بيت القرين اول موضووع لي في المنتدي

[ام كوثر2007]

السلام عليكم ورحمة الله وبركاته

بيت القرين

امس حضرت مهرجان الوحده الوطنيه اللى قاموا فيه بعض من شباب الكويت في بيت القرين


لتعزيز الوحده الوطنيه بقلووب اهل الكويت ..


كان منظر ولا اروع .. كل الناس كانت موجوده السنه والشيعه والبدو والحضر والعيم وكل طوائف الكويت

كلنا كنا نهتف ونقول النشيد الوطني كلنا كنا انتغنا بحبنا للكويت



السنيه واقفه يم الشيعيه


قرينا الفاتحه علي كل شهداااء الكويت اللى انذكرت اسمائهم في ملحمه القرين كانو شيعه او سنه


كل شهيد دفع دمه عشاااان نبقي احنا فيها الحين
​

الشهيد سيد هادي العلوي
الشهيد عامر فرج العنزي
الشهيد يوسف خضير يوسف
الشهيد جاسم محمد علي
الشهيد خليل خيرالله البلوشي
الشهيد خالد احمد الكندري
الشهيد حسين غلوم
الشهيد محمد عثمان الشايع
الشهيد بدر ناصر العيدان
الشهيد مبارك علي صفر
الشهيد ابراهيم علي صفر
الشهيد عبدالله عبدالنبي مندني


اسماء يجهلها الجيل الحالي ....

مووضووعي اليوم مو عن تعزيز الوحده الوطنيه مثل ما انتو حسيتوا ..


لانه عقب اللى شفته البارح في بيت القرين انه كلنا ايد وحده ومافي فرق بينا سنه وشيعه حب الكويت جمعنا امس وراح يجمعنا دائما وابدا

حسيت وتذكرت اياام الغزووو اشلون كنا .. استرجعت كل ذكرياتي بوجودي امس في بيت القرين ..


لكن اليوم وعقب اللى شفته امس .. حز بخاطري شي وودي اطرحه عندكم عل وعسى توصل كلمتنا لذوي الكلمه والقرار ..


رساله لوزاره التربيه ..


كلام تكلمنا فيه نحن اولياااء الاموور امس في بيت القرين انا وبعض النساااء عن الرحلااات المدرسيه ..

استغربنا ليش مدارس عيالنا ما تقوم برحلات لبيت القرين ؟؟

ليش اغلب اليهال اللى كانو هنااك مو عارفين شسالفه ؟

شنو هذا ليش شكل البيت جذى شصااااير ؟؟

ليش هالصور المعلقه من هم الشهداااء

ليش وزاره التربيه بس فالحه تاخذ اليهال حق حديقة الحيوان ومصانع شويخ وشركة كي دي دي ؟؟ شنو بيستفيدون ؟


ليش ما تقوم وزاره التربيه بعمل رحلااات لبيت القرين


نبي عيالنا تفهم شنو اللى صار

نبي عيالنا يعرفون انه يوم من الاياام هالديره اللى عايشين فيها بأمن وامان اغتصبت من جااار

نبي عيالنا يعرفوون انه في يوم وليله راحت الكويت

نبي عيالنا تعرف الاحدااث اللى صارت قبل 21 سنه

نبي عيالنا يعرفوون منو اللى فداا الكويت بدمه عشان اهم يعيشوون بأمان بالديره ؟


نبيهم يعرفوون المعاناااه اللى عانيناها بالغزووو العراقي الغاشم علي ديرتنا . .


انا ما ابي منكم ردود يا بنات .. ولا بطالبكم بالرد لكن اطااالب لكل كويتيه وفيه لهذى البلد

لكل ام كويتيه تحس انه كلامي سليم ترفع الموضووع سواء بمشاركه وزياده معلومات

او بـتأييد كلامي ..


نبي رحلاااااااااااااااااات لبيت القرين حق عيالنا .....

وعسى الله يحفظنا ويحفظكم يا بنات الكويت ويجعلنا دائما وابدا علي قلب واااحد

ويبعد عنااا الفتن واصاحبها .. ونعيش تحت ظل الكويت ..




وكل وحده بتنقل الموووضوع .. محللله لي يوم الدين ...



وهذى بعض الصور اللى صورتها من ملمحه القرين في تاريخ 24-02 2012

 

[xxx]

روعه الموضوع

يعطيج العافية

والله يرحمهم

تم التثبيت ...

 

[ام كوثر2007]

شكرا لج اختي بنت الكويت علي مرورج اولا وعلي التثبيت ثانيااا

ما قصرتي .. وبأنتظااار مشاركه خواتنا ..

 

[ام كوثر2007]

up up up

 

[نونو العصله]

يعطيج العافيه
ومبروك التثبيت

الله يرحم شهداء الكويت ويسكنهم فسيح جناته
اانا ولا مره رحت وودي اروح
بس ازور الكويت ان شاء الله بروح
الله يحفظ الكويت و شيوخها وشعبها بكل مذاهبهم و اصولهم

 

[fatma j]

يعطيج العافيه
على الموضوع

الله يرحم شهدائنا

 

[متحديه ومتاكده]

الله يرحم الشهداء

ويحفظ ديرتنا يارب

يعطيج العافيه حبيبتي ..



Up

Up

Up


سبحان الله وبحمده

سبحان الله العظيم

 

[ام كوثر2007]

اللهم امين ....


يعطيكم العافيه علي المرور الطيب ما قصرتوا .

 

[english muffin]

تدرين اختي
انا بحرينية وعندي رفيجة كويتية ودكتوووورة !!!
ذاك اليوم تسأل عن بيت القرين
قلت لها من صجج ؟؟؟
انا بحرينية وكان عمري سنتين حزة الغزو
واعررررف واقعة بيت القرين وكلشي صار فيه شلون انتي ماتعرفين
استغربت الصراحة
المفروض هذا يكون شي يندرس في المنهج المدرسي

 

[ام كوثر2007]

تدرين اختي
انا بحرينية وعندي رفيجة كويتية ودكتوووورة !!!
ذاك اليوم تسأل عن بيت القرين
قلت لها من صجج ؟؟؟
انا بحرينية وكان عمري سنتين حزة الغزو
واعررررف واقعة بيت القرين وكلشي صار فيه شلون انتي ماتعرفين
استغربت الصراحة
المفروض هذا يكون شي يندرس في المنهج المدرسي

اول شي حياج الله بمووضوعي ويا هلا فيج واشكر مشاركتج ..

لا تستغربين لاني عقب اللى شفته ذاك اليوم في بيت القرين شفت نماين رفيجتج وايد

واغلبهم جيل التسعينات واخر الثمانينات .. وطبعا اطفالنا اللى بعمر الزهور ما يدرون لولا احنا الاهالي كنا شارحين لهم اللى حصل قبل


وبعض الاهالي مع الاسف ما تقعد مع عيالها ولا توعيهم علي اللى حصل لا تقولون يهال وما يفهموون انا اصغر عيالي بعمر خمس سنوات عارفين شسالفه .. ودايم اسولف لهم عن الغزو واللى حصل ..


فعلا اتمني تدرس بالمناهج .. والرحلات بتكون شرح كافي ووافي لهم بعد ..


شكرا لج مره ثانيه .​

 

[MY GLITTER]

حبيتي يعطيج العافيه عالموضوع و انا امايدتج 100%
عسى الله يحفظ ديرتنا

 

[^^yasmina^^]

ام كوثررررر
تبين اصدمج اكثرررر ؟!
قبل فترة دريت ان في ناجيين من بيت القرين
يو بيت القرين يوم اليمعه للمهرجان وما عبروووهم
وللاسف الاعلام ركززز علي النواب وقابلو النواب وهدووو ابطال القرين الناجين
اذكرلج اساميهم
سامي سيد هادي العلوي ابن شهيد القرين هادي العلوي
بالتويتر موجوود اهوه مستنكر الي صارر ان حاله حال الظيووف كان اشلوون قعد الاعلام يقابل النواب الي يو وهدوهم وعلي قولته طلعت بسرعه

الناجي الثاني
سامي البناي
انخش مع سامي بالكنكيه ولحسن حظهم الجندي العراقي كان شاب الولاعة بويهم بيشوف اذا في احد بالكنكيه ولا لا وما شافهم سبحان الله سبحان الله
*الجندي قال حق الثاني " مافي شي سيدي "

الناجي الثالث
حازم جابر كان منخش بالكنكيه ثانيه

الناجي الرابع
طلال هزاع
انأسرررر مع شهداء القرين ال ٨ او ال ٩ الباقي لكنهم نكرووو معرفتهم فيه شفتو اشلون واهمه في اشد محنتهم نكرو معرفتهم فيه وعلطول فكو اسره بعد التحقيق وياه

الناجي الخامس محمد كريم


*

 

[^^yasmina^^]

وايد ناس ما يدرون ان في ناجين حتي ريلي يسألني في ناجين ؟! يقولي توني ادري
وكانو ياييين تخيلي اتوقع وايد ناس نفسي بعد ٢١ سنه درو ان في ناجين

 

[ام كوثر2007]

والله يا قلبي يا ياسمينه احنا ما درينا انه في ناجين الا يوم رحنا بيت القرين وشفنا احفااد الشهدااء وعيالهم ..

وين الاعلام قبل عنهم ؟؟؟؟؟؟ ليش ما عرفنا انهم موجودين ؟


وواحد من الناجين تكلموا معاااه بنفس اليوم وشرح اللى حصل في بيت القرين ..


اما من ناحيه الاعلاام والتجمع كان للنواب والوزرااء اللى حضروا اقول معاج حق لانه هالشي شفته بعيني محد قالي


ان شاءالله يوصل صوتنا لكل شخص له كلمه بالديره هذى ..


من حق كل من دافع عن الكويت وفداااها بكل ما يملك اننا نذكره ونحي ذكرااه وهو عااايش مو بس اذا ماات

ونبي عيالنا تعرف هالشي بعد ...

اشكر مشاركتج اختي ياسمينا نورتيني .

 

[فوشيه كويتيه]

الله يحفظ آلكوويت

 

[خشف شمّر]

الله يرحمهم ويغفر لهم
ودام عزك ياوطن
مأيدتج بالفكرره

 

[ام كوثر2007]

اشكر كل اخت دخلت وردت ..

 

[ام كوثر2007]

اب اب اب .....

 

[ورع البدو]

بسم الله الرحمن الرحيم ..​

قال تعالى : ​

(" ولا تحسبن الذين قتلوا في سبيل الله امواتا بل احياء عند ربهم يرزقون ")​

صدق الله العظيم ​

قصه [URL="http://www.bntnjd.com/vb/t18476.html"]شهداء القرين صارت في 24 فبراير 1991 عند بدايه تحرير الكويت ..​

والقرين هي منطقة بالكويت .. وشاءت الظروف إن يكون اسم القرين ​

لـ ملحمه صارت في منطقه القرين بين المقاومه الكويتيه ( قوات المسيله )​

وبين القوات العراقيه ..​

وفي بيت من بيوت القرين تمركزوا شباب مقاومه المسيله و صارت معركه كبيره ​

بين المقاومه و القوات العراقيه و استخدمت القوات العراقيه كافه الوسائل ​

وأاسلحه لـ هدم البيت واستشهد أكثر شباب المقاومه ..​

وتكريم حق هذه الموقعه الخالده .. أمر صاحب السمو الشيخ جابر الأحمد الصباح رحمه الله​

بأن يكون بيت القرين متحف وطني و شاهد حي على أفعال العراقيين بالكويت ​

وكان رمز للحريه الكويتيه ورفض هذا الاعتداء ..​

(.. أسماء بعض الشهداء في واقعه القرين ..)​

الشهيد - بدر ناصر عبدالله العيدان ..​

العمر : 30 سنة .. الوظيفه : عريف بالسجن المركزي ..​

مكان الوفاة : بيت القرين ..​

الشهيد - حسين علي غلوم رضا ..​

العمر : 20 سنة .. الوظيفه : عريف في وزارة الداخلية ​

مكان الوفاة : بيت القرين ..​

الشهيد - محمد عثمان علي الشايع ..​

العمر : 30 سنة .. الوظيفه : عسكري في خفر السواحل ..​

مكان الوفاة : بيت القرين ..​

" .. مـعـلـومـات .. وأحـداث .. وصـور .. "​

شـهـداء مـجـمـوعـة الـمـسـيـلـه​

الـنـاجـون مـن الـمـعـركـه .. :​

1 - محمد يوسف كريم ..​

2 - سامي سيد هادي علوي ..​

3 - جمال البناي ..​

4 - طلال سلطان الهزاع ..​

5 - حازم جابر صالح ..​

الـذيـن خـرجـوا مـن الـبـيـت قـبـل الـمـعـركـه بـدقـائـق .. :​

1 - مشعل المطيري ..​

2 - أحمد جابر صالح ..​

3 - بدر السويدان ..​

بـعـض الأحـداث .. :​

مجموعة المسيلة أخذت ثلاث بيوت في منطقة القرين وإتخذتها مركز للمقاومه .. ​

الآن تم تحويل أحد هذه المنازل لـ إدارة المتحف و مسموح فقط لكبار الزوار بزيارته !!​

والآخر تم وضع بعض البقايا و الآثار من تلك المعركة كالرشاشات و الرصاص والقذائف ​

مع بعض المستندات الخاصة به وبطاقات تعريفية بالشهداء ..​

أما البيت الثالث فهو البيت المسموح بزيارته .. وترى آثار الدمار والدماء ​

وأماكن استشهاد بعض أفراد المجموعة ..​

أول طلقه اطلقت في المعركه من " محمد يوسف "​

في الساعه 8 من صباح 24 فبراير ..​

رفع العلم الكويتي في الساعه 10,30 صباح 24 فبراير​

وكان أول علم يرفع قبل التحرير ..​

" عامر فرج العنزي " أول شهيد في المجموعه ​

وقد استشهد بقذيفة آر بي جي في الساعه 11,30 ظهر 24 فبراير ..​

كانت آخر أماني الشهيد " جاسم محمد علي " قبل استشهاده ​

رؤية ابنائه وقد أنجبت زوجته توأمين ولد وبنت بعد استشهاده بيوم واحد فقط ..​

اللهم إرحم شهدائنا ..​

وشهداء المسلمين ياااارب العالمين ..​

كانت آخر أماني الشهيد " جاسم محمد علي " قبل استشهاده ​

رؤية ابنائه وقد أنجبت زوجته توأمين ولد وبنت بعد استشهاده بيوم واحد فقط ​

لا حول ولا قوه الا بالله ​

سبحان الله رزق بولد وبنت بعد استشهاده ....
حتى لا ننسى مافعله العراقيين بنا​

منقووووووول للفائده << اسمحيلي أم كوثر على هالإضافه :eh_s(22): خخخخ << شوف الذكاء حاطه الاضافه بعدين تقول اسمحيلي

موضوعج روووعه يا عمري الله يعطيج العافيه :eh_s(8):

 

[ام كوثر2007]

حبيبتي كثر الله خيرج علي هالاضااافه الاكثر من روعه

الموضوووع لكم وانتو اصاااحبه واضافتج هذى زادت المووضووع روح


اثريتينا بالمعلومات وصور الشهداء رحمة الله عليهم جميعا ..


ورع البدوووو .. نورتيني يا قلبي ..