بسم الله الرحمن الرحيم
وكل عام وانتم بخير
انا راح ادخل بموضوعي الي خلاني اكتبه في وحده من الاخوات كانت شبه منهاره وبصراحه الله يهديها كانت تقول انا دعيت ربي وتذللت وبكيت بس ماصار شي ولا تغير شي..لاحول ولاقوة الا بالله
غاليتي..انتي ملزمه بعبادة ربك وليس ملزم بانه كل مادعيتيه يعطيك دعوتك لانك عبدتيه والا صليتي كم ركعه
اختي..الله يعطي بمشيئته وكيف يشاء ومتى يشاء..مو لانك صليتي كم ركعه له خلاص معناته انتي منتظره منه استجابة دعوته على الي سويتيه ..اي نعم الله شكور ويجازي على الاعمال بس ضروري نكون مؤدبين مع الله هذا ملك الملوك جل في علاه..
عشان كذا انا كنت متابعه في رمضان برنامج اسمه (الكنز المفقود) وكان جايب حلقه عن هذا الموضوع فانا حاولت اني الخصها لكم باسلوبي. ويارب نستفيد وانا اولكم لانو انا برضو نفس بشريه وتواقه لكل شي وينولني من الاحباط وسوء الظن بالله نصيب.. واذا بغيتو الحلقه بلغوني انزلها لكم
بس انا راح ابدأ بسؤال..
هل تشعرين بالاحباط لو قربت لربنا وكنتي منتظره فتوحات في اشياء معينه..او هل حسيتي بالاحباط لما دعيتي دعوات كنتي حاسه انها كلها خير مع ان الله وعد وقال ادعوني استجب لكم..!
لكنه ماستحاب..! مع انك متقربه منه بالطاعات..
بقولك انو عندك مشكله في قربك..
المشكله حبيبتي ان قربك لربك مشروط..
القرب المشروط معناته تقولي.. يارب انا اذا قربت منك ابي الشي الفلاني يصيرلي مع ان ربي عطاءه واسع اناابي كذا وابي كذا
طب سؤال هل لازم لما اقرب من ربنا يسويلي الي انا ابي..!
هذي خدعه الشيطان يغذيها ان الانسان هل لو تقرب لربنا سبحانه هل هو متوقع ان كل المشاكل الي في حياته او كل شي يبي من ربنا تتحقق له مثل مايبي
او يمكن ربنا له حكمه في العطاء فيمنع عنك اشياء او ياخر عنك اشياء لحكمه ربنا يعلمها ولان الخير للعبد في هذا الشي..
وفي ايات كثيره تدل على صدق ربنا..(ومن يتق الله يجعل له من امره يسرا)
(ومن يتق الله يجعل له مخرجا) يعني انتي متوقعه انك لما نقربين من الله ان الله يوفقك ويجعلك مخرج ويهبك اليسر في امورك..الدنيويه والاخره
والله سبحانه قال عن نفسه(ومن اوفى بعهده من الله)
هذا سوا مشاكل كثيره لكثير من الناس ليش...
لانو
احنا نحط في بالنا انه بمجرد مانتقرب لله سبحانه انو خلاص كل المواضيع الصغيره والكبيره بتنحل وكانها بكبسة زر..سبحان الله
طبعااااااااااا القرب من الله واجب والدعاء واجب والله بيفرج علينا ويحل مشاكلنافي امور كثيره لكن بحكمته وبما يتماشى مع الخير للعبد.. يعني الله سبحانه يحل لنا مشاكلنا او يفرج علينا ساعات تكون بالعطاء وساعات تكون بالمنع وساعات على طووووووووول لكن ربنا سبحانه اعلم بالي يصلحنا ويصلح لنا واحنا طبعا مانوكن فاهمين
يعني هو اعلم هل هذا الوقت هو الانسب لنا عشان يفتح علينا ويوسع علينا او الانسب ان الله سبحانه وتعالى يضيق علينا بمعنى انه يؤجل استجابته لاشياء احنا محتاجين لها
كثير مننا لو دعى ربنا باشياء وماستجاب الله له يجيه احباط...مع انه في نظره ان الاشياء الي طلبها كلها خير وهي فيها خير لكن هل كل شي يعطيه الله العبد يصلحه قال رب العالمين(ولوبسط الله الرزق لعباده لبغو في الارض ولكن ينزل بقدر مايشاء) اذن الله سبحانه يعلم المقادير من البلاء والرزق الي بتنزل على كل واحد والانسب لكل واحد فينا
لكن انتبهي لشغله..
اذا دخلتي على ربنا وتقربتي لربنا وانتي بتششترطي ..يارب لو انا تقربت لك معناته لازم تحللي مشاكلي بالطريقه الي انا ابيها..وترزقني الارزاق في الدنيا الي انا ابيها والله سبحانه يقول(والله يعلم وانتم لاتعلمون)
واوقات تكوني مستعجله على شي قال تعالى (ويدعو الانسان بالشر دعاءه بالخير وكان الانسان عجولا) بمعنى انك تكوني مستعجله كثير على تحقيق شغله لكنها شر لك وانتي مره ميته عليها... طيب سؤال من يعرف الخير والشر لي من يعرف الانسب من يعرف تاريخ حياتي من يعرف مكاني بالدنيا وموضعي بالاخره ولكي يطمن الله قلوبنا قال سبحانه( الا يعلم من خلق وهو اللطيف الخبير) ولم يقل سبحانه الا يعلم من خلق فقط.. بل اكمل وهو اللطيف الخبير سبحانه هو الخبير والاعلم بماضيكي ومستقبلكي وحياتك كلها وهو لطييييييييييف معك بقدره خبير بالي يصلح لناسبحانه
اذن اخوااااااااااااااتي...
لابد انا نغير فكرة ومفهوم ان الابتلااااااااااء هو التضييق..
الله سبحانه علمنا ان الدنيا من صفاتها الابتلاء
فالعطاء بان الله يوسع علينا هذا ابتلاء
وان الله يضيق علينا او يمنع عنا هذا ابتلاء
وانه ياخر شيءهذا ابتلاء
والتعجيل في اعطاء شي هذا ابتلاء
قال تعالى(تبارك الذب بيده الملك وهو على كل شي قدير الذي خلق الموت والحياة ليبلوكم ايكم احسن عملا)
وليبلوكم بمعنى يختبركم يعني ان مابين موتنا وحياتنا اختبارات كثيررررررره والاختبار يكون بالتضييق الي هو ضيق في مفهوم الناس لانوالتضييق هذا فيه سعه لو صبرنا ورضينا بحكمة ربنا او يكون بالتوسعه الظاهره لنا مع انه قد تكون هذه التوسعه لو ماتصرفنا فيها بمايرضي الله تكون ضيف ونكد
اذن..
المؤمن والكافر والعاصي والطائع سيبتلون لان معنى كلمة ابتلاء هي اختبار
الله سبحانه يحطنا في موقع معين والله يحبنا نتصرف بطريقه معينه في هذا الموقف.
انتي لك شهوات ورغبات وتبغي تتصرفي بطريقتك فممكن تكون شهوتك ورغباتك وحياتك كلها مو زي الي يحب ويرضى عنه الله سبحانه عشان كذا رب العزه يحطك في موقف او اختبار عشان تتصرفي فيه على مراد ملك الملوك وقد تكون شهوتك عكس ذلك لكن هذا هو الابتلاء.
غاليتي انتي قد تكوني عملتي اشياء كثيره وتعبتي وربما ماشفتي جزاء..فلاتستغربي لان هذي ليست بدار جزاء بل هي درا اكدار ودارالجزاء هي الاخره هي الدار التي لانكد ولاغم ولاه ولاكدر وهرم فيها.. عشان كذا بما انا عايشين بالدنيا لازم نعرف اننا نمر بمواقف ولابد نثق بان كلها خير لان الله الكريم لايصدر من افعاله الا الخير ويوم القيامه يكون بوزن قلبك( يوم لاينفع مال ولابنون الا من اتى الله بقلب سليم) وقلبك ماراح يكون سليم الا اذا اخذ نعم قال الحمدلله على نعمك واذا ابتلي قال يارب اكشف عني مالي غيرك يارب لانه نصف الايمان الشكر ونصفه صبر(ان في ذلك لايات لك صبار شكور)
انتي ممكن تسمعي دروس عن الصبر وعن الشكروالابتلاء ومحاولة فهم حكمة الحكيم من الابتلاءات ولكن ماراح تترسخ هذي الامور بقلبك وعقلك الا اذا عشتي في ابتلاءا ربك بكل انواعها
عشان كذا انتي ماراح تحبي الله بجد الا اذا عرفتيه انتي بحاجه تشوفي احداث كيف ربنا يعلمك وكيف ربنا يكون معك وكيف ربي بيـــــاخذ منك عشان تناديه يااااااارب فيستجيب منك وكيف ربي ينعم عليك عشان تحسي انك عايشه في خير وسعة رحمة العظيم جل في علاه يقول احد الصالحين( متى اعطاك اشهدك بره ومتى منعك اشهدك قهره وهو في كل ذلك متعرف اليك ومقبل بلطفه عليك)
اختي...حاولي حاولي تفهمي حكمة افعال ربنا سبحانه وتعالى وانا قلت حاولي لان حكم افعاله سبحانه لاتنتهي والقصد ابيك تثبتين على شي وهي..
مع العطاء والتوسعه احبك يارب ومع المنع والشده والتضييق احبك يارب وراح اضرب لك المثل واقرب لك الصوره اكثر وهذي امور ظهرت في افعال الانبياء
سيدنا سليمان عليه السلام كان اغنى الاغنياء واقوىالملوك فاراد الله ان يبين له كيف اعزه واغدق عليه من رزقه فسخر له الشياطين والجن وفهمه لغة الطيور فلما حب ان ياتي بعرش بلقس قال له احد الجن انا اتيك به قبل ان يرتد اليك طرفك فاتى به ولماراه قال(هذا من فضل ربي ليبلوني ااشكر ام اكفر ومن يشكر فنما يشكر لنفسه ومن كفر فان ربي غني كريم)
وبرضو سيدنا يونس لما كان في بطن الحوت كان في ثلاث ظلمات بطن الحوت والليل والبحر نادى ربه لااله الاانت سبحانك اني كنت منالظالمين بصراحه في ناس كثير لوفتشتي جوات قلوبهم تلاقينهم حاسين ان ربنا ظلمهم ومو معطيهم حقهم لكن يونس اعترف بتقصيره وظلمه الشديد لنفسه فقال سبحانه( فاستجبنا له ونجيناه من الغم وكذلك ننجي المؤمنين) لانه اعترف فضل الله عليه وظلمه لنفسه ففرج الله عنه
سيدنا ايوب عليه السلام لما ابتلاه الله سبحانه لسنوات طويله وقيل انها 18 سنه ابتلاه بالمرض فبعد السنين الطويله نادى ربه( اني مسني الضر وانت ارحم الراحمين) بمعنى انه ينسب الضر لنفسه والرحمه لرب العالمين هذا ادب مع الله وادب في التسليم لحكمة الله (لاتحسبوه شر لكم بل هو خير لكم) مع انه استمر في المرض سنين ماسخط وجزع وقال ليش ربي يسوي فيني كذا
احنا أي احد يضرنا بالدنيا نزعل منه ويمكن نبعد عنه الا الله سبحانه وتعالى اذا اتانا الضر نسعى له ونلهج اليه بالدعاء لانه ضرنا بالظاهر لكن باطن الضرر فيه خير كثير لنا فالصالحين فهمو هذا الموضوع فهمو ان أي عطا او منع من الله هو اختبار فلابد تشيلي من بالك ان المبتلى هو المضيق عليع لانك قد تتقربين لله وتبعدين عن اشياء كثيره عشان ربنا وتتوبي عن اشياء ونتوقع ان ربنا راح يفتح علينا وقد يفتح(وهذا اختبار بحد ذاته) وقد تقابلك مشكله ثانيه وهذي برضو عشان ربي يعلمك منها.
تخيلي انتي عايشه وفي احد اقوى منك مديره او زوج او ام زوج او أي شخص اقوى منك وظالمك وانتي مو قادره تاخذين حقك.. انتبهي تقولي يارب يارب وينك بمعنى انك تقولي ليش مانصفتني... انتبهي
الله قريب منك كثيييييير وفوق ماتتخيلي هو اقرب لك من حبل الوريد ..لكن في ناس ماعندهم طاعات كثيره وقد تكوني منهم وربي كاتب لك تروحي مكان عالي جدا ومنزله عاليه وانتي مثلا ماقد حجيتي والي ظلمك شخص حج كثييييير فلما ظلمك وصبرتي ودعيتي ربك ووكلتي امرك له وجا يوم القيامه انتي تاخذي من حسنات الي ظلمك ويكون عنده اجر حجه وانتي ماقد حجيتي فراح تتشال من ميزانه لميزانك وتكوني كانك حجيتي وممكن برضو يبقى لك حق زياده فتاخذي من حسناته او حسناتها فتلعو من قدرك ومنزلتك في الجنه الى درجة الصالحين وانتي بالدنيا ماسويتي اعمال كثيره,, سبحان الله لولا ظلمك بالدنيا مارتفع مقامك بالاخره
او ممكن انتي انظلمتي وسيئاتك اكثر من حسناتك وراح تدخلين النار فسبحان الله لما ربي يعدل بينكم راح يعطيك ربي من حسنات الي ظلمك وقد تدخلك الجنه بعد ان كنتي بتدخلين النار شفتي رحمة ربك... وبيكون حال لسانك وقتها ياليت حياتي كلها ظلم بظلم عشان ترتفع منزلتي اكثر
يعني اذا ظلمك احد لتقولي وينك يارب ووين عدلك قولي الحمدلله يارب انا عارفه انك تسمع وترى واعلم بحالي
لسان حالك يقول وحال الكثيرات..
يارب انا بعدت عن العلاقات المحرمه وتركت الي احبه بالحرام عشان اخذه بالحلال او اتزوج احسن منه وماتزوجت للحين
يارب بعدت عن الاغاني والافلام وماانفجت علي
يارب مسكت نفسي عن الغيبه وتصدقت كثير وماجاني اولاد
يارب تركت الوظيفه الحرام وتركت مال الحرام وانا عايشه في فقر
يارب انت قلت (ادعوني استجب لكم) طب انا دعيتك وجالسه ادعيك لي زمان وماساتجبت...!
صح بالله مو كثير تقولي كذا..!
بدا قلبك يشك في صدق وعد ربنا عزو وجل عشان ربنا في ظنك انتي تاخر عليك في استجابة دعائك او تعويضك بالطريقه الي انتي تبيها عشان كذا كثير تلاقين نفسك تعبتي ومنتظره النتيجه وتتاخر عليك نتيجة دعائك هذا فتفقدين ثقتك انك ماشيه صح.. وتقولين هذي فلانه وفلانه مبعدين عن الله وغرقانين بالدنيا ولاهين ومع كذا الله مغدق عليهم ومعطيهم فتجلسين تقولين ( ايييييه ارزاق الطيب ماله مكان في هالدنيا وماله حظ) ومن هالحكي الي يوصلك الحضيض من القنوط وهز الثقه بكلام رب العباد وانك ماشيه على طريق نبينا صلى الله عليه وسلم.. قال تعالى (ومن يتق الله يجعل له مخرجا ويرزقه من حيث لايحتسب ومن يتوكل على الله فهو حسبه ان الله بالغ امره قد جعل الله لكل شي قدرا) المخرج يكون من الحزن والضيق والهم واعظم مخرج ربي يعطيه لك هو المخرج من المعصيه نفسها يعني انتي لما قطعتى علاقتك المحرمه بشخص كنت تحبيه مثلا او وقفتي عن الغيبه اوتركتي وظيفه حرام هذا مخرج لانك خرجتي نفسك من معصيه وبعدتي عن شي يغضب ربك ممكن يجرك للنار والعياذ بالله لو ماتبتي منه.
وبعدين انتي تقولي انا بعدت عن اشياء كثيره وتذللت لله ودعيته وخشعت له وبكيت دم بدل دمع لله ولسا ماتزوجت..او ماتقدم لي الي احبه طب ياقلبي انتي في كثير ناس كثير استعجلو علىهذاالموضوع ويقولون احسن لي اتزوج وانا صغيره اوخلاص ماعاد ينفع اتزوج وانا وصلت 30والا زواجي ماله طعم بهذا العمر..لااله الا الله في كثير ناس تزوجو وشقو في حياتهم ومستحيل كل الي تزوجو وتعرفينهم كلهم سعداء مستحيل في كثير متزوجين حزينين او عندهم مشاكل او مش متوافين وغير متفاهمين..وفي كثير بنات يقولو ياليتني تاخرت بزواجي عشان اكون اكثر صلابه او صبر ويكون عندي قدره على تحمل المشاكل
كثير بنات انفصلو ليش..لانها تسرعت وتزوجت بدري وهي كانت مو مستعده للزواج ولا امور الزواج من ناحية النضج وتحمل المسؤليه (والله يعلم وانتم لاتعلمون)
عشان كذا لو انتي رفعتي يدينك وبكيتي وتذللتي وقلتي يااااااااااااارب وتاخرت استجابة الدعاء والعطاء
او تركتي شي لله وتاخر الفتح والفرج..
انتي ماتعرفين العطاء والفتح الحين مناسب لك اولا..
انتي ماتعرفين لو ربك عطاك الي تبين بالوقت الي تبينه هل بتكملين حياتك شاكره وسعيده اولا..
فياقلبي... استسلمي لله ولحكمة الله عز وجل واستسلمي للملك..
طب فكري بشغله .. الرسول صلى الله عليه وسلم لما ضيقت قريش عليه الحصارثلاث سنوات في شعب بني طالب وكانت في اول سنوات دعوته وكانو في فقر وضيق شديييييد حتى كانو ياكلون من الجوع اوراق الشجر هل هذا معناته ان النبي صلى الله عليه وسلم لايتق الله او لايأخذ بالاسباب..!
قال صلى الله عليه وسلم فيما معنى(ياتي النبي ومعه الرجلين وياتي النبي ومعه الرجل وياتي النبي وليس معه احد) وهذا يوم القيامه تخيلي ياتي النبي وليس معه احد من امته يدخلون الجنه هل معنى هذا انه مقصر..! طبعا لا فالانبياء هم صفوة الخلق والنبي هو من اختاره الله لنشر دينه ويكون النبي يتعب ويعمل بالاسباب ويدعوهم ليل نهار ولكن ياتي يوم القيامه ومامعه احد من امته وهذا من حكمة الله.
اذن ..انتي قد تتعبين وتشوفين الجزاء في الدنيا بسرعه وقد تتعبين ويتاخر الفرج والفتح وقد تتعبين وتشوفينه بالاخره اوسع واوسع واوسع.
طب تخيلي انتي تعرفين وحده غنيه ومقتدره وتثقين فيها كثير وتعرفين دائما انها توفي بوعودها المهم وعدتك بتجيبلك جوال في الزياره الجايه.. وجت الزياره الجايه وقابلتيها وانتي منتظره تعطيك الجوال جت وطبطت عليك وقالت اصبري شوي اصبري وبتشوفين..انتي من كثر مانتي واثقه فيها ومتعوده على كرمها معك يوووووووه انتي بتتحمسين كثير ويتقولين قالت لي اصبر معناتها مجهزتلي شي كبييييييييييييييير..
ولله المثل الاعلى.. لو احنا نتعامل مع ربنا بمثل هذي الثقه وشايف سبحانه بقلبك هذي الثقه وشايفك كيف مستسلمه له وانك فرحانه بعطاءه وفرحانه اكثر بمنعه لانك عارفه انه في شي اعظم منتظرك..
راح اضرب لك مثل ..سيدنا نوح عليه السلام جلس 950سنه وكان يدعي قومه وبعد السنين هذي مااسلم معه على اقرب التقديرات الا 80 شخص يعني تقريبا كل 12سنه يدخل شخص واحد في الاسلام مع سيدنا نوح واستمر يدعي الناس وما تكاسل واوحى الله سبحانه له (انه لن يؤمن من قومك الا من قد امن فلاتبتاس بماكانو يفعلون) ثم امره الله سبحانه ان يصنع الفلك (واصنع الفلك باعيننا ووحينا ولاتخاطبني في الذين ظلمو انهم مغرقون) سبحان الله ابلغه الله انه ماراح يسلم غير الي اسلمو معه واستمر بتنفيذ امر الله ببناء السفينه وماعاتب ربي وقال ليش مااسلم معاي ناس كثير..الله لايحاسب ولايسال عما يفعل ..
خذي بالاسباب .. واجتهدي ..شاء ربنا ان قدره فيك يكون التوسيع قولي الحمدلله على كرمك ومنك..شاء ربنا يأخر التوسعه الحمدلله يارب على كل حال..شاء ربنا انه ماراح يوسع عليك بالدنيالعلمه بانك لو اخذت منه الفرج بالدنيا راح تستغنى عنه وكم من انسان استغنى عن ربه قال تعالى( كلا ان الانسان ليطغى )
وقال تعالى (فأما من بخل واستغنى فسنيسره للعسرى) لما اخذ بخل على الله سبحانه
فالانسب لك هو الي يعطيك اياه الله
ارضي ولاتتسخطي من قضاء الله لانك لو تسخطتي ماراح يجيك الا السخط من الله..
وداااااااااااائما وابد حطي التفاؤل وحسن الظن بالله قدامك..دائما
وانتي تدعين ازرعي قناعه بنفسك ان دعائك مستجاب..وفوضي امورك كلها لله..
وباذن الله فرج ربي قريب.والدنيا ابدا ماتدوم على حال ان حزنتي لازم بتسعدين بس اهم شي انك تكوني صابره لما كنتي حزينه وبتشوفين العوض من رب العباد..
وثقي تمام الثقه ان الحزن والنكد من الشيطان وكل الي جالس يصير هذي وسوسه عشان يخرب عليك قال تعالى (انام النجوى من الشيطن ليحزن الذين امنو وليس بضارهم شيئا الاباذن الله وعلى الله فليتوكل المؤمنون) الشيطان وش هدفه غير انه يحبط من عزيمتك ويحسسك بالاحباااااااط وبالاخر فقد الثقه بالله وثم القنوط والعياذ بالله
اختي من لنا غير الله قوليلي..!
انتي عندك خيارين مالهم ثالث
* تكوني متفائله وواثقه بالله وتعملين بالاسباب وتتوكلين وتفوضين امورك لله ثم ترضين بقضائه والنتيجه راحة بال وسعاده وطمانينه وتحقيق امال وخاتمه حسنه وجنة خلد
*او تكوني محبطه يائسه تفقدين الثقه بالله متسخطه قانطه مبعده عن الله ضيق وضنك في الدنيا وتكاثف هموم فتحلو لك المعاصي ثم سوء خاتمه وعذاب جهنم اجارنا الله منها
وتذكري دااااااااااااااائما حبيبتي
( الله يبتلي لـــــــــيهذب لا ليعذب )
من قلب صادق اسال الله العظيم سابق الفوت وسامع الصوت كاسي العظم لحما بعد الموت ان يصلي على محمد وعلى اله وصحبه وان ييسر لكم اموركم ويفتحها عليكم فتحا مبينا وان يفرج همومكم وينفس كربكم ويقضي حوائجكم وييسر عسيركم ويستجيب دعواتكم ويجعل مالنا الفردوس الاعلى مع اهلينا وازواجنا واولادناواحبابنا بصحبة نبينا محمد صلى الله عليه وسلم امين امين امين والحمدلله رب العالمين
يارب اكون غيرت لو شغله بسيطه وقدرت اني ارفع همتكم وروحكم
في امان الله
منقووووووول ان شاء الله تستفيدون من الموضوع
