حابة اتغير100٪ وموعارفه من وين ابداأ ساعدوني بديني

[نبرمان]

سلام عليكم خواتي كويتيات

بختصر كلامي ..
حابة اتغير
واغير لبسي وصلاتي احسنها
واصوم السنن واصلي الليل
احفظ شي من القران

بس !!!

متا اسوي هذا كله .. شلون جذي
ابي البس عبايه بدال البدل الملونه
ابي عباة راس !! واللي حولي مو جذي مادري شلون ابدأ فجأه بعباة راس
واخاف ما استمر
ابي صلاتي بوقتها بس كله نايمه او طالعه مشوار ومو علا ووضوء !!
ساعات ياربي اغفرلنا بايام العروس
نكشخ من ويه الصبح وماانقدر نتوضا تالي !! وتروح صلاة المغرب والعشا

احس اني مقصره وايد
ومابي ( تي في ) مابي اشوف مسلسلات وبرامج
حابه اقطعه عدا الاخبار والنت بشي حلال طبعن
ومع هذا مو قادره من ولدي كله طيور الجنه واغاني وكارتونز

تكفون دنيي خذتني وايد .. سهلوها علي مو عارفه شلون

لحد يطنش او يطنز او يزف
يا تقولون شي ينفعني. يا مشكورين مابي غثااا

 

[*السكب*]

وعليكم السلام ورحمة الله وبركاته ​

وليه نزفج او نتطنز عليج ياقلبي ؟​

بالنسبه للصلاه انا مثلج وقت الصلاه اكون نايمه بس اضبط المنبه واصلي وارد انام .​

والافلام والمسلسلات كنت مدمنتها بس لو سالنا نفسنا هل طلعنا منها بفايده ؟ طبعا الجواب لا وهذا غير المسلسلات الجديده اللي الواحد 150 حلقه واجزاء اشبقى في عمرنا اذا ضيعناه عليهم ؟​

وكلنا في الحلقه الاخيره نقول بايخ وضيعت وقتي فيه صح ؟​

والحجاب اهم شي يكون ساتر وانيق ومن غيرزبرقه وزينه يعني ساده بس خياطه مرتب تحببين البنات في الحجاب وتاخذين اجرهم .. مااحب اللي حجابها مومرتب او عباتها مغبره ومومكويه وقديمه لانج تعكسين صورة الحجاب والمحجبات .​

وبالنسبه للاطفال من قال ان طيور الجنه حلال ؟ كلها موسيقى تجيب الشياطين للبيت ومومطالبين نحط كل المحطات بالتلفزيون .. يعني اختاري المحطات المهمه وتفيدج مثل اقرا الرساله المجد .. وكثرة جلوس الطفل على التلفزيون تسبب غباءه لانه مثل الصنم قدامه مايلعب مايبتكر فهمتي قصدي ؟​

والعروس منتي مطالبه بحضور كل الاعراس وتمكيجي على الاقل بعد صلاة المغرب ورجعي قبل لايفوت وقت العشاء وصليها .​

والقيام يكفيج ركعتين لو خفيفه تكتب لج قيام ليل .​

والحفظ حسب استطاعتج بس المراجعه هي المهمه ... ان شاء الله قدمت شي يفيدج وموفقه ​

سبحان الله وبحمده ... سبحان الله العظيم​

:33_1185028183:​

 

[عاشقة الدوحة]

حبيبتي اختي
تأكدي ان مب من أخلاق المسلمة انها تزف اي حد يبي يتغير ويطلب والنصيحة. ..

الحمدلله ان عندج هالارادة. . وانتبهتي لأخطائج..
وابي اقولج. . وايد بنات بالذات هنا ما كانوا ملتزمين.. لكن بفضل الله ،، الحمدلله تغيروا
أنا بقولج عن نفسي وان شالله تستفيدين

أول شي تذكري هالاية من سـورة الرعـد : (إِنَّ*اللَّهَ*لا*يُغَيِّرُ*مَا*بِقَوْمٍ*حَتَّى*يُغَيِّرُوا*مَا بِأَنْفُسِهِمْ)

ابدأي بالتغير من نفسج من داخلج..

شوفي الصفات السلبية اللي فيج واتركيها غيريها. . واكتسبي مشاعر وصفات ايجابية

انا بقولج عن نفسي..

أول شي وأكثر شي خلاني احب أتقرب من الله هو اني : أعرف الله سبحانه وتعالى. . أعرف أسمائه ومعانيها. .

واذا عرفتي الله سبحانه وحبيتيه سبحانه وتعالى. . من الطبيعي انج بتطيعينه. .

وانا من خلال النت ومن المصادر الموثوقة تعلمت أشيا وايد وصار عندي شغف ابي اتعلم كل شي ديني. .. ادخل الحملات وادور في اليوتيوب. .. اذا عرفت ان في محاضرة دينية بمكان اروح له. .
اقرا كتب اسمع اذاعة القرآن......


والشي الثاني بعد. .. قررت اترك المعاصي واصحح نفسي.... اللبس الشرعي. .. الأخلاق الحسنة. . بر الوالدين. . احترام الناس،، اني أحب الخير للناس وما أكره أحد بدون سبب. ..
تركت الأغاني. . ومستحيل تحبين الأغاني والقرآن بنفس الوقت. . ومستحيل حد يقول ما احب الأغاني بس اسمع. .. أو احب القرآن وما اقراه. ..


من الاشيا اللي تغير الانسان. . انج تقرين القرآن. .. تذكري ان القرآن يشفع يوم القيامة للناس اللي ما هجروا القرآن. . واقري التفسير من اي مكان ويكون من مصدر ثقة. ..

والصلاة التزمي فيها. .. وابحثي واقري عن اهمية الصلاة وفوائدها. .


ولا تنسييين الدعاء..

انا كنت مب قادرة اترك الذنوب. . فكنت ادعي بصدق دوووم : اللهم اني أشكو اليك نفسي ، أشكو اليك ذنوبي. ..


واذا تبين تخشعين في الصلاة بعد ادعي. ..


و الأذكار التزمي فيها


هذا اللي عندي. ..

 

[عاشقة الدوحة]

امبيه عدلت مشاركتي بكلام طويل عريض ورااااح

يلا مب مشكلة بكتب اللي اتذكره ....


بالنسبة للصلاة ... اختي اللي بقلبه الصلاة ما تفوته ... احنا بعد تصير عندنا مناسبات وطلعات واعراس ونتمكيج ... لكن نحط ببالنا اهم شي الصلاة ..
انا صرت ما اطلع الا اذا توضيت .. واحط ببالي ان وراي صلاة وافكر اذا المكان اللي بروحه في مكان اصلي فيه ولا لا ...

وبالنسبة للبس الشرعي .. اهم شي ما يكون ضيق ولا يشف ولا قصير

انا البس عباة كتف بس بس وسيعة وما تلفت النظر والبس شيلة عريضة ما تحدد الكتف و الرقبة ...

وبالنسبة للاذكار ...
تذكري الاحاديث

يقول النبي صلي الله عليه وسلم " سبق المفردون " قالوا : وما المفردون يا رسول الله؟ قال : " الذاكرون الله كثيرا والذاكرات " مسلم

و كان من جواب النبي صلي الله عليه وسلم علي سائله : أي الأعمال أحب إلي الله عز وجل بقوله : " أن تموت ولسانك رطب من ذكر الله عز وجل "


الله تعالي : < يأيها الذين آمنوا اذكروا الله كثيرا وسبحوه بكرة وأصيلا > الأحزاب :44 ويقول الله تعالي : < فاذكروني أذكركم > البقرة :152


وانصحج اقري المواضيع اللي بالقسم الاسلامي هنا


ان شالله تستفيدين

 

[دلوعة أبوهآ]

الله يهديكِ يارب ويثبتك ع طآعته وعبآدته
بالعكس مو من حق أي شخص انه يتكلم عليكِ او ينقدك
كلنآ بنخطيء بس اهم شي نعترف بأخطائنا وتقصيرنا ونحآول نعدل اللي فينآ ..


ودامك انك عارفه انك مقصره وتبي تتقربي من الله بالعكس هالشي زين ..!
ويدل ع ندمك وتوبتك ..


آحرصي ع صلآتك آهم شي في حيآة الإنسان صلآته
حاولي تصلين فروضك كآمله وفي وقتهآ ومع الوقت حآولي تصلي النوآفل وقيآم الليل
صدقيني راح تحسي في الآول بتعب لانك مو متعوده بس بعد كذا راح تصير من اولوياتك وانه ما يمر يومك الا وانتي مصليه كل فروضك والنوافل ..

كيف نطلب من الله يريح قلوبنآ ويسعدنآ ويحفظنآ ويحقق لنا كل اللي نتمناه من غير مآنطيعه ..!
أو نصلي فروضنآ الخمس ..!

لمآ تصلي آدعي واستغفري وربي راح يغفر لك ويقربك منه ..

مره قريت كلآم ماذكره عدل والله بس بمآ معناه " إنه لو الانسان فجأه صار يستغفر كثير هذا يعني انه الله يبي يغفر له .. " شوفي كيف الله غفور رحيم مهمآ نعصيه ..؟

حاولي تستغفري في اليوم من 100 إلى 1000
الاستغفار يشرح القلب ويجلب الرزق والسعآده ..

وبالنسبه لمآ تكوني بزواج او عندك سهره وحآطه ميك آب
عادي حبيبتي توضي قبل لاتحطين الميك آب واول مايأذن صلي ..
أو حتى لو توضيتي ترى ماراح يخترب ان شاءالله
لانك انتي بتسوي شي لله مو لغير الله !!
يعني الزواج ولآ المنآسبه أهم من الصلآه !!
الصلاه هي اللي بتنفعنآ في اخرتنآ

آنآ ماقولك هالكلآم ع اني وحده دآعيه !! لآ
بس سوي اللي تبينه بحياتك الا الصلاه والتقصير في العبآده

وانا دائمآ أؤمن ب " قليل مستمر خيراً من كثيراً منقطع "
يعني !!
سوي الخير ولو كان بشي بسيط وقليل لكن ع الاقل يكون مستمر معاكِ طول العمر
احسن من إنك فجأه تتركي كل شي كنتي تسوينه وفجأه صرتي دآعيه لانك بهالحآل ماراح تستمري وبتملي وراح ترجعي لحيآتك الأوليه ..


فَ ابدآي شوي شوي
ابدآي بالصلآه خلي يومك مآينتهي الا وانتي مصليه فروضك كآمله وبخشووع واذا قدرتي مع النوآفل
أبدآي لبسي عبايه لو ع الكتف !! وبعد فتره غيريها ولبسي عبايه ع الرآس ..
اهم شي عبايتك تكون ساتره جسمك سواء كتف ولآ رآس !!
آبدآي بالاستغفار لو 500 مره في اليوم

هذا كله خير صح قليل لكن بتستمري عليه ان شاءالله ومع الوقت بتتقربي من الله آكثر ..


دآيم آدعي وقولي " اللهم زدني قرباً إليك "
" اللهم آجعل همي الآخره "



والله يرزقك الخير والسعآده :eh_s(17):
​

 

[ساإرهـ]

وعليكم السلام ورحمة الله وبركاته


صاحبي لك صاحبات ملتزمات صدقيني بيعاونونك ويغيرونك

دايم ادخلي هالقسم بيفيدك كثير ويشجعك ع الطاعه

ادخلي اليوتيوب اسمعي كلام الشيوخ بيفيدونك

خلي الله قدام عيونك الله وبس ماعليك من اي شي ثاني ( أنا أحب الله أنا ابي ارضيه )

تذكري هاادم اللذات !!


اذا تذكرته احس مافي شي يستاهل اضيع صلاتي عشانه او اترك عباتي عشانه وراي عذاب ووراي نعيم وانا بأعمالي اختار مكاني

عمري في الدنيا يمكن 100 سنه بالكثير وعمري في القبر كم بيكون !!!!!

( زادي قليل والمسافه طويله )

ادعي الله يغير حالك ويرشدك للاعمال الصالحه

اي شي في قلبك اطلبيه من الله

اطلبي الله يهديك



شوفي من بيفيدك الله او الناس واتبعي اللي بيفيدك صدقيني لا الناس ولا كلامهم بيفيدك

وتذكري إنك ماخلقتي الى لعبادة الله

وتذكري الجنه ونعيمها وتذكري انك بتشوفين وجه الله بطاعاتك وتقربك له

احنا اذا قالوا لنا فيه وحده جميله كلنا ودنا نشوفها وشلون اتخلى عن شوفة وجه الله سبحانه وتعالى بشوية معاصي ماتزيدني في الدنيا شي غير ( هم وضيقة في الصدر ) ماشوف في المعاصي اي سعاده ولا طمأنينه ولا راحه

وجاهدي نفسك ياقلبي ترا الصلاة مجاهده والطاعات مجاهده

انا ساعات ودي اسمع لي اغنيه وساعات ودي انام واخلي الصلاة وساعات تعجبني جلسة اهلي وودي ااخر الصلاة وساعات ودي البس الكتف والمخصر

بس اتذكر يوم تشيب فيه الولدان واتذكر ان وراي حساب وعذاب ومحد بيفيدني لا اغنيتي ولا نومي ولا جلسة اهلي ولا لبسي


واحب الاعمال الى الله : الصلاة في وقتها

والله يهديني ويهديك ويثبتنا

انا هذي طريقتي واتمنى تستفيدين منها


يمكن كلامي موب حلو ولا مرتب بس هذا اللي في قلبي واتمنى يلامس قلبك ويساعدك في التقرب الى الله

واخر شي اهديك هذي الانشوده

http://www.youtube.com/watch?v=p-t44aWx8sU

واتمنى لك الهداية ولجميع اخواتي الغافلات

 

[عاشقه الشامري]

نبرمان انتي حيل متساهله بصلواتش شلون تطلعين وتنامين عن الصلاه شلون لازم تغيرين نفسش وانتي تعرفين الصح من الغلط ولو انش


ما تعرفين كان ما قلتي ابي اتغير عدلي نومش ولما تطلعين من غير وضوء اكيد الاماكن العامه فيه حمامات وانتي بكرامه تروحين توضين

وتصلين مو تخلين صلاتش واذا عندش عروس لا تحطين مكياج ولا تلبسين الا لما توضين وتصلين وتكونين على وضوء كل شي بدنيا ولا الصلاه

هي صلة العبد بربه الرسول صلي الله عليه وسلم قال العهد بينا وبينهم الصلاه فمن تركها فقد كفر اهم شي صلاتش هي عمود الدين لا

تهاونين فيها عشان عرس ولا مشوار خير ان شاءالله اطلعي وروحي عروس بس اهتمي بصلاتش ولا تتركينها عشان عرس ولا مشوار

ولا نوومه لو عندش دوام ولا اختبار كان حطيتي المنبه وقعدتي بس الصلاه شلون ما تحطين منبه او توصين امش ولا خواتش يقعدونش

لصلاه وثاني شغله بسيطه غيري لبسش لوجه الله عشان الناس اللي حوالينش يقلدونش وتنصحينهم وتاخذين اجرهم واخلصي النيه

لله عشان ما تخلينها بعدين غيري نفسش للأفضل احفظي القران حافظي على صلاتش بوقتها صلي صلوات السنن الرواتب صومي

الاثنين والخميس كثري من الاستغفار والتسبيح والتهليل عشان ما يجي الشيطان مجال ويوسوس فيش وترجعين مثل قبل متهاونه

ومتساهله حافظي على قيام الليل وصلاة الوتر حاولي كل اسبوع تختمين القران واتركي الاغاني والافلام لانها كلها لهو وتبعدش عن الطاعات وتلهيش عن الصلاه

والذكر والخير صدقيني اذا انتي ناويه تتغيرين لازم تتركين الاشياء هذي لان المعصيه والطاعه ما تجمع بقلب واحد قوي ايمانش والله

راح يهديش ويثبتش على طريق الحق كثري من الاستماع للأشرطه الدينيه وحاولي تحظرين ندوات ودروس دينيه وحلقات تحفيظ قران

واذا انتي قاعده عند التلفزيون حطي على قناه دينيه واسمعي للمشايخ ودروسهم وحلقات الذكر افضل لش من الافلام والمسلسلات

التافهه اللي مالها اي هدف او قيميه وصدقيني لما تسوين كل هذا راح تكرهين الافلام وتكرهين نفسش اذا تركتي الصلاه وما صليتيها بوقتها راح تخافين من الله وتستحين منه يا بنت اصحي لنفسش قبل

موت الفجأه وقبل لا تدشن قبرش وتحاسبين

 

[Habooon]

الله يهدي جميع المسلمين والمسلمات , البنات مشالله ما قصروا
و انا وايد استفدت منهم

يعطيكم الف عافيه والله يثبتنا كلنا على دينه

 

[طالبة انجلش]

اي والله الله يثبتج يااارب

واستفدت وااايد من البنات

 

[طالبة انجلش]

اسفه نقل شي بالغلط