تعالو قولولي...............زليش تنامون ببيوت اهاليكم؟

[جميله وجذابه]

ما يثير تعجبي بعض الحريم تقول انا انام عند اهلي اسبوعيا اسألها زوجج بالدوام؟ تقول لا انا اروح انام

ليش يا ترى؟ شالسبب الي يخليج تتركين بيت زوجج واتنامين عند اهلج كل اسبوع او في بعضهم بالايام

من وجهة نظري اشوف ان هالشي غلط ان الوحده تترك بيت زوجها واتنام بيت اهلها حتى لو ليله وحده و هالشي يعطي مجال للزوج ان يتعود على الوضع و يمكن يشوفله شوفه بدال مو قاعد وحداني بالبيت

انا وحده من الناس ما احب انام الا فبيتي حتى لو زوجي ماكان موجود (عنده شغل ) انام افبيتي لأن راحتي فبيتي والا شرايكم؟

 

[زوجة الفنان]

انا من رايج
لازم الوحده ماتنام بره بيتها حتى لو عند اهلها بعدين ترى النومه هذي موووووووووضه قديمه كانت ايام امي وخالاتي بس الزمن تغير وكثرت المشاكل

 

[اميرة-الاحجار]

انا ساعات انام مو اسبوعيا بس ساعات يكون مشغول بالبيت ومو فاضي حقي وساعات بيكون ثاني يوم طالع من الصبح لي الليل عشان جذي انام عند اهلي وترى يوم واحد بين كل جم شهر ما يأثرصح بيتي غير بس يظيق خلقي بروحي واستاس ويا خواتي وامي وابوي بالبيت شوي

 

[krkooora]

عدل كلامج ..

غلط تروح تنام و تخلي ريلها .. حق منو تخلينه !

تعودينه على فراقج ليش

بعدين تبجي و تطالب ريلي خاني ريلي سوي ترك فعل

 

[q8hadaya]

مو شرط اسبوعيا
لكن ممكن على حسب الحاجه
ومثل ماقالوا البنات هذى عاده قديمه
ويمكن تخليج عزيزه اكثر عند الريال

 

[توتــــه21]

انا بصراحه ماأييد هالفكره كلشششش احس انها موحلوه الوحده اتهد بيتها كل ويك اند وتنام بيت اهلها الا بظروف مثلا لمن يكون الزوج عنده دوام نظام شفتات او تكون الوحده بالنفاس يعني من هالظروف الاستثنائيه فقط لا غير
شنو المقصد !! وصارت هالايام موضه حتى لمن الخطيب ايي يخطبها هذا الشرط صار ضمن الشروط حمد الله والشكر الله يهديهم

 

[ferdaws]

اي من جد ليش اتنامون بيت اهلكم اذا مافي شي يستدعي ومافي ظرف

انا ماأيد هذي الحركة خصوصا بداية الزواج او اول سنين الزواج

 

[*كلي~أنوثهـ*]

انا الحمدلله مانام بيت اهلي الا وين ووين لان دوام ريلي يطلع بحر باليوم واليومين ف عشان جذي بس

 

[زعلـوه]

انا اختلف مع وجهه نظرج وكل وحده تقول ان المرأه لازم تقعد عند زوجها فتره الاجازة وهذا غلط ياحبيباتي ., أنا أشوف أن هذه الإجازة مفيدة وأنصح فيها على أنها حل ناجح لكثير من المشكلات الزوجية ، كما أنها أسلوب وقائي يمنع تطور المشكلات أو يقل من حدوثها . هذي من ناحيه ومن ناحيه اخرى اشوف ان الاجازة والابتعاد يعطي فرصة لكل من الطرفين لمراجعة نقاط الاختلاف التي تعكر صفو تواصلهما والعمل على حلها بواقعية بعيدة عن التعصب.
ولا تنسين ان اجتماع الزوجين دائماً في مكان واحد أوقاتاً طويلة؛ هذا الأمر يولِّد مشاعر المل والرغبة في الهروب منه ومن الشريك".

 

[(( انفوي ))]

انا اول ايام زواجي كنت انام عند اهلي لان زوجي دخل دورة وما يطلع الا بنهاية الاسبوع فكنت انام بشقتي قبل لا يطلع بيوم بس بعدين لما تخرج لا ما انام عند اهلي الا بالنفاس .

 

[تعويذه الحب]

انا كلش ما ايد فكره الوحده تنام بره بيتهاااااااا لان جذي راح تخلي الزوج يتعود على فراقها

واا بصرااااااحه مستحيل انام بره بيتي حتى لو زعلانه منه ما اطلع من بيتي كلش لان هذا بيتي مملكتي وراحتي فيه

 

[كويتيه مذهله 87]

والله حبيبتي مدام هو راضي وهي راضيه ومافيه مشاكل ابد مايمنع ان تنام بيت ابوها

انا مرات اشتااق حق أمي حبيبتي أنام وريلي يرضي عادي
ويعني الي بسوي خرابيط ما اييله الشيطان الا وانا في بيت ابوووي ؟!
لأ أكيد الي عنده خرابيط يخربط ومايهمه أحد
والريال الي يخاف الله ويخاف علي بيته وحياته الزوجيه لو تهده اسبوع مايخربط

 

[كويتيه مذهله 87]

انا كلش ما ايد فكره الوحده تنام بره بيتهاااااااا لان جذي راح تخلي الزوج يتعود على فراقها
واا بصرااااااحه مستحيل انام بره بيتي حتى لو زعلانه منه ما اطلع من بيتي كلش لان هذا بيتي مملكتي وراحتي فيه

بالعكس
من خلال تجربتي
لمن أرد يشتااااقلي جنه توني متزوجه

 

[kuwaitya_zoGaa]

واى احسها لويه وشقله كل ساعه ساحبه هدومي ؟؟؟ ورايحه بت اهلى ؟؟؟ صعبه
وبعدين مادرى احس بيت الاهل حق النفاس السفر وحق الزعل لوووووووووووووووووووووول
وبعدين احلا ايام ايام الويكند يطلع الريال مع مرته ويغيرون جو ويسهرون مو حلوه مايلاقيها يمه

 

[مشتطـه]

مافيها شي طول الاسبوع مجابلته يت على هاليوم


ومثل ما قالت مذهله 87 الشيطان ما ييله الا وانا إبيت ابوي


بالعكس عشان يشتاق لها وما يمل خل تفج شوي عنه مو 24 ساعه مجابلته


وثاني شي تبي تسهر مع اهلها خواتها تبي ترتاح من الكشخه واللبس هههههههههههههههههههههههه

 

[حب الرّمان]

انا كنت انام عند اهلي لمن ريلي كان عنده دوام وشفتات ’’’ بس ألحين ماقمت انام الابوقت الضرروره وذا كان ريلي دوامه ليل ....

بس احد من اليهال صخن احط كل الادوويه عندي وبس ..... والله انت بيتي اريحه وايد .... سبحانه الله البيت الي نتربى فيه واحنا
صغااار لمن نتزوج مانعرف أنام فيه ..... الله يتمم علينا يارب وعليكم

 

[الأميرة الحزينة]

انا بعد تنبط جبدي من اللي كل اسبوع ببيت اهلهم يعني شحقه متزوجة عيل دام تبين اهلج؟؟ ممكن الوحدة تروح تنام كل جم شهر يوم عشان كسر روتين تغيير ويشتاقلج بس مو كل اسبوع اللي تسوي جذي ماتدري شنو تأثير هالشي على الريال بيصير عادي عنده فراقج.. نفرض لاسمح الله صارت بينكم مشكله ورحتي بيت اهلج توقعين بيتأثر نفس تأثير الريال اللي مرته ما تهد البيت؟ اكيد لأ ومليون لأ واتحدى اللي تقول غير هالكلام لأني مجربتها وشايفتها بوايد ناس واللي تقول غير جذي تكااابر اصلا اهو بيتعود على جذي واذا قعدتي مارحتي بيحسج ثقيله عليه بيقولج ماتبين تروحين؟لأنه تعود ان كل وااحد بصووب والله اكبر غلط يا بنات تهدينه كل اسبوع ترا هالشي ماتحسين فيه الا عقب سويلج قيمه ووجود بحياته انتي زوجته وهالكلام مااايصير .. مشكوورة صاحبة الموضوع

 

[بمبة المفترسة]

خليهم
باجر لا تزوجوا عليهم ولا كلم بنات قالت والله بنات انا مو مقصرة وانا جميلة وفيني وفيني
الريال عنده شهوة عنده رغبة وين يروح تنامين ببيت اهلج اسبوع واسبوعين واحيانا يكون الزوج مو راضي
لاتزوجوا ناموا عند اهاليهم ولاماتزوجوا قالوا بنات ادعوا لنا نتزوج ملينا من بيوت اهالينا
والله الحريم دووخة مدري شيبون

 

[روحي ابوي]

ما يثير تعجبي بعض الحريم تقول انا انام عند اهلي اسبوعيا اسألها زوجج بالدوام؟ تقول لا انا اروح انام

ليش يا ترى؟ شالسبب الي يخليج تتركين بيت زوجج واتنامين عند اهلج كل اسبوع او في بعضهم بالايام

من وجهة نظري اشوف ان هالشي غلط ان الوحده تترك بيت زوجها واتنام بيت اهلها حتى لو ليله وحده و هالشي يعطي مجال للزوج ان يتعود على الوضع و يمكن يشوفله شوفه بدال مو قاعد وحداني بالبيت

انا وحده من الناس ما احب انام الا فبيتي حتى لو زوجي ماكان موجود (عنده شغل ) انام افبيتي لأن راحتي فبيتي والا شرايكم؟

انا معاج حبيبتي وان جنة المرة بيتهاا ..انا عن نفسي لما كنت في بيت حمولتي لا والله ماصدق عالله ايي يوم الخميس وطيرااان لبيت اهلي :dddds: وهذا طبعاً من الضغط طول الاسبوع من مجاملات معاهم ومواجيب غير المشاكل اللي تصير مع الجنه اللي تحوش كل بيت .. بس من يوم ما طلعت بشقة بروحي مابات عند اهلي خير شر لاني لقيت راحتي في بيتي:eh_s(17):

 

[هداوي المطيري]

انا من راي بعد الاهل لهم حقم لازم تقعدين معاهم ...