تجميل أنفي مع الدكتور عبدالكريم فدا ( بالصور )

[جوري ksa]

السلام عليكم .. حياكم بعد هالغيبه وبعد هالانقطاع
حبيت اشاركم تجربتي الحديثه نسبياً مع عملية تجميل الأنف واللي مالها غير اسبوعين ..
يالله لك الحمد والشكر , راضيه عن النتيجه تمام الرضا :yaaaaaarb:
وهذا بفضل ربي أولاً ثم بفضل الدكتور المبدع عبدالكريم فدا , جزاه الله عني كل خير :eh_s(17): ..
العملية ضربت فيها عصفورين بحجر سواء من ناحية صحيه او من ناحية تجميليه ,
لأن كان عندي مشكله بالتنفس وفوق هذا شكل الأنف كان زاعجني ولاعب بنفسيتي ..

تجربتي طويله عريضه كتبتها بالتفصيل بمنتدى الفراشة بقسم الصحة بموضوع ملف تجميل الأنف
" الملف العاشر " بدايه من صفحه 1051 بنك نيم " ام نظره خجوله " ..
لكن بختصرها عليكم واحط لكم مباشره صوره للأنف قبل وبعد , بعد فك الجبيره بيوم واحد
وخلال اسبوعين او ثلاثه راح انزل صور اكثر للأنف , واي سؤال انا حاضره ..

ملاحظة : انا حابه فقط من هالموضوع اذكر تجربتي مع الدكتور واشارك فيها , واعطي رأي شخصي يخص حالتي فقط
لحد ياخذ الموضوع على اساس انه نصيحه مباشره موجهه لكل بنت ناويه تجمل أنفها , القرار مسؤوليتك انتي وحدك ..
ماله داعي بكره تجي وحده تسوي انفها عند نفس الدكتور وما تكون النتيجه على هواها وتعيش الحاله والدور وتقعد تتحسب علي واكون انا في نظرها السبب الرئيسي لفشل عمليتها !! ..
طبعاً انا قلت لكم هالكلام لأني لاحظت وشفت انه فيه بنات فعلاً عندها هالمنطق الغريب العجيب ..
تتحسب على غيرها من البنات اللي لهم تجارب ناجحه مع نفس دكتورها بعكس تجربتها ,
وهم كل ذنبهم انهم شاركوا تجاربهم وحبوا الخير لغيرهم ..
والله يوفق الجميع ويسخر لكم ويختار لكم ولا يخيركم ويكتب لكم اللي فيه خير ..

 

[FANA__3]

ما شاء الله خشمج حيل طالع حلو وطبيعي والدكتور مسوي تغيير جذري بشكل خشمج .. ما شاء الله محترف

وان شاء الله يارب يتمم امورج على خير ويصير خشمج احلى واحلى

سؤال: بالنسبة للدكتور شلي خلاج تسوين عنده وما تسوين عند غيره؟ يعني شنو اللي يميزه عن غيره؟ وممكن تعطينا تفاصيل اكثر عن الدكتور

 

[جوري ksa]

انا تجربتي كلها على بعضها كاتبتها بمنتدى فراشة بس المشكله في الصفحات وكثرتها
خل اقولك ع السريع وبحاول اختصر كيف وصلت للدكتور عبدالكريم فدا
طبعاً انا من اهل الرياض وكانت عيني ع الاسماء المشهوره والمعروفه
وما اخفيك لي ثمان سنين وانا مفكره بالعمليه لكن بديت المراجعات من خمس او ست سنواتت
بداية كانت مع حواري , اللي ما قنعني كثير في كلامه , رغم تجاربه الناجحه مع اخواتي
لكن اكتشفت انه له طريقه وحده في تجميل الأنف يستخدمها مع الكل , انتي وحظك على قولتهم
كان خشمك مناسب لهالطريقه مثل اخواتي يا بختك , واذا كان لا ربي يعوضك
هذا غير انه يخلي العظم نحيف وينحت منه كثير ويخلي الارنبه مثل ما هي , فاللي ارنبتها عريضه مثلي راح تعرض زياده
وكله كوم وتكرار حالات سقوط الارنبه عنده كوم ثاني .. بنظري قمة الفشل دكتور له خبره فوق العشر سنين ومازال يغلط هالغلطه ! ..

ثاني دكتور جمال جمعه , اللي ما كان مختلف مع رأي الحواري بشي غير الرفع ..
ورغم اني قلت له انفي بهالحاله بيكون عريض , اتفق معي وقال نقص الفتحات اذا تبين لكن انا مو مسؤول عن النتيجه
لأن القص يبين الأنف مصطنع ومشغول عليه طبعاً على طول نحشت دام السالفه فيها قص ..

دارت الايام وشفت تجربة بنتين هنا مع الدكتور حمد الجابر , فطرت على طول لقطر وخذت موعد عنده
لكن مشكلتي معه انه اكد لي اني محتاجه قص !! .. رغم شغله النظيف مثل ما شفت بتجربة وحده من البنات هنا
الا اني انا انسانه ضد القص نهائياً .. قلت له الدكاتره يقولون في طريقه ثانيه نلم فيها الفتحات قالي فيه بس ماراح تجيب نتيجه معك ..
الحلو في حمد الجابر انه نبهني بالمشكله الصحيه اللي عندي واللي ما كنت عارفه عنها شيء

رحت لأيمن آل الشيخ بالرياض , اكثر واحد من بعد فدا اقنعني بكلامه
وكنت خلاص بسويها عنده حتى التحاليل عملتها بالرياض لكن سبحان الله ربك ما كتب ..
فيه شيء يخليني اتردد وافكر بعبدالكريم فدا كثير بوقتها .. قلت اخاف ادخل عند ايمن واسويها وبعدين اقول ياليتني رحت لفدا
يا بنت ايمن مو طاير روحي ل عبدالكريم فدا بجده وشوفي وش عنده بعدين قرري , حجزت على جده ..

عبدالكريم فدا جاء بالآخر بما انه جديد بالمجال وماله الا ثلاث سنوات ..
شفت تجربة وحده عنده بمنتدى الفراشة وحبيت شغله , نظيف وما غيرها تغيير جذري , شال العيوب
بعدين سويت عنه سيرش لقيت له بالاكاونت تبعه بتويتر وانستقرام والفيس بوك تجارب قبل وبعد ..
عرفت ان شغله نظيف وان ما غيرك وعدلك وجملك ع الاقل ماراح يشوهك , هذا غير انه رافض موضوع القص نهائياً
وقال انا اصغرها لك بغير طريقه وبصراحه وقتها ما سألته كيف صغرها .. عندي موعد بعد شهر وبسأله بالضبط وش سوا بأنفي
هذا غير انه استشاري بتخصصين , تخصص تجميلي له علاقه بتجميل الانف والوجه وتخصص صحي للأنف والاذن والحنجره
رحت له للعياده ودخلت عنده استشاره وخذت وعطيت معه قلت له الاشياء اللي ابيها واللي ما ابيها وما كتفيت برايه بس
كلمه من عنده كلمه من عندي لحد ما وصلنا لنقطة اتفاق بيني وبينه .. وحبيت انه ما كان يسايسني وياخذني على قد عقلي مثل باقي الدكاتره
الشيء اللي ما يقدر يسويه او ضده يقولك لا انا ضدك بهالنقطه .. حتى كان عندي غظاريف قلت له الدكاتره قالوا بيشيلونها لي , قال احمدي ربك انك ما شلتيها , بس تشيلينها بيصير فيه مشكله بالتنفس ومشكلة بالصوت , قالي اضغطي عليها بنفسك وشوفي وش يصير معك وفعلاً كلامه صحيح ..
قال انا ماراح اشيلها لك انا بس بنعمها شكلياً .. وشفت له كتالوج تجارب عنده صور قبل وبعد شغله نظيف وطبيعي
قالي استخيري وشوفي وش يصير معك ..
رحت لشقتي وطول الليل وانا استخير وادعي .. صارت معي احداث واكشن وحركات هههههه اللي مهتمه ترجع لمنتدى الفراشة
من بكره سبحان الله حسيت اني مرتاحه رحت خلصت اموري وقابلت الدكتور وتناقشنا مره ثانيه وحددنا موعد العمليه والحمدلله سويتها على خير والآن انا بالرياض وراجعه للدكتور بعد شهر من الآن ..

 

[FANA__3]

ما شاء الله عليج الحلو فيج انج قابلتي اكثر من دكتور وما استعيلتي وسويتها عند اي احد

وعجبني بهالدكتور انه من غير ما يقص الجوانب لم الفتحات وصغرها بطريقه محترفه وهالشي اكيد راجع لانه تخصص تجميل بالاضافه لاختصاصه الرئيسي .. مو مثل اغلب دكاتره الانف الثانيين اللي يسوون عمليات تجميل بدون ما يكونون مختصصين بالتجميل

وبعد عجبني سالفة انه يعرف اهمية الغضروف للخشم وانه ما لازم ينشال وعلى قولته المفروض بس يتعدل

 

[جوري ksa]

من على جنب

 

[جوري ksa]

ياليت احد المشرفات تحط هالصوره بدل الصوره الاساسيه اللي ماكله نص الصفحه بحجمها

 

[جوري ksa]

ي بنات الله يرضى عليكم كثير لاحظت فيكم اللي تعدل انفها بالأبر وبالفيلر وبالتدبيس
الدكتور عبدالكريم فدا بتويتر يحذر منها تحذير شديد ..

هذا الاكاونت تبعه بتويتر د . عبدالكريم فدا FacelookDr

حسابه فيه معلومات مفيده عن تجميل الأنف وفيه تجارب له قبل وبعد للي حابه تطلع ..
وفيه تحذير شديد وبالصور كمان من الفيلر للأنف وتأثيره على التغذية الدموية والتشوهات الدائمه اللي تجي من وراه

 

[جوري ksa]

من على جنب كأن الصوره مو طالعه !! .. بنزلها لكم من جديد

 

[فاطمة 25]

ما شاء الله تبارك الله

نتيجه حلوووه .. الله يهنييكي يارب

وفرق عن أول

وإن شاء الله يصير أحلى يارب

 

[الشاذليه]

ماشاء الله تتهني ماعليك امر كلفتك كم العملية

 

[جوري ksa]

اسعار الدكتور حسب ما فهمت من سكرتيرته تبدا من 17 ألف احتمال تزيد او تنقص على حسب الحاله ..
الا اتفاجأ بسعر عمليتي 25 ألف لأن الشغل كان صحي وتجميلي بنفس الوقت , حاولت بالدكتور وآخر شيء سواها لي ب 23 الف ..

 

[افيون]

شغله جميل وتعديله بسيط ارتفاع الانف من فوق كانه نفس قبل مانزل فيه الا شي بسيط والفتحات برضوا ماصغرها كانها نفس اللي قبل ووكبيره


ربي يوفقك وشغله ماهو ذاك الزود حقيقه

 

[جوري ksa]

انا لما دخلت عند الدكتور اول شيء ناقشني فيه العظمه , قلت له دكتور " شخصياً ماعندي اي مشكله لا بالطول ولا بالعظمه " حتى هو استغرب وقتها !! ,
قلت له مشكلتي كلها بتفحات الأنف وبالارنبه , وهذا اللي نحشني من دكاترة الرياض اللي ينحتون الحاجز الانفي ويخلون الارنبه ويكون الانف من جنب مفعوص او مضغوط ومن قدام فارش بدون حاجز , وانا ما احب هالشيء رغم البنات تتهافت عليه هههههههههه ..
وفعلاً ركز على الارنبه والفتحات , وبالعكس الفتحات صغرت كثير ولمها بطريقه مرتبه وصارت ناعمه بعد ما كان شكلها حاد , وكمان الارنبه اللي جالسه تتحدد وتنرسم اكثر ..
اما من على جنب , فمعك حق من جنب الدكتور ما غير شيء كبير غير انه نعم شكل عظمة الانف وقصر طول الفتحات بترجيع الارنبه لورا وهذا بناءاً على طلبي
لأني احب الأنف الطويل ( النجدي ) واللي كأنه منقار واللي العظم والحاجز يكون فيه راهي هههههههههه < < عكس العالم ..
شخصياً راضيه بالنتيجه مية بالمية يالله لك الحمد , لأن صحيح طلباتي مش مثاليه ولا لها علاقه بالأنف المثالي واللي البنات يحلمون فيه هههههههههههههه
لكن انا عارفه ملامحي وعارفه وش يناسبها , وفعلاً توقعاتي في محلها ..
وعموماً الدكتور عبدالكريم بغض النظر عن حالتي , هو ضد التغيير المبالغ فيه وخصوصاً التغيير الجذري واللي يبين تجميل
يعني اللي تدور هالتغيير اكيد الدكتور ما يناسبها , لكن اللي تبي شغل طبيعي ونظيف تحط دكتور عبدالكريم فدا بحساباتها بعد ما تقرر وتستشير وتستخير .. وكل التوفيق لكم

 

[Timmy]

فعلا دكتور رائع الحمدلله ربي وفقني بعمليتي عنده ياربي لك الحمد

 

[فطمطم]

ماشااااااءالله

 

[^عطور^]

الصور مو طالعه بس شفت صور بتويتر وانستجرام العمليات اللي سواها ماشاء الله افكر اسوي عنده
سؤال اللي يجي من الشرقيه بعد مايشوف يسوي العمليه نفس الاسبوع ؟!ولا لازم يعطينا موعد ثاني ونرجع بعد شهر !:bbbiu:

 

[غفوة رحيل]

الحمد الله على سلامتك

لكن الصوره مو طالعه عندي :eh_s(2):

 

[princess.78]

بكم سواها ؟

للاسف ماطلعت الصوره

 

[سور الفرح]

جدا ممتاز شفت صور في الانستغرام معدل عمليات سابقه فاشله بجد فنان شكلي بروح له يليت لو يجي الرياض او الشرقيه

 

[AL-NOR]

الله يسعدك يال جوري ،، والله يتمم لك على خير
ياليت ما تنسينا وتتابعي موضوعك هذا ,, والله حالتنا حاله
ودام ربي وفقك وسخر لك الاسباب والتوفيق ,, لا تنسينا لان لسى ربي ما كتب لنا

عندي اسئله عن العمليه اسئله دقيقه شوي , مو اسئله عامه وممله

وبخصوص الدكتور فدا يا الجوري قد شفتي او سمعتي ذم قبل تسوي العلميه ؟
لان الان اشوف 5 بنات تقريبا يذموا فيه

وباسالك بخصوص الغضاريف بالتحديد ,, حط لك غضروف طبيعي او صناعي ؟ ويستخدم صناعيه ولا لا ؟
لان فيه بنت تقول انه حط لها صناعي والتهب عليها وبتسوي ازاله وترميم ,, الخ
ورفع لك الارنبه ؟ وكيف رفعها ,,


شكرا الله يوفقك ردي علينا وتابعينا لا تنسينا