جميع لاستعمالات للمسك الأبيض من القرشي

[فجورة]

انا شريت المسك الأبيض من القريشي و العلبة صار لها شهور و هى عندى و ماني عارفة حق شنو استعمله .

يا ليت البنات اللى يعرفون فى الخلطات العربية و استعمالات المسك الأبيض ينوروني .

انا ما سويت منه شي لانى الحين حامل بالشهر الاخير فقلت أترك الاستعمال بعدالولادة ان شاء الله بس ابي معلومات لاني احب ألأشياء الطبيعية . بليييييييز لا تكشتون

زكاة العلم نشره و كل معلومة بحسنة و الكل يستفيد و ميزان الحسانات يزيد .

 

[سنـــــا]

شوفي حبيبتي تقدرين تقطعين وتحطينه بين ملابسج الداخليه او بالجنطه اذا بتسافرين ....

والاستخدام الاكثر انتشار اهو انج تبشرينه وتنقعينه بماي وتتطهرين فيه بعد الدوره ( طبعا بالماي )

وان شاءالله اكون فدتج

 

[[]نهاوند[]]

مثل تفضلت الأخت سنا تبشرينه وتستخدمينه كمطهر بعد الدوره

او لتطييب المنطقه من بره

او تخلطين شويه من المسك المبشور مع شوية بودرة أطفال وترشينها على الملابس الداخليه

وتقدرين تخلطين منه مع اي كريم للجسم مثل جلسوليد او جونسن الوردي ويصير مثل كريم معطر للجسم ريحته حلوه وبارده بس ترى قويه يعني لا تحطين منه اذا كنتي طالع لمكان عام الله يرضى عليج

هذا اللي عندي وان شاءالله باقي البنات يفيدونج

والله يقومج بالسلامه ويرزقج بالطفل السليم​

 

[ام عفاف الكويت]

اطحني نص حبه المسك وحطيها في قارورة قابله للقفل ((يعني ام غطاه))...........

: صبي تقربيا ماء ورد في القاروره لين النص والربع صبي ماء عادي

وبعدين رجي القارورة مظبوط لين ما تتخلط المحتويات((طبعا المسك ما راح يذوب))

: جيبي قطعه قطن دائري وتقسمينها((يعني تطلع عندج نصف دائره))

وتغطسينها في الخلطه وتمسحين بها المنطقه من فوق لين تحت و الخلف بعد...
للمتزوجات لازم ادخلين القطنه داخل0 ... وراح اتشوفين انه في وصخ يطلع ((هذا دليل النظافه))

والبنات بس من برة.

((يجب مراعات النظافه التامه ... يعني لا تغطسين القطنه اكثر من مره عشان ما تنتقل الجراثيم في العلبه))

وتستمرين بها الطريقه
بعد ما تخلصين من الدوره ولمده 3 ايام متتاليه

وشوفي النظافه والريحه الحلوه ((حتى الريحه تعلق في ملابسك الداخليه))
وانسي شي اسمه التهابات او حساسيه وافرازات وروائح كريهه...

 

[ام عفاف الكويت]

اختي
المسك الاسود هو حق التطهير وهو زيتي وعطر ثقيل
المسك الخشن يوضع بين الملابس والفراش
تجربتي مع المسك الخشن انا اخلطه مع الريحان واضعه داخل المخدات والفرشات الصوف
والرائحه خياليه تعلق براس النائم وملابسه وتدوم في الفراش سنه او اكثر
والريحان تشتريه من عند العطار ليس الريحان العادي الذي يزرع في البيوت

نقلت لج هالطريقه بعد

 

[ام عفاف الكويت]

طريقتي في المسك
1 اطحن مكعبين مسك لين تصير بودره
2 اجيب علبه صغيره واحط فيها كميه متساويه من المسك والشب المطحون (هذا للابط عن العرق)3جيبي لوشن مسك من بودي شب واخلطي معه شوي من المسك المطحون وحطيه على جسمك بعد ما تتروشين ثم رشي على جسمك رشتين من سبراي المسك من بودي شب
4 جيبي بياله ماء وردوـبياله ماء ـملعقه صغيره مسك بودره وملعقه صغيره جليسو ليد واخلطيهم في الخلاط بيطلع كريم حطيه في علبه قزاز غرشة عسل اهم شي قزاز ولها غطى بعدين لفيه في قصدير ثم نايلون ثم في الثلاجه 3 ايام هذي الطريقه خذتها من عالم حواء وتستخدم لعطير المنطقه الحساسه او كريم مرطب لليدين بصراحه حلوه لليدين
5 جيبي بخاخ القزاز او اي علبه مثله يعني ترش رش وعبي نصها مويه عاديه والباقي موية ورد ونقطي فيها اي عطر مركز عود او غيره انا احط من عطورات زهور الريف اللي تجي 30 او 35
وشوي من المسك البودره وخضيهم بقوه وبعدين استعمليه معطر جو او لشرشف الصلاةوالسجاده او للمفارش او للملابس او........ للي تبين

وهذي طريقه بعد

 

[ام عفاف الكويت]

تطحنينه وتخلطين ربع مقدار مسك وثلاث ارباع مقدار شبه بيضاء وتخلطينهن كويس ويستخدم للابط

وهذي بعد ازعجتج

 

[ام عفاف الكويت]

انك تاخذين مكعب المسك وتبشرينه وتجيبين زيت جلسرين السائل اوزيت جونسون للاطفال ونص توله دهن عود مسك اوعادي وملعقتين فازلين حطيهن على النار الين مايصبح سايل وبعدها خليه يبرد وحطيه بعصاره واستخدميه وشوفي ريحتك واااااو والكل راح يسالك وخوذي منه وحطيه على فواحة الشمعه وشوفي ريحة بيتك يااااااي
على فكره مقدار الزيت فنجان ونص

وهذي بعد
بس امانه ادعي لي وكل من يشوف الله يبشرني بالحمل القريب وبالولد الصالح المعافى

 

[ام عفاف الكويت]

**الطهارة ويستخدم المسك الاسود ويكون سائل

** المسك الابيض البودرة منه فى المخدات وبين الملابس

**على المكيف

**مسك مطحون مع الشبة وبودرة اطفال للعرق

**ومسك مطحون مع بودرة اطفال للجسم

**وخلطة ( فازلين وزيت اطفال ومسك وعطر زيتي وجلسرين لتعطير الجسم ويمكن استعمالها للفواحة


**وفى وحدة من الاخوات قالت تستعملها فى السفون الله يكرمكم بس انتبهوا لايسكر مجرى الموية


**وممكن تطحنيه وبقطنة تمسحى اماكن النبض مع نقطتين زيت اطفال او اى زيت للجسم



وبالتوفيق

وهذي

 

[ام عفاف الكويت]

المسك)

عن عائشه أن أسماء سألت النبي صلى الله عليه وسلم عن غسل المحيض قال تأخذ احداكن ماءها وسدرتها فتطهر فتحسن الطهور ثم تصب على رأسها فتدلكه دلكا شديدا حتى يبلغ شؤون رأسها ثم تصب عليها الماء ثم تأخذ فرصة ممسكه(أي قطعة قطن أو صوف مطيبه بالمسك) فتطهر بها قالت أسماء وكيف تطهر بها قال سبحان الله تطهري بها قالت عائشه كأنها تخفي ذلك تبغي أثر الدم وسألته عن غسل الجنابه قال تأخذين ماءك فتطهرين فتحسنين الطهور أو أبلغي الطهور ثم تصب على رأسها فتدلكه حتى يبلغ شؤون رأسها ثم تفيض عليه الماء فقالت عائشه نعم النساء نساء الأنصار لم يكن يمنعهن الحياء أن يتفقهن في الدين )) أخرجه الجماعه الا الترميذي

طريقة الأستعمال :
الطريقه الأولى : يبشر المسك ويوضع على الفوطه آخر يوم من الدوره 0
الطريقه الثانيه : تؤخذقليل من المسك وينظف بها أثر الدم 000
الطريقه الثالثه : يبشر ويستخدم مزيل للعرق 000

أستخدامات أخرى :
رائحه زكيه للملابس - معطر للجسم - منعشه للغرف ودورات المياه0

فوائد الأستعمال :
1)أتباع للسنه0
2) يذهب الأفرازات المهبليه والفطريات 0
3) يمنع من سرطان الرحم باذن لله
4) يذهب الحكه والحساسيه0
5)يساعد على الأنجاب وتثبيت الحمل

واسفه للازعاج

 

[nero]

ام عفاف ما خليتي شي

يزاج الله خير

 

[العذبه]

ام عفاف

ما قصرتي حبيبتي كلنا استفدنا منج

الله يوفقج ويرزقج بالذريه الصالحه ان شاء الله

 

[قهوة برية]

اللهم ارزق ام عفاف الذرية الصالحة

والولد الصالح وان يجعله من عبادة الصالحين

وتقر عينها بحفاد عيالها ....


ماقصرتي قلبواااا

 

[ام عفاف الكويت]

حياتي والله ماسويت الا الواجب

 

[حرم سعادة المستشار]

ام عفاف كفيتي و وفيتي ...جزاج الله خير

 

[فجورة]

أم عفاف الله يبشرج بالجنة و بالذرية الصالحة , ان شاء الله ولادتى الشهر الجاي و راح احطج في بالي وقت الولادة و الدعاء المستجاب و ادعي لج بالحمل القريب .

كفيتي ووفيتى و الله يجعلها بميزان حساناتج هذا التعاون اللي علمنا نبينا و قرآننا عليه " و تعاونوا على البر و التقوى "


و الشكر موصول لك من ساهمت و دمتم بخير

 

[Baby^Bop]

ام عفاف الله يرزقج بالولد الصالح العافي عاجلا وليس آجلا
اللهم آميين

 

[SAMSAMA]

هاي

المسك الابيض انا استخدمه مثل ما قالو البنات العزيزات حق المنطقه الحساسه بعد الدوره والايام العاديه عادي مو مشكله .
انا طريقتي فيها أييب ماي حار وابشر شوي مسك واحطه بصحن صغير واحط عليه الماي الحار واجيب قطنه واغطس القطنه وامسح المنطقه بس نطري شوي مو والماي حاااااااااااااار تنصلخين وتقولين انا وتبلشيني ههههه نطري شوي عشان القطنه تبرد وحطي .
وموفقه

 

[ام عفاف الكويت]

عساني مانحرم من دعائكم