تجربتي مع جهاز فيلاشيب VelaShape اللي حاطين إعلانه بالمنتدي

[Academiya]

قوة بنات شلونكم؟؟؟

اليوم بس لاحظت إعلان فيلا شيب اللي بالمنتدى جهة اليسار واللي يقدمه مركز لاليك وحبيت أسدح تجربتي مع الجهاز وأي وحدة عندها استفسار انا حاضرة :eh_s(20):

وهذي تجربتي الشخصية مع هالجهاز...

قبل فترة كنت بأمريكا أدرس وكان عندنا مركز تجميل صغير وسمعت عن هالجهاز ولأني كنت متينه وضعفت حسيت جسمي مترهل وعندي سولولايت بفخوذي ورا فنصحتني مالت التجميل أجرب هالجهاز وطبعا أهو يصير لكل المناطق ماعدا الويه..
وبناء على ميزانيتي البسيطة اخترت اسوي فخوذي وبطني بس وتقريبا كان السعر 600 دينار والجلسات 6 كل اسبوعين مرة...

الجلسة الأولى انسدحت على السرير ويابت المرة مادة نفس الجل وحطتها على بطني ويابت الجهاز تقريبا نفس السونار بس أكبر وراسه مدور وفي راس مدبب بعد وقامت ادلك بطني مع ضغط خفيف على المنطقة وتقريبا بعد 10 دقايق سوت فخوذي نفس الشي وأول شي لاحظته انه في احمرار بالمكان اللي سوته بس مو وايد وقالتلي شربي وايد ماي وتحركي وخلي المنطقة دافيه عن طريق لبس شورت داخلي وفنيله داخليه لاصقة عشان تستفيد المنطقة من التدليك...

وعدا أول يوم بسلام :eh_s(22): بس ثاني يوم لووووول صار فيلم...
ماقدرت أقعد من النوم من عوار بطني وريولي.. والاحساس نفس اللي أول مرة يسوي تمارين للبطن والفخوذ وتشد عضلاته يعني كانت عضلاتي بهالمنطقة شادة.. ودقيت على المرة وقلتلها قالت اي احسن معناته جسمج استفاد...

المهم.. كملت الجلسات كلها.... والنتيجة...

خسارة فلوس وماكو شي اتغير بجسمي أبدا أبدا
:23_asmilies-com:

مع العلم إني مو متينه ووزني كان وقتها اقل من 60 بس للأسف مااستفدت ومادري شنو السبب مع إني اتبعت كل الإجراءات المطلوبة ولما سألت المرة قالتلي في ناس يحتاجون اكثر من 6 جلسات فتعالي نسوي كورس ثاني وصراحة حسيت العملية نصب فقلت لا مشكورة...

وبنات اللي جربوا الجهاز خل يحطون تجاربهم عشان البنات الثانين يستفيدون صراحة مانبي أحد يقط فلوسه على شي مامنه فايدة...

:bye22:

 

[زهر الرمان]

عاد اتصدقين شكله يشوق
بس مو كل شي يحط اعلان شكله حلو معناتة صج
شكرا على تجربتج حبيبتي

 

[Academiya]

رد : تجربتي مع جهاز فيلاشيب VelaShape اللي حاطين إعلانه بالمنتدي

صاجة زهر الرمان انا بعد جذي تشوقت بالبداية وكنت شايفة صور قبل وبعد بمركز التجميل وسويت كل التعليمات..
بس صراحة شغل تجاري ودعايات مبالغ فيها..
يالله بنات منو جرب الجهاز؟ يمكن أحد استفاد أو شي مني مناك

 

[!الجادل الصعب!]

رد : تجربتي مع جهاز فيلاشيب VelaShape اللي حاطين إعلانه بالمنتدي

مشكوره ع الامآنه
يعني 6 جلسآت وماتغير شي .. كورس كامل عدى من غير فآيده ماتوقع منه فآيده لو عشر كورسات

 

[bibi]

مشكورة على نقل تجربتج لنا .

وعلى فكرة الآعلانات كثرانة في المنتدى والمفروض أن البنات ينتبهون .

طبعا أنا ما أتكلم عن الإعلانات التجارية فواجهة المنتدى لأنها تسويق وإعلانات مدفوعة .

أتكلم عن اليوزرات اللي تسجل عشان تروج وتسوق لمنتج أو براند معين أو عيادة ، وواضح انهم سكرتيرات فعيادات وخبيرات التجميل

فالصيدليات . وغشهم وتسويقهم واضح و مكشوف ، لأنهم يسوقون بمنتهى الغباء ويوزرهم مايظهر إلا لما يكون الموضوع يخص منتجاتهم

وكل مشاركاته تقتصر على الترويج لها .

 

[Academiya]

رد : تجربتي مع جهاز فيلاشيب VelaShape اللي حاطين إعلانه بالمنتدي

من شان هيك عفيه بنات اللي جربت شي ومافادها تقول لنا... واللي فادها هم تقول.. وتذكروا لايؤمن أحدكم حتى يحب لأخيه مايحب لنفسه...
وهذا مو معناته إن الجهاز مامنه فايدة.. يمكن بنات جربوه وفادهم الله العالم لأن كل جسم يختلف عن الجسم الثاني... بس لاتبخلون علينا بتجاربكم راحت فليساتنا وإحنا نحورف بعمرنا وماكو فايدة لووووول:016:​

 

[bibi]

وشغلة ثانية حبيت أضيفها ، من واقع تجربة الأشياء اللي تجربونها أول مرة لاتتعاملون مع البكج .

مومشكلة ندفع زيادة 10 و20 بدال ما ندفع بالميات وتالي نخسرها ، طبعا غير الخسارة الجايدة التعب والتحطيم النفسي


لأن احنا دايما نتحمس وضامنين النتيجة ، ونحسبها ماديا أوفر ، و مانعطي نفسنا فرصة نجرب الشي بشكل مبدأي ونحكم علي نتائجه وتأثيره

وبعدها نقرر .

 

[Academiya]

رد : تجربتي مع جهاز فيلاشيب VelaShape اللي حاطين إعلانه بالمنتدي

إي بيبي بس هالشركات عارفين لنا مايبيعون شي الا باكيج... لأن شكلهم يدرون شغلهم اي كلام واذا جربنا ومافاد ووقفنا أهم مو خاسرين شي بالعكس يبونها من الله.. وماكنت اقدر اسوي الفيلاشيب الا عن طريق باكيج كورس كامل بس زين منهم خلوه على دفعات لوووول كل شهر يخصمون من الفيزا سواء حضرت أو ماحضرت... وماقدر أوقف الخصم لأني للأسف موقعة عقد

 

[wafa82]

رد : تجربتي مع جهاز فيلاشيب VelaShape اللي حاطين إعلانه بالمنتدي

مشككووووووووووووووووره ودي اجربه بس مادري شنو النتيجه اب اب اب

 

[مريم86]

انا جربت وحسيييت شغل بطيييخ ووقفت الجلساات ..راحت فلوسي عالفاضي
والدكتوره ماتعرف تتكلم او انها تدري انه الجهاز اي شي وتمشي السالفه

 

[CHICKLYTA]

هذا الجهاز حتى العيادات اييبونه بتصريح fda حسب معرفتي عيل اشلون اهو اخرطي

 

[Beautiful soul]

انزين بسالج حسيتي ان السيليوليت خف ولا عادي ؟

 

[_zahra]

مرحبا ,,شفت عن الجهاز بيوتوب ببرنامج ذا دوكتورز و راشيل راي بس اللي مجربين ضعااف ولا وحده متينة ,لا يكون نفس جهاز اللي دعايته عن العرموطة وانه يسوي نحت وبعدها طلع فاشل شسم الجهاز هذاك؟