تقبلين تكونيين الثالثة؟؟؟؟؟ مشاركتكم تهمني

[mahawe]

السلام عليكم يابنوتات ياحلوين من زمان مو كاتبة موضوع

بس عندي أنسانة عزيزة علي وبغيت أخذ رايكم بصراحة وصدق وأمـــــــــــــــــــانة

أهية صغيرة بالعمر والحياة جدامها تقدم لها شخص أهوة شاريها ويبيها وين المشكلة المشكلة
أنة متزوج مو وحدة ثنتين وعندة كوكش ياهال ويبي يتزوج الثالثة وغير هذا أهوه كبير في العمر يعني في فرق تقريبا 15 سنة وأهية لو ماتهمني ماخذيت رايكم لأني تعبت وأنا أحاول أقنعها بس تقولي أن هذا مايعتبر عيب فية أذا أخلاقة زينة

بترك المايك لكم وأبيكم تعطوني رايكم لأن يمكن أقدر أغير رايها

بنات أبي حوار وحل هادف من غير تجريح :rerrerek::rerrerek::rerrerek::rerrerek:

 

[الرحيق]

السلام عليكم ورحمة الله وبركاته


أولا خل تستخير مو مره ولا مرتين ولا ثلاث اتم تستخير لين ماربي يكتب لها اللي مقدر عليها ..
ثانيا اهي شتشوف في نفسها لها مقدرة انها تتحمل يعني معدل الغيره عندها اذا عالي تستريح في بيتها ولا تفتح على عمرها باب ..
ثالثا اهو ليش يبي يتزوج شنو السبب؟
رابعا اهلها شنو موقفهم ..
خامسا اسالت عنه عرفت عنه كل صغيرة وكبيرة ...
هذي الامور لازم تعرفها قبل لا تقدم على أي خطوة ..

 

[عبير العنزي]

طبعا الشي الاهم واللي كلنا مانختلف فيه ومتفقين عليه

ان تعدد الزوجات حلال

انا طبعا عن نفسي مااوافق

لكن اللي تكلمتي عنهم مانعرف ظروفهم

ولا انعرف شنو الاسباب اللي تدفعها انها توافق بزواج مثل هذا

وطبعا اذا عرف السبب بطل العجب

يعني لو قايله انها كبيره بالعمر وفرص الزواج قلّت بالنسبه لها

نقول فيها مجال

اشوفها صعبه

وخليها تستخير

 

[:: Diva ::]

شنو حادني .؟!


الزوجه الثالثه يعني بالاسم بس
و الي اخذ الثالثه ما يرده عن الرابعه
و منو بيعدل بين ثنتين فما بالج بين ثلاث


حقها ضايع من الحين
و مبينه مستقبل العلاقه من الحين

نصحيها يا اختي
حرام عليها شبابها و مستقبلها

 

[mahawe]

مشكورين الي ردو
والله أنا نصحتها بس أهية مو شايفة أن هذا شي غلط بلعكس قاعد أتقول على الاقل يومين مايشوفنس وايني مشتاق طبعا هالحجي ماخوذ خيرة بس المشكلة أن الريال عنده بيتين وغير جذي كوكش ياهال والي عرفتة أن أهوهة أخلاقة زينة وأهو قايل أن أنا راح أعدل بينهم بس الي ينرفز أن أهو يبي وحدة تشتغل على قولتة خايف أن الفلوس تنقصو ومايقدر يوفر لها شي أحس بس يبي زواج وناسة وبس وهذا غير أن ممكن يرفض أن تييب عيال ايش أن أهوة عندة وطبعا من الاسباب الي عشانها بيتزوج أن الريال عندة قدرة جنسية والثنتين مو موفينة حقة.

 

[واي بفضفض]

اذا صغيرة شالله حادها الثانيه اوكي بس الثالثه لا

 

[دنيه سعوديه]

بالعربي يبيها بنت ليل وسوري ع هالعباره بس واحد بياخذ وحده صغيره وعنده غيرها ثنتين اذن الخلل فيه لو صادق يبي يعدل حريمه ويشوف وش يبون ويعطيهم عشان يعطونه ويريحونه لان مافيه اخذ بدون عطااااااااااء وصديقتك انصحيها العمر مره وحده فلا تضيعه وتتحرى المصداقيه من هذا الزوج

 

[عيش و مرق]

شتبين فى يالله ياركض على عياله بين جمعيه وطبيب ومدارس موفاضيلج وكبر ابوج 15 سنه عمر مو شويه

 

[حبيبه العلي]

اسمحيلي بس اتوقع زواجها فاشل بجميع المقاييس وباين من البدايه

1- كبير بالعمر واكيد تفكيرهم يختلف ممكن نتغاضى عن العمر
2- يبي وحده تشتغل يعني تشيل مصروفها واضح من الطلب
3- تقولين يمكن مايبي اطفال اجل ليش تضيع عمرها معاه الحب مو كفايه
4- يعني بس تخلص قدرته الجنسيه وين تروح
5-تكون محرومه من ابسط حق لها انها تشوفه كل يوم وتعيش حياة طبيعيه

نصيحه خليها تسأل ناس عاشت الدور وبعدها تقرر ولا تاخذها الاحلام الورديه وتضيع نفسها
ولازم تستخير

لو انا مكانها مع اني كبيره 35 وارمله ولا حتى افكر مجرد تفكير فيه وليش ما اعيش حياتي

بالطول والعرض وخاصه انها صغيره

 

[المرتاحة]

هذي رفيجتج بتضييع مستقبلها من الحين

ليش يعني تقط نفسها هالقطه

لهدرجه مسترخصه عمرها علشان ريال؟!!

شوفي حبيبتي هذا انا عمري الحين 33 سنه و مو متزوجه بس والله لو اكون بمكان رفيجتج على طول راح ارفض بدون تردد و بدون تفكير

يعني لهدرجه ميته على الزواج

 

[اللولو97]

يمكن تحب الاكشنات رفيجيتج الله يعينها


الثااااالثه ! الناس اطباع !

 

[عالمي انا غير]

كل شئ قسمه ونصيب والوحده فينا ماتعرف وين الخير لها فأحسن شئ تستخير


ماادري شقول بصراحه ومايندرى عن ظروفها

 

[kookiz]

الثالثه يعني احتمال رابعه وبعدين اهي صغيره وبتواجهه مشااااااكل وااااايد سواء مع زوجاته واولاده نصيييييييييييييييييييييييييييحه لا تتزوج رح تندم وااااااااايد

 

[أنثى اليمامة]

انا استحقر الرجل الي يتزوج إمرآة بس عشان انها تشتغل ، انا لو تزوجت رح اخلي ببالي زوجي فكره اني رح اوقف عن العمل ، اكره الرجل البخيل والي ما عنده شهامه ، خصوصاً بسالفه الفلوس .. بالنسبة لي الرجل البخيل مو رجل والي يطالع لفلس زوجته مو رجل ، حلو ان المرآه تساعد الرجل ومشاركه بينهم اما انه يتزوجها لانها تصرف على نفسها .. هذي لا ومليون لا

اسمحيلي صديقتج غبية ، وغبية بدرجة كبيره الرجل يبيها لمتعته وبس ، رجل مزواج ، حتى ما يبي يصرف عليها ولا يدللها ، اول مره اشوف جذي يعني العاده الي يتزوج صغيره يدللها ويعيشها عيشة حلوه .. اهي صديقتج فيها شي ،؟؟؟؟؟

يعني قاطه نفسها لرجل ببلاش يتمتع فيها وهي تصرف علي روحها وتسنع نفسها من مالها عشان متعته ولا محترمها ولا محترم انسانيتها ولا انوثتها .. مفكر فيها جسد وبس .. ياااه هالكثر ما عندها كرامه ... ومسترخصه نفسها وبعدين انتي اشعليج منها ليش شايله همها اذا هي رخيصه عند نفسها ، بصراحه لا تنقهرين عليها ولا تفكرين فيها ... حرام تفكرين فيها .. والله انتي انسانه طيبه وقلبج ابيض الحين هي راخصه بحالها وانتي تفكرين فيها ..

 

[منو انت]

وجودي بحياته راح يكون علشان الفراش وبس يعني لو لاسمح الله ماقدرت اسوي هالشي معاه فتره راح يتزوج علي هذا اذا ماحذفني بالشارع وبالذات ان مابينا عيال حزتها راح يكون وضعي على كف عفريت ليش تقبل على نفسه هالشي والله ماانصحها عيشه العزوبيه ولا زيجه رديه خل تفكر بدال المره الف يعني اهو يبيها باليوم اللي يكون عندها لابسه وكاشخه وبس وعقب مايخلص ياانه يلف راسه وينام ياانه يطلع وين حياتها اهي وين وجودها بعد تبي زوج تطلع معاه تسافر معاه تاكل معاه تشرب معاه تسولف معاه بالله هذا من وين راح يجيب وقت حق كل هذا

الحياه راح تكون صعبه حييل والله يعينها

 

[روانتي 12]

اذا انتي خايفه عليهاا قولي لهاا تزوج مرتين و انتي ثالثه شتنطرين لا اخذج بيتزوج عليج رابعه و تنقهرين و شتبين في واحد

كبير بالعمر مايمدي اعيااالج يشووفونه

و ان شاءالله ترفض

 

[بصْمةُ ضِيَاءْ]

ما انصحها كلللللللش

 

[> Miss M6ereiah <]

لا لا لاااااااااااااا :eh_s(4):
ليش جذيه شناقصها تاخذ واحد كبر ابوها ؟؟ ويتشرط بعد ؟؟ :bbbiu:
لا ما يبيلها تفكر اللي ماخذ ثنتين ومفكر بالثالثة مو بعيد بعد جم شهر يحط على راسهم الرابعة ..
انا مع اختي انثى اليمامة بكل كلمة قالتها :ggdw:
يعني قلنا المرة تشارك زوجها بالمصاريف وتساعده بس مو كل شي على راسها عاد :eh_s(10):

 

[شذى2007]

اكيــــــــــــــــد ماقبل كل واحد وجهه نظره

 

[الزين 85]

مهما كانت الظروف مايخليها ترخص نفسها صج على سنة الله ورسولة بس بتكون مهشمة بلا حقوق شاللي جابرها تعيش هالموقف وحرام تنتقم من نفسها بالزواج هذا قولي لها كل شي قسمة ونصيب بس مو معناته اقط نفسي بالتهلكة وتوها صغيره جدامهااااا خيارات كثيره لا يغرها جنسية وكويتي حياتي اذا زوجاته كويتيات وتزوج عليهم يعني اللي مارحم بالأول مايرحم تالي وخل تفكر عدل مدل وصدقيني ربي بعوضها بخير بس حرام تقط عمرها هالقطة