تكفون ابلات الخبره مساعدتكم الله يجزاكم الخير

[f6ame]

السلام عليكم
ماعليكم امر ابلات عندي درس عن العرس الكويتي
ومادري شلون اقدمه اول سنه لي
والموجهة مادخلت علي واحتمال كبير تدخل
فابي اعرف شنو احتاج شلون خطوات الدرس
تكفوووووون ساعدوني
وهذي اهدافي
يتعرف على العرس الكويتي قديما وحديثا
يشارك الآخرين في أفراحهم
يؤدي رقصة جماعية

 

[العنقه]

حبيبتي شوفي انا صج اول سنه ابله روضه وعمري صغير <<< 18 سنه
بس عندي خبره من خواتي وان شاء الله افيدج
اول شي لازم تسوين منبه يعني مثير
وهذا المنبه اهو مفتاح الحصه بحيث يجذب انتباه الاطفال
ممكن تسوينه بكذا فكره
مثلا : تيبين بنت لابسه دراعه خضره و مشكوكه بذهبي
وغير الاكسسوارات الهامه والجف والتراجي وغيره
وممكن تتقولين لأم البنت اللي تختارينها تحني ادينها وتنقشهم
وتختارين بنت ثانيه لابسه نفنوف ابيض وحاطه طرحه <<<< طبعا الطرحه مو صج يعني قطعه دانتيل على الراس شي بسيييط

بدايه الحصه
تسلمين
وتقولين نشيد الصباح مع الاطفال
عندي نشيده حلوه وبسيطه
طلعت الشمس بان النور وابتدى النهار
سلام عليكم يا هلا فيكم اطفالنا الشطار
طبعا مع جم حركه انتي تحفضينها لليهال
وبعدين ينطق الباب
وادش البنتين
ويلقون التحيه على الاطفال
وتوقفينهم بس شوي
وبعدين تسألين الاطفال
ما هذا يا اطفال ؟ يردون عرووس
تقولين
وما الفرق بينهم ؟
يفكرون الاطفال ويقولون الملابس
تقولين تدرون منو كان يلبس مثل لبس فلانه << ام اللبس القديم
هذيلا عرايس قبل يعني جدتنا كانت تلبس جذي بالعرس
وتشرحين شنو الملابس اللي لابستهم البنت
مثلا تقولين كانو لازم يلبسون اللون الاخضر ويحطون حنه
او قبل لا تشرحين تسألينهم شنو تشوفون الفرق
وحاولي تساعدينهم قوليلهم اللون مثلا
واهم بعدين بيعددون الحنه وغيره
وبعدين توضحين اللبس القديم او الاشياء اللي اهم قالوها عنه
وبعدين تسألينهم <<<< طبعا هني دور العرس اليديد
منو راح عرس؟
ووين كان هالعرس بالبيت ؟
شنو كانت لابسه العروس؟
وطبعا تخلين البنات يقعدون بكراسي بوسط الصف عشان يتميزون
وبعد ما تخلصين من سؤال الطفال تبينين لهم ان هذا اللبس اليديد للعرس
واخر الحصه تطرحين عليهم أساله عن الدرس ككل
مثلاً :
شنو شفنا اليوم ؟
واطلبي منهم انهم يأشرون على اللبس اليديد واللبس القديم
وبعد اسأليهم شالفر ق بين العروس قبل والحين
ونهايه الحصه
مثلا سوي تطبيق فيه رسمه عروس من قبل
وعروس الحين
وخلي الاطفال يلونونها
واتمنى اني افدتج
ادعيلي الله ينولني اللي ببالي ويسهل علي ويرزق الناس اجمعين وانتي بعد معاهم

​

 

[العنقه]

صح وحاولي تسوين لهم مسابقه مثل لوحه فلينيه و فريقين والاسرع يركب الصور وطبعا الصور تكون من نفس الموضوع يعني عن العرس القديم واليديد
او مثل تيبين باربيات والاسرع بتلبيسها بالزي القديم واليديد
او اممممممممممممممم تييبين فساتين صغيره واحد ابيض والثاني اخضر وطبعا تكون في باربي لابسته والاسرع اهو اللي يكمل مجوهرات اللبس وينسقها والاجمل شكل اهو الفايز

 

[العنقه]

صح نسيت وقبل المسابقه تناقشينهم بانهم لازم يشاركون الناس افراحهم وانه اذا رحنا العرس نقول مبروك ومن عالسوالف
وانتي ذاكره انهم يسوون رقصه جماعيه اختاري جم بنت جريئه وجم ولد واذا كنت انتي هم جريئه سوي صفه واقصدي لهم وصفقه وشغل عدل والبنات طبعا ينفحون بشعرهم والصبيان يرقصون بعقالهم وطبعا لابسين دشاديش والبنات نفانيف من الستايل القديم واليديد

 

[عهود الحب]

شلون ابلة روضة عمرج 18 سنة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[f6ame]

مشكوره حبيبتي وماقصرتي والله يوفقج وحقق كل الي تبينه

 

[العنقه]

شلون ابلة روضة عمرج 18 سنة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

والله يعني اجذب
صارت لي ظرروف وما قدلات ادرس
اشتغلت والشغل مو عيب​