تقولي: قررت أطلع من بيت أهلي !!

[.Nihal.]

قوة بنات شلونكم ؟ شلون العيد وياكم ؟

انا لي صديقة مقربة من سنين واعرف تفاصيل حياتها

وكل يوم تشكي لي معاناة وظلم اهلها معاها

تكسر الخاطر والله

بقول جم شغلة تعاني منها ورؤوس اقلام عن قصة حياتها:-

1- من كانت ياهل وامها تطيح فيها طق وما وقفت عن طقها لين تسببت في تشوه ويها وتعقدت البنت من التشوه اللي فيها. مع انه بسيط بس حرام مخرب على شكلها شوي

2- الام مو راضية تسوي للبنت تجميل ما تبي الخساير واللوية مع انها اهيا اللي مسببة لها التشوه.

3- معاملة قاسية للبنت جنها خدامة .. الخدم يمكن يعاملونهم احسن منها.

4- حكرة في البيت ماكو طلعة الا للجامعة.

5- اي مشكلة في البيت يقطونها على راسها حتى لو ما كانت السبب في هالشي.

6- البنت كذا مرة تنخطب وبدال ما امها تستانس تقص على الناس اللي خاطبين بنتها وتقول انتوا تبون بنتي الكبيرة ! وقصد الام انها تحول الريال اللي خاطب رفيجتي على اختها ..

7- الام وايد تفضل اخت رفيجتي اللي قصدتها برقم 6 على رفيجتي .. اي شي تبيه يوصل لي ريولها .. رفيجتي كل شي لا حرام وما يجوز .. لي درجة ان اخت رفيجتي لو تطق امها الام تبجي ما تقول شي .. ورفيجتي لي قالت كلمة وحدة حقها تاخذ منها كل اغراضها مثل اليهال وتتفنن بالعقاب.

8- وايد اهانات .. تفال " وانتوا بكرامة" .. الفاظ سوقية تنقال حق رفيجتي بدون سبب. مجرد يفشون خلقهم فيها.

9- البخل واصل لي السما .. الابو ما يدفع شي.. والام لي دفعت نتفة ذلت البنت ذل على اللي دفعته, وازيدكم من الشعر بيت .. مو كل بنت بالجامعة لها اعانة ؟ ام رفيجتي ماخذة الكرت منها وتعطي رفيجتي كل يوم دينار ولا دينار ونص جنها ياهل ...

10- البنت تبي تشتغل وتصرف على نفسها مو راضين اهلها كل شي لا لا لا ...

هذي مجرد رؤوس اقلام .. لو تعرفون بالتفاصيل يشيب شعر راسكم

محد واقف مع البنت

والحين كملت 21 وقالت لي قررت قرار

تدرون شنو اهوا ؟

انها تطلع من بيت اهلها وترفع عليهم قضية انها تعيش منفصلة عنهم

رايي بالموضوع:

كوني رفيجتها واكثر من اختها .. انا ما الومها على هالقرار
حرام كلنا نطلع ونستانس ونعيش حالنا حال البنات الا اهيا عايشة بسجن وعذاب
انا وياها وضدها بهالموضوع .. وياها انها بترتاح من ظلم اهلها
وضدها اني احاتيها شلون تعيش بروحها ووين ؟


ملاحظة: طرحت الموضوع عشان اعرف هل شفتوا بنات اتخذوا مثل هالقرار وشنو كان مصيرهم؟
وبرايكم هل تقدر تطلع من بيت ابوها وتعيش مستقلة عنهم ؟
لو كنتوا مكانها شتسوون ؟

وبليز بنات اللي بتقول حرام ومهما كان واهلها ومادري شنو
لا تشارك او خل ترفع الموضوع بذكر الله
اعتقد ان همن اللي يسوونه اهلها معاها حرام وما يرضي الله
ونبي راي القانون بهذا الخصوص للي عندهم معرفة بهالشي

انا ما عندي خلفية عن هالمواضيع .. فقلت لها كلمي محامي احسن

فمادري انتوا شرايكم ؟

 

[ϻʟǎƙ ཞǿ7ყ*]

اممممممممممبييييييه
آلله يعييينهآ

لييه هالتفررقةة بيين الخوآت

بصرآحةة انا معآهآ بقرآرآهآ خل ترفعع قضضيةة مآرآح تعيش غير ممررةة خل تسستآنسس وبآلنسسبةة لي ممآعندي احد عآيشش بروحةة و لآ جآن نقلت لج التجررربةة !

آلله يوفقهآ بحيآتهآ ان شاآء الله و يهدي اهلهآ

 

[FeShinGoOo]

مادري والله بس اتمنى من كل قلبي ان ربي يرزقها بولد الحلال اللي يعوضها عن هاذا كله ..
بس خل تفكر اذا هدت اهلها وعاشت بروحها منو بيرضى يتزوجها ..؟؟ ترى سمعت البنت نفس الجبريت انا اقول خل تتحمل ضيم اهلها ولي تزوجت بترتاح وصدقيني الله بيعوضها عقب هالحرمان وخل دايما تردد ان بعد العسر يسرا .. وتتقرب من رب العالمين اكثر وتدعي ان الله يرزقها بزوج صالح احسن من هالقرار الي اختمال تتحسف عليه .. لان اذا اتحسفت ماراح ينفع وماتدرين شنو ردة فعل اهلها خوفج يذبحونها ولا يأذونها .. لا تستسهل الموضوع .. وهم لاتشوه سمعتها وسمعت اهلها

 

[قسوة الزمن]

شوفي ممكن تروح عند خوالها او اعمامها

 

[.Nihal.]

مشكورين حبايبي عالردود

فيشينقو .. صح كلامج نفس كلامي اللي قلته لها تقريبا وردها كان ما عندي شي اخسره من جذي مصممة على قرارها

 

[منبع عبط^_^]

الله يرزقها بولد الحلال اللي يعوضها ع اللي شافته من اهلها بس ماايد تطلع لان مايسوا لها الحجي اللي بيطلع عليها والناس مابترحمها فانا اقول لو تصبر علي اهلها ولا يحوشها حجي مني مناك والاكيد بعد ان اهلها ماراح يتركونها بحالها

خل تتقرب من ربها وتدعيه يفرج ضيقها صدقيني مجرد انها ترفع ايدها وتدعيه بترتااااح <انا جذي لاضاقت فيني ماارتاح الا لمن ادعي

 

[منبع عبط^_^]

بلى بتخسر سندها بهالدنياا لو صار لها شي واحتاجت مساعده مااحد بيساعدها كثر اهلها لو جافين معاها حيل وقت الصجيه مابيخلونها وهم بتخسر سمعتها السموحه بس صج خل تتخيل الحجي اللي بيطلع عليها .. الله يسترعليها الله بس خل تحكم عقلها وهي مو صغيره

 

[توتا الكتكوته]

خل تروح شقه بروحها وااايد ابرك لها وطز بالزواج وبالاهل وانا شكلي بسوي نفسها بعد شخباري البنات يقعدون

عند اهلهم افف ما نبيهم الواحد ماله خلق هدومه اللي عليها خلاص لا يجيبون عيال سووو تحدديد نسل دام بخله

ومالهم خل يدلعون ويربون يجيبون نص ياهل ويرحون الارواح بس مستانسين لي كل وحده مسطره 5 ولا 7 يهال

 

[فدوووو]

قرارها صعب

شلون بتعيش وكيف راح تصير سمعتها؟

عاد هنا سمعه البنت اهم

خليها تكلم محامي افضل واحسن وتستشير اعمامها وخوالها اذا يقدرون يخلون اهلها يخففون عليها من العذاب

 

[سكوتي بذوقي]

لاحول ولا قوة إلا بالله

ابوها وينه ؟

ليش مايقول حق امها شي وينهيها عن تعذيب بنتها

اكره شي اللي يفرقون بين عيالهم

الله يكون بعونها يارب

ويرزقها بالزوج الصالح

 

[mouzza]

لا اله الاالله الله يفرج كربتي وكربتها يارب خل تستخير بالاول والله معاها

 

[samyah a.o]

نهال حبيبتي الا صديقتك الي كانت تبي زوجها يسوي.....مع صديقتها وش صار عليها
والله يعين صديقتك المعذبه ويهدي أهلها لوطلعت مثل ما تقولين وين بتروح ولحظه كيييييييييييييييف مصرفها مع امعهاتسحبلها كل يوم ديناروين عايشين احنا معقوله مافيه أحد حكيم من عايلتها عم خال جد جده اخ اخت ؟؟؟

 

[حريتي بحجابي]

احسلها تقعد عند اهلها بتخسر اشياء كثيره اذا راحت
وليش ماتكلم اختها وتقولها تتفاهم مع امها
وتتقرب من الله بالصلاه والاستغفار

الله يفرج همها وكل المسلمين يارب

 

[لياليـ]

مشكلتها معقده خلا اتحاول تتقرب من اختها تسولف معاها تتقرب من امها اتيي اتسلم عليها اتباريها لانه انا معاها على اللي راح اتسويه بس المشكله وين بتروح بعدين هل المجتمع اذا طلعت محد بيزوجها او بنسبه حق القانون ماعندي فكره
اتقبلي مروري

 

[لياليـ]

اب
اب
لعيونج

 

[طموحه بزياده]

خل تصبر وتتحمل لين تتزوج

واذا صج وضع لا يحتمل خل ترفع عليهم قضيه

الواحد لي متا يعيش بحزن خلهم يولون دام ما عاملوها معامله وينه ولا وفرولها الامن والسكينه والحنان والاطمئنان ما منهم فايده

اهل على شنو؟؟؟؟؟؟؟؟؟؟؟؟

 

[amal ksa]

هي صبرت لا هل عمر شيء جميل خلاص تصبر بعد اشوي لين تخلص دراستها وتتوظف
وبعدها تقرر بس هذا اللي عندي
والاهل ترى مهمين بحياتها بكرا الكل يتخلى عنها ويمكن انتي اهلك بيمنعونك عنها ماراح يبقالها احد
تنتظر افضلها وتحاول تهونها وتهون ان شاءالله
امها خلي امك تقعد معها وتتقرب منها ماتوضح لها انها تدري بشيء لا بس يعني تنصحها اوتقول فيه بنت امها كانت قاسيه معها وعندها مشاكل والله لايبلانا هربت وكذا
المهم لاتترك بيتها لو ولد عادي بس بنت ترى مره صعبه الله يحفظها ويهدي بالها

 

[mf6nt el3lat]

يوه الله يعينها يارب ويفرج همها

اذا تقدر خل تروح تكمل دراسه برااا وان شاء الله يرضون تفتك من الضيم شوي والله بيجازيهم وحسبي الله ونعم للوكيل
وصدقيني دوام الحال من المحال !

 

[أريد حلا]

لا حول ولا قوة الا بالله وش صار على البنت للحينها على قيد الحياة انا لو منها كنت مت صراحه

واااي قلوب جاسيه متحجره​

 

[اميره1980]

اعرف وحدة نفس ظروفها بس الحمدلله ربي ستر عليها و تزوجت و ربي عوضها
المهم
ما انصحها تسكن بروحها لا قانون و لا عرف و لا عاداتنا و تقاليدنا تسمح بهالشي و اصلا المحكمة ما توقف مع البنات اللي يطلعون من شور اهلهم مهما كانت الظروف
حلتتقرب من امها و تسمع كلامها حتى لو تذل روحها حقها ميخالف اسمها امها و لا تعاند ترا مو كل شي ينقال حقج صح يمكن البنت تعاند امها او تطول لسانها ماكو شي من غير سبب
الله يهديها و يهدي اهلها لها و اذا ماكو فايدة لازم تقول حق ابوها يخلونها بحالها و لا يتحرشون فيها لحد ما تتزوج