صارلج احد المواقف التالية؟
اخوج الصغير يشوف معاج زوارة خميس وطلع مقطع او قالو كلمة قليلة ادب اثارت فضوله وسألج شنو يعني؟
اختج الصغيرة تأثرت بحليمة وقامت تقلد اسلوبها بالمياعة
ليما صارلج هالموقف شنو كانت ردة فعلج؟
ما استحيتي من الموقف البايخ اللي انحطيتي فيه؟
ما خفتي على هالياهل ؟
شنو استفدتي من هالمسلسلات؟
هل كان لها تأثير ايجابي على حياتج؟
اول ما طلعت هالمسلسلات على ايام فجر السعيد كانت تلفونات ومواعد
بعدين رقص وحفلات وشرب
وتطورت اخيرا ووصلت الى ادق تفاصيل الحياة الزوجية
والله يستر من اللي ياي
كل هذا عشان يخلون المشاهد يبدي يتقبل هالاشياء وانها احداث طبيعية
والخوف الاكبر اهو على الجيل الياي اللي بسرعة يتأثر ويتشرب من هالمفاهيم الخاطئة
ترا عيالنا امانة برقبتنا باجر بنتحاسب عليهم
بدال لا نشجعهم على الصلاة وحفظ القرآن وعمل الخير
نشوف معاهم هالاعمال المنحطة
لا تقولين انا ما اشجعه
اهو يتشجع لأن يشوف امه او اخته يشوفون هالمسلسلات
فيصير عنده الوضع عادي
انا شخصيا اعتبر ان اكبر واقذر خدعة كانت زوارة خميس
لأن بالبداية ظهر بشكل المسلسل العائلي وحبب الناس فيه وسمحو لعيالهم يتابعونه معاهم
بس مع مرور الحلقات كشف عن وجهه القبيح
عقب ما الناس تعلقت فيه شلون يمنعون عيالهم عنه؟
حتى اذا منعناهم يقدرون يشوفونه من ورانا لأن صار ببالهم ويبون يعرفون الاحداث
تدرون شنو مشكلتنا على مدى السنين اللي فاتت
ان احنا شعب ما فينا الا لسانا
ينطبق علينا المثل اللي يقول ام ناصر لسان طويل والحيل قاصر
صارلنا اكثر من 10 سنين واحنا تتشوه سمعتنا وصورتنا جدام العالم
ونتحلطم طاع المسلسل الفلاني شسوو بس نظل نتابعه
شوفو الشعوب الثانية وتعلمو منها
ليما بوقتادة وبونبيل غلط على الشعب المغربي
طالبو باعتذار وقام وزير الخارجية بكبره واعتذر
قطر صارلها جم سنة ترفع قضايا على المسلسلات والجرايد اللي تسيء لها
واخير
غضب شعبي يجتاح الأوساط الإماراتية بسبب برنامج كويتي
http://q8yat.net/showthread.php?t=678983
واحنا اللي صارلنا 10 سنين تنهان كرامتنا ليش ما تحركنا وطالبنا برد اعتبارنا؟
يا بنات لازم يكون لنا ردة فعل
ما يصير بس تحلطم تحلطم
صارلنا 10 سنين نتحلطم شستفدناا؟
هل عبرونا واحترمو راينا؟
هل ترقى مستوى الطرح؟
هل راعو قدسية الشهر وعادات وتقاليد المجتمع المحافظ ؟
ولا عمتهم المادة اكثر وصارو يبون اقصر طريق لها
بدال لا نضيع وقتنا على هالتفاهات ونرضى بالاساءات والاسفاف
خل نستثمر وقتنا بأشياء احسن وافيد
صدقوني لي تعلمتو يصير الوضع طبيعي وتريحون بالكم وتصونون نفسكم وبيتكم وعيالكم
بنات الهدف من هالموضوع ان في اكثر من طريقة نقدر نوصل اعتراضنا الجاااااااد على هالمسلسلات
وحده منها توصيل رسالتنا لنوابنا المحترمين
واشكر النائب الفاضل الوعلان على مبادرته في هذا الموضوع
http://www.alaan.cc/pagedetails.asp?cid=30&nid=57928
انا شخصيا اللي اقدر اسويه واسجل اعتراضي اني اقاطع هالمسلسلات
وانا اقصد بأقاطع اني اقاطعها صج
مو بالخش والدس اطالعها
كوني صادقة مع نفسج
اذا انتي فعلا متضايقة من هالمسلسلات
قاطعيها وانتهى
وتذكري (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ)
لأن القنوات يبين عندها عدد المشاهدين وعلى هالعدد تقدر تطلع فلوس من الدعايات
فإذا قاطعناهم راح تطيح المسلسلات بجبدهم ويخسرون
وتوصل رسالتنا بلزوم احترام الشهر الفضيل وراي المشاهد
واخيرا نصيحتي تذكرو ان احنا مقبلين على العشر الاواخر ايام العتق من النار
وهذي فرصة ما تتعوض لنيل الاجر والثواب بإذن الله
سوري على الاطالة
وسلامتكم ويعطيكم العافية
