ثالث موضوع احطه ... ومافي تجاوب .. لو سمحتوا دشوا

[ام حمود 81]

السلام عليكم اخواتي العزيزات
انا عندي طفل وحيد و بدششه اولة روضه السنه الجاية باذن الله ... وماني فاهمه اي شي ... ابي اعرف متى المفروض اسجله و اشلون على التطعيم ؟؟؟ تطعيمه قبل السنه الدراسيه بشهر ... هذا ثالث موضوع احطه استفسر فيه وماحد فادني او جاوبني .. ابي ردود لو سمحتوا مابي اتوهق بالاخير و لا اعرف وين اودي ولدي ...
سؤال اخير ... هل المفروض الاب يسجل الطفل ولا مو ضروري ؟؟؟

اتمنى الي تقرا مشاركتي و تعرف تفيدني باي شي تجاوبني ... و الله يجزاكم خير :q8:

 

[كويتيه متفائله]

هلا حبيبتي
التسجيل يعلنون عنه قبل لاتنتهي السنه الدراسيه على ما أعتقد على شهر 4
وأغلب الإعلانات للتسجيل يحطونها على باب المراكز الصحيه (المستوصف) علشان التطعيم
وبالوقت اللي يحددونه تروحين المركز التابع لمنطقتكم وهناك يقولولج كل طلباتهم وشنو تسوين وبنفس الوقت يطعمون ولدج
أما تسجيل الروضه فلازم الأب هو اللي يسوي الإجراءات كلها مايصير أحد ثاني..
وعلشان تتأكدين أكثر روحي الروضه اللي بتسجلين ولدج فيها واستفسري عن كل اللي بخاطرج وماراح يقصرون معاج
اتمنى أكون أفدتج

 

[فيونكا فوشيهـ]

سوري مااعرف والله بس بغيت ارفع الموضوع

 

[شمس نص الليل]

حبوبه عادي انا اللي سجلت عيالي مو ضروري الاب

والتسجيل يعلنون عنه واتوقع على شهر 2 او3

 

[الحراير]

مثل ماقالت شمس التسجيل شهر 2او3

 

[ام حمود 81]

كويتيه متفائلة .. شمس نص الليل ... فيونكا ... حراير ... مشكورين وايد على الاستجابه
انا ريلي متوفي يعني الاب مو موجود ... يعني ماكو غيري يسوي كل شي ... و اتمنى صج ما تتعسر الامور و يطلبون احد من العمام او اهل الاب ...

باذن الله ورا العيد جذي باخذلي لفه على المدارس الي حولنا و بقرر باي مدرسة بدششه و بسالهم عن كل شي ... مشكورين و ما قصرتوا و عساكم عالقوة

 

[basema]

تري الأمر سهل حيل مايبي شيء قبل ما تعطل الروضة بشهرين يحطون إعلان و تقدمون بس لازم الأب هو اللي يقدم الأوراق بعدين يخلونج تراجعين الصحة المدرسية و تردين مرة ثانية تكملين الأوراق و تنتهي و إن شاء يكبر و تفرحين فيه

 

[كويتيه_غاويه]

اختي ام حمود .. الله يرحم موتاكم ياقلبي .. ويعوضج خير يارب

حبوبه .. اذا الأب مو موجود لا بد الوصي اهو اللي يسجله بالروضه .. يعني جده من ابوه او واحد من عمامه .. وكل اللي عليج زهبي اوراقه كلها وحطيها بظرف .. وكلمي الوصي ياخدهم ويروح يسجله .. !!

انا مطلقه فديتج .. وما قدرت اسجل بنتي بالمدرسة اللي يمنا لأنهم اشترطوا انه ابوها هو اللي يسجلها (لأنه الوصي) .. وهذا كلام المنطقة التعليمية ياعمري

الله يسهل اموركم .. ويسخر لج عمامه والوصي عليه .. وماتتعسر دراسة الولد

موفقه حبيبتي

 

[ام لآلئ]

هلا حبيبتي ...
التسجيل يعلنون عنه قبل لاتنتهي السنه الدراسيه على ما أعتقد على شهر 5
وأغلب الإعلانات للتسجيل يحطونها على باب المدرسة اوالمراكز الصحيه (المستوصف) علشان التطعيم
وبالوقت اللي يحددونه تروحين المركز التابع لمنطقتكم وهناك يقولولج كل طلباتهم وشنو تسوين وبنفس الوقت يطعمون ولدج
أما تسجيل الروضه فلازم الأبو اهوا اللي يسوي الإجراءات كلها مايصير اي أحد ثاني حتى انتي لو كنتي حاضنه (اسملله عليج)..
وعلشان تتأكدين أكثر روحي الروضه اللي بتسجلين ولدج فيها واستفسري عن كل اللي بخاطرج وماراح يقصرون معاج
اتمنى أكون أفدتج

 

[ام حمود 81]

بسيمه ... كويتيه غاويه ... او لالي ... مشكورين وماقصرتوا على الافادة و اشكرلكم اهتمامكم

عمامه عسرين وايد و الوصي عمي وايد يتعايز عن اي طلعه ودشه او مراجعه لي او لولدي عانيت وايد مع هالناس ... الله كريم

ادعولي بس الله يسهلها وما تتعسر وما يطلبون احد من اهل الولد ......

ومشكوررررررررررين و يعطيكم العافيه على مشاعركم الطيبه

 

[أم هديل]

السلام انا موظفة بالمنطقة التعليمية يبدأ التسجيل لرياض الاطفال من اول يناير الى آخر مايو

 

[ام حمود 81]

عساني ما انحرم منج ام هديل ... مشكورة حبيبتي ... بس لو سمحتي قوليلي انا بسجل ولدي احتمال بمدرسة ثنائية لغه يصير انا الي اسوي كل شي ولا لازم وجود الاب او احد من طرفة ؟؟ ؟؟ و يعطيج الف عافيه يالغاليه

 

[* LOVE STORY *]

حبيبتي ام حمود81
أغلب المدارس ثنائية اللغة تفتح باب التسجيل شهر 2
روحي للمدرسة اللي بتسجلين ولدج فيها وشوفي شنو يحتاجون من أوراق
وشرحي لهم ظروفج اذا تقدرين تسجلينه بروحج او لا ؟
وجهزي اللي يبونه وخليج على شهر2 زاهبه
من يفتحون باب التسجيل سجلي على طول
عسى الله يخلي لج ولدج وتفرحين فيه متخرج من أرقى الجامعات يااارب

 

[ام حمود 81]

لوف ستوري ... خلاص انا راح اسوي جذي ضروري ... ويعطيج العافيه وما قصرتي ... والله يفرحج بعيالج و تشوفينهم باعلي المراتب و المراكز

اللهم اميييييييييييين