اذا كان البوفيه ل 20-25 شخص فهذه هي الأصناف بالعدد والنوع
2 سخان كبير ( سخان برياني الدجاج- سخان المشويات)
4 سخان صغير كالتالي:
- سخان لازانيا بالبيتزا ( صج عجيبة عبارة عن مكرونة لازانيا بالبيتزا) أو مكرونة باشميل
- سخان محاشي كوسا وملفوف
- سخان معجنات مشكلة وسمبوسة
- سخان كرات البطاط بالدجاج
4 سلطات متنوعة( سلطة الشمندر بالذرة- او سلطة الذرة – أو سلطة الملفوف بالمايونيز – اوفتة بطاط باذنجان أو سلطة تبولة او فتوش)
2 نوع من الحلويات
البيبسي والسفن والماء
طبعا اما تحجزين البوفيه من الحريم اللي يسووون بوفيه أو تطلبين من مطاعم البوفيهات
اهم شي عند طلب البوفيه لا تنسين ما يلي:
- اطلبي بعدد السخانات وليس الاشخاص لان المطاعم اذا قلتي 20 شخص راح يفشلونج جدام ضيوفج ويحضرون سخانات اقل واكل اقل.
- بالنسبة لعدد ونوع السخانات سبق وان ذكرتها .ويمكن تغيير نوع السخانات اذا كنتي مجربة من قبل بس لا تفشلين نفسج وتطلبين صنف جديد مو مجربته من قبل.أو محد امدحه.
- اطلبي البيبسي والسفن واذا تبين عصاير طازجة (فراولة – كوكتيل) لان المشروبات لها سعر بروحها بس طبعا حددي عدد البيبسي والسفن بأكثر من عدد الاشخاص .
- اطلبي صحون الغرف البيضاء بالعدد ويكون اكثر من عدد الضيوف يعني اذا عازمة 20 شخص اطلبي 25 صحن مثلا.
- اطلبي الطاولات والمفارش والصحون لان بعض بوفيهات الحريم يحددون لها سعر اخر ، البعض يحسبها عليج بعشرة دنانير.
- ممكن تطلبين سيرفس خدمة يعني فلبينيات للخدمة وهذي بعد لها سعر خاص ،.بس غالبا يحضرون مع البوفيه فلبينية لترتيب البوفيه وتشغيل السخانات.
- الطلب قبل موعد العزيمة بفترة خاصة من الحريم لان البعض تقول لج انها محجوزة وما تقدر تاخذ طلبات اكثر ،
- احرصي ان تؤكدي على وصول البوفيه قبل موعد العشاء بساعة علشان ما يتأخرون عليج.نقول لو ناوية تتعشون الساعة 9 قولي لهم ابيه الساعة 8 ،لا تخافين ما راح يبرد لان بيشغلون الشموع تحت السخانات.
- أكدي على نظافة المفارش ولونها المناسب.
واذا وصل البوفيه تأكدي مما يلي:
- المفارش مكوية لان بعضهم يحضرونها معفسة وتفشل ، مو مشكلة خلي الخدامة تكويها.
- تأكدي من نظافة الملاعق ( ما ادري ليش ما يهتمون بنظافتها)
- لازم تكونين قبلها فضيتي ثلاجة البيت لوضع الحلويات والسلطات من البوفيه حتى لا تخترب فقد يتأخر بعض الضيوف .
- اشعال الشموع تحت السخانات قبل العشاء بنصف ساعة لان مدة الشمعة اعتقد ساعة ومو زين يتسخن اكثر من هالوقت حتى لا يتغير الطعم،
- اعيدي توزيع وتنسيق السخانات والصحون اذا ما اعجبك تنسيق البوفيه.ممكن اضافة لمسات جمالية باشعال الشموع الملونة والورود وزعيها بأمكان متفرقة على طاولة البوفيه
- اغسلي صحون غرف اضافية وضعيها في المطبخ وذلك للغرف حق الأطفال والخدم ليأكلوا بعيدا عن الضيوف.
والان السؤال الموجه لكم
ما هي السخانات او السلطات او الحلويات اللي جربتوها وكانت مميزة وحلوة سواء من بوفيهات الحريم او المطاعمانا وحدة اخاف احط صنف ما مجربته او احد مدحه من قبل
يعني منو جربت السخانات التالية
ارز اشبنت بالدجاج والكريمة
ارز بشاورما الدجاج بالشعيرية
ارز بالقيمر
الدجاجا المشوي مع الخضار
دجاجا مع الباستا
رولات الباذنجان بالدجاج
الجلاش بالدجاج
دجاج بالكريمة
صينية الدجاج بالبطاط
المسقعة بالباشميل
البطاط بالشيدر
الصاج بالدجاج
البطاط بالنقانق
السلطات منو جربها
السلطة الملغمة
السلطة الصينية
سلطة الشاورما
سلطة الاندومي
سلطة البطاط المقرمش
سلطة الناشوز
باختصار
ما هي السخانات او السلطات او الحلويات اللي جربتوها وكانت مميزة وحلوة سواء من بوفيهات الحريم او المطاعم
التعديل الأخير:
