حزيييييييييييييييييييييييينة وما ادرى شسوى؟

[barbie_78]

السلام عليكم بنات
انا صار وياى موقف من اسبوعين ومن يومها واسودت بعيونى الدنيى
وحسيت انى مالى لزمة بالحياة ولا دور
المهم
قصتى هى:
انا كنت ادور باوراقى عن شهادتى لان بكمل تعليمى
حلو
وانا قام ادورها طحت على عقد شقة فى دبى
طلع الحجى شارى شقة هناك من شهر مارس ولا قايلى شى عنها
ويوم واجهته جان يهاوشنى ويقولى شحقة تنبشين بالاوراق
وللحين انا محاربته واهو بارد ولا على باله
بس على فكرة اهو مايسافر دبى كلش الا اذا دزوة الشركة مؤتمر او كورس
وماعنده غير روحة القهوة
عرفتوا شلون
بس موعارفة شسوى وياة؟ بليز ساعدونى
شسوى بهالمشكلة وشلون احسسه بغلطه

 

[الاسطورية]

هدي بالج والله خرعتيني اول شي عبالي فيج شي

الحمدالله

ماكو غير تكلمينه بهدوء وتقوليله فهمني ليش شريتها بدون لاتعلمني وحق شنو شاريها وانا ماراح ازعل منك لاعرفت السبب واذا قالج وصارحج بهدوء قوليله اوعدني ماتكررها

يمكن الريال ناوي يسويلج مفاجئه ولامخطط لشي وبعدين بيقولج

 

[barbie_78]

مشكورة اختى اسطورية على ردج ومساعدتى
بس تصدقين من اسبوعين وانا زعلانة وما اكلمة ولا سالنى شفيج ولا ليش زعلانه
وهذا اللى ذابحنى منه
والله صاكة الدنيى فينى

 

[أمـ طلال ــ]

وي يحياتي ..

قعدي وياه وخليه يصارحج

 

[الاسطورية]

مايصير اسبوعين تسكتين السكوت مامنه نتيجه المره دايما اهي الي عقلها اكبر ورحيله وكلميه

 

[صديقة د. شريفه]

باربي ..
في البدايه لازم ألفت انتباهج انج قلتي جملة خطيره وهي انج حسيتي انه مالج لزمه في الحياة ، عسى ماشر يا باربي السالفه مو سالفة شقه في دبي ! السالفه أكبر من جذي ، انتي أكيد متعرضه لسلسلة احباطات خلتج اتحسين ابهالشعور .
وبعدين انتي ابنفسج أكدتي ان مايروح دبي وايد ، يعني شالفرق انه يسكن ابفندق أو شقه؟
شنو وجه الاعتراض بالضبط بس لانه غبه عليج انه شاري شقة بدبي ؟
هل الشي هذا خله الوساوس تلعب ابمخج؟ تعوذي من الشيطان الرجيم واللي بيسويه بالكويت بيسويه بأي مكان و اخفاءه عنج شقته ما تدينه ، فيه وايد كويتيين يشترون أراضي وشقق في دبي انا والله العظيم أمس كلمت أخوي ابهالخصوص ، عن الكويتيين اللي يشترون عقار وأراضي في الامارات مايسكنون فيها بس يشترونها والسنه اللي وراها يبيعونها بأغلى من سعرها كإستثمار .
تدرين ليش زوجج حاقرج وماراضاج ، لانه في قرارة نفسه يدري ان ما سوا شي غلط ، ياليت تفهمين الرياييل أكثر من خلال كتاب ( الرجال من المريخ والنساء من الزهره) هالكتاب راح اتحرج بدايته واتبط جبدج لانه في ضرب من ضروب الخيال بس بعدين راح تفهمينه وراح تفهمين الريال عدل ، وتكتشفين ان الرياييل مختلفين عن النساء في أغلب الاشياء .
كبري عقلج ولا اتكونين نكديه ترا أردى مره وأسوأهن حظا اللي تنكد على زوجها وتزعل على أتفه الأسباب ، الريال مايبي الا الصبر والابتسامه والروح الحلوه والنفس الطيبه ، لا تكرهينه في البيت وحاولي تاخذين كل شي ابروح رياضيه وابتفاؤل. وروحي بادري في مصالحته ، ولا اتكبرين الموضوع ، ولا اتظنين فيه سوء " ان بعض الظن إثم "
يالله جدامي روحي راضيه ، أو لا طفيه وابتسمي ابويهه وكأنه ماصار أي شي ، ترا والله الدنيا ما تسوا ، وزوجج أهوا جنتج ونارج.
وعقب ما يهدا ويرضى ويرد لطبيعته اختاري الوقت المناسب واطرحي هالموضوع جدامه ، واذا حسيتي انه هالشي ضايقه لا تناقشينه ، وقدري انه الريال له خصوصياته ، وتقدرين تدخلين من باب المحبه والغيره عليه ، يعني مثلا اتعبرين له عن حبج وتقوليله ان هالشي أثار غيرتج وعشان جذيه زعلتي وخذيتي ابخاطرج ، وان ودج تكونون على علاقة وثيقه ، وماتخشون شي عن بعض ، وهذا مو تدخل ابقدر ماهو محبه و احساسج انه يثق فيج ويقدرج ، ومع ذلك ترا أغلب الرياييل ما يقولون كل شي لزوجاتهم ، وهذا من باب حبهم للتمتع بالخصوصيه ، فإذا الريال مو امقصر ابحقج ، ولا عنده حركات مني ومناك ؟ لا تجنين على نفسج وحياتج ، وعيشي مرتاحه امريحته معاج

 

[barbie_78]

مشكورة اختى صديقة
بس اسمحيلى انا موياج بالراى
ليش؟
لان ماكو بين المره والريال خصوصيات
عدل ولا غلطانة؟ لو غلطانه قوليلى
هالكلام يمشى ويا الربع اى كل واحد عنده خصوصيات لكن انا مرته ستره وغطاه
واللى يفرحة يفرحنى اكيد
ياليت نكون على تواصل بعد عمرى
ماقصرتى

 

[الاسطورية]

باربي اشصار عليج شكلج ليلحين ماراضيتيه؟