تجربتج الاولى مع تغذية طفلج بعمر 6 شهور .. تعالي اعلمج عن جهاز يريحج !!

[t0o0fa]

سلام عليكم

شلونكم يا امهات ..

الله يعطيكم العافيه على جهودكم مع عيالكم

يحتاج صبر و طولت باال

المهم انا يايتكم اليووم ومعاي جهاز من فيليبس

يطبخ الاكل بالبخار و تقلبينه يقووم يخلط لج !!

وهذا موقعهم

Philips - جهاز خلط وإعداد الطعام بالبخار "المدمج" SCF870/22 - تحضير وتخزين الطعام - التحضير للطعام - الرعاية بالأم والطفل


جدا سهل و مريح

انا شريته من mothercare ب 60 دينار تقريبا

عاد انا يايتكم بشوف منو اللي سمعت عنه او استخدمته

انا بنتي باجي لها اسبوع وتدش الشهر السادس و ابدي اعطيها شويه عيش

ابي تجاربكم الاولى في الاكل مع عيالكم شنو بديتو معاهم ؟؟ و شنو كانت ردود فعلهم

​

 

[ام رينـاد]

يعطيج العافيه

 

[t0o0fa]

الله يعافيج

مشكوورة ام ريناد على الرد

اتمنى من باجي الامهات يشاركونا بتجاربهم في الاكل مع عيالهم حتى لو ما جربو الجهاز

​

 

[Smetk 3'lay]

انا بعد اتمنى احد سمع عنه او استخدمه بس سعره وايد غالي

 

[PinkLulu]

شكله جهاز حلو ويريح

بس أنا كنت أفوح الخضرة وأخلطهم بخلاط عادي

أول شي بديت بجزر مفيوح

كان ياكل جم قفشة بس

طبعاً كل 3 أو 4 أيام أجرب نوع خضار يديد (كوسا، بطاط، بطاطا حلوة، قرع، بروكولي، بزاليا، سبانخ)

وضفت عيش وشوفان

وبعدين دخلت دياي ولحم

قطعة من فيليه صدر دياية...أو فخذ مع العظم

ولحم عجل

بعد فترة لما تعلم على الأكل...قمت أخلي أكله خشن شوي ما أطحنه ناعم

وبعدين بديت أضيف ملح وبهارات خفيفة

 

[t0o0fa]

PinkLuLu مشكووورة حبيبتي

يعني ابدي معاها بالتدريج

و بالبدايه بس خضرا بدون عيش ؟

​

 

[t0o0fa]

هذا فيديو حصلته باليوتيوب يعلم طريقة الاستخدام

جدا سهله وتضمنين انه ولدج يحصل على الفايدة من الخضروات كاملة​

 

[ناني سيكرتس]

اتهبل هالماكينه مريحه وسهله حيل, معاها تضمنين ان الخضرا ما تفقد الفيتامينات الي فيها ..
صارلي اسبوعين استخدمها وماشيه على كلام الدكتور, اول 3 اسابيع عيش وعقبها نبدي بواحد من الخضرا, يعني نبدي مثلا بالبطاط لمدة 3 ايام وعقبها ندخل معاه جزره لمده 3 ايام وجذيه, كل 4 ايام اتدخلين او اتزيدين نوع خضره.

والحلو فيها ان معاها كتاب فيه وصفات اكل حق اليهال , من 4 شهور لي السنه, بكل عمر شنو ياكل واشلون ينطبخ ...
بصراحه روعه عليها شويه وفلوسها مو غالي, كا احنا نشتري كريمات ومكياج باكثر من هالسعر, اعيالنا اولى بهالفلوس لمصلحتهم ..
الي ما خذتها ومحتاره شنو توكل بيبيها , تتوكل على الله وتشتريها وترتاح ..

ترا مو كاتبين اشلون تطبخين العيش فيها, طريقتي اني اطبخ كميه من العيش بالطريقه العاديه طبعا من غير ملح ولا اضافات واوزعه على وجبات واحطهم بالثلاجه. كل يوم اطلع وجبه واخليها برا, واذا صار وقت الغدا احط العيش مالها بالماكينه هذي واخليه يطبخ لمده 10 دقايق , وعقبها اقلبها ونطحن العيش, فيصير العيش مطحون وحلو ولين حق بنتي.

اشلون اتخزنين الوجبه ؟
حق الي ما تعرف حطيهم اما بصحون صغار الي ينباعون بمذركير ملوت التخزين وقسمي وجباتد فيهم وحطيهم عادي بالثلاجه. انا عندي الغراش ملوت حليب التخزين ملوت الرضاعه اموزعه فيهم الاكل واطلع كل وجبه بروحها اسخن على راحتي ..

 

[@ام يوسف@]

يعطيج العافيه

 

[PinkLulu]

pinklulu مشكووورة حبيبتي

يعني ابدي معاها بالتدريج

و بالبدايه بس خضرا بدون عيش ؟

​

إي شوي شوي...

أهم شي تجربين شي يديد كل 3 أو 4 أيام وراقبيها عشان تشوفين جسمها يتحسس من شي معين ولا لأ

وإن شاء الله ما تتحسس من شي

حطي قفشة عيش مصري أو بطاط (لأن أثنينهم نشويات) بس أول مرة بس جزر...وعقب جم يوم ضيفي العيش

وتأكدي إن مستوي عدل وخلطيه بالخلاطة وتأكدي ما في قطع كبيرة لأن بعالعمر الياهل بس يبلع

والعشا تقدرين تبدين معاها سيريلاك عيش طعمه حلو وبعدين القمح

وبعدها بجم شهر سيريلاك القمح مع العسل أو الفواكه أو التمر

 

[المـــــها]

مافهمت يعني بعمر 6 شهور ياكل جزر و بطاط و عيش بس كله مهروس؟؟

 

[MzOoOn 22]

ولدي اربع ششهور متى يبدي باكل

 

[travel_addicted]

عندي نفس هالمكينه وايد وايد سهله و مريحه
أنا بديت الاكل من عمر ٥ شهور تقريبا بتوصيه من الدكتور
اول شي بديت بالسيريلاك بس اللي يصير أرز مو قمح
اهم شي توخرين عن القمح لي ٧ شهور تقريبا
و بعدين بديت غدا خضره و عشا فاكهه و اب عمر ال ٧ شهور دخلت اللحم و الدياي