بعد نجاح "سلسلة كيف تتحولين من ممسحة رجلين إلى فتاة الأحلام في عينين زوجك" وده كان بفضل تفاعلكم الجميييل و بشكركم عليه قوي
موضوعي الجديد هيبقى على شكل حلقات برضه و كل حلقة هتكلم عن موضوع معين هيساعدك انك تفهمي جوزك صح و تعرفي ليه بيتصرف بطريقة معينة ساعات و امتى تشدي و امتى ترخي و كل اساليب الدهاء الانثوي و هيجاوب على الكثير من تساؤلاتكم و مشاكلكم إن شاء الله . والموضوع زي اللي قبله ترجمة من كتب و مواقع أجنبية بس ترجمة على ذوقي :mood1:
نبدأ على بركة الله بأول موضوع :
ازاي تخلي جوزك يعجب بيكي من تاني
يعني الحلقة دي بتتكلم عن الستات اللي ابتدت تحس إن إعجاب جوزها بيها ابتدى يقل إن ما كانش إختفى و إن أعز أصدقاءو بقم الكمبيوتر و الفيسبوك و التيفي و طبعاً التليفون المحمول و يا سلام لو معاه ipad مبقاش يسأل فين أراضيك ههههه و ممكن ينسى إن متجوز أصلاً ههههههه
يعني أول سؤال بتسأليه لنفسك إيه الحاجة "المثيرة" اللي في الحاجات اللي قلناها فوق و اللي بتخلي جوزك مبهووور و مفنجل عينيه و ناسي الدنيا حواليه و مش مديكي وقت ؟؟؟ و بتبتدي تحسي انك ربان سفينة بتغرق و إنتي شايفة جوزك بيعمل عالم خاص بيه و مش مدخلك معاه العالم ده .
عايزة تحسي تاني بمتعة الجلوس جنب جوزك و تحسي إنو مستمتع بحديثك و مديكي كامل إنتباهو من غير ما حد تاني ياخده منك ؟ إنتي عايزة كده أكيد بس في حاجة جواكي بتخليكي مش واثقة فنفسك و متخيلة انك لازم تعملي مجهود جبار و زي مبيقلو الأمريكان لازم تحركي جبل من مكانه عشان توصلي للهدف ده وده اللي بيخليكي تزهدي حتى في المحاولة.
أي وحدة فيكم مفتكرة انها لازم تعمل عملية تجميل عشان تعجب جوزها ! أو تموت من الجوع عشان الدايت عشان تخس وترجع تاني جذابة أو تشتري مكياج غالي قوي أو ترهق نفسها بالنيولوكات و غيره و غيره والحقيقة هي :
إن شكلك مش هو العامل الأساسي في نجاح العلاقة الزوجية و إنجذاب زوجك ليكي
امال إيه العامل الأساسي طيب؟
الجواب هو : السلوك the attitude
الانسان هو مجموعة عادات : في منها العادات الكويسة و في العادات الوحشة و احنا عشان نطور من نفسنا لازم نعمل عملية تنظيف عميق لشخصيتنا و نرمي كل الحاجات القديمة اللي معدلهاش لازمة و نفضي المكان للحاجات الجديدة الحلوة .
تخيلي دماغك عامل زي الخزانة دي، كل حاجة فيها مكركبة و في حاجات مش محتاجها وبرضه لسة شاغلة مكان
أنا بقى عايزة أساعدك ترتبي دماغك وسلوكياتك من تاني عشان ترتاحي و تريحي وأول نقطة هنبدأ بيها :
الحوار و التواصل :
لو عايزني أقولك عن حاجة واحدة تعمليها و هتعمل تغيير جامد فحياتك الزوجية هقولك هي " بطلي النق" ... لو هتحاولي مرارا وتكراراً وبدون كلل و لا ملل تملي جوزك لازم يعمل إيه ويسوي إيه و ازاي فلان وعلان بيعاملو لمراتاتهم و لازم يسمع منك و و و و النتيجة الواحدة اللي هتوصليلها إن الشوية اللي كان بيعملهم هيبطل يعملهم.
أي فعل بيولد رد فعل مماثليعني لو
الفعل (من طرف الست) = الإنتقاص من الحاجات اللي بيعمل جوزها و النق على الصغيرة والكبيرة ومفيش حاجة عاجبة
رد فعل الراجل = بيتمادى في الحاجات دي زيادة في استفزازها و اللعب على اعصابها وممكن يجي يوم وتلاقي نفسك مكان الست دي ههههه :mood1:
يعني بدل متركزي في الحاجات اللي بيعملها وحش ركزي في الحاجات الكويسة و إمدحيه عليها، خلي دماغه تبرمج على العطاء الايجابي مش العطاء السلبي، وزي مقلنا إن الفعل بيولد رد فعل مماثل يعني زي ما هيتمادى في استفزازك لو إنتقدتيه هيزيد في عطاءه لو شجعتيه .. فهمتي النقطة دي ؟ "و ما جزاء الإحسان إلا الإحسان"
يبقى العادة القديمة اللي لازم تتخلصي منها هي : النق والإنتقاد للحاجات الوحشة
والعادة الجديدة الصحية هي : المديح و التعبير عن الاعجاب في حالة عمل حاجة كويسة
يعني لو كسر كوباية بدل ما تنقي على كسر الكوباية اشكريه عشان لم الإزاز !!
replace the nag with the brag
الثقة ثم الثقة :
الجواز المفروض مبني على الثقة، والثقة لم بتكون بتخلق جو من الطمأنينة و الراحة بن الراجل ومراته
وإنتي بتقولي لجوزك انك بتثقي فيه، لكن هل تصرفاتك بتقول كده ؟
يعني لو بتسأليه بالتفصيل عن علاقته بزملائه البنات في الشغل وعن بنات عمته اللي شافهم لما راح يزور والدته هل اتكلم معاهم وداهم ريق حلو ؟ ... كده إنتي بتحطيه وبتحطي نفسك في موقف بايخ، بتبيني انك معدنكش ثقة في نفسك وبتحسيه إن شخص غير جدير بالثقة
يعني لو ما كانش في سبب مقنع انك تشكي فجوزك متخليش الشك هو أساس العلاقة ... و حطي مكانه ثقة
جوزك هيجاوب على ظنونك، لو ظنيتي فيه كويس و عاملتيه على أساس الظن ده هيحاول إنه يكون عند حسن ظنك وميخيبش ثقتك فيه على العكس لو توقعتي منه السوء هيعملو و مش هيبقى هامو عشان إنتي أصلاً عاملتيه على إنه أهل لكده .
غيري مسار النهر :
جوزك هو الميه و إنتي النهر و النهر هو اللي بيحدد مسار الميه، جوزك ممكن تخليه أنعم من الحرير أو أصلب من الحديد بناءًا على الطريقة اللي بتتصرفي قدامه بيها.
يعني لو عايزة جوزك يقعد يسمع ليك ويديكي إنتباهو لازم تعملي إنتي ده الأول يعني لما يجي يحكيلك حاجة اديه كل اهتمامك و اسأليه اسئلة تبين انك متابعة معه ومهتمة باللي بيقولو و هتلاقيه هو كمان بيعمل معاك كده.
خلي بالك من حواسه :
لما يشم ريحة صنية البطاطس و يقولك "الله على ريحة"، تأكدي إن ده مش هيكون رد فعله لما يشم الريحة دي فيكي إنتي :mood1:
خليه ميشمش فيكي إلا ريحة حلوة
وبيتك كمان عطريه عشان يبعت على الراحة و الاسترخاء
نوعي في الألوان اللي بتلبسها وجربي حاجات مطرقعة و تاتو وستراس على جسمك، الرجالة زي العيال الصغيرة بتجذبهم الحاجات اللي بتلمع و تزغلل العينين و تذكري إن أنشط حاسة عند الرجل هي البصر
اللمس : متنتضريش إن هو اللي ديماً يلمسك ... لو بتكلمو حطي ايدك على دراعه بلطف، العبي في شعره ، امسكي ايده و انتو في العربية، لو هو سايق و شفتي عرق على جبهته هاتي منديل كلينكس وامسحيه بلطف ... لو كان تعبان إعميللو مساج لظهره هيخليه يعشقك صدقيني.
و أخيراً عشان ألخص حقول انك لو عايزة إهتمام جوزك لازم تغيري نظرتك للأشياء و تكوني أكثر إيجابية و الاجابية دي بتبان في أفعالك قبل اقوالك و لازم جو من الثقة في نفسك أولاً ثم فيه .
و دمتم سالمين
يتبع ااااااااا
