تعالوا انصحوني ! مابي اخسر ولدي

[اللّہ معي ، ♡]

السلام عليكم


بنات انا شفت تجربة امي مع اخوي كيف كانت قاسيه معه وخسرته

كبر وهو مايحترمها ويتلفظ عليها
وانا خايفه من هالشي

ولدي الحين لعصب يقولي يالكلبه يالخايسه ويسبني

انا شديدة معه نوعا ما

هو عمره 4 سنين بس مو عارفه كيف اتعامل معه بهالحاله اضربه ولا اسكت ؟؟
ولا وش اسوي

احس لضربته بيكرهني ويعاند
لان امي لمى كانت تضربنا كنا نعاند

؟؟ والله محتاره معه خصوصا لعصب مايحس بنفسه

والنقطه الثانيه صاير يلقط اي كلام وصخ يسمعه من الاطفال اللي حوله يتعلمه بسرعه

صعب اني اعزله عن العالم وصعب اني اربي عيال الناس
ولدي مؤدب وحساب والله بس عيبه متعلق بولد عمته واجد و ولد عمته وقح ومتمرد والفاظه وصخه
صاير يحب ولد عمته بجنون حتى اكثر مني يحب يقعد معاه
انا اقول يمكن لان ماعنده اخوان وحيد ؟؟ ومتى بفتك من تعلقه الزايد فيه وشلون افصل بينهم

عجزت والله هم بالقلب لكن الله المستعان

 

[اللّہ معي ، ♡]

ويحب يقلد ولد عمته بكل شي بالرغم انه اكبر منه بكم سنه مو كبره


؟؟ انصحوني يا امهات تعبت نفسيتي !!


كيف اخلي ولدي يطيعني ويداريني ويحب يقعد معاي

هو من يشوف ولد عمته يتغير علي وذاك شخصيته جدا سيئه جالس يكسر شخصيه ولدي يخليه تحته ينفذ كل طلباته و ولدي طيب يسمع كلامه بكل شي
لدرجة يعصيني انا بس عشان يسمع كلامه

والله حالته تحيررر صعب بكم سطر اسرد لكم تفاصيل غريبه تصير لولدي مع هذا الولد الغريب اللي بيدمر شخصية ولدي

والمشكلة انه معانا في البيت ؟؟؟؟؟ الى اين المفر

 

[ظبية بوظبي]

انصحج تاخذين استشاره من المتخصصين روحي اسالي طارق الحبيب في تويتر ..
وهالدكاتره في مواقعهم

 

[Bio_reem]

لا تطقينه
الطق يبلد الاحساس ويخليه شي عادي عنده
مابي اعطيج حل من محي بدون علم، روحي اي استشاري تربوي او نفسي
بنت عمي ودت بنتها لانها تعاند حتى لو كان فيه عواقب وحرمان اقول من اول مره تغيرت

 

[دلولي كويت]

نفس المعاناه مع ولدي الله يهديهم

 

[احلى الاسامي]

الله يصلح ماعطى نفس معاناتي

 

[بحور العنا]

لازم استشارة مختص
والله يسخر لج اولدك يارب

 

[M!SS.LOBY]

الله يحفظه ويهديه

 

[M!SS.LOBY]

اتبعي معاه حل وطرق للتربية من دكاتره مختصين
قبل لا يتمرد

 

[اللّہ معي ، ♡]

مشكورين ، مادري وين اوديه ماعرف مختصين

 

[الـكـاديـي]

لازم استشارة متخصصين تربوي الطق يبلد الاحساس ويسبب العنف

 

[opera]

ولدي اكبر من ولدج بسنه ..

اول شي انتي المفروض ماتقولين اي كلمه غلط جدامه .. وتعلمينه انه هالكلام عيب وانه لسانه يصير لونه اسود لمن يقول هالكلام وكل ما قال كلمه وصخه اخذيه الحمام وغسلي حلجه قوليله لسانك صار وصخ ولازم تنظفه ..

انا استغرب من الامهات اللي عادي عيالها يقولون كلام وصخ وتسكت .. لا تسمحين له ابد انه يتلفظ هالكلام سواء حقج او حق غيرج

ولد عمته جم مره يشوفه بالاسبوع ؟؟ اذا وايد لاتخلينه بس خليه يوم اليمعه يقعد معاه وحتن لو ولد عمته قال هالكلام قوليله عيب جدام امه ختربي ولدها

وولدج صاحبيه خليه مثل رفيجج سولفي معاه طلعي معاه وقبل النوم قعدي على فراشه سولفي عن يومه نو الاشياء الصحوالاشياء الغلط .. حضنيه .. حسسيه بالحب اكثر

مادري انا هالطرق اسويها مع ولدي وماشيه معاه واذا سوا شي غلط اقوله انا زعلانه منك وايي يعتذر ويقولي سوري اخرمره

 

[الغضى]

أوبرا كلامها عدل

 

[اللّہ معي ، ♡]

صدقتي اوبرا بس الوضع صعب عندي احنا في وسط مايتحكم بالفاظه الالفاظ يسمعها من غيري

حتى من اخواني الصغار يسمع الكلام


ماقدر اربي مجتمع كامل ؟؟؟؟!

 

[حرم راشد الماجد]

انا مع اوبرا بكل كلمة واضيف عليها


الياهل لما تتجاهلين الكلمه الغلط اللي يقولها راح يحس انها مالها تأثير عليج او على غيرج فينساها خصوصا بهالعمر خصوصا ان هو بهالعمر يبي يستفزج ويطلعج من طورج عشان تعصبين

اولا حسسيه الكلام اللي يقوله مايخليج تعصبين بس ان راح يأثر عليه هو يا اما تقولين له لسانك يصير وصخ او اي شي ثاني يحسسه ان الشغله هذي ماتأذي احد غيره

ثانيا احسن اسلوب عقاب هو الحرمان

يعني اذا هو متعلق باي باد او اي لعبه ثانيه حرميه من هاللعبه مهما سوا لا تعطينا لين ينتهي العقاب عاد هذا الشي انتي تقدرينه وتتحكمين فيه

واخيرا لا تقارنين عيالج باحد ولا تقيسين تربيتهم باحد وربي عيالج بطريقه صحيحه ولا تخلين احد يأثر عليج

 

[M!SS.LOBY]

الله يعينج

 

[انصاريه قمره]

البنات ما قصروااا الله يجزاهم خير
وانتي لا تخلين ولدج يحتك فيه وايد خليه اغلب الوقت معاج طلعيه رفهي عنه وخليه يبتعد عن ولد عمه وانتي لي شفتي الصبي يغلط لا تسكتين حتى لو جدام امه خل تربي ولدهااا

 

[.. BNT ..]

اليوتيوب مليان نصايح لمشكل سوي سيرش وبتلاقين

 

[miss-jmjm]

حبيبتي انا عيال بنات عمتي كلهم قليلين الادب ليش لان امهاتهم وبيئتهم جذي
الصراحه انا مع اوبرا لاتودينه عندهم وتكلمي جداهم هذا عيب
ونفس ماقالت قوليله غلط وقعدي معاه وتكلمي معاه
موتقولينله غلط وخلاص لا فهمي نصحيه
واذا احد من اهلج مثلا قعد يضحك على كلامه انتي قوليله جدامه لاتضحك هذا موصح هذا غلط عشان اهو يعرف ويشوف ان حتى جدام الناس هذا غلط وتعلمين مجتمع ليش لا مومعناته ان الناس كبار مايتعلمون لا
حاولي انتي تغيرين هالصوره عشان مصلحة ولدج ومصلحه عيالهم راح يطنزون مره ومرتين وعشر بس خلج عند كلمتج انتي لام وانتي الي تربين وتعلمين واهو واجهتج انتي
الناس لما تذم راح تذم فيج مو في العيال

لاتسكتين ابد

 

[ريتااجي]

لاتحطين في بالج يسمع الكلام من برا

حتى لو سمعه بطريقتج تقدرين تخلينه مايتلفظ

انا ربيت طفلي وكان وحيد لين صار عمره 6سنوات

عيال اختي الله يخليهم اي كلمة يلقطوها ويتلفظوها

مع إن الكلمة تنقال قدامهم كلهم بس هوه ماينطقها

ولايتلفظ بألفاظ لإن من هوه صغير فهمته

إن الطفل الجميل اللي يحب ربه مايتلفظ بألفاظ

تغضب ربه والحمد لله عديت مرحلة التلفظ والخوف منها

وإذا ضربج أو صرخ عليج لاتضربيه بس عاقبيه

إحرميه من أي شي يحبه وعلى ولد عمته كلمي أمه أو أخوج

عشان ألفاظ ولدهم لإن ولدج يتأثر به والله يساعدج