تجمع لكل زوجه بتسافر مع ريلها عشان يكمل دراسته

[شمعة^الحب]

هااااي بنات
حاسه بتوتر ...بخوف ...برهبه :0bee2e8d89: بسافر دوله اجنبيه مع عيالي لمدة اربع سنوات مع زوجي ديره يديده فعيشه يديده خاليه من امج وبوي وخواتج ماكو زواراة ماكو خدم ماكو سيارة تحت ايدج متى ماتبين تزورين اهلج طقيتي سلف ورحتي ..غير هذا ريلج بيكون طالب فالله يعيني شكثر بحاتيه احاتي دراسته احاتي الطالبات اللي معاه ماتنعجب فيه :eh_s(13):وحده يشوفها كل يوم كاشختله وانا محتاسه بالياهال والطباخ والتنظيف .:dfgl:.صج مادري شسوي ياليت كل وحدة سافرت ويه ريلها تقول شلون كانت حياتها وشنو تنصحني فيه

 

[M!SS.LOBY]

الله يكون بعونج

 

[bride2011]

راح تكون اخلى فتره بحياتج لا تحاتين بتلقين بنات ربع وهناك الجو الزين وحياة تهبل
الحياة نمطها هناك مريح وسريع غساله صحون الغسالات غير وكل شي مجهز ختى البصل والطماط هناك مقصص بالجمعيات والسلطات مقصصه جدا عادي الوضع وحطي عيالج حضانات

 

[توتة UAE]

زين انج بتسيرين وياه شي حريم يتمون ف بلادهم والريال يسافر بروحه
عاد شرايج منو مفروض يزعل ويحاتي . . شوفي وضعج بطريقة ايجابية
بتكونين ويا ريلج على طول وبتغيرين جو انتي وعيالج . . بتتعلمين اشيا يديدة
ترا هناك بعد شي حريم متزوجات وعندهم عيال وامورهم طيبة . .

يمكن فالبداية بتتعبين شوية لانه مكان يديد ويبالج وقت ترتبين كل شي . .
بس عقبها بتمشين عادي حالج حال هالاجانب والخليجيين الموجودين هناك
كلمي اهلج وقت ماتبين كل شي متوفر الحمدلله . . انا اشوف من الاحسن
تستغلين هالاربع سنين وتستانسون كلكم تراهم بيخلصون بسرعة وبتشتاقين
لهالايام . .

ربي يسعدكم

 

[جوري الصالح]

ضــــــروري تتحمـــــلين
شـــــــريك حيـــــــــاتـــج

 

[شمعة^الحب]

يعطيكم العافيه يابنات ماقصرتو

 

[M!SS.LOBY]

الله يعافيج

 

[mrs.abk]

الله يسهل أموركم ويوفقكم أنا أشد على ايدج هذي تجربة بتغير حياتج للأحسن إن شاء الله

 

[cute_mama83]

حبيبتي فالبدايه بيكون الوضع يديد عليج وصعب تتقبلينه شوي

لكن صدقيني بعدها بترتااحين وتكون لج خصوصيتج مع ريلج ، اعيالج بتربينهم بدون تدخلات

انا كنت متغربه مع زوجي 6 سنين ونص بالبدايه كنت احس اني متوهقه ومو عارفه ادبر اموري لكن شوي شوي تنحل

انتي سوي لج جدول ونظمي امورج عشان يكون لج وقت لنفسج ولزوجج والعيال

الصبح بعد ما يروح زوجي كنت انظف البيت وارتبه

بالنسبه للطباخ راح تحصلين شغلات زاهبه ومثلجه مثل البيتزا - لازانيا- باستات وهالسوالف تصلح للعشا
وعندج بعد شغلات مقطعه وزاهبه وااااااايد تسهل عليج الطباخ مثل ( البصل- الثوم- الطماط- فلفل خضر- بقدونس الخ) وهم شغل السلطه ماعليج الا تخلطين بس وفي بعد فاكهه حق اسر سرريع ولان اغلب وقتهم راح يصير بالجامعه ساعات بس تجهزين وجبه وحده له ، والويك اند تطلعون تتغدون برا ولا تطلبون

اليهال حاولي تدخلينهم حضانه لو بارت تايم عشان اهما يختلطون باليهال الثانين ويستانسون وهم يكسبون لهم لغه وبهالوقت انتي ترتاحين شوي وممكن بعد تطلعين مع زوجج

ومع الوقت اكيد راح تدلين الاسوقه والجمعيات اللي يمج - حدايق ممكن تروحين لها مع اليهال لمن يكون زوجج بالدوام
واكيد راح تحصلين لج صديقات عرب او خليجيات تتسلين معاهم

واذا ظروفكم تسمح اخذوا لكم سياره هناك عشان ماتتمللين وتقضين مشاوريج لاصار ريلج بالجامعه

وبالنسبه لاهلج ورفيجاتج اهني بكبسة زر ممكن تتواصلين معاهم صوت وصوره عندج فايبر- تانقو وغيره

بعد ممكن زوجج يكلم السفاره هناك لمن توصلون وياخذ ارقام المبتعثين المتزوجين ويعرفج ع زوجاتهم تصيير

الله يسهل اموركم ان شاءالله

 

[<miss botamba>]

مع كيوت ماما

ومن الحين ضبطي شغلج وبحثي بالنت عن مدينتج والاماكن السياحيه الي فيها

الاسواق القريبه من بيتج و مدارس حق اليهال

وحتى السفاره تواصلي دايم معاهم وروحوا حفلاتهم

وحطي لج جدول لكل شي التنظيف و الاكل وغيره

حتى الوجبات رتبيها باليوم الفلاني جذي الساعه الفلانيه جذي وايد بسهل عليج

وبره انا اشوف الحياه اسهل من هني

وانتي دشي هناك دورات استغلي كل دقيقه


والله يسهل عليج

 

[جذابه بنت ذيابه]

حبوبه ونسي عمرج و عدلي نوم اعيالج هناك ويوم وترك طلعيهم و اهتمي بزوجج و اعيالج و ابحثي عن المدينه و اللي فيها بالنت لا تحاتين بتلقين اهل واصدقاا
الناس للحين فيها طيبه وخير .. وكوني صدقات و بتكبرين بعين زوجج بالاهتمام والتربيه و البعد عن اهلج وتحمل المسووليه

 

[Dalo3at Rayli]

شوفي انا بسافر بس مو دراسه ، تخيلي بنتقل اعيش حياتي كلها برا ,
لان ريلي اوروبي .. اشوف الحياة اسسهل برا و احسن ..

يعني من وجهة نظري :
دام عندي زوج اللى يفهمني و يوقف وياي ،
و يكون معاي بكل اموري و حياتي ما راح تصعب علي الغربه نهائيا !

و اذا عن اهلج و ناسج صح بتشتاقين لهم و تحنين علي سوالفهم و قعداتهم
بس الله يخلي برنامج المحادثه مثل السكايب ، فايبر ، تانقو و غيره ..

الغربه حلوه و طالعيلها من جانب مشرق ،
راح تقربكم من بعض و تقربكم من عيالكم حييبل صدقيني ..

بالبدايه راح تصعب عليج يبيلج فتره علي ما تتعودين ,
بس سلي نفسج بـ امور الطبخ و الميكاب ،
و الدراسه دشي معهد هناك و اخذي شهاده ما فيها شي ..

و اذا عالطالبات خل اقول لج شي عن اللى شفته و اللى سمعته :
خوفج من الجنسيات العربيه ،
اما اذا تحاتين الاجنبيات صدقيني كلش ما عندهم هالنظره !!

انا ريلي ششكثر معاه بالدوام بس ما اغار ،
لان عارفه اهو شلون متربي و البنات اهناك شلون بس صداقه مو اكثر !

عالعموم خليييج واثقه من ريلج و الاهم من نفسج ,,
حلوه الغربه بيصير عندج وقت فراغ وايد تقدرين تتسلين و تونسين عمرج
اهتمي بنفسج و شكلج و سوي كل اللى بخاطرج ..

و الله يعدي هالفتره علي خير عليكم و يهنيكم حبيبتي :eh_s(7):


​

 

[rose2012]

ابوي كان يدرس برا وحنا صغار فعشنا برا اونسسسسسسسسسسس شي يمكن اونس فتره بحياتي
بس امي كانت تشتاق لاهلها وتبي تكلمهم
من ذكريات الطفوله
كنا نيب قلاصلات قزاز ونشلع توت من الشجر كان لذييذ وناكله بالقلاص كان شكثر شجر توت فيه توت بنفسجي غامج
بالكويت مو حلو و غالي مناك ببلاش
وكان عندهم شجر كستن تخيلي كل مكان مقطط ناخذه و نشوية
وحلاوهم كله حلو وباربياتهم ايدد شي
واونس شي بحديقه بيتنا تربتهم غير عن الكويت اي شي تزرعينه يطلع اي شي وكنا زارعين شكثر نبتات
واتذكر كنا نجمع حلزونات كل مكان و نلعب فيهم و احطهم بجواتي اللي احقد عليهم بالبيت عشان يدوسونهم
والدود اللي بتربتهم همن عجيب ساعات نتذكره انا واختي و نضحك وايد كنا نلعب فيه نجمعه نحطه بعلب نحبسه
وكان عندنا هووس بحلاوهم اينن مو نفس الكويت
واتذكر حدايقهم جنه جبال وشلال و خضره كل مكان
والمدرسة تهبل مدرسه مسلمين بس مختلطه صبيان و بنات اتذكر اللي بصفي
حتن لما ردينا لغتنا الانقليزي وايد متطوره عن اللي بالكويت
ودي اروح مره ثانييه
حتى كانت امي متعرفه على رفيجات شكثر و يون بيتنا ع طول عزايم و طلعات و تيلفونات

 

[amanena]

الله يعينج
نفس الشي بروح مع ريلي بعد فتره ونفس المخاوف عندي
شي يديد علي مو فاهمه شلون بيكون الوضع
بنات كلامكم حلو ويشجع
ونبي بعد تجارب

 

[شمعة^الحب]

صج صج ونستوني وشجعتوني عاد صج يابنات الغربه تخلي الزوج يتعلق فيج اكثر وانا جربت اسافر وياه ست اشهر خلتنه حيل نفهم بعض وحيل نتعلق ابعض بس ايامها ماكان عندي عيال... ان شالله يارب عيالي يستانسون فيها لانه هذا عندي الاهم ونتوفق ولما نرد الديره تكون ذكرى حلوه نحب نذكرها ..عاد من الحين قاعده اكتب بوصفات اكل لاني فكرت فيها شكلي بونس نفسي بالطبخ وتختخ عيالي وبوهم وفكرت اييبلي جهاز شمع وعدة الباديكير لانه هناك صالوناتهم خلط وبيب شيره عشان لما ريلي يرد من الجامعه يشوف الوجه الحسن والا انتو اشرايكم

 

[يا فرحه ما تمت]

انا ريلي خريج دوله اوروبيه بس تميت بالكويت ما رحت معاه يمكن غلطتى وبحكم دراستى بعد

 

[ام رينـاد]

عادي حبيبتي راح تتاقلمين بالوضع لاتحاتين

انا كنت مثلج لما تزوجت ريلي قال لي ان بيروح بعثه يبي يكمل دراسته بره بالبداية رفضت الفكره لاني كنت صغيرونه ومابي افقد اهلي ومابي ابتعد عنهم بس اضطريت بس الحمدالله 3 سنين وردينا لووووول انا اللي جبرته ..صج عشت ايااام صعبة وحملت ويبت بنتي وبنفاااااااسي خربطت بالاكل بس بعد عمري امي يتني وساعدتني بس تأقلمت مع الوضع صج الغربه صععععبة بس لاااااازم تتاقلمين شتسوين بعد

 

[cute_mama83]

صج صج ونستوني وشجعتوني عاد صج يابنات الغربه تخلي الزوج يتعلق فيج اكثر وانا جربت اسافر وياه ست اشهر خلتنه حيل نفهم بعض وحيل نتعلق ابعض بس ايامها ماكان عندي عيال... ان شالله يارب عيالي يستانسون فيها لانه هذا عندي الاهم ونتوفق ولما نرد الديره تكون ذكرى حلوه نحب نذكرها ..عاد من الحين قاعده اكتب بوصفات اكل لاني فكرت فيها شكلي بونس نفسي بالطبخ وتختخ عيالي وبوهم وفكرت اييبلي جهاز شمع وعدة الباديكير لانه هناك صالوناتهم خلط وبيب شيره عشان لما ريلي يرد من الجامعه يشوف الوجه الحسن والا انتو اشرايكم

حبيبتي ممكن تاخين هالشغلات حق اول الفتره لين تعرفين المنطقه وتضبطين امورج لكن في صالونات ممكن تطلبين منهم يحطونج في غرفه مسكره انا كنت اسوي جذي اذا حبيت احف جسمي - قص الشعر وحتي رفيجاتي لمن بيصبغوون