تعبت والله

[روعه المزاين]

مرحبا بنات
اقصد مرحبا خواتي
شورو علي شنو اسوي
تعبت والله العظيم صارلي سنه ونص متزوجه وماصار حمل
والي حولي ازعجوني مافي شي ماصارت كذا يقولون تخيلو
مايدرون انه هالشي بيد الله موبيدي:eh_s(11):
وربي يجرحون
وحياتي زوجي يهدي فيني يقول عادي مومستعجلين عادي
بس هو مايسمع الكلام الجارح عرفتو
يارب صبرني وارزقني

 

[المسكـ]

روحـــي عالجي حبيبتي وخلي ايمانج بربج قووي وداومي عالاستغفار والبقره ترا محد يعرف قدر هالايه الا قليل اقري منها ان شالله صفحه باليوم وهالله هالله بالدعاء والصلاة احسن مليون مره من التفكير بكلام الناس
والله يرزقج يااااااااااااارب

 

[**شـوشـو**]

انا نفس حالتج
بس انا اكلت مانع 10 شهور ومن تركته ماحملت
الله يرزقج ويرزق الجميع من واسع رزقه ياااارب​

 

[روعه المزاين]

اختي شوشو الله يرزقنا ويفرح صدورنا

اختي مسك انا الحمدلله مستمره على البقره كل يومين اقرا 20 صفحهوتقريبا حافظتها الحمدلله
صارلي4اشهر واقراهاالحمدلله

 

[نـعـومـه]

الله يهديكم موزين المانع وانتو بجر

صاحبه الموضوع

الله يرزقج بالطفل السليم ويرزق كل وحده

اول شي لاتنسين الدعاء واذا احد زعجج قوليله شفيكم مستعيلين علي خلاص اذا حملت انا راح اقولكم

فعلا الناس تبط الجبد انا ماحملت الا عقب زواجي ب ٦ شهور والناس اذتني هااا ماحملتي ليش انتي ماتبين !!! وفي ناس مرتين تسأل ومره حماتي ها ماكو شي بطريج قلتلها لا وتبرر اييي عادي كا فلانه ماحملت الا بعد ٥ شهور كا فلانه ماحملت الا بعد سنه وانا غلطانه لو قايله مابي احمل بهالوقت احسن عشان اسكتهم
خلاااااص بنحمل راح تعرفون بسكم حنه

وعشان تختصرين الوقت راجعي حق دكتوره شوفي يمكن في مشكله بسيطه تعيق او تعطيج علاج احسلج راجعي سكاتي من الحين لاتنطرين

 

[ام دليار]

راجعي عند دكتور أحسن

 

[noof nasser]

سوي تحاليل انتي وزوجك عشان تطمنون

 

[قطعة ثلج]

ادعي والله ماراح يخيبج اذا انتي صج تيقنتي بالاجابه ولو تسمعين كلام الناس ماراح تخلصين .. الله يرزقج الي تمنينه ويجعله من الذريه الصالحه

 

[جديده 1]

التزمي بالصلاه و اكثري الصدقه و الاستغفار و شوفي توقيعي .

 

[مس عسولة]

حبيبتي روعة الله يرزقج ان شاءالله
الناس ما وراها الا الهم وقصدهم يغثون والله يكفيج شرهم صكي اذونج وبطقاق وزوجج لا تضيقين خلقة لان الحريم ما تخلصون
عليج بشيين
الاول التوكل ع الله واليقين بان كل تاخيره وفيها خيره وقولي الحمد لله في ناس١٥ سنة واكثر اهم شي لا تعبين روحج بالتفكير وعليج بالدعاء والصدقه تجلب الرزق
وثاتيا رجعي انتي وزوجج وخليج مكان واحد يعني عند دكتوره وحده عساس التحاليل تكون كامله وانصحج تروحين لدكتوره ماجده لانها بتاخر الحمل شاطره عن تجربه اختي
وصدقيني روعه والبنات كلكم كلام الحريم مايخلون احد حتي الي عندها ياهل وطولت عليه ما يخلونها بالحجي بس السفهان يقطع المصران والله يرزقج طولت عليكم

 

[شنوووفه]

الله يرزقج حبيبتي الناس مو مخليه احد بحاالها

 

[sharoo_e5]

الله يرزقك يا رب
ويرزق كل محروم من هالنعمة

حبيبتى طلعى صدقات واستغفرى وايد

وروحى لدكتور مدحت الشربيني في بوشهرى كلينك اعتقد


بس وايد شاطر ويعالج حالات تاخر الانجاب او العقم

 

[جمالي خيالي]

نصيحه قبل لاتروحين للدكاتره وتتبهذلين بالتحاليل والاشعه والمواعيد وقط الفلوس سوي هالجم شغله وبتحملين باذن الله

- باول يوم دوره دقي على رداده تمرخج يمكن الرحم عندج مقلوب وانا ارشح لج الرداده ام ناصر وايد بنات حملو عقب ترديدها

- استخدمي خلطه عيون وليد سوي بحث تلقين طريقتها وتجارب البنات وشكثر حملو من عقب ماستخدموها لانها تنظف الرحم وتنشط المبايض

- التزمي الاستغفاااااااااار بكل دقيقه وكل لحظه

- ارقي نفسج وريلج بالقرآن

- لاااااااااا تفكرين بالحمل شيلي فكره الحمل من بالج ترا كثر التفكير ياخر الحمل ... من تطري على بالج فكره الحمل اشغلي نفسج باي شي

 

[ام الحوراء زينب]

عادي اختي كله بأيد الله
انا سنتين ونص ماحملت من بعد اجهاضي
الله يرزقج ويرزق كل محرومه يارب

 

[@ام يوسف@]

الله يرزقج الذريه الصالحه

 

[دآنة آلرشآيده]

الله يرزقج بالله تتمنينهـ يارب
روحي عالجي اختي وان شاء الله تحملين ​