حلويات اليمعات...جان زين اتشاركون ابتجاركم:)

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

قوه بنات
تذكرت طريقة حلو النسكافيه معطيتني طريقته أبلة الأقتصاد مادري مار عليكم والا لأ بس مره ذقته عند بنت خالتي رفيجتها مسويته لذييييذ ومو وايد حالي يعني ينفع للي ما يحبون الشكر وايد وخفيف ما تحسين انج كليتي شئ
المقادير
المقادير: 3 قشطه
3 جبن كيري
1 جيلاتين مذوب فى ربع كاس ماء
قفشتين سكر
2 كيس كابتشينو
1 كيك جاهز فانيلا 1
كيك جاهز كاكاو
الطريقه
تقطع كيكة الكاكاو وتصف بقالب التشيز كيك
تخلط باقي المقادير بالخلاط الكهربائي ما عدا كيك الفانيلا
تصب نصف الخلطه ثم نصف شرايح كيك الفانيلا
تصب باقي الخلطه وتزين بكاكاو فليك وتدخل الثلاجه
بالعافيه

 

[كويتية]

مشاركة: حلويات اليمعات...جان زين اتشاركون ابتجاركم

مطفوققققققققة تونى اشوف كيكة الكاكاو الكريمة اللى نحطها قصدك بيضا يعنى مو صلصة الجالكسىهذى للزينة اخر شى

 

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

هلا كويتيه أمبله اهي صلصة الجالكسي نفسها


بنااااااااااااات هذي طريقة بسبوسه الحقوق محفوظه لجوريه حمرا وصتني أكتب أسمها
بسبوسه بالقشطه (منقوله بالحرف الواحد)
شوفى كلاصين سميط وكلاص جوزهند وكلاص شكر ونص كلاص دهن وبيضة واحد ةوعلبة قيمر كويتى كى دى دى,وشوى بيكباودر وربع خلاص ماى وخلطيهم عدل,ووحطيهم بصينية مدهونة أو قوالب صغيرة وزينيها بالسمسم,, وبالعافية

 

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

هذا الحلو مره ولد خالتي شاريه وكل من عجبه يهبببببببببببل لقيت طريقته وجربته طلع نفسه كوبس بيست بس اللي يابه ولد خالتي الطبقه الأولى كيك
تره لذيييييييذ

المقادير :

الطبقة 1 : بسكويت مطحون + زبده ذائبة..او بسكويت مبلل بالحليب.<<<انا جربت البسكويت المبلل بالحليب.

الطبقه2 :كيس دريم ويب + قشطه + ربع كوب حليب مركز

الطبقه 3:2 كيس كريم كراميل البودره +علبة بيبسي<<ممكن نستبدل البيبسي بالعصير ..

نخلط مقادير الطبقة الاولى ونضعها في قاع الطبق ...ثم نخلط في الخلاط مقادير الطبقة الثانية الى ان يصبح مثل قوام الكريم ثم نضعه في الثلاجه الى ان يتماسك وثم نخلط 2 كيس كريم كراميل مع علبة بيبسي على الناار الى ان يغلى ثم يصب على الطبقة الثانية وتوضع في الثلاجه الى تتماااااااااااااسك..

 

[ام بدر البدور]

مشاركة: حلويات اليمعات...جان زين اتشاركون ابتجاركم

ما شاء الله روعه

 

[rooh14]

مشاركة: حلويات اليمعات...جان زين اتشاركون ابتجاركم

مشكورين خواتي وكل وصفه احلى من الثانيه وانا مني لكم هالكيكه اللذيذذذذذذذذذذذذذذذذذذذه
وكل واحد يذوقها تعجبه كيكة البف باستري وطعمها مثل الكيك الجاهز وهي:
كيكة البف باستري
المقادير والطريقه:
1- 5 حبات من عجينة البف باستري الجاهزه - تحمص بالفرن من الجهتين ثم تفتت باليد
2- نسوي كيكه بالطريقه المعتاده ومقاديرها
1,5 ك طحين - 3/4 ك سكر - 2 بيضه - علبة روب صغيره - 1 ملعقه بكنج بودر - ا ملعقه وسط فانيليا - 1/4 ك زيت تخبز في الفرن وفي هالاثناء نجهز التشريبه للوجه وهي:

(( 1كيس كريم كرمل + ك حليب بارد يسوى على النار))
((في وعاء اخر نخلط : 1 قشطه + فنجان القهوه سكر على النار )) والافضل سوي القشطه اذا طلعتتي الكيكه من الفرن حتي ماتجمد القشطه .
بعد استخراج الكيكه اثقبيها براس الملعقه وصبي الكريم كرمل ثم القشطه وبعدها نثري البف باستري المفتت
جربوها والله مارح تندمون وشغلها كله نص ساعه اذا كنت هابة ريح
وعليكم بالعافيه

 

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

مشكوره روح بس سؤال بالثقوب يعني يصير بالتناوب واحد قشطه وواحد كريم كراميل والا بنفس الثقب احطهم أثنيناتهم نص هذا ونص ذاك؟؟؟

 

[rooh14]

مشاركة: حلويات اليمعات...جان زين اتشاركون ابتجاركم

لا حبيبتي مطفوقوووووووووووووووووووووووووووووه
اول شي ثقبيها كلها براس الملعقه وبعدها صبي الكريم كرمل بحيث تتشربه الكيكه وبعدها صبي القشطه ومسحيها بالملعقه على كبر الكيكه ونثري البف باستري وبالعافيه
واذا ذقتيها واعجبيتج ادعي لي تكفين

 

[لازانيا]

مشاركة: حلويات اليمعات...جان زين اتشاركون ابتجاركم

هلا بنات يعطيكم العافيه على هالمواضيع اللي تبرد القلب ,,,, بكره انشالله بحط لكم علشان ماصير انانيه كوبي وبيست وبس الحين انا مشغوله الظهر انشالله راح اتحفكم ,,,يالله موفقين ....

 

[لازانيا]

مشاركة: حلويات اليمعات...جان زين اتشاركون ابتجاركم

هااياات حطيت لكم طريقه وانشالله تعجبكم
انا توني مجربته ولذييييذ


حلى التسع تمرات

المقادير:

علبة بسكوت شاي + اصبع زبده

علبة نستله

9تمرات

بيضه

ملعقة فانيلا

كاكاو حسب الرغبه

جوز مكسر حسب الرغبه

الطريقه:

نطحن البسكوت ونفركه بالزبده ونرصه بالصينيه حقت الفرن

نصف الجوز المكسر على البسكوت بالتساوي

نخلط باقي المقادير بالخلاط ونصبها على البسكوت والجوز وندخلها الفرن لحد ما تصك وتتحمر شوي بعد

وتقطع صغار وتقدم فاتره مع القهوه طبعا

وفيه العافيه

 

[لازانيا]

مشاركة: حلويات اليمعات...جان زين اتشاركون ابتجاركم

هذي كيكه حلوه وشكلها احلى

كيكة السمسم


اول شي تسوون الكيكه:3 بيضات,ملعقه كبيره بيكنج ب,ملعقه صغيره فانيلا,علبة روب ,قد علبة الروب :طحين وزيت وسكر ..نسوي الكيكه بصينية التشيز كيك الصغيره اللي تنفتح.

اول خلطه :علبة نستله,8كيري,ملعقتين كبار نسكافيه...نخلطهم ونصبهم على الكيكه ونصف فوقهم بسكوت السمسم اللي مدور صاير زي الحلقه عرفتوه؟ بس ندخلها الثلاجه شوي

ثاني خلطه: ملعقه كبيره نسكافيه,ملعقه كبيره كريم كراميل البودره نذوبهم في كاس ماي حار ونصبهم بحذر على الكيكه ونخليها تبرد زين بالثلاجه ونفتحها وناكلها بالعافيه

ادري انها دندره لكن تستاهل

 

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

مشكوره روح توني اقرا الرد اسويها بس عقب ما اضعف

لازانسا أنتي وين والريجيم وين اشوف على قسم الريجيم لا أعلم بنوته عليج خخخخخخخخخ تسلم ايدج عاد أحب التمر

 

[لازانيا]

مشاركة: حلويات اليمعات...جان زين اتشاركون ابتجاركم

طفوقه حرام عليك انا قاعده اكتب وانا اتعذب ... بس انا جامده للحين ماسكه على الريجيم لا تخافين على ,,, كل ما زهفت نفسي قلت الدنيا ما طارت لا حقه ...هههههههههه

 

[جارة القمر]

مشاركة: حلويات اليمعات...جان زين اتشاركون ابتجاركم

rooh14


أي نوع روب عادي ولا روب كي دي دي

والقيمر قيمر نستله ولا كي دي دي العود ولا الصغير

ممكن توضحين

ومشكوره




لازانيا



قصدج مقاس الطحين والسكر والزيت نفس مقاس الروب

واي نوع أستخدم الروب



وتخليم الكيكه بالقالب ما طلعينه الا وقت التقديم صح


ومشكوره

 

[لازانيا]

مشاركة: حلويات اليمعات...جان زين اتشاركون ابتجاركم

اي جارة القمر مقاسهم نفس مقاس علبة الروب والروب اللي استخدمه هو العلبه الصغيره 180 جرام تقريبا المراعي او الصافي اي شي....
والكيكه ماشيلها الا وقت التقديم...
وبالعفيه عليك

 

[جارة القمر]

مشاركة: حلويات اليمعات...جان زين اتشاركون ابتجاركم

لازانيا


مشكوره

وتسلمين يا الغالييييييييييه

 

[جارة القمر]

مشاركة: حلويات اليمعات...جان زين اتشاركون ابتجاركم

اول خلطه :علبة نستله,8كيري,ملعقتين كبار نسكافيه...نخلطهم ونصبهم على الكيكه ونصف فوقهم بسكوت السمسم اللي مدور صاير زي الحلقه عرفتوه؟ بس ندخلها الثلاجه شوي


لازانيا

بس ممكن أعرف شنو علبة نستله

ومشكوره

 

[لازانيا]

مشاركة: حلويات اليمعات...جان زين اتشاركون ابتجاركم

علبة نستله هي الحليب المركز من ماركة نستله يعني حليب محلى او مكثف مثل تقريبا العسل ثقيل ,, يجي منه بعد ماركة بوني
وحجمها كبير يعني بحجم الماوس
واسفه اني مارديت عليك على طول حبيبتي

 

[جارة القمر]

مشاركة: حلويات اليمعات...جان زين اتشاركون ابتجاركم

لازانيا

مشكوره يا قلبي

ولا عادي

وكل انسان عنده ظروف

مشكوره

 

[مطفوقه^ملقوفه]

مشاركة: حلويات اليمعات...جان زين اتشاركون ابتجاركم

وااااااااي يم يم يم طريقتج لزانيا تشوق عندي اياها بس ما طبقتها سليييييحط بس كل من يمدحهها