ترتيب الخلطات والسنفرات

[الكريستال]

السلام عليكم
بنات اكيد كلكم تستخدمون خلطات صابون وسنفرات وكريمات سباحة وصابون مغربي الخ الخ
انا الحين ببيت اهلي عادي ان يكونون بعلبهم
بس الحين ان شاءالله وراي زواج
مابي زوجي يشوف شكل علبهم كل وحدة شكل مو حلو
ففكرت اشوف لهم علب زجاج ان اخليهم كلهم نفسالشكل عشان يكون تناسق شوي
فاللي تعرف وين القى علب زجاج تنفع للخلطات
وهم ما ابي احط بالاستاند احس الشكل يكون مو حلو
ابي كبت صغير وضعيف يتعلق مثل الصيدلية بس ابي شي راقي ان اصفهم داخله بالحمام
هذي فكرتي حاليا وابيكم تساعدوني من وين اييب هالاشياء عشان اطبقها
وابي كل وحدة تقولي طيقتها بتصفيف الخلطات والسنفرات

 

[غير كل الناس]

تحصلين في الشايع شغلات حلوه مثل الكبت خاص للحمام وشوفي ايكيا تحصلين عندهم كبت صغير من حديد معلق

والعلب من اي سوق شعبي

 

[ناتشوو]

في مثل الكبت كله رفوف ومعدن
ينفع تحطينه بزاوية بالحمام خاصة اذا فيه مساحة
وفوقه تحطين كل علبج مالت الخلطات
وخليهم بلاستيك مو زجاج علشان لو طاحو
العلب بالجمعيات واي سوق قسم ادوات المطبخ اشكال و احجام
واذا تبينه معلق
جيبي نجار يفصل لج مثل الصيدلية الراهية وتكفي العلب
طبعا هذا مو من تجهيزج
عقب العرس روحي مع الحبيب
واشتريه ورتبي فيه
والله يوفقج

 

[عبق البنفسج]

العلب تلقينها بالأسواق الشعبية مثل المعلم الي بحولي بالسرداب تلقين أشكال وأنواع من العلب ..
وبنسبة للكبت روحي ايكيا وان شاء الله تلقين شغلات حلوة

 

[سكر عسل كراميل]

والله انا بعد ابي استفيد

 

[كل الحب]

تلقين حتى بالسراديب ارفف فيهم دروج بلاستيك تقدريت تخشين اغراضج فيهم ومحد يشوفهم

 

[عاشقة الوطن]

اختي بالنسبه حق العلب في محل بالشويخ ورى سوق لندن مخصوص حق العلب عنده بلاستيك وزجاج والاحجام الي تبين والاشكال الي تبين

وعندج بعد في دايسو وبالنسبه حق الصيدليات او على قولتج الكبتات الي نفس الصيدليه عندج الشويخ صوب الادوات الصحيه متروس اشكال حلوه بس نصيحه اذا بتاخذين تكرمين حق الحمام اخذي ستيل احسن شي عشان ما يخترب مع لرطوبه والماي