تــبيــن الاجــر تعالي عساه بميزان حسناتج يارب

[الغاليه نونو]

السلام عليكم حباااايب قلبي اشلونكم وعسااكم ابخير يااااااارب يتمم علي وعليكم صيام هالشهر المبروك ويتقبل الله صالح اعمالنا ويجعلني وياكم من عتقاء النار بهالشهر الفضيل اللهم آمين


عندي لكم سالفه وهالسالفه حق وحده دشت لي بالخاصوقالت لي قصتها من طأطأ لي سلامون عليكوم والبنت معروفه ونختني واطلبت مني احط مشكلتها وتبي مشاركاتكم بمساعدتها بالحل والدعاء الصالح وادري فيكم منتو مقصرين ان شاء الله اللي يطلع بيدكم قولوه خصوصا ان الكلمه الطيبه صدقه وانتو قدها



شوفووووا يمه هالبنت تقول انها متزوجه واحد عن حب وعندها منه بنت وولد الله يحفظهم واهيا تموت علي ريلها ولاهي مقصره بشي معاه واهو بعد يبادلها الحب وحياتهم مستقره لابعد الحدود تقول من كثر مانحب بعض كل ليله قبل ماتغفي عينا واحنا عالفراش نطرش حق بعض مسجات تصبحين وتصبح علي خير واللي يفز بالليل مثلا تقول يطرش للثاني مسج حب وغرام المهم ان حياتهم مستقره

تقول انن ريلها يعبد بيته وعياله بيتوتي حده ويحب المواجيب ومايخلي عليها قاصر السوق يوديها الطبيب يطير فيها مومخلي عليها قاصر ابد ابببببببد

بس مشكلتها بدت من اول رمضان تقول انقلب حاله فوق تحت بدون سبب صار بوطنقوره ويعصب ويحمق علي اتفه الاسباب ويغلط عليها بدون مقدمات تقول وانا بس ادعيله بقلبي ان الله يمسح قليبه ويبرد عصبيته ومن خوفها عليه تقول وتحلف بالله انها ماتبطل حلجها بحرف لي شافته حمقان ويهاوش عياله بدون سبب تقول وانا اصف وياه واطلعه علي حق جدام عيالي بس لي قعدت معاهم تقول عيالي كبار ويفهمون تقول لهم ميخالف ابوكم وواجبكم انكم تتحملون كل اللي يقوله وادعوله بقلبكم بالخير ولا تتذمرون من تصرفاتي لي صفيت معاه حتي واهو غلطان


المهم تقول اللي ذابحني اني ماادري اشفيه ولا ادري شاللي قلب راسه مع انه مايطلع الا مع معاها وتلفوناته بالبيت مقطوطين جدامها يعني ماتشك باخلاقه ابد اببببببببببد وكل ماحاولت تقعد معاه لي شافته شوي مرتاح وقربت يمه يكش منها ويحمق عليها وتقول يا ماماعوده والله ماني من بنات هاليومين اللي يبون النجره والصيحه انا ريلي شاريته ومعذبني اني موقادره اعرف اشفيه لانه موعوايده تقول ماخذ اجازه برمضان علشان يتعبد ومصحفه مايطيح من ايده ولاهو راعي دوانيات ولا سفرات ولا خرابيط الشباب اللي يهبون فيهم وعمره تقول 38 سنه

تقول طرشت له مسجات مارد علي ولا ياب طاريهم تقول كتبت له رساله لقيته شاقها وقاطها بسلة الخمام بالغرفه تقول ادق عليه وانا بغرفتي تقول يصك الخط بويهي ومايرد تقول بالبيت طلبت منه انه يعطيني خمس دقايق من وقته تبي تتفاهم معاه يقول لها ماني فاضيلج ويهاوشها

تقول لا تقولون اهله السبب لانه امه خالتها اخت امها وريلها عمها اخو ابوها عرفتوا صلة القرابه ؟؟؟؟؟؟
تقول واهلي واهله مايدرون ولا ابيهم يدرون بهالسالفه لاني ماطلع اسرار بيتي بره

قلت لها روحي معاه العمره يمكن يطخ قالت لي انه مايقدر يروح العمره لانه يشتغل بمكان حساس ويمكن ينادونه باي وقت لازم يكون مستعد
قلت لها كلميه قبل النوم ساحليه واخذى مايخاطره تقول ماقدرت سويت هالسالفه وفشلت هاوشني وقال لي ماني فاضيلج

موفاضي لا ليل ولا نهار
ودوم حمقان ومعصب عليها وعلي عيالها
ومن بدا رمضان تقول دمعتي مانشفت عليه خايفه عليه وخايفه منه بنفس الوقت وخوفي علي عيالي اكبر

سألتها عن خدامتهم شنو جنسيتها قالت لي ماعندي خدامه انا اللي قايمه بالبيت

نصحتها بالقرآن تقول والله ياا يمه انا ملتزمه حيل وصديقاتي داعيات وريلي ملتزم حتي تلفزيون ماعندي بالبيت

انا بيني وبينكم بجيت علي حالتها ودعيت ربي يسخر لها ريلها ويرده لها ويزيد حبها بقلبه ويخليه مثل مجري الدم بشريانه

استأذنتها احط قصتها منها تشورون عليها بالكلام الطيب والا تدعون لها بهاالشهر الفضيل وبالحالتين لكم الاجر بإذن الله

 

[الغاليه نونو]

نسيت اقول لكم يمه البنت معاكم تقرا وتشوف ردودكم اللهم بلغت اللهم فاشهد

 

[خذاني الشوق]

والله يمه ماكو الا تشغل سورة البقره بالبيت 24 ساعه ماتدري يمكن عين صايبتهم ولانفس وتمسح شقتها بماي مقري تستمر عليها وتدعي ربها بالقيام والتراويح وحنا بشهر الخير وعسي الله يفرحها بردته لها

 

[صديقتك ياليل]

رد : تــبيــن الاجــر تعالي عساه بميزان حسناتج يارب

انصحها بالرقيه الشرعيه تشغلها باليت والله تنفعها وخصوصن رقيه الزامل حطيها بجهازج او نقالج وشغليها بالبت وانشالله ربي يسهلها ادعيلي بالزوج الصالح

 

[أبله كويتيه]

لا حول ولا وة الا بالله

والله انا اقول عين ماتصلي عالنبي

والعين مذكوره بالقران

واعتقد اعتقد انها كانت تسولف حق احد من اهلها ولا رفيجاتها عن طبعها اهي وريلها وشيسوون

مو معقوله ماتسولف لاحد

الحين الاخت تحسد فما بالج الصديقه ولا بنت العم
لاتسولفون يابنات وديروا بالكم

وخل تراقب ريلها ترا بنات الحرام شكثرهم بالديره حسبي الله ونعم الوكيل

وخل تشغل قران

 

[بشور]

والله يمه ماكو الا تشغل سورة البقره بالبيت 24 ساعه ماتدري يمكن عين صايبتهم ولانفس وتمسح شقتها بماي مقري تستمر عليها وتدعي ربها بالقيام والتراويح وحنا بشهر الخير وعسي الله يفرحها بردته لها

آنا رايي من راي اختي وفوق هذا خل تستغفر وايد بنيه ان الله يهديه لها .. والله يهديه ويردون مثل اول واحسن يارب

 

[غزلاان]

الله وحده أعلم عن السبب
بس الأكيد انه سبب قوي ومصيري
أول شي تدعيله ان الله يفرج همه وهمها ويسخره لها تسخير العبد لسيده و وتحاول تستغفر باليوم مية مرة وأكثر وإذا ألف أحسن بعد وتتصدق بنية ان الله يرد زوجها لها ردا جميلا وتقول إنا لله وانا إليه راجعون/وأفوض أمري إلى الله ان الله بصير بالعباد/حسبي الله لا إله الا هو عليه توكلت وهو رب العرش العظيم سبع مرات/لا إله إلا الله ولاحول ولاقوة إلا بالله ولا منجى من الله إلا إليه سبع مرات /وخلها تخليه على راحته وإن شاء الله اهو بنفسه بيجيها ويشكيلها وعسى الله يرده لها ردا جميلا يارب ويكشف عنهم السوء

 

[بشوشه]

تدرين ان صارت هذي الحاله مع زوجي من 4 سنين و ظل ساكت شهر
و بعدها اكتشفت ان وساااااااااااااااااااااااااااوس الشيطان في راسه و انه يشك فيني بدون سبب؟؟؟؟؟؟؟؟؟؟؟؟؟؟؟؟؟؟؟؟
و ان اعترفلي ان في راسه افكار عني و انه من كثر ما يسمع من ربعه ما قام يصدق بالبنات و لا يوثق باحد
وصلت مشكلتنا لفووووووووووووووق ما تتصورين و ضلينا على هالحاله 3 الى 4 اشهر لو يشوف صورت وحده بالموبايل او النت يقول تشابهج ؟؟؟؟؟ يعني قصده انا ؟؟؟؟؟؟؟؟؟؟ تخيلي ؟؟؟؟؟؟يعني حاط في راسه اشياء واااااااااااااايد تجرح
خليته و حقرته و كملت حياتي
شنو سويت عقب ما حنيت عليه و جربت كل طرق اللي ترضيه و تنضف ظنونه و ما فاد
1- القران وخصوصا بالفجر
2- الدعاء لانج مظلومه ربي بينصرج
3 حقريه لا تحنين راح يطخ بروحه
4- لا تبخلين عليه بشي تنقصيله وداريه مدارات بس و انتي سااااااااااااااااااااااااكته لا تهذرين على راسه شفيك ؟ متغير ؟زعلان

 

[الغاليه نونو]

جزاكم الله خير يمه ماقصرتوا فديتكم


تقول البنت اهيا ملتزمه حيل والرقيه والقرآن علي طوول مشغلتهم بالبيت واللي فهمته من كلامها ان ريلها ماعنده خرابيط والخير اللي فيه واصل السعوديه ربعه مشايخ كبار والكل يشهد له بالتقوي والصلاح

بيئتهم دينيه بحته وماتشك فيه كلش كلش شتسوي بهالحاله؟؟

 

[بشوشه]

سوري نسيت اقول شي
بالنهايه مع السوالف اكتشفت ان اقرب الناس له حاسديني عليه يقولون يطلعها و يشتريلها و الحمدالله عندي عيال و هم ما عندهم يعني العين حق

 

[بشوشه]

مرات الريال تصادفه مشكله بالشغل و ما يحب يحرج نفسه جدام مرته انا مره شفت ريلي وااااااااااااااااايد معصب كم يوم و لعبت بتلفونه و لا الاقي مسجات من لابعه اللي بالدوام يضغطونه و يتطنزون على سالفه صايره بالدوام فعرفت انه كان مار بموقف محرج بالدوام و موقف ما يحب الريال يشتكي حق مرته على شان ما تنهز صورته جدامها يعني حطي كل الاحتمالات يمكن في حياته الخاصه شي و ما يحب يفضفض انتي لازم تفهمين شغله
صج ان الزواج مشاركه و انتي و اهو واحد بس ترى يضل انسانه بذاته له شخصيته و لا اسراره اللي ملكه

 

[بشوشه]

لابعه =ربعه

 

[الشيخه ام شيخه]

رد : تــبيــن الاجــر تعالي عساه بميزان حسناتج يارب

انصحها تدخل اليوتيوب و تحط اسم الشيخ سالم القطيبي في خانة البحث وراح تلقى تسجيل لرقية العين و الحسد خل تنزلها بجهازها و تشغلها في البيت وتسمعها بتمعن

تكرر الرقية عالأقل 3 مرات باليوم

الصبح

قبل المغرب بنص ساعة

بالليل


وان شاء الله ربي يرجع لها زوجها مثل الأول و احسن وان شاء الله ان شاء الله ربي يخليها له و يخليه لها و يخليلهم عيالهم

ويسعدهم و يهنيهم و يبعد عنهم العين و الحسد و كل شر ويبلغهم بعيالهم ان شاء الله اللهم استجب اللهم آمين

انصحها بعد انها تقرا آيات المحبه و تكررها دايما بنية ان الله يحبب زوجها فيها و يرده لها مثل الأول و احسن


طمنونا شيصير معاها وان شاء الله ماراح ننساها بالدعاء

​

 

[معشوقة الكل]

رد : تــبيــن الاجــر تعالي عساه بميزان حسناتج يارب

انا رايي من راي خواتي وتقرا سوره البقره كل يوم وتتسبح بسدر اهي وريلها
والله يرد زوجها لها ردا جميلا ويرجع كما كان وان شاءالله بندعيلها بظهر الغيب

 

[انا مو هني]

رد : تــبيــن الاجــر تعالي عساه بميزان حسناتج يارب

حبيبتي مالج الا انج ترقين نفسج وبيتج وزوجج
ومالج الا الصبر والاستغفار

 

[&لقيت روحي&]

رد : تــبيــن الاجــر تعالي عساه بميزان حسناتج يارب

الله ايهون عليج انشاء الله ويبعد عنكم الحساد ويرد لج مثل اول واحسن مثل ما قالو البنات التزمي برقيه الشرعيه والاستغفار والله ايسر امورج انشاء الله يا الله انك اتهون على المؤمنين والمؤمنات واتريح قلوبهم وخلي املج اكبير بالله وباذن الله بتنحل مشكلتج

 

[@ام ضاري@]

رد : تــبيــن الاجــر تعالي عساه بميزان حسناتج يارب

الله العالم ياقلبي شنو فيهم

العين حق ومذكوره ماتدرين وحده فاطنه لها محتره منها عينها حاره

دام جذي منى والطريج قلب حاله يمكن في شغله صايره له سالفه ومايحب يقولها لمرته

عشان جذي ماخذه فكره السالفه ماندري والله

تكثر من الاستغفار وتشغل البقره يومي وان شاءالله يرد مثل اول واحسن

 

[ضايعة بدنيتي]

رد : تــبيــن الاجــر تعالي عساه بميزان حسناتج يارب

عسى الله يهدي سرهم ويهدي زوجها ويسخره لها ويفرج همه وهمها ويحنن قلبه عليها ويبعد عنهم وساوس الشيطان وعيال الحرام ويحميهم من العين ويسعدهم ويوفقهم ويعينهم على طاااعته وحسن عبادته ...ان شاء الله ازمة وتعدي بإذن لله سبحانه !!

 

[noorq8]

أتوقع والله أعلم ان زوجها مخه مشغول بمشكله اما بدوامه أو مشكلة شخص عزيز يعني خل تهدي الأمور مدام هي ماغلطت بشي وماكو الا العافيه بني آدم دم ولحم وأدناة الدون تكدره لاتلزق فيه خل تفج شوي وان شاء الله بيرجع أحسن من قبل .