تركت بنتي في البيت ويا الشغالة وتعالوا شوفو شو صار !!

[mrs.abk]

السلام عليكم ورحمة الله وبركاته

حبيباتي عضوات كويتيات ..

أنا موب أول وحدة ولا آخر وحدة تترك بنتها عند الشغالة وتروح الدوام ..

خبروني شو أسوي .. مخي افتر .. ماعندي إلا هالحل

بيتي يبعد عن بيت أمي وأم زوجي حوالي نص ساعة .. ومن صوب بيت امي لدوامي أحتاج ساعة إلا ربع .. ( من بيتي لدوامي 20 دقيقة) ..

مافيه حضانات جنب بيتي وزوجي رافض فكرة الحضانة ..

ما أقدر أقعد في بيت أمي وأترك زوجي .. ولا أقدر أقعد في بيت أمه بسبب وجود أخوان زوجي الشباب ولأن بيت خالتي موب مجهز لاستقبال ضيوف يباتون ( يعني م عندهم ملحق ضيوف )


أخذت إجازة طويييييييييييلة .. ومردها انتهت وداومت ..

دوامي طويل ( أنا في الامارات .. دوام 8 ساعات .. يعطوني بس ساعة وحدة رضاعة .. يعني 7 ساعات)

مافيه حضانة حول دوامي ..


بنتي معورة قلبي وقولوني ..

أحس نفسي أرجف من الضيجج عليها ,.


جربت أقعد في بيت أمي وأخليها وأيي الدوام .. أمي تطلع تخلص أشغالها .. والبنت تقعد عند الخدامة .. يعني نفس الموال .. كأنك يا بوزيد ما غزيت


أنا أعرف حالتي صعبة ومالي إلا هالحل وإني استودعها رب العباد .. وكلمت شركة يركبون كاميرات في البيت وخلال هاليومين بركب ..


بس هالموضوع جبر لخاطري وخاطر كل بنت خلت أطفالها الصغار عند الشغالة وراحت الدوام ..

تعالو نسولف عن احوالنا .. عن أي تغييرات نشوفها على عيالنا . . على شوقنا لهم وشوقهم لنا ..


ويارب إنا نستودعك أطفالنا فاحفظهم من كل سوء .. وكن بهم رحيما رؤوفا ..

:yaaaaaarb:

 

[Ranoon]

خرعتيني عبالي صار لها شى ؟؟؟ !

الله يعين صح صعبة شغالة بروحها مع طفل !
لو احد يمها مغير يتابعها زين واشوه ،،

 

[نور دنياه]

عبالي صار فيها شي خرعتينا!! انا مريت بحالتج توتر وتفكير لين ماركبت كاميرات واشوفها من لجوال مباشره صج احسن اختراع . انا مثلج ماقدر اخليهاعند امي لانه امي طول وقتها مسافره عند اخواني يدرسون برى وام زوجي تشتغل يعني اعتمدت على نفسي وكل يوم قبل لاتطلعين امسحي على راس بنتج واستودعيها الله ، انا بنتي تكون نايمه طول وقت شغي وماتقوم الاقبلها بنص ساعه الحمدلله

 

[Aloe Vera]

اشوف دكتورة عيالي علطول حاطة الايباد و تشوف بيتها شنو يصير فيه
خوش نظام بس لازم الخدامة تدري ان فيه كاميرات
و لازم تفهم ان السبب انج تبين تتطمنين علي بنتج و لان تولهين عليها و تبين تشوفينها من دوامج
انا دوامي ٨ ساعات و لمن يصير عمر الياهل سنتين ادخله حضانه
قبلها الياهل يكون مع الخادمة و استودعه ربي الذي لاتضيع ودائعه
والله كريم ماكو غير هالحل

 

[M!SS.LOBY]

الله يعينج

 

[M!SS.LOBY]

ما في ثقة بالشغالة

 

[مريامتي]

اقنعي ريلج بالحضانه والله احسن لج ولها
خليه يروح يشوف المكان عشان يتطمن وشوفي لج حضانه على طريق دوامج حتى لو تبدا قبل دوامج بفتره ان يمديج تنزلينها وتروحين الدوام
كلش ماانصحج تخلينها عن الشغاله
وايد مشاكل وبلاوي على الاقل في الحضانه بتصير اجتماعيه وتعلب ويا اليهال وتقدرين تحاسبينهم على اقل خطا بس الخدامه شلون بتحاسبينها

 

[attoosh]

اهاااا اه من هل السالفه اقسم بالله محد متعبني بهل الدنيا الا هل الموضوع انتي وحده عن الشغاله انا اسم الله عليهم ثلاثه التوام سنتين ونص والصغيره سنه ونص زوجي يطلع من الفجر الساعه 6 يروح دوامه يخلص ثنتين ونص وانا اطلع تسع وارجع ثنتين وانا ساكنه ابيت اهل زوجي وخالتي دايما طالعه وعمي ابو زوجي اكون موجود وساعات يطلع بس هم احاتي اعيالي فوق بشقتي لو صار شي محد دره عنهم كله احاتي قلبي اعورني والحضانات غاليه اقل شي 120 بالشهر لو بدخل ثلاثه جم ادفع وهم بصراحه الحضانات ما اثق فيهم ياما سمعنا بلاوي وانا حاطه خدامتين حق عيالي وادعي ليل ونهار ان هل السنه تمر على خير ويدخلون الروضه وارتاح من هل التعب والله احنا الامهات نعاني

 

[نبض السعاده]

الله يعينج

 

[M!SS.LOBY]

لا حول ولا قوة الا بالله

 

[مشتطـه]

عادي حبيبتي كلنا انا واخواني امي تداوم وكنا عند الخدم ماكو الا العافيه


ترى الدنيا بخير اذا ارتحتي لها نفسيا خلاص لا تحاتين
وانتي مجبورة

ومو كل الشغالات مو زينين

واحسن حل الكاميرا بالنسبة لحالتج

وقنعي زوجج عالحضانه

 

[عاشقة الككاو]

نفس معاناتج بالظبظ خيتي
ربنا يحميهم بعينه التي لا تنام

 

[78MariMar78]

نفس الحاله والله

الله يحمي اولادنا جميعا ويبعد عنهم كل سووووووووووووووووء ياااااااااااااااااااااااااارب

 

[متواضعة]

الحضانه اامن حبيبتي

الله يحفظ عيالكم وعيالنا يارب

 

[queen2020]

عذرا من صاحبة الموضوع
ابغى اعرف لما تركبون كاميرا تعلمون الخادمه ان فيه كاميرا؟

 

[Horror Lady]

لازم تحطين كامرة
الخدم ماكووو اماان منهم هالايام
بس الخدم قاموا يذبحون و يمشون في كامرة او لا
مع ان يدرون شنو مصيرهم و مع هذا عادي عندهم موخايفين
انا افضل تخلين بنتج عند احد من االاهل
عشان مايصير شي لاسمح الله و تندمين و تزعلين
و شكرا

 

[mrs.abk]

خرعتيني عبالي صار لها شى ؟؟؟ !

الله يعين صح صعبة شغالة بروحها مع طفل !
لو احد يمها مغير يتابعها زين واشوه ،،

لا الحمد لله هي بخير .. بس غباء الشغالة متعب .. كثر ما أقولها لا تدخلين البيبي غرفتج بعد تدخلها

 

[mrs.abk]

عبالي صار فيها شي خرعتينا!! انا مريت بحالتج توتر وتفكير لين ماركبت كاميرات واشوفها من لجوال مباشره صج احسن اختراع . انا مثلج ماقدر اخليهاعند امي لانه امي طول وقتها مسافره عند اخواني يدرسون برى وام زوجي تشتغل يعني اعتمدت على نفسي وكل يوم قبل لاتطلعين امسحي على راس بنتج واستودعيها الله ، انا بنتي تكون نايمه طول وقت شغي وماتقوم الاقبلها بنص ساعه الحمدلله

والله يا أختي بعدني ما ركبت الكاميرات .. بس هالمشروع وارد ... حاليا عندي ضيوف بيطولون في القعدة يايين من عمان وهالشيء ريح بالي الحمد لله لأن فيه حد في البيت معاها غير الشغالة .. ربج ما ينسى عباده

 

[mrs.abk]

اشوف دكتورة عيالي علطول حاطة الايباد و تشوف بيتها شنو يصير فيه
خوش نظام بس لازم الخدامة تدري ان فيه كاميرات
و لازم تفهم ان السبب انج تبين تتطمنين علي بنتج و لان تولهين عليها و تبين تشوفينها من دوامج
انا دوامي 8 ساعات و لمن يصير عمر الياهل سنتين ادخله حضانه
قبلها الياهل يكون مع الخادمة و استودعه ربي الذي لاتضيع ودائعه
والله كريم ماكو غير هالحل

زميلتي قالت لي عن هالبرنامج وعلى الشهر الياي ناوية آخذ الايفون اليديد وأشغل فيه هالخدمات

 

[mrs.abk]

ما في ثقة بالشغالة

مافيه اطمئنان وانتي الصادقة ..

أنا حاسة إن قلبها طيب وزينة بس ما أتطمن على غباءها الله لا يبلينا ,, استيعابها ضعيف