حياتي بدون خادمة .... احلى :_) تجمع بيوت كويتية بدون خادمة

[خبيرة اعشاب]

السلام عليكم

طبعا اكيد اغلبكم او كلكم مو عاجبكم العنوان

و انا بعد ؟؟؟ مو عاجبني ...

بس من باب الترويح عن النفس ........


الحين ابي اي وحدة ما عندها خدامة تجي اتسولف لنا عن حياتها في ظل هذه الازمة

و شلون اتنظم وقتها

و تعطينا افكارها الحلوة في السيطرة على الموقف :d:d:d

 

[أتعبني شمووخي]

انا امس سافرت خدامتي وتقول بترجع بعد شهر
والحين مو عارفه شنو اسسوي حدي ضايعه مالقيت مؤقته الي بالشهر
وولدي عند امي اذا رحت الدوام واذا رديت اخذه

 

[خبيرة اعشاب]

خلوني بقول لكم تجربتي

في البداية انا عندي خدامتين و ما فيهم اي شي

بس جذي قعدت الصبح ما حصلتهم :eh_s(11)::eh_s(11):

رديت نمت مرة ثانية قلت يمكن حلم :bbbiu:

بس طلع حقيقة و مرررررررررررة للاسف

فقلت خلاص بالطقاق بجيب غيرهم

و رحت للمكاتب و لا كلللش ماكو خدم ,, لا مرتجع , لا طلب ,,, ابداااا

فقررت مواجهة الموقف

في البداية شوفوا نظامي

طبعا البيت كان يوم الاربعاء غبار حييييييييل و ما نظفنا و على اساس الخميس كنت برتب و نحشتهن صارت الخميس

فمن الصبح بس تريقنا و اطلع انا و عيالي ما ردينا الا بالليل متاخر

يوم الجمعة جبت شركة تنظيف نظفوا البيت كللله الصالات على المطبخ على الحمامات عزكم الله


و دقيت على مرة طباخة سويت عندها اشتراك 4 ايام بالاسبوع ب 20 دينار بس انا للتنويع قلت

اخلي يوم او يومين اطلب منها مو شرط كل يوم

و اتسوي الغدا على حسب طلبج مرات 6 مرات 7


و الحين ما شاء الله من جبت شركة التنظيف رتبوا لي البيت حييييييييييل و اتفقت معاهم ان مرة بالاسبوع يجون يغسلون الدرج و ممر الخدمات

الاجراءات المتبعة :


* الصالات سكرتهم

* الحمامات عزكم الله خليت بس 2 واحد لغرفتي وواحد لعيالي و سكرت الباجي

* اهم شي لا تخلين الشغل يتراكم حاولي اتخلصينه اول باول
يعني مثلا المطبخ المواعين الي تستعملينهم على طول تنغسل ,, و بس اتخلصين طبخ مسحي الارضية و المجلى و خلي مكانج كلييييييييين

** حطيت بالادرج معدات صغيرة للتنظيف فوطة + سبراي منظف ... مرات اكون بالصالة فاخذ الفوطة امسح الطاولة او التلفزيون او بقعة على الزولية

** تغسيل على مراحل .. مثلا اليوم امسح الجام و المع الحنفيات و البانيو ... الخ
و من باجر فقط الارضية


صدقوني احس بيتي صار انظف و ريحة النظاافة طالعة من كل مكان

على قولة زوجي انتي تشتغلين بضمير و الخدامة ما يهمها

 

[خبيرة اعشاب]

اول شي طلعت عندي كمية من المواعين السفري كنت حاطتهم حق البر و الكشتات



حطيتهم بكبت بالمطبخ و اخليهم حق استعمال العيال اتعرفون لازم يبون كلاصات او صحون 24 ساعة و بجذي قلصت المواعين للنص تقريبا


شغلة ثانية :

اهم شي قعدة الصبح و تجهيز العيال للمدارس

ففي البداية اغراض الريوق احطها بالليل ( ارتب صحون الجبن و القيمر ... ) مع اني عيالي حدهم توست و جبن

بس الكلاصات و الفناجين و الغوري ... الخ كلها اجهزها بالليل و احطهم بصحن و اغطيه بسفرة

يعني من باجر مجرد اطلع الصحون من الثلاجة

و الصمون بالمكرويف دقيقة

و ماي حار


و بس يروحون للمدارس اضبط ريوق ابو العيال :ggdw::ggdw:

 

[كويتيه وافتخر]

تمام يا ام خالد عساج عالقوه

احلى شيء حياة بدون خدامه

 

[ام الدرر]

ماشاءالله تبارك الرحمن
عساج عالقوة
والله الخدم شر لابد منه ​

 

[قدها وقدوود]

ما شاء الله عليج والله يعينج ويقويج جربت الحياة بدونها وتبعت نفس طريقتج سكرت الدواوين والمواعين سفري وايام وعدة جعلي ماشوفها مره ثانيه وياكم اجمعين موضوعج حلو وحماسي

 

[خبيرة اعشاب]

الله يسلمكم

صراحة انا ما اتخيل حياتي بدون خدامة لان كل وحدة عندها ظروف مسايير ,, اتعزمين ببيتج لازم خدامة اتساعدج
بس هاذي فترة مؤقتة و ان شاء الله نلقى بنت الحلال ( حشا عروس )

على قولة زوجي ... مو انا صرت مطنزة عنده ها اليومين

دقت ساعة العمل
دقت ساعة الغسيل

الى الامام
الى الامام

لا تراجع


كخخخخخخخ


بجيب فلبينية شرايكم ؟؟؟

 

[ريح الجنه]

مالج أمل أقعد يوم بدون خدآآآآمه :eh_s(16): ,,,, جان اعيالي اقلبو البيت فوق حدر .:j013:.. يمآآآي ,,, يآآآآرب اتثبت خدامتي يارب :yaaaaaarb:

 

[miss saroona]

مساكم عسل طبعا انا من غير الخدامه وحياتي من غير خدامه سلطه والصراحه اهيا اهم من الريل

 

[بتبوتااا]

لووووووووول مس اهم شي انها اهم من الريل

يمكن صدقتي << خخخخخ

الله يثبت خدمناا الله يعينج على التنظيف يمكن الحين متحمسه بس كلها اسبوع او اثنين وبتملين وتحوشج حاله كسيفه

الخدم شر لابد منه حسافه تعلمنا عليهم تهيء تهيء

 

[Melazlaza]

صارلي تقريبا سنتين بدون خدامة وانا في قمة وروعة سعادتي الله لا يغير علي والله لا يعيد ايام الخدم ذوقوني المر لاانام نفس الناس ولا اطلع ولا اكل كل شي مراقبة فيه اعسيها ستيييين دينار عشان تعيشني بسجن


شسوي اخذت قرار نهائي بالتخلي عن الخدم واشتريت ديش ووشر وغسالة فول اوتوماتك وقلاية سريعة واوتي بخار وكل مايسهل الحياة

الي ما احتاجه وديته للجنة الخيرية ونظفت البيت من قلب مع ان عندي بيبي واسم الله عليه مايعرف يقعد بس نظمت امووووووري ومااخلي الشغل يتراكم وقبل النوم اسبح 33مرة واحمد ربي33واكبر34 ورسولنا ما ينطق عن الهوى عليه افضل الصلاة والسلام

كافي الراحة النفسية وتعب ريوووووولك ولا تتعب قلبك


لا للخدم لا للخدم لا للخدم

 

[أم عبش]

مرحبا خبيرتنا وجارتنا<<<قطت وجه :eh_s(9)::eh_s(9): أنا من اول ما تزوجت ولحد الحين من غير خدامة يعنى 6 سنين وعندى عيال اثنين من غير الزوج العزيز شوفي نظامى يوم وترك غسيل ملابس وثاني يوم كوى ملابس يوم السبت اى غرفه من البيت فوق تحت ومن اسقف الين تحت ترتيب مع مسح وطبعا حذف بالزباله وطبعا غسيل انتو بكرامه الحمامات يوميا والمغاسل الاحد المطبخ الثلاجة الفريز البراد والكباته تعزيل ومسح وغسيل وطبعا الطباخ ما انسى وطبعا الدرج والاصنصير وانا ماره الاثنين الدرايش البراد والزل برش الدرايش مسح وكل مرايا مع مسح السراميك والثلاثاء الين الجمعه تنطيف على الماشى لانى معزله من اول ... وبعدين تحسين بيتج انظف وانتى تحسين براحة وتصيرين خفيفه(العمر يخلص والشغل البيت ما يخلص)) وعاد جو الكويت:eh_s(15): يسوى رجيم من كثر الشغل​

 

[lovely-girl]

حبيبتي (خبيرة الاعشاب)

الحال من بعضوا....

صارلي 5ايام بدون خدامه واحس بتعب وارهاق غير طبيعي

الله يعيني مع ان شقتي صغيره بس حوسه هالعيال ماتقعدج
من اقعد لين ينامون وانا احوس جني دبانه دايخه...

واللي يعافيج لو بتيييبين خدامه فلبينيه ييبيلي معاج لالني دورت وما لقيت

والله يعينا​

 

[برد ابو الذهب]

ام خالد عساج عالقوة حبيبتي بغيت رقم اللي تطبخلج سعرها حده مغري واشلون عالتوصيل
فديتج ياليت عالخاص

 

[ام متلق]

الحياة بدون خدامه مثل الاكل بدون ملح للاسف الشديد بواقات وملسونات وصخات بس الحياة بدونهم متعبه

 

[دلوعه دجــه]

يوووووووووووووووووووووووه

اكثر شئ اخاف منه ان خدامتي تقول :
ماما يبي يسافر ..

حزتها ببجي
هههههههههههههههههههه

الله يعينج ومشالله عليج
والخدم شـــــــــــــــــر لابد منه

 

[غرام زوجي]

اهئ اهئ اهئ دموعي تصبصب من قريت الموضوع انا ياطويلات العمر صارلي تقريبا خمس شهور بدون خدامه وعندي ياهلين بوسنه توه مكمله والثانيه سنتين ونص يعني ثنتينهم متعبين لازم اقعد قبلهم اطبخ ومرات وانااطبخ يقعدون اللي تبجي وانا اسكت فيها وبلحق على الاكل لايحترق واللي تصارخ والمشكله انه دوام ريلي شفتات ليل لانه بقطاع خاص وطبعا الصبح نايم والليل قاعد عكس اليهال ولازم اقعد معاه لايزعل ولاعمره فكر يساعدني الايمكن ثلاث مرات عن الظلم تخيلو. وبنتي الصغيره من اوخر من عندها تبجي ومايسكتها شي الالما ارد حاطتلهم العاب حاطتلهم ديفيدي وكل سيديات اغاني اطفال وكل ششي الوان ومع هذا لاحياة لمن تنادي وريلي الياهل الثالث يقطط ملابسه مني ومناك واللي مكوي يطلعه ويقطه من غير مايلبسه ويعفسلي كل شغلي ولا يزيد علي الشغل وبناتي من ردى حظي حنانات درجه اولى ريلي يقول وارثينه منهم معنه شقتي موكبيره غرفتين وصاله وحمامين واحد مال خدم تكرمون والثاني لنا والمشكله عندي بلكونتين وجو الكويت ياسلام عليك غبار جنه يقصدني من اخلص غسيل البلكونات يرد الغبار ويبهذلي الدنيا داخل وبرى البيت بموت جد ماقمت اهتم بنفسي لالبس ولامكياج ولاتكشخ ولاطلعات والكل يتهرب مني خايفين اكدش خدمهم تعبت حتى اترجى ريلي ترجي اتسبح ويمسك اليهال ومايرضى ادش اسبح والباب مبطل بس اصكر الستاره طبعا لازم اهم يكونون نايمين ولا انسى. وحزت الغدا لازم يحنون ويبجون وياذوني ومايخلوني اتغدى والمشكله ماينامون نومه وحده ستين مره يقومون ولا وانا اكتب الحين اهز وحده بكرسيها والثانيه قاعده بحضني ماينامون ادري كتبت قصت حياتي بس تعبت ابي خدااااااااااامه متى توصل *

 

[um khaled]

هو فعلا راحه بدون الخدامه لكن ماكو وقت حق نفسي

انا حاليا مشيت حالي وكل شي بجدول وبوقته

والبلوه الكبيره اذا طلعت ايام المدارس كل شي يعتفس

وانا نوعي كل شي اكوي بس توني فجيت شوي وما صرت اكوي الملابس الداخليه .. معقده مو ؟؟

وعشان شوي اخفف عن نفسي قمت اغسل ملابس ريلي واقطهم المصبغه بس كوي

ابي خدامه مره ثانيه وما ابي ما ادري شنو الحل

والله المستعان

 

[انا شفتك]

غرامي زوجي الله يعينج والله حاسه فيج انا عيالي كبار ومو ملحقه لاني اطبخ ومو اي طبخ صرت مطعم كل واحد له طلب غير والغسيل وكله كوم وكوي الدشاديش كوم وليرحت مشوار ارد تعبانه الاقي الشغل ينطر ماكو راحه كلش تعبت ..تعبت..تعبت اربع سنين شقا وعداب ادعوا الله يفرجها علي عسى الله يفرجها عليكم