تقبلتي زوجك او ماتقبلتيه

[فديت حلاتي]

سلام عليكم

شلووونكم

بنات انا زواجي قريب ان شاء الله بس للحين ماحس اني متقبله زوجي وماحس اني احبه

وخايفه استمر على هالحال لبعد الزواج

بنات منو كانت مثلي ؟ وهل حبيتيه وتقبلتيه بعد الزواج او للحين ماتغيرت مشاعرك اتجاه ؟

وياليت تفيدونا بخبرتكم :eh_s(17):

 

[شادن33]

لاتخافين مع العشره بتتقبلينه خصوصا اذا كان طيب

الله يسهل امورج

 

[اذوب بكلامه]

حبيبتي أكيد ما راح تحبينه الحين وخصوصا إذا كانت فتره الخطوبه قصيره
بعد الزواج ان شاء الله بتحبينه ويحبك
ادعي ربك دايما انه يخلي بينكم القبول والراحه النفسيه من اول ليله

 

[زوجة عزيز]

اهم شي تكونين متقبلته من البدايه ويمكن بعد الزواج يتغير الحال ماتدرين !!

 

[راقية بذوقها]

مدري حبيبتي على حسب طول الملكة اذا كانت قصيرة اكيد ماراح تحبينه انا صار لي الحين 8 شهور بملكة وحبيته الحمدلله بس مو بسرعه حبيته بعد 5 شهور عرفت اني احبه الحب مايجي بالسهولة وخاصة للحين ماعاشرتيه لا تحاتين صدقيني لتزوجتي وعاشرتيه بعد العرس بتتقربين منه وبتحبينه اكيد ربي يوفقك بس ادعي دايما ان الله يالف مابينكم

 

[Smchoocha]

اي بعد الزواج راح تحبينه و العشره

 

[دلال و غلا]

الحب يجي بعد الزواج و مع العشره

 

[Gatwa DaloO3a]

لا بصراحه القبول والراحه تجي من البدايه .. لو ماجات عمرها ما بتجي بعدين ..

يمكن بعد الزواج يصير في الفه ، محبه ، احترام ... لكنننن عششق ؟؟ صعب ..

انتي بداخلك مو مقتنعه في جزء من شخصيته و تحسين انه هو في وادي و انتي في وادي صح ؟

وهالشي حتى لو تغير بعدين ماراح يروح احساسك لانه ماجا من البدايه ،، باختصار زوجك ما جذبك ..

وهالشي بيأثر عالعلاقه الجنسيه ...لو ما تقبلتيه ك شخص مارراح تقدرين تتقبلينه بالفراش ...

القبول مسأله مهمه مهمه مهمه من البدايه ، لو فيك شي ينغزك بقلبك وتحسين انك ماتقدرين تكملين معاه لا تطنشين احساسك

لو انتي تبين تعشقين شخص كوني صريحه مع نفسك و لا تبررين له شي ، لا تقولين بس هو طيب ، بس هو حلو بس هو وظيفته زينه

حبيبتي ... لو ما تقبلتي شخصيته ماراح تعشقينه لو انشالله معيشك ملكه ... ولو عشقتي شخص بترضين تعيشين معاه في عشه

بس لو انتي قابله في انك تعيشين عيشة محبه عاديه من باب انه ززوجك و احترام مو اكثر ،، فاااا مو مشكله

تراااا المحبه والقبول من الله ، مو مجبوره تعيشين في مجاملات وبالنهايه تتعبين نفسيا


كوني صريحه مع نفسك ، شوفي انتي ايش اللي مو متقبلته فيه ؟ وايش اللي تمنيتيه يكون موجود فيه وماهو موجود ؟ و قدري الامور هل انتي قادره انك تتعايشين مع شخصيته ؟ او ما تقدرين وقاعده تتجاهلين هالشعور ،،

خلي كل شي وااااضح عشان ترتاحين ..

اللي ايده بالماي مو زي اللي ايده بالنار ، محد يشوف الامور ويحس فيها غيرك ..لاتاخذين راي احد في مشاعرك

 

[بشورة الحلوة]

انا حبيته بفتره الملجه لان كان يتمني عرسنا يجئ يسرعه ولمن جاااااا ما احس شوووقه ولهفته نفس ايام ملجتي وطالعتنااااا سبحان الله تغيررررر كل شي بعد زواج فا انا عن نفسي حبيته باايااااااام الملجه بس

 

[غلايو]

اختي شي طبيعي تحسين بهالشعور

ليش؟

لانج مومتعوده على انج تعاشرين ريال وتهتمين فيه و ف اكله ولبسه وتحاتين كيف تسعدينه ف هذا كله يحسسج بالضغط انج مومتقبله هالفكره


انا خذت ريلي عن حب و ضحينا و قدمنا تنازلات عشان ناخذ بعض
بس اول ايام الزواج كنت احس اني مومتقبلتنه ولا كأنه هو حبيبي وهو الي ضحيت عشانه

لكن كلها كم شهر و صارت حياتنا احلى عن قبل

و للعلم ترى الريال يحس بهالشي لان زوجي بعدين قالي ان حتى اهو كانت حياته متغيره عليه و مو حاس بفرحه العرس نفس الي اهو راسمنها ف باله

ف شي عادي

 

[بنك بااستا]

ليش بيتزوجينه بدون قنااعه ولابس برستيج سويت عرس وتزوجت

 

[امـل لاينتهي]

مستحيل اخذ واحد مومتقبلته من البداية ! شلون صبرتي هالفترة وانتي مومتقبلته !

 

[sh_mashael]

الحين انتي ملچتي!!

يعني خلاص المفروض تأقلمين نفسچ إنچ تحبينه

شوفي مميزاته و تغاضي عن عيوبه

و الله يوفقچ

 

[توتة UAE]

انا تزوجت زواج تقليدي ف بداية الملجة موووووول
ماااا حسيت بالحب تجاهه لكن كنت متقبلتنه يعني
مشاعري كانت عادية تجاهه . . عادي هذا
بيكون زوجي . . لكن كلامه وطريقته معاملته لي
خلتني اعجب فيه وعقب حبيته، وعشت الحب وياه :$

حبيبتي انتي مب متعوده تتعاملين ويا ريال غريب
هالشي يديد عليج والحب ايي ويا العشرة . .
إذا ريلج زين وما عليه كلام خلاص لا تحاتين الحب
بتحبينه مع الايام ان شا الله وبتعيشين السعادة

مثل ما قالوا اللي فوق انتي أدرى بوضعج، نحن
قلنا آرائنا وانتي شوفي الموضوع وقرري . .

اذكري ربج كل يوم واقري قران بتتيسر أمورج
ان شا الله 3>

 

[سماء الاحساء]

شوفي السبب ليش مؤ متقبلته استخيري ان كنتي محتاره وان شالله مع الايام وبعد الزواج كل شئ يسير تمام والله يوفقك ويسهل دربج

 

[روان المطيري]

اكيد مع العشره والاحترام المتبادل بينكم واذا اهو كان طيب ومتفهم بتحبينه

 

[Roozlin]

استخيري والحب بعد الزواج ...

 

[يجازيك بحبك]

أختي لا تفكرين بها لشيء وتخلين للشيطان باب يوسوس فيه
صدقيني الحب مع العشرة واذا شفتيه معاج وأدعي دايم ان الله يحط حبه بقلبج
والله يوفقج ويسهل أمورج وتعشقينه وهو بالمثل ....
بتوفيق ....

 

[مناير ...!]

حطي ابالج الزواج مو قائم على الحب
وحتى بالقران ربي قاله
الزواج موده وألفه

 

[amami al-kuwai]

انا ماكنت متقبلته مع انه كان يزورني ويقعد معاي ويسولف معاي

وقلت لوحده من رفيجاتي ان مابي اكمل بهالزةاج مو حاسه اني متقبلته وقالت لي تعوذي من الشيطان وشوغي شلون ماراح تتحملين غيابه

وفعلاً الحين اموت فيه واحبه