تعبت وأبي أستقيل

[نسمة الجنوب]

السلام عليكم ورحمة الله وبركاته
خواتي حابه أسألكم
أنا معلمة وتعبت من التدريس مو قادره عليه ولا على أي وظيفة ثانية في الوقت الحالي لأن عيالي صغار واسم الله عليهم فوق بعض وبسبة الشغل اهملتهم حيل صحتهم كل مالها في النازل ونفسيتهم حيل تعبانه من هالشغالات الي ما يخافون الله .
قلبت السالفة في مخي يمين يسار ما لقيت حل لكل مشاكلي الا اني أهد وظيفتي في الوقت الحالي ز
بس عندي عدة استفسارات وياليت الي تعرف تفيدني :​

• لو استقلت من وزارة التربية وحبيت أرجع بعد فترة يردوني ولا لا ؟​
• ولو ردوني لوظيفتي اشلون يعاملوني من ناحية الدرجة أنا أللحين معلم (ج) يردوني معلم (ج) والا أصير (د) مثل التعيين الجديد ؟​
• بالنسبة لإجازة رعاية الأسرة فكرت فيها بس قلت مايصير آخذها لأني مو كويتية .بس زوجي كويتي وعيالي كويتيين فما عندكم فكرة اذا أقدر آخذها أو لا ؟​

يا ليت إلي عندها معلومات تفيدني وجزاكم الله خير .​

 

[نسمة الجنوب]

للرفع

 

[ألايانفس......]

والله ماعندي معلومة

رفع لعيونج ,,,

 

[بنات حواء2]

رفع لعيونج

 

[عزتي مالها حد]

انا اللي اعرفه اذا استقلتي وصرتي ادارية بوزارة ثانية
وصارلج سنه عالاستقالة وحبيتي ترجعين للتدريس ، لازم تتمين سنتين من تاريخ الاستقالة + يكون لج اختبار وفيه ٣ محاولات + مقابلة

هذا اللي انا اعرفه

بس ماعندي فكره هل تظلين معلم ج او ينزلونج معلم د ماعندي علم

 

[عزتي مالها حد]

ايه نسيت اضيف لج معلومه
اذا استقلتي وما صار لج سنه ، يعني اقل من سنه
وحبيتي ترجعين للتدريس ترجعين عادي لا اختبار ولا مقابله ولاشي

بس مثل ما انتي عارفه وزارة التربيه كل يوم لها قرار
انا اشوف لو تروحين للوزارة عند صالة المراجعين + قسم التنسيق وتستفسرين منهم عن اخر القرارات بهذا الخصوص
يكون افضل وموفقة

 

[اجياد]

بعون الله البنات يساعدونج

 

[عود وطيب @]

الله يكون بعونج
العاده مواضيع الاستقالة نقراها باااخر شهر 8
مو الحين
بس طالما متاذين عيالج طلعى من التدريس والوظيفه احسن لهم ولج
والله يعينج حبيبتى

 

[ام حنااين]

ضد الاستقالة

استفساراتج بس تروحين ديوان الخدمة بالديرة يفهمونج كل شي ويكون الكلام اكيد

 

[الأميرة جوري]

ليش تستقيلين اختى عيالها علي بعض وفي منهم توأم..بس ترد من الدوام تهتم وتشوفهم وماتغيب عنهم الا 7او8ساعات...ونصهم روضه...فكري عدل قبل الاستقاله وانا ضدها....والله يكتب لج اللي فيه خير

 

[مشغوله و محتاسه]

اذا ماديا قادره عالاستقاله ... استخيري و شوفي الانسب لج ..

و اعتقد العوده .. على نفس الدرجة ..

و طبعا يقبلونج ما يرفضون خاصة اذا تخصصج مطلوب

و اللي اعرفه ان رعاية الاسرة للكويتيات فقط ..


واجوبتنا ما تغني عن السؤال مثل ما قالو البنات


قبلج فكرت انا بالاستقاله ..

و وصلت الى طلب النموذج و عبيته .. بعدين تعوذت من ابليس .. و يت عطلة الصيف و ريحنا فيها و السنين مرت و كاني رئيسة قسم الحمدلله

اذا ما استقلتي ... فكري شلون تنظمين وقتج و تخلصين شغلج بالدوام بحيث لما تردين تتفرغين للعيال

و موفقه

 

[قمر الكويتية]

• لو استقلت من وزارة التربية وحبيت أرجع بعد فترة يردوني ولا لا ؟​

لكويتيات يردونهم ،، بس إلي مو كويتية ماعندي فكرة​

• ولو ردوني لوظيفتي اشلون يعاملوني من ناحية الدرجة أنا أللحين معلم (ج) يردوني معلم (ج) والا أصير (د) مثل التعيين الجديد ؟​
• إلي أعرفه يعاملونك تعيين جديد ،، و تري ماكو فرق وايد بين ج و د​
• يعني لو إنتي مترقيه منيه حسافه لان يلقون الترقية ،، أما معلم ج و د عادي يعني​
• ​
• بالنسبة لإجازة رعاية الأسرة فكرت فيها بس قلت مايصير آخذها لأني مو كويتية .بس زوجي كويتي وعيالي كويتيين فما عندكم فكرة اذا أقدر آخذها أو لا ؟​

لازم تسألين فيها لان أعرف معلمة مصرية عطوها إجازة أمومه لانها متزوجه كويتي ،، لان الأمومه تنعطي علي شهادة الميلاد الطفل و شهادة ميلاد ولدها كويتية

و حتي الأسرية يطلبون منك شهادتين ميلاد لعيالك ،، روحي سألي يمكن يصير نفس الأمومة و هي بدون مرتب ​

 

[PuPa^^SWeeT]

روحي الخدمة المدنية سالي فيها

او وزارة التربية نفسها تعطييج معلوومات اذا تبين

 

[عطر الحروف]

قلبي تقدرين تاخذين رعاية اسرة


انا اعرف وحده سعودية خذت رعاية اسرة سنه


لكن الوظيفه لاتتركينها خصوصا انج مو كويتيه

فاكيد رح تملين من قعدة البيت ومعيشة الكويت غالية فضروري دخل ثاني

والله يوفقج

 

[درة أهل الطولات]

استخيري الاستقاله مو شي هين

 

[نسمة الجنوب]

الله يجزاكم خير جميعا حيييييل فدتوني
أنا في الوقت الحالي أفكر في إجازة رعاية الأسرة حسيت إني مرتاحة لها القرار أهون من الاستقالة بس باقي أروح للوزارة أسألهم
دعواتكم يالغاليات​

 

[أنوار@@]

نصيحة اخت لا تتاخذين قرار في وقت انتي تعبانه لان التعب في هالوقت يخليك تتاخذين قرارات تندمين عليها بسررررعه مشي حالك هاليومين والاسبوع والشهر واتعدي انا صديقتي استقالت وارتاحت شهر شهرين وبعدين ذبحها الفرااااغ ورجعت التدريس بعد اقل من سنه ما استفادت الا التعب في المراجعات الرسميه اذا انتي تعبانه اخذي اجازه بدون راتب وارتاحي وجربي قعدة البيت وقرري بالتوفيق

 

[Melazlaza]

قرارج يتوقف على اختيارين قعدي بينج وبين نفسج وقولي انا شنو اهم عندي بيتي وعيالي ومستقبلهم الي يتوقف على الاهتمام فيهم بالصغر والا التدريس والمجال الوظيفي؟!
وعلى الهامش حاولي تقيمين نفسج هل انتي قنوعة ماديا
والا تبين ماركات وصرف بدون حدود؟!
واذا تبين رايي انا الشخصي اشوف انج تستقيلين ليما يكبرون عيالج ويدشون مدرسة وحزتها بتروحين وظيفتج مرتاحة البال
والله يوفقج