بنتي بلغت ... وان شاء الله بتتحجب ( موضوع للنقاش )

[مفرفشة ومنعنشة]

السلام عليكم ورحمة الله وبركاته

شلونكم بنات :eh_s(7):

اليوم حبيت افتح موضوع ونتناقش فيه وهو
:eh_s(17): حجاب البنات :eh_s(17):

طبعا هالموضوع لكل البنات
وللامهات الي عندهم بنات بسن بلوغ بشكل خاص

انا بنتي الله يحفظها ويصلحها بلغت وعمرها 11 سنه

وان شاء الله ناوية اني احجبها
وطبعا هالشي من يوم اهي صغيرة وانا اقوله لها
انها اذا كبرت بتتحجب
بس الحين صارت الصجية ... والبنت بلغت :eh_s(7):

بنات منو عندها بنت بلغت وحجبتها ؟؟؟
وشنو ردت فعل بنتج ؟؟؟

طبعا هالموضوع مو عشان نتناقش بفرضية الحجاب لانه امر مفروغ منه

الموضوع عشان نتناقش بردة فعل بناتنا لما تحجبوا او قبل لا يتحجبون
احساسنا احنا كأمهات
ردة فعل الناس الي حولج على حجاب بنتج وهي صغيره

:eh_s(17)::eh_s(17)::eh_s(17)::eh_s(17)::eh_s(17):

 

[برونزية الكويت]

حبيبتي انا معاج بس اول شي كلميها وفهميها عشان تقتنع انا معاج انه فرض ولابد منه بس حلو لما تتناقشين معاها لانه صغيره 11 سنه وتنصحينها ترى صدقيني ما ايي شي بالقصب انا عندي قناعه بالمسايس والنقاش تحب الحجاب اما كلام الناس ما لج شغل فيهم الناس مو مخليه احد بحاله ..حببي البنت بالحجاب وادري هذا مو موضوعنا بس لانه عندي ولد والله للحين ما رزقني ببنت والله يخلي لج بنيتج ويكبر حظها

 

[منو انت]

ياحياتي الله يصلحها


اهم شي تتحجب عن قناعه وهالشي يبيله وقت بالبدايه خل تتعود على اللبس الطويل وتالي تلبس الحجاب

انا مااحب الامهات اللي بنتها تلبس قصير وشورت وبين يوم وليله تتحجب

حلو الشي يجي حبه حبه علشان البنت نفسها ماتنصدم بالتغيير

 

[مفرفشة ومنعنشة]

الله يصلح بناتنا وبنات المسلمين


بنات نبي تجاربكم مع بناتكم الله يحفظهم

 

[noorq8]

انا عن نفسي اترك لهم الحريه لين تجي من نفسها تقول بتحجب والحمد لله تحجبوا حجاب شرعي مو مصرصر وصبغ اظافر ومكياج وعطر يشمونه بكيلومتر وراها ولا سنام بعير على راسها اللهم لك الحمد
وبالمقابل شفت حالات الام وابو فرضوا الحجاب فرض عالبنت لكن تعالوا شوفوا اللبس جنها ممهده يمكن لو تعطس ينشق

 

[المرتاحة]

انا أشوف حب الحجاب ما يطلع جذي بيوم و ليلة هالشي يبدأ من التأسيس بالصغر


حبيبتي علشان تحببين البنت بالحجاب وماترفضة اذا صارت الصجية مثل ما تقولين هالشي يبدأ وهي صغيرونه يعني مثلا تلبسينها الحجاب الكامل وقت تعليمج لها الصلاة ،وقت روحتج للعمرة مثلاً وحتي في البيت احيانا البس بنات اخوي او بنت اختي الحجاب واصورها وأنشر صورها علي الأهل وايد يستانسون عليها

وشرحي لها بصورة مبسطة عن اخلاق الصحابيات واشلون كانوا ملتزمين بالحجاب مع ذكر مواقف الصحابيات البطولية


ترا اشوي اشوي بتحب الحجاب


وماشا الله بنات اخوي لبسوا الحجاب من نفسهم وقبل البلوغ وهم أعمارهم حوالي ٨ سنوات


وصج بتلاقين من اهلكم ناس راح تعاتبج ردي عليهم و يا حبذا البنت تسمع قولي لهم بنتي قدوتها الصحابيات الجليلات البطلات مو فلانه و علانه بنتي سمعت كلام ربها و طاعته وماراح تسمع كلام احد ثاني غير ربها.


وبعد سوي لها احتفال بمناسبة حجابها ورزيها بين اهلكم

 

[اميره1980]

احنا بعايلتنا لازم البنت تتحجب من عمرها 8 او 9 سنوات يعني اصغر من بنتج الله يحفظها
عاد كل بناتنا بروحهم يحنون نبي نتحجب و نكون محببينهم بالحجاب من صغرهم
الحين بعد هابين بفنتق يسوون حفلة حجاب للبنت اللي توها متحجبة و المعازيم يجيبون لها هدايا بمناسبة حجابها

 

[Patcholli]

دور الام انها تحبب بنتها بالحجاب من صغرها وتكلمها وتشرحلها عن مكانته الحجاب بالاسلام طبعا بطريقه تستوعبها وتفهمها وتحببيها فيه .. عشان لنا توصل لسن الحجاب تكون البنت ناطره انها تتحجب بلهفه الحمدلله بناات عايلتنا من نفسهم ينطرون وقت الحجاب ويستانسون لما يتحجبون يحسون انهم صارو كبار واحنا انسويلهم نفس تكريم للحجاب وانيبلهم هدايا عشان اهي تستانس وبنفس الوقت غيرها يتشجع

 

[أم حيدر]

احنا بعد عندنا البنت تتحجب على عمر 9 سنين

ونسويلها حفل تكليف بسيط نحسسها فيه ان الشي اللي سوته له مكانه كبيرة عند الله أولا وعند الناس واهلها .. طبعا حب الستر والعفة البنت تتشربه من امها بالدرجة الاولى بحيث انها من اول ما تفتح عينها على امها تشوفها مستورة وحجابها صحيح وبعيدة عن التبرج ،، طبيعة البنت تحب تقلد امها بكل شي .. فبتكون الفكرة سهلة التطبيق عليها لما بتتحجب ، واهم شي تكون فاهمه الغاية والسبب من ورا الحجاب عشان تعرف ان هي مميزة ومكرمة من رب العالمين ،، وحرصي على لبسها من البداية ان يكون محتشم عشان تميز بأن الحجاب مو بس قطعه وتنحط على الراس ،،، الله يستر عليها ويبلغج فيها يا رب

عفية

 

[Mrs Al-Nasser]

احنا عندنا البنت من تصير ٩ سنين يكون واجب عليها الحجاب
وطبعا اهيا من قبلها تعرف هالشي ونمهد لها الموضوع من قبل وايد وانها كبرت وكيت وكيت
ومن قبل لاتصير ٩ طبعا تبدي تلبس لبس ساتر وطويل وابدا ماتلبس لبس مفصخ
عشان شوي شوي تتعلم

وبالعكس بناتنا يحنون عالحجاب ويبونه من قبل لايصيرون ٩
على بو ان يبون يحسسون نفسهم انهم كبار

وهم نسوي لهم حفلة تكليف بمناسبة الحجاب والناس اييبون لهم هدايا وجذي
كتشجيع لهم

الحمدلله بعايلتنا ما مرت علينا وحده من البنات ماكانت راضيه انها تلبسه او شي جذي
بالعكس كلهم يحنون ويبونه

 

[روحين في رـوح]

بمـآآ آنــي صبيهـ رح احكـي ::

انا بس بلغت اهلي حكولي تحجبي انا ترددت بالاول بس قالولي جربيهـ سنهـ رؤحي فيه ع المدرسهـ وبالفعل كنت البسه وارؤح فيه ع المدرسهـ وبس نطلع انا والاهل ماكنت البسه
بس كمان حسيت انه في اشي ناقصني بس كنت اطلع من البيت من دون حجاب
والحمدلله تحجبت بعدين وعادي ضربت صحبه انا والحجاب خخخخ


انتي قولي لبنتج يما انتي بلغتي وابيج تتحجبين شتريلها حجابات وخليها تجربهن تلبسهن بالبيت تشوف نفسها فيه تلبسهم بطريقه حلووهـ اكيد رح يطلع حلووو






وتح ـيـآآتي آلكـ :^^

 

[Omali835]

الله يخليها لج ياربً وتشوفينها عروووس أنا رفيجتي مشاللهً عليها سوت حفلة تكليف حق بنتها

 

[كويتيهة]

توني ع الامومه بعدي صغنونه :$
بس برايي الام ملزومه من تفطن بنتها و تفهم الصح من الخطأ انها توضح لها ان الحجاب
ستر وان لازم البنت تتحجب ومن هالكلام بس بصوره حلوه ترغيب مو ترهيب

الله يستر على بناتنا

 

[أميرة-]

زين تسوين مشالله عليج

حلو الأم تحبب بنتها بالستر من صغرها

ومثل ما قالوا البنات بالتدريج شوي شوي عشان البنت تتحجب عن قناعة

 

[@ام يوسف@]

الف مبروك الحجاب

 

[مفرفشة ومنعنشة]

هالزمن فيه وايد فتن - الله يكافينا الشر
فالام لازم تعلم بنتها وتعودها وتنصحهمن الصغر ان الحجاب فرض

الله يستر على بناتنا وبنات المسلمين

 

[مذهلة 78]

شوفي حبيبتي انا عندي بنتين كبار يبتهم ورى بعض بس بينهم فتره الحمال

الثانيه بلغت والكبيره لاء وانا كنت دايما اقولهم انشالله بتتحجون والحجاب عليكم

وايد حلو وكنت احجبهم بالبيت واخذ لهم لقطات وجذي واول ما دشوا المتوسطه وحده دشت 7 والثانيه 6 وديتهم السوق وشريتلهم ملابس وحجابات من فولار وجناط كروس من كارولينا هيريرا هديه الحجاب هني استانسوا وااايد بعدها بلغت
بنتي الثانيه والكبيره للحين والحمدلله صارلهم سنتين من تحجبوا

ودامج قايله حق بنتج انها بتتحجب ومفهمتها من قبل يعني ما راح تواجهين صعوبه حجبيها الحين لانها صغيره وتسكع كلامج وتقدرين تسيطرين عليها بس اذا دشت بس المراهقه ماراح تقدرين عليها

 

[I'm who I'm]

الله يهدي بنات المسلمين والله مافيه أحلا من الستر

 

[بحرانيـه]

الحجاب تعويد يعني انا تحجبت 9 سنوات بس ماكنت ملتزمة بالحجاب اقطه وافصخه وشوي شوي تحجبت وعمري 12 او 13 سنة

 

[بطوووطة$بيضة]

انا بتحجى عن نفسي

انا اهلي حجبوني غصب علي

وانا بكون صريحة وانا عارفه هالشي

انا حجابي موعدل

وانا ماني مرتاحه كلش

لان المتحجبة لازم تلس الحجاب الشرعي

وانا مو مرتاحه لاني مولابسته صح

ولا اني قادرة اتقبله

وامي الله يسامحها مرة كنت طالعه معاها وشافت وحدة عيوز بس متشببه وسفور .....جان اتقولي انتي باجر ليما تكبرين راح اتصيرين نفسها!!!!

والمفروض ماتقولي هالكلام