تجربتي مع عمليه الأنف عند غابريل صعب بالصور (بعد سنتين من العمليه

[كنترول دبي]

قبل











بعد



[



طبعا كنت أبا يصغر الارنبه ويخلي العظم إلا أن النتيجه كانت مب حلوه يعني شل الغضروف ورفع الأنف والارنبه مرفوعه وكبيره يعني مشروع فلبينيه مكدونالدز

عموما ابي اسوي عمليه ثانيه والخيار الأول عند ايلي غاريوس منو عدل لها الارنبه وصار خشمها زين!

ابي
نفس الفنانه مي عبدالله عبدالله كلمتها واتساب وسالتها لكنها فتحت المحادثه و قرت وماردت

مي عبدالله قبل

بعد

 

[كنترول دبي]

بعد




طبعا الله يحرسها من العين ويهنيها ويحفظها انا حطيت صورتها عشان ابين لكم اني ابي نفس نتيجه عمليتها الارنبه عندها وسيعه قبل وضبطلها دكتورها بحيث انه سيده وطبيعي وجميل مش مختفي نفس شهد الياسين او الهام فضاله او نتيجه عمليتي انا ،ماشالله تبارك ألله ربي يهنيها والي عندها فكره عن دكتور فنان بهالخصوص تخبرني

عيوب ثانيه من عمليتي اني يوم اضحك خشمي مب بس ينفرش إلا يصير سجاده منسدحه مفروشه ..

عموما الموضوع للاستفادة وبينمسح عقب لأني نزلت الصور وسويت الموضوع من تلفوني عالسريع ومامداني امسح واقص صوري وشعري برع وويهي فمبسحه بعد ما أشوف ان شريحه كبيره استفدت
وعشان ما اذم د.غابريال الي اكتشفت فيه انه شاطر بسوالف العظم والانحراف بس الله يهداه ماخبرني وقال بضبط لج إياه وسوا عكيفه
بالعربي بس يعرف يعدل الأنف المنحرف
أما الارنبه لا وألف لا ومليار لا
وأنا كنت ابي الارنبه
ولو رد الزمن ورا ماسويت عنده
عالتعب الي تعبته وجسمي ماساعدني اتحمل الآثار الجانبيه للعمليه
وعالنتيجه النهائيه
العمليه كلفتني تقريبا 28الف درهم بعد

بالصور خشمي فيهم أهون عن الواقع
الواقع وايد كبيره الارنبه خاصه ان ويهي صغير وايد وارنبتي صارت مرفوعه وكبيره !
أتوقع اني كفيت ووفيت وكتبت كل شي بالتفصيل وصوري واضحه قبل وبعد مب نفس الباقي مادري كيف لانستفيد منهم عدل ولا شي ونتيجتي نهائيه بعد سنتين من العمليه بطلت حلجي وتكلمت
بنات الي جربت مع ايلي غاريوس و مشكلتها كانت نفسي تخبرني او اي دكتور ثاني خل نستفيد ويزاكم الله خير

 

[كنترول دبي]

آخر ملاحظه من وانا صغيره كنت متعقده من خشمي وسويت العمليه عمري ماشغلت التلفزيون وقعدت أقارن نفسي بالممثلات وأبي نفس هذي والكلام الفاضي هذا !
كنت استحي اطالع الناس بويوههم من خشمي حتى
لين توكلت ع لله وسويتها
ولله الحمد والشكر بس ابي اسوي خشمي مب عمليات الدنيا وابهدل بنفسي يعنيوفي بنات يبون خشم وتفخ خدود وتكميم وشفايف وجبهه وصدر واذن وجمبلولو جمبليلي يا جماعه والله مانصحكم بهالنمونه بالنهايه هذي صحتج وهذا جسمج تجملي وعدلي مب تدمنين العمليات فكل جزء من جسمج

وأن ما استفدت من حد ولاعرفت دكتور زين احط لكم هالتجربه من باب الافاده والأجر واسالكم الدعاء مب كل حد يتفيج يذكر تجربته الكل يقول (نفسي نفسي )
يتوفقون بعملياتهم ويسحبون عالكل سيفون

ومابي إلا دعواتكم الصادقه لي خاصه ف رمضان
وسامحوني ع الأسلوب
والله المستعان

 

[غفوة رحيل]

الله يسهل لك احس دمر لك الخشم من ناحية العرض و الارنبه شوفي عمليتي بموضوعي تقريبا نفس مي خشمي

 

[Fattom R]

إنشاءالله تتوفقي بالدكتور الشاطر إللي يعرف يعدل الأرنبة متل مابتحبي

 

[princess.78]

جربي أستشير د مصطفى بوزيد

 

[شواخي]

هلا والله

ماشاء الله كيوووت جنج لعبه والله !!


ههههههه اسلوبج عجيييب والله

في دكتور اسمه ايريك بلو يزور كل كم شهر .. شوفي موقعه وراسليه اختي سوت عنده بالضبط الي تبيه هي عاد سوت وايد ناتشورال مع اني انا احب التغيير صراحه

صار لها الحين ٣ شهور ونتيجته حلوه .. كلفتها ٣٠ الف ريال

الله يحفظج اهنيج على البوست الجميل

 

[Fake glitter]

اذا سويتي عند ايلي غاريوس بشرينا بالنتيجه..
واذا فكرتي بايران راسليني انا خاطري اعدل خشمي بايران بس ماعرف احد هناك وبتوهق بروحي..
يهمني انه يكون دكتور انف اذن حنجره عشان اعالج مشاكل التنفس مره وحده..

 

[ظبية بوظبي]

ههههههههههه ضحكتيني جمبلولو

اولا حابه اقول ان ترا شكلش كثير حلو كيووت
وثانيا الله يعينش وان شاء الله تنفرج امورش

و صادقه في كل كلمه كتبتيها

من ناحيه ادلش على احد
انا مرة شفت بنت هي اتوقع خاله كلمتها فالانستقرام وقالت ان اختها سوت خشمها هنا عندنا في مستشفى الامارات الفرنسي عند دكتور سوري نسيت اسمه للاسف بس اظن عدي شي مثل كذا
وسالتها اختش تعاني من خشمي عظمي ولا لحمي قالت لحمي .. بكذا تطمنت وعرفت اي نوع يعرف يضبط
شوفيه وسالي

 

[جوري ksa]

يبي لج دكتور شاطر بالترميم , لكن الارنبه وتحديداً الفتحات نادر اللي يعرف يضبطها ويطلعها بشكل يكون قريب للطبيعه

عبدالكريم فدا شاطر بالترميم عموماً لكن يحافظ على هيكل الانف وما يغير كثير ,
يعني ما اعتقد انه بيصغر لك الارنبه والفتحات بالشكل اللي تطمحين له ..
وعندك الدكتور حمد الجابر بقطر شاطر كمان بقص الفتحات وتنسيقها
والثنين فعالين بالسوشال ميديا , تقدرين ترسلين صورك لهم وتاخذين منهم استشاره ولو مبدئيه

وبالنسبه لأيران , انا اشوف شغل دكاترة ايران بالمجمل مش نظيف ويبين انه تجميل مهما كان الأنف حلو
واذا معزمه على ايران شيكي على حساب الدكتور شهريار يحيوي وراسليه وكمان خذي منه استشاره مبدئيه , شغله حلو
وللأمانه انا ما شفت تجارب عندهم غير الصور والله اعلم عن مدى صحتها وحقيقتها .. موفقه

 

[برنسس كاتي]

عزيزتي كم صارلج مسويه العملية ؟؟
إحتمال كل هذا بس تورم يعني لانه الأرنبه تاخذ وقت على ما تفش ..
وبعدين التب الخشم مع الوفت ينزل لتحت عشان كذا الدكاتره يرفعونه شوي فوق ..

ان شاء الله يخف التورم ويطلع زين
شكنت بقول انا صديقتي سوت تجميل وصار نفس خشمج كبير وراحت عند دكتور ثاني وقالها انه خشمها فيه تليف وشاله كله وصار اوكي ..

 

[rozario]

الاخوات الفاضلات
السلام عليكم ورحمة الله وبركاته
انا اختكم من احدى دول وسط اسيا وسمعت من بعض الاصدقاء عن الدكتور غابريال صعب في كوزموسيرج الجميرا في دبي ولانني اعاني من ميلان الانف قليلا الى الشمال بسبب سقوط من السلم وانا صغيرة اضطررت الان لتعديل الاعوجاج وبموافقة اهلي وزوجي . المهم تمت مقابلت الدكتور على عجل وابلغته بانني اريد تعديل الاعوجاج بشرط الا يؤثر على المضهر الخارجي مثل الانحناء الزائذ الذي يوضح فتحات الانف مثل اكرمكم الله الخنزير او تصغيره وتنحيفه مثل مايكل جاكسون . وبالرغم من طلبي من الدكتور ان يوضح لي علي الكمبيوتر كيف سوف يكون الانف بعد العملية اخبرني بانه لايتعامل بمثل هذه الامور علما بان اغلب الاطباء الان يتعاملون برنامج 3d ، كان مستعجلا من كلامه ولم يترك لي مجالا للحديث والاطمئنان نفسيا ، وبدآ وكاته واثقا من نفسه اكثر من اللازم وبعدها توكلت على الله ووافقت لاجرائها بمبلغ ٢٦٠٠٠ درهم .
انتهت العملية وعانيت من تورم الوجنتين والانف والان لي شهر تقريبا والملاحظات هي :
- انحناء في الانف في الوسط.
- صغر الانف
- ارتفاع مقدمة الانف قليلا
- ميلان الانف للشمال قليلا
والله ثم والله انني اصبحت اعاني من الخروج من المنزل بسبب توقعي للحرج خاصة ارتفاع مقدمة الانف .
نصيحتي للاخوات الفاضلات عدم اجراء عمليلت عند هذا القصاب وغير الامين على انفس الناس وحسبي الله وتعم الوكيل .
اقسم بالله العظيم ان هذا الدكتور لم يعمل شي من ما طلبته منه وانما قام بما يريده هو بنفسه وكانه يريدني وغيري حقول تجارب ولا اعلم كيف يسمح له بمزاولة عمله في بلدان تقدر مواطنيها وتهتم بهم خاصة وانني اطلعت لديكم من يشتكون منه وفي الامارات ايضا .
يالله ياكريم يامقتدر ان تريني في هذا الدكتور آشد عقابك وانتقامك لكل من ظلم على يديه وان تجعله مضحكة لخلقك وان تزيل كل نعمة ينعم بها انك على كل شي قدير .
الان انا وبمساعدة زوجي بعد الله سبحانه نجهز بعض الملفات الخاصة التي سوف نرفع فيها قضية عليه وعلى الكلينك الذي يتعامل معه ولدينا والحمد لله كل مانحتاج اليه .
يعلم الله انني لا احب المواقع ولا الدخول اليها ولكن بسبب ماحدث اخذت الموافقة من زوجي لتقديم النصيحة لكل من يرغب لكسب الاجر والثواب

تمنياتي لكم بالتوفيق والسعادة