[mr000]

سلام أمهات اشلونكم!ملكه تسلمين هلى هالموضوع القيم بصراحه احنا الأمهات قلبنا متروس ومتأثرين أكثر من عيالنا بهالمشاكل اللي تصادفهم بالمدرسه! هذي مشكلة الBullying مثل مايسمونها الأجانب يعني ياهل يستسبع على غيره مايعاني منها ألا اليهال اللي مثل عيالنا اللي ربيناهم على الصح والأدب واللي يطقك لاتطقه بس علم عليه المدرس وللأسف طلع هالأسلوب مايفيد ويحتاج تدخل الأهل يالله المدرسه يحسون بأهمية المشكله واشكثر الياهل متأذي وقاعد يعاني منها آنا ولدي تأذى من الصبيان لما نقلته من مدرسته صبرنا 4 سنين مو شويه والله أني كنت أقعد بالدوام متضايقه لأني عارفه أن ولدي ألحين بالمدرسه قاعد يأذونه الصبيان وبدال ما المس توقف معاه تعاقبه وتصدق الصبيان وهذي كانت معاناتي لأنه كان ولدي يسكت وبس يحاول يتكلم وتقوله المس بس لاترد خلاص يسكت المهم ياما تعاقب ظلم وياما رحت المدرسه تكلمت ماكو فايده لما نقلته وللأسف أول ماداوم العام بمدرسته اليديده هم تسلط عليه ولد مصري وماشاءالله فنان بالكذب والتمثيل عالمدرسين وهم نفس الشي آنا رايحه وراده عالمدرسه وهم حصل عقاب ظلم مرتين بس الحمدلله أن هالولد كان عليه شكاوي وايد فعرفوا أنه مو من ولدي والحمدلله الأخصائي انسان ممتاز وايد وقف معاي والحمدلله انتهت المشكله وطخينا باقي السنه ولما عرفت هالسنه أنه الولد نفسه صار بصفه من ثاني يوم على طول آنا ابلمدرسه قلتلهم تغيرون صف ولدي الحين والحمدلله غيروا صفه!! بس اللي أبي أوصله لكم عقب قصة حياتي هذي كلها أنه 1-اللي مثل نوعية عيالنا يتفاجأون بالمدرسه بنوعيه يديده من اليهال مايعرفون يتعاملون معاهم يعني يهال فيهم خبث ولؤم ونحاسه وجرأه وطوالة لسان عيالنا مايقايشونهم 2- لازم تعودونهم يدافعون عن نفسهم و تقول حق المدرسه وتتكلم شنو صار وتدافع عن نفسها بكلام واضح آنا ولدي لي المتوسط لما بيدافع عن نفسه حده يتكلم كلمتين ويسكت تالي يقولي الاخصائي ولدج ليش ماتكلم عدل ووضح لنا وهذاك الولد ماكلهم بلسانه فطبعا يصدقونه 3- المدارس حتى الخاصه موبس الحكومه لاتسكتين عنهم اذا ماتروحين لهم وتشتكين وتعلين قلبهم كل شوي رايحه وراده والله أنه يضيع حق الياهل! ويعطيكم العافيه مابي أطول عليكم أكثر!!

 

[ملكة بيتها]

شلونكم أمهات شعليكم ويك إند هالله هالله بالطلعات والروحات .....ههههه
دلوعه زوجها حياج الله وعلى رايج الله لا يجيب المشاكل
روحي تحب ...العفو حبيبتي وربي يبعد كل سوء عن بنتج
حضاره ...الله يعين بنتج على هالبنات بجد ساعات تحسين إن ما عندهم أهالي أستغفر الله لأن تصادفين ناس كلش ما في تربيه بس أنا رايي تقوين بنتج عليها وتفهمينها إنها سخيفه ولازم تتحاشاها مو لأنها خايفه منها بس عشان بنتج ما تطيح معاها بمشاكل سخيفه هي بغنى عنها وقولي حق بنتج إنج أرقى ومو فاضيه ولا سخيفه مثلها عززي ثقه بنتج بحالها ...أنا هذا الحين أشتغل عليه مع بنتي أقولها وي هذي مو ذكيه تسوي مشاكل وبعدين المس راح تعاقبها وإنتي تعرفين الصح علميها لما تقولج تعالي نسوي شي غلط يعني أعطي بنتي الثقه بنفسها وقلتلها إذا أذتج قولي حق المس ...
مروو ...نور الموضوع بوجودج وصاجه بكلامج صج إحنا ربينا عيالنا على قيم ومباديء أنا بنتي كنت أمنعها إنها تطق أحد بس مره قابلت الدكتور جاسم حاجيه إستشاري تربوي وقتله عن إن إحنا نربي عيالنا على إنهم مايطقون وجذي الحين أقولها تطق وتاخذ حقها أصير بجذي متناقضه قالي لأ سأليها هي شنو ودها تسوي لما أحد يضايقها وخليها هي تتعرف على الأسلوب اللي تدافع عن نفسها وطبعا قال لازم تخلينها تدافع عن نفسها ...ومروو بالعكس ياريت تطولين بكلامج أكثر وأكثر عشان نستفيد منج والله يبعد كل سوء عن ولدج ويوفقه ويسعده .

 

[حلم الطفولة]

** متابعه معاكم **

الله يعينكم حبايبي ,, ملكه نفس مشكلة بنتي يوم كانت بأولى روضه إلى ثانيه ابتدائي وملازمتها وحده مخربه عليها .. أدري بنتي تحبها وايد بس عطيتها جرعات عالخفيف لغاية ماتمردت منها .. القي النقطه الصح اللي تبدين فيها معاها ,, ودعائنا معاج.

حبيت أطل أشوف منو مخالفه بالردود !! <<< ناظره مو مشرفه ! .. حبيباتي فيكم الخير والبركه ان شالله

 

[ملكة بيتها]

هلا وغلا بحلم الطفوله ناظرتنا المتميزه...أنا ماشيه بنفس طريقتج إني أخليها تتمرد عليها شوي شوي والله يبعد عن عيالنا كل سوء

 

[الريان]

شوفوا بنات انا عندي عيالي في الابتدائي-صبيان- من صغرهم وانا اقولهم اللي يطقك طقه ,وعلم عليه المدرسه بعد,يعني يدافع عن نفسه اذا عالوا عليه.ولا يبدي اهو بالهواش او يضايق احد ....لاني اذكر قبل لما كنا في المدرسه كنت مؤدبه ومتفوقه وفي بنات كانوا يضايقوني /طبعا البنات لسان وتطننز/وكنت اعلم امي تقولي خليهم هذول مو مؤدبات.خليج بدراستج..شنفعني هالكلام ضايقوني سنين ,ليما رابعه ابتدائي كرروا المضايقه ,تهاوشت معاهم .وبعدها ماعادوها وياي...يعني لو متصرف هالتصرف من قبل جان ما انقهرت هالفتره هذه كلها.وكرهت المدرسه والتفوق................
عشان جذي ليما يردون عيالي من المدرسه اسولف وياهم شصار وياهم ...وانا داخل نفسي اركز على الصبيان المتنمرين تعرضوهم ولا لاء...عشان اكون في الصوره واتصرف بسرعه واعلمهم شلون يتصرفون ...لان الصبيان يخشون ويتعرضون لمواقف كبيره يمكن تكسر لنفوسهم ويكرهون المدرسه......وبالذات المرحله الابتدائيه....
المدرسه مجتمع مصغر فيه الزين وفيه الشين....واهم من الدراسه نعلم عيالنا شلون يتعاملون اجتماعيا مع اللي في المدرسه....
مشكوره عمري على هالموضوع صراحه ممتاز واتمنى انه يستمر..
...وان شاء الله اقول لكم موقف بط جبدي صار مع ولدي الكبير ...وخلاني ما اتهنى بالعطله الصيفيه
بس الحين انا مشغوله واكتبه مره ثانيه اذا دخلت المنتدى
ودمتم سالميبن........:eh_s(1)::gathering:

 

[lyale]

الريان صاجه انا معاج الياهل لازم يعرف يتعامل مع اليهال لان الاهل ما رااح نكون دايما معاه وخصوصا المدرسه هذا عالم ثاني لازم يكون يقوي ويعرف يتعامل مع غيره لان هذا بيكبر معاه باجر فاذا ظل ما يعرف يرد بيظل ينهان وما يرد حتي وهو كبير

 

[ملكة بيتها]

الريان ...حياج الله حبيبتي وشكرا إنج ذكرتيلنا تجربتج بصراحه أنا ما أعرف عن الأولاد وايد بس الأكيد واللي أوافقج عليه إن السكوت مو هو الحل عن المضايقات لا بالعكس أحسه بيصير الطفل الساكت هدف للمشاغبين يعني لازم نخليه يتعلم يوقفهم عند حدهم بأن يشتكي عليهم عند المدرس وإذا تكررت المضايقات يجب تدخل الأهل في هذه الحاله بالتواصل مع المدرسه ...وناطرينج يالغاليه لا تطولين علينا

 

[ملكة بيتها]

للرفع

 

[ملكة بيتها]

السلام أمهات عدم دخولكم الموضوع مونسني ...لأنه يدل على عدم وجود مشاكل تواجهكم مع المدرسه وهذا شي يطمني عليكم وعلى عيالكم

وياريت تقولولي شلون تصرفون إذا كان في معلمه أو معلم عصبي ويصارخ في الصف ؟ ؟؟؟ أنا بنتي ما تحب الصراخ وعندها مدرسه تصرخ في الصف على الطلبه ؟؟؟؟ شوروا علي شلون أتصرف